٨ أسرار لتصوير احترافي

السلام عليكم ورحمة الله وبركاته

🌿

 هذي رابع تدوينة في تحدي ( تدوينة يومياً لمدة اسبوع )

1  .  2  .  3  .  4  .  5  .  6  .  7

وأخيرا بأكتب هالموضوع اللي طُلب مني كثير كثير كثير ، ومجرد طلبكم اني أدون دروس في التصوير أعتبره شهادة أعتز فيها..

ما أذكر متى بدأت بحب التصوير ، اللي أذكره أن الشغف بالتوثيق كان دائما موجود..

أحلى هديه تلقيتها وقت ما كنت في أولى متوسط كانت كاميرا فيديو باناسونيك أهدتها لي خالتي العزيزة جواهر.. امتلكت بعدها عدة كاميرات لكن هذيك الكاميرا فرحتها كانت غير لأني كنت صغيرة ومو بعمر اني أمتلك كاميرا محترمة..

 بالرغم من توفر الكاميرات كنت مبتدئة في التصوير لفترة طويله بسبب اني مااستطعت أفهم كيف أستخدم إعدادات الكاميرا ، كنت احاول اقرأ الدروس بس كلها معقده بالنسبة لي وطلاسم مايفهمها الا المصورين..

لكن مع التدريب والممارسة وبعض الكتب، بديت أتطور وأفهم لغة المصورين..

والآن أحب أدون عن ما اكتسبته وأفيدكم بأهم العوامل لتكوين لقطة جميلة بأبسط طريقة ممكنة ..

٨ أسرار لتصوير احترافي

أولا

السؤال الشهير : تصويرك جميل وش نوع الكاميرا ؟

جمال الصورة مو بسبب نوع الكاميرا ، كثيير من الأسئلة الي تجيني عن نوع كاميرتي أكون في الواقع مستخدمه فيها الجوال ايفون ٤-٥-٦

مراعاة العوامل الأساسية للتصوير هو اللي ينقل الصورة من عادية إلى احترافية وليس الكاميرا أبدا ..

ما أنكر روعة الالتقاط بالكاميرا الاحترافية ، لكن شخص يجهل العناصر اللي تصنع الصورة الجميلة ماراح تقدر الكاميرا الإحترافية أنها تصنعها عنه ..

بل على العكس ، الكاميرا الإحترافية تعطي نتائج أسوأ من الجوال إذا كان المستخدم جاهل بالتصوير لأن الجوال والكاميرات البسيطة مصممة على التعديل التلقائي ، تعدل كل شيء بنفسها بينما الكاميرا الاحترافية تحتاج ضبط يدوي..

فمايحتاج ننفق آلاف مؤلفة على الأدوات حتى نكون محترفين، تماما مثل الرسم ، المهارة عند الرسام وليست عند القلم..

لكن إجابةً على السؤال : صور المدونة بكاميرا Canon 60D وصور الانستغرام اليومية بجوال أيفون ٦ بلس

🌿📷

حتى نحصل على أفضل لقطة يجب مراعاة عدة جوانب .. ولكن قبل أن ذكرها أفضل أن ألفت انتباهكم لنقطة مهمة وهي أن لكل قاعدة شواذ ..

أحياناً القواعد والأساسيات الخاصة بالمبتدئين تكون مختلفة عن مايفعله المحترفين، لأن المحترف وصل لمرحلة يمكنه كسر كثير من القوانين والإبداع بالرغم من ذلك ،

أما المبتدئ فيحتاج أن يتبع خطوات بسيطة وثابته تحسن من أداءه بشكل ممتاز وتضع له قدمه في بداية الطريق ،

ففي هذي التدوينة إذا قلت أن هذا صحيح وهذا خطأ لا يعني أبدا أن الفكرة مرفوضة بالكلية في مجال التصوير، بل أن ارتكابها أو عدمه قد يصعب مهمة الخروج بلقطة جميلة لشخص مبتدئ..

وسأذكر في هذي التدوينة بإذن الله نقاط بعضها أساسي وبعضها مساعد للخروج بلقطات جميلة

🌿

١-الإضاءة

وهي أهم نقطة في التصوير كله.. (قد تبدو معقدة ولكنها معادلة سهلة)

موضوع الإضاءة يحتاج تجارب كثيرة لحد ما الواحد يستوعب الفكرة ويعرف الأماكن والأوقات المناسبة للتصوير في المحيط الي ساكن فيه..

أفضل إضاءة للتصوير هي إضاءة الشمس الطبيعية (غير المباشرة)

حتى داخل البيت نختار غرفة إضاءتها عالية خلال اليوم ،

ومانصور في المنطقة اللي تضربها أشعة الشمس مباشرة نختار مكان قريب منها ، إلا في حالة رغبتنا في إظهار بقعة الشمس نفسها أحيانا يكون شكلها مخطط أو مربعات وتعطي تأثير جميل مثل هالصورة

٨ أسرار لتصوير احترافي

ولكن بشكل عام الأشعة المباشرة غير جيدة للتصوير لأنها تجعل للأشياء ظل والظل يفسد الصورة إذا ماكان مدروس بطريقة صحيحة..

إذا التصوير خارجي يفضل يكون بعد الشروق بقليل او نهاية العصر بحيث مايكون للأشياء ظل قوي لكن المكان يكون فيه إضاءة عاليه..

ايضا هذي الفتره هي الفترة الذهبية لتصوير الحيوانات و الاشخاص لأن خصلات الشعر بتكون ذهبيه من الشمس بدون ماتأثر على ملامح الشخص وتترك ظل تحت عينيه.

الإضاءة تأثر على جودة الصورة وعلى ألوانها وأبعادها ،

لذلك أنا نادرا جداً أصور في المساء، لأن التصوير في المساء يخرج صور غير صافيه وغير قابله للتعديل..

معلومة أعمق بالنسبة للضوء والكاميرات :

قلة الإضاءة تتسبب أن الكاميرا ترفع معدل الأيزو (حساس الضوء) تلقائيا حتى تقدر تلتقط الصورة بشكل واضح وبالتالي تظهر حبوب في الصورة وهو مايسمى عند المصورين (نويز). 

القاعدة الخاصة لإضاءة الكاميرات الاحترافية: كل ما قل الرقم في الأيزو كل ما قلت إضاءة الصورة وقلت الحبوب وزادت الجودة..

المطلوب : اخفضوا رقم الايزو .. اذا أظلمت الصورة ارفعوا الاضاءة عن طريق تقليل سرعة الغالق

صورة توضيحية :

٨ أسرار لتصوير احترافي

كيف أقلل سرعة الغالق وماهو الغالق أصلاً ؟

سرعة الغالق ببساطة هي سرعة انفتاح وانغلاق العدسة حتى تلتقط اللقطة .. وكلما اسرعت كلما قل الضوء المتسلل لداخل الكاميرا (يعني مايمدي الضوء يلحق) وكلما قلت السرعه كلما زادت الإضاءة ..

ولكن تقليل السرعة يتسبب في ان الصورة تكون مهتزة لأنها تاخذ وقت في الالتقاط وحركة اليد تأثر عليها.. والحل؟؟

حامل الكاميرا هو الحل في حالة الإضاءة المنخفضة..

الخلاصة ( ايزو منخفض + سرعة غالق بطيئة + حامل الكاميرا = صورة صافية ليلا أو نهارا)

🌿

٢-خلفية جميلة

كل مصور يحتاج لو زاوية وحدة في البيت يخليها مثالية للتصوير،

كثير فاهمين ان الي عايشين في الخارج أو في بلدان طبيعية يصورون بشكل اجمل فقط لأن فيه طبيعة تساعد،

هذا صحيح من ناحية تصوير الجبال والأنهار والشوارع ..

لكن الحقيقة أن التصوير (المنزلي) من طبخات وأثاث ونباتات وأطفال وكل شيء آخر غير الطبيعة، يقدر الشخص يتحكم فيه على مزاجة بدون مايحكمه الجو..

المصور يحدد ايش يشوفون الناس في صوره وأي انطباع أو شعور تمنحهم الصورة ..

على سبيل المثال هذي الصورة :

التقطتها في الرياض

٨ أسرار لتصوير احترافي

الخلفية حديقة المنزل ..

وهذي الصورة ملتقطة في أمريكا،

٨ أسرار لتصوير احترافي

كل الصورتين للفطور يشتركون في عامل الخلفية الطبيعية برغم اختلاف البلد وطبيعته

في امريكا مع انها بلد طبيعة ، كنت ساكنة في شقة وماكنت محظوظة بمطل جميل أو حديقة منزلية ..

كان مطل بلكونتي اسطح القراجات للسيارات الخاصة بأصحاب المجمع،

منظر أبيض غير جذاب مثل حال الكثير من الإطلالات في البلدان الصحراوية، فماكان مناسب للتصوير أبدا..

لكن الإضاءة كانت مثالية اني انصب في المكان خلفيتي التصويريه ،

كل الي جبته مجموعة نباتات و لوح خشبي مربعات حق الحدائق،

وعند التصوير بالإعدادات المناسبة يصير المنظر جميل مع أن الخلفية ماتتجاوز مترين في مترين.

تكلمت عن بلكونتي وتعديلاتها في هذي التدوينة

٨ أسرار لتصوير احترافي

هذي الزاوية الصغيرة يمكن نصبها بسهوله في أغلب البيوت ، ولا تستهينوا بالسطح إن كان ماعندكم حديقة أو بلكونة ، السطح مكان مثالي لنصب خلفية تصويرية صغيرة..

ولو ماكان فيه أي مجال لمكان خارجي ،

ممكن التعويض بمكان داخلي و نباتات منزلية ، مجرد نبته وحده ممكن تحول الخلفية لخلفية مشرقة وتملأها حيوية ، مثل هالصورة

٨ أسرار لتصوير احترافي

طبعا النباتات والطبيعة أحد أنواع الخلفيات ، وممكن تقيسونها على أي نمط حابينه، ما أقصد حصر الخلفيات بالطبيعة ..

ممكن مثلا تكون الخلفية غرفة أو مكتب أو غيرها أو أنوار صغيرة.. المهم يكون عندنا مكان مناسب دائما أنه يكون خلفية جميلة لصورنا بما يتناسب مع الموضوعات اللي نميل لتصويرها

🌿

٣-ترتيب عناصر الصورة

هذي تحتاج شوية ذوق وتصور لكيف بتكون الاشكال في الكاميرا وتكتسبون هذي المهارة مع كثرة التصوير بإذن الله ..

أولا ، نحرص ماتكون الاشياء زحمة، في نفس الوقت مايكون الموضوع صلعة يعني حلو يكون فيه عناصر تدعم الموضوع ماتزاحمه وتشتت الشخص اللي يشوف الصورة،

ضروري اي شخص يشوف صورتك يعرف انت بالضبط تصور ايش ؟

على سبيل المثال موضوع الصورة هو (كتاب)

مثال لصورة غير ناجحة :

٨ أسرار لتصوير احترافي

مشكلتها ماندري المصور يبينا نشوف ايش بالضبط؟ الوردة والا الكتاب؟ والا الشمعة؟ وش الموضوع بالضبط وش يحاول يقول من خلالها؟

ماندري ، الشعور مايصل من المصور للمشاهد بل يجعل المشاهد يجزم ان المصور راح وجمع كم غرض وحطهم جنب بعض بهدف التصوير لا أكثر ولا أقل ، وهذا خلل كبير ..

مثال لصورة ناجحة :

٨ أسرار لتصوير احترافي

هذي مثلا فيها الكتاب لكن محفوف بعناصر تدعم شعور القراءة ، نظارات ، وكوب قهوه .. هنا الشعور وصل جلسة هادئة مع كتاب ..

فالعناصر مو فقط لملء المكان وإنما لدعم الهدف من الصورة..

🌿

٤-الانسجام

شوفوا هذي الصورة 

٨ أسرار لتصوير احترافي

برغم من الوضوح والجمال في العناصر إلا انها ماتشهي لأكل الآيسكريم، لأنه في عز البرد وبرا البيت ، صحيح الصورة جميلة ، لكن الايسكريم ماوصل تأثيره للدرجة اللي تخلينا نتمنى نذوقه..

بينما هنا الصورة رغم بساطتها وبساطة شكل الكاسات ، تخليني ودي أدخل في الصورة وأعيش الجو لأنه متناسب .. مشروب بارد وجو حار ..

٨ أسرار لتصوير احترافي

وهكذا كل ما راعينا انسجام موضوع التصوير مع المحيط أو الخلفية التصويرية كل ما كان أثر الصورة أقوى..

🌿

٥- الزاوية 

أولا وأهم نقطة تجنب الميلان

في كل صورة فيه خط أفق وخط طول ،

لو بنصور أي صورة نتخيل انه فيه خط طويل في الوسط بالعرض وخط ثاني بالطول،

لو كان مايل بتكون الصورة تحتاج تعديل

نفس الشي لو بنصور باب أو شباك ، ضروري ننتبه هل الخط مستقيم سواء طوليا او عرضياً ، مايحتاج يكون مستقيم من كل الجهتين واحد منهم يكفي لخلق التوازن في الصورة..

الشي اللي ماينتبه له كثير من الناس إذا صوروا صورة ممكن يركزون على موضوع الصورة وماينتبهون للخلفية إذا هي مستقيمة أو لا ، وهذا يعطي فارق كبير في جودة الصورة

صورة توضيحية 

٨ أسرار لتصوير احترافي

الصورة اللي على اليمين أفضل لأن الخلفية مستقيمة بينما اليسار مايله ، مع ان الهدف من الصورة ما كان الخلفية ..

ممكن هذا الخطأ يتم تعديله بعد التصوير ، لكن الأفضل التركيز وقت الالتقاط لأن في بعض الحالات محاولة إعادة التوازن للصورة يفقدنا جزء منها

النقطة الثانية :

اذا كان موضع تركيز التصوير لكوب او صحن يفضل تكون الزاوية مرتفعة شوي حتى تبين الاشياء الي داخل الكوب او الصحن. بينما لو التركيز على الجو الي متواجده فيه العناصر فننزل الكاميرا شوي ونبعدها حتى تظهر الخلفية او المكان الي تمت التقاط الصورة فيه.

مثال :

في هذه الصورتين نجد عنصر مشترك وهو (فطور كورن فليكس)

 في هذه الصورة الهدف هو الفطور : وبالتالي نرفع الكاميرا حتى نستطيع رؤية الهدف

٨ أسرار لتصوير احترافي

وفي الصورة الثانية الهدف هو الجو أو ايصال رسالة بالحالة النفسية..

فما نحتاج نرفع الكاميرا بل نحتاج نبعدها قليلا حتى يدخل المحيط لأنه هو الهدف

٨ أسرار لتصوير احترافي

النقطة الثالثة:

اللي مهم تاخذونها في الاعتبار من ناحية زاوية التصوير:

وضع حدود خفيه مايتعداها موضوعك الي تصوره، بحيث مايكون موضوع الصورة طرفه لاصق في حد الصورة وكأن جزء منه مقطوع، الأفضل يكون الموضوع داخل الحدود  

وأيضا ماتكون العناصر كلها في طرف وباقي مربع الصورة فاضي

مثال على صورة جمعت بين الخطأين

٨ أسرار لتصوير احترافي

 في الصورة كل عنصر طرفة مقصوص ، النظارة والوردة والكتاب ، الاقتصاص أعطى شعور ان فيه شي ناقص والنظر لها غير مريح ..

ايضا كل العناصر مجتمعة في الزاوية وهذا غير جذاب ويفقد الصورة توازنها..

🌿

٦- ترتيب عناصر الصورة 

اذا الصوره ملتقطه من الاعلى وكان فيها بعض العناصر الهندسية، بيكون جميل لو توازت أطراف الصورة (الحدود) مع الاشكال أو توازت الأشكال مع بعضها، حتى يكون أرتب ولاتصير الصوره كلها خطوط في اتجاهات مختلفة..

مثل الحال في هذي الصور:

هنا الملعقة موازية للابتوب واللابتوب موازي لخطوط المنديل

 السبب : لأن التركيز نحتاجه يكون على الزبادي في المنتصف، ولو كان محيط الصورة غير منظم سيثير انتباه العقل لها وبالتالي يتشتت المشاهد للصورة.

٨ أسرار لتصوير احترافي

يعني حتى الأشياء البسيطة مثل الغرزات اللي على المنديل تحتاج انتباه وقت التصوير .. لا تخلون شي يدخل إطار صورتكم بدون ماتنتبهون لوجوده ..

وهنا مثال آخر ، المنديل و الكتاب والنظارة مهم يكونون متوازين مع خطوط الخلفية

 السبب : لأن العناصر كثيره في الصورة ولو ماكانت أغلب العناصر متوازية كان بيصبح شكل الصورة حوسه وزحمة ومشتته للنظر..

 ٨ أسرار لتصوير احترافي

وهنا عنصر التوازي غير ضروري ولكن جو الصورة وهدفها اعطاء شعور بالراحة والهدوء فما نخرب عليه بزوايا مايله ومثيره للانتباه 🙂

٨ أسرار لتصوير احترافي

الخلاصة : تخيلوا ان العقل اذا شاف الصوره يحلل كل جزئية فيها ويتجاهل الأجزاء المتشابهه، فإذا حبينا مانركز على بعض العناصر لأن وجودها مجرد ملء لبعض الفراغات فالتوازي هو مفتاحك لتحقيق هذا الهدف.

🌿

٧-التزييف

 يقول المصور سكوت كيلبي “لا تنتظر المطر ، زيفه”

يعني، انت اخلق الجو الي يحسس الاخرين انك فيه حتى لو ماكان موجود،

(نتكلم عن جو الصورة الاحترافية فقط وليس تزييف حياتك او التظاهر بشي لا تملكه) 

مثال ، اجواء الشتاء جميلة وأجمل شي لما يكون الجو فيه ثلج ، لكن بعض البلدان مايجيها سنو وثلج،

هالصورة صورتها على شباك غرفتي في الرياض ،

كنت حابه ألتقط صورة شتويه ، خليت اختي ترش بخاخ الثلج كان عندنا من بقايا أحد الحفلات، وأعجبتني النتيجة (الثلج من الصورة الحقيقية وليس اضافة بالفوتوشوب)..

٨ أسرار لتصوير احترافي

مثال آخر :

هذي الصورة أخذتها من مقطع فيديو للمصورة المبدعة سلوى هنيدي :

٨ أسرار لتصوير احترافي

باستخدام رشاش المويه على الشباك صار كأنه مطر ، الشعور بالجو فيها وصل 

هذا الي نسميه ابداع التكوين، استغلال اللحظات وخلقها مايبعدون عن بعض،

مثال آخر ، الورود أو أوراق الشجر اللي يكون عليها قطرات المطر أحيانا يصعب أن الإنسان يصورها وقت المطر بسبب الرياح أو انعدام الإضاءة بسبب الغيوم الداكنة،

بالرغم من أن شكلها جميل للعين وقت هطول المطر..

فبكل بساطة نرش بعض الماء على الشجر ونعيد إنتاج الجو اللي نحتاجه في الظروف الجوية اللي تناسبنا للتصوير ..

في النهايه المشاهد للصورة الاحترافية مايهمه الحقيقة وهل المصور استمتع بالمطر أو لا، المهم عنده الشعور والإحساس والذكريات اللي صورته نقلتها لروحه..

🌿

٨– تعديل الصورة:

بعد التقاط لقطة بأفضل إضاءة ممكنه وبأفضل زاوية وفكرة وتناسق ، يجي وقت الإخراج النهائي ..

 التعديل على الصور مهم جدا جدا جدا، بمثابة الملح للطعام..

برامج التعديل أشهرها وأفضلها الفوتوشوب، لكن سواء كنت تصور بكاميرا احترافية أو بكاميرا الجوال أي برنامج يسمح بتغيير التباين و التشبع و الحده و الإضاءة فهو يكفي للتعديل..

أول شيء ينقل الصورة من عادية إلى مشرقة وسعيدة هو رفع الإضاءة ، حتى ولو كانت الإضاءة مرتفعة من الأساس ، الرفع بالتعديل يضفي لمسة أجمل ..

مثال لصورة معدلة قبل وبعد :

٨ أسرار لتصوير احترافي ٨ أسرار لتصوير احترافي

الصورة على اليمين قبل التعديل واليسار بعد

بعد التعديل أعطت شعور خريفي مقرمش ، ألوان مشبعة وإضاءة أعلى وتفاصيل أوضح وأدق

كل هذا يدعم الشعور بالخريف في الصورة ويجعلها شبيهه بمواصفات ورقة الخريف الجافة

٨ أسرار لتصوير احترافي ٨ أسرار لتصوير احترافي

أيضا التعديل على هذي الصورة بزيادة الإضاءة ، أضفى عليها نقاء وبياض يتناسب مع بياض الثلج وأجواء الشتاء الباردة ..

التعديل موضوع جميل ويحتاج دروس مستقلة ليأخذ حقه

عندي معلومات وكلام كثير عن التصوير والخلفيات والتعديل وأفكار وحيل جميلة لكن ماتكفي تدوينة وحده

أحتاج سلسلة أو كتاب كامل حتى أقدر أقول كل اللي في خاطري ..

بإذن الله أخصص لها تدوينات في المستقبل ، كونوا بالقرب

وترقبوا تدوينة الغد

أتمنى لكم يوماً ملوناً

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

177 تعليق على "٨ أسرار لتصوير احترافي"

avatar
فرز بواسطة:   الأحدث | الأقدم | الأكثر تصويتاً
غدير
ضيف

مرررررره جمييل الموضوع وابدعتي 👌🏻👌🏻😩

بسمه🕊
ضيف

موضوع راااائع واستفدت منه كثيرر❤️❤️❤️
ماشاء الله أهنيك على هالإبداع والمدوونة المليئة بالأفكار الملهمة
من اروع المدونات🌹🌹اللي اتابعها
ننتظر موضوعك الجديد بشوق😍

ميعاد
ضيف

ما شاء الله ابدعتي بالسرد واختيار الموضوع ،شكلي بخلي التدوية مرجع لي ❤

نوف
ضيف

بطلة ما شاء الله 👍🏻👍🏻👍🏻👍🏻

دنيا حسن
ضيف

يعطيك العافيه موضوع جداا جميل وأكثر من رائع

Ruralhouse8mnol
ضيف

جميل جدا مرره استفدت الله يجزاكي خير

هَناء
ضيف

يعطيك العافيع ومره شكراً استفدت كثير ،استمري💗💗.

منيرة عادل
ضيف

معلومات جداً رائعة صراحة استفدت منها تسلم يمناك💜

فاطمه
ضيف

رااائع جدا استفدت
يخلي لنا ام تالا

وضحى الخالدي
ضيف

مُبدعه ،،مُلهمه
شرحك سلسل وبسيط يشجع على التطبيق والابداع

استمري وننتظر دائما ابداعاتك وتدويناتك

عهود
ضيف

مبدعه كعادتك ماشاء الله تبارك الله.. التصوير فن و هوايه جميله لمن يحسن استعمالها 👌💕

Fatima
ضيف

💗 واااااااااو ماشاء لله 💗
– انا اعشق التصوير لكن كاميرا الأيفون ما بترضيني ويمكن ما كنت اعرف استخدم الجو لخلق صورة حلوة متل ما حكيتي.
– كتير حبيت التدوينة و رح خليها مرجع استفيد منه عندما أرزق بكاميرا محترمه 😊 إن شاء الله
– 💗 شكرا لك 💗

Haneen Alhammad
ضيف

فعلا أضاء الشمس جدا تغييير بالتصوير ❤️❤️❤️
والعناصر اللي تكلمتي عنها مهمه جدا لازم تكون مرتبه وتعطي شعور بالرحه ✔️💜

ممُتنه جداً.💓

روان
ضيف

الله يسعدك.. نصائح بسيطة ومفيدة جدًا جدًا ❤️

Salma
ضيف

و اخيرًا 😍 كل شوية ادخل اشوف التدوينة دي نزلت و لا لأ ✌ كنت مستنياها
و كالعادة استفدت منها جدًا ❤

Muna Mohamad
ضيف

كنت محتاجه مثل هذي الدروس الجميله ونزلتيها في احسن وقت وقت الاجازه 💜💜💜
الله يسعدك ويوفقك مررره شكراً ع الدرس الاكثر من رائع 💘

Peony Rose
ضيف

ماشاء الله عليك يا أروى والله استفدت من هالتدوينة كثيييييو شكراً شكراً 💕💓🙆🏻💭🌸

ساره الغامدي
ضيف

شكرا اروى 💗💗

عتاب
ضيف

الموضوع مرررره حلو ومفيد
ابدعتي اروى
مشكورك على جهدك ووقتك

بيان الطلحي
ضيف

الله يسعدك عرفت اشيا لها اهمية في التصوير وانا كنت ساحبه عليها

سلوى هنيدي
ضيف

بصراحه اول مره ادخل المدونه حقتك يا اروى 😞 فاتني الكثير واضح انك تعبتي عليها الله يسعدك مثل ما اسعدتيني وامتعتينا بالصور الجميلة جدااااا كلها الوان مشرقه تفتح النفس وتحسسنا بجمال الاشياء الحمد لله على جميع النعم الي من حولنا وانتي احد هذه النعم الله لا يحرمنا منك يا جميلتنا المبدعه ❤️❤️❤️❤️ واشكرك من اعماق قلبي لانك ذكرتيني بالمدونه الرائعه 😘😢❤️🙏🏻

Seham
ضيف

حبييت التدوينة .. افدتيني جزاك الله خير ياجميله 💕

وفاء
ضيف

ماشاء الله عليكي صراحة،ذوق وابداع في كل شي، سبحان الله تابعت تدوينتك بالصدفه لما كنت حابه استفيد من تجربتك مع القطط وفعلا من يومها انبسطت بهذي الصدفه ﻻنها عرفتني بإنسانة مثلك💖.
كل التقدير لك وبالتوفيق

🎥💕.
ضيف

الله يا أروى استمتعت واندمجت بقوة💛💛💛
يوم وصلت (لكن ماتكفي تدوينة وحده..) ضاق صدري تكفين نبي سلسلة مستمره 😗
النزييف على اني أقرأ كثير عنه بس مستصعبته، بعد كلامك تحمست أطبقه حسيته بسيط ومايحتاج جهد عظيم
والايزو وسرعة الغالق هذي أزمتي، بس التصوير مع الممارسه والقراءة تنفك الأزمات
تحمست مره مره أقوم ألحين أطبق تدوينتك 📷💕
اللي أسلوبها بسيط وتفتح النفس

Ruba
ضيف
قريت كتب تصوير زمان ايام اول مابديت وماشاءالله عليك اسلوبك في السرد افضل وابسط منهم بكثير 💕 كنت ابي انوه عن شيء قلتيه عن وحدة من الصور انه كل شيء متجمع بزاوية والباقي فاضي ، هو الصورة غلط اللي فيها بس فيه قاعدة اسمها قاعدة التثليث او rule of thirds ، تقولك انه الصورة يكون لها جاذبية اكثر لما تكون بزاوية او بجهة معينة تشكل ثلث من الصورة تقريبا ، طبعا ما يعني ان الصور اللي ما تتبع هالقاعدة مو جميلة بس زي ماقلتي لكل قاعدة شواذ . اللي خلاني اقول كل هذا هو لانيالاحظ بصورك دايم انه تكوين الصورة… قراءة المزيد ..
ام فيصل
ضيف

كل مايخرج من القلب يصل الى القلب …وانتي قلب كبير …انتي مكسب لكل من عرفك سواء قريب او بعيد…اسألك بالله ياروى لو دخلتي الجنة افتكريني واطلبي من ربك يجعلني معك

lama
ضيف

استفدت كثير شكرا اروى

لميس
ضيف

مرحبا .. مدونه رائعه من انسانه اروع..

عندي كاميرا احترافيه وعدسات وفلاش وحامل ومع ذلك لم احترف التصوير بعد بالرغم من حبي للتصوير. ولكن اطلع بنتائج شبه مرضيه..

واذكرك نسيتي اهم عنصر. وهو حب الشخص الملتقط للصوره. للتصوير. اذا كان يحب التصوير راح يبدع. واذا ماكان يحبه ويلتقط الصور لمجرد الذكرى ماراح تضبط معه ..

بعد هذي التدوينه باطلع كاميرتي واحاول ابدع فيها 😊

بانتظار التدوينه القادمه

سلمت اناملك ❤️

Sara
ضيف

شكرا ًلك على المعلومات المفيده جزاك الله خير ، لكن تسمحين لي ان اقتبس بعض الافكار من حسابك واطبقها انا💓

بيان
ضيف

مااشاءالله موضوعع ججمييل واستفدت منه اشياء كنت اجهلها 💕🌷
شكرا لك
💌.

ثناء علي
ضيف

توقعت الاقي بعض المعلومات مكررة بما أني أحب أبحث وأقرأ عن التصوير مع اني ماأصور بغير الجوال لكن كل الموضوع جديد علي واستفدت من المعلومات جدا جميلة متحمسة أطبق هالأفكار وألاحظ الفرق.. شكرا أروى👍❤

A☘
ضيف

كنت مررره متحمسه لهذي التدوينه ، وجداً استمتعت بكل نقطه ذكرتيها وكل معلومه ، وحمستيني أبدع بصوري أكثر 💗😍
الله يعطيك العافيه يا أروى 🌷💕

Liberty_Blogger
ضيف

و انا من اكثر الناس اللي انتظروا هالتدوينه
و اكثر وحده يجذبني تصويرها و اعرف انها
اروى بدون ما اشوف الاسم (: متميزة دائماً
شكراً لك راح يكون مرجع مفيد لنا ..

أم عبدالعزيز
ضيف

الدرس جدا جميل واسميه انا خلاصة التصوير
جمعتي فيه معلومات مهمه واختصرتي فيه دروس طويله

انا جدآ سعيده اني وجدت حسابك وتابعتك
اعطيتيني طاقه ايجابيه للاستمرار وحب الحياه

الغربه بنسبه لي كانت هم و ألم وانتي اعطيتيني درس جميل في التأقلم وإستغلال المواهب والابداع أسأل الله العظيم أن يشرح صدرك ويسعدك مثل ما أسعدتي وافدتي من حولك ويجعل كل ما تقدميه في ميزان حسناتك

Bayan ❤️
ضيف

بططططلة التدوووينة مررره حبيتها ، ورحت كمان قريت تدوينة البلكونة حبيت التغيير كثير ، تمنيت انها ماتنتهي من كثر مااستمتعت فيها ، معلومات مفيدة الله يسعدك 💕

آلاء الطعيمي
ضيف

عجبتني هذه التدوينة ❤️😍

Rood
ضيف

ماشاءالله
تدوينه جميله ، أستفدت منها الكثير ✨
دُمتي بسلام ياجميلتي 🌸🍃.

منى العضياني
ضيف

الله يجزاك خير أروى
معلومات رائعه 😍 وأتوقع الابداع والموهبه لها دور
انتي فنانه ماشاء الله ❤️

ريم
ضيف

الله عليك يا أروى 👍🏻💕 احب شخصيتك
ولمساتك الي تجنن ونشوفها بكل شئ تسوينه
شكرا ع المدونات الجميله ..

شهد
ضيف

جزاك الله الجنة يا أروى💋💋🌹🌹❤️❤️

شهد
ضيف

شكرا اروى

Fatma
ضيف

الشرح مرا جميل وافي 😍👌🏻

تصويرك يجنن مشاء الله

شهد
ضيف

أروى أنا أحبك في الله وأعتبرك مثل أختي استفدت منك الكثير وصرت ما أستغني عن حسابك وعن مدونتك الرائعة أنتي انسانة جميلة ومحترمة ومتفائلة أسأل الله أن يجمعني بك في جنات النعيم … اروى حققي لي أمنيتي وردي علي ولو بكلمة ❤️

Raghad""
ضيف

ماشالله شي جميل ، الله يديكي العافيه اروى😍ونستنى باقي الموضوع💙💙

تهاني
ضيف

صراحه روووووووعه من زمان أتمنى أحد يعلمني عن التصوير الله يسعدك يارب ويرزقك ماتتمنين…

عضو

ما شاء الله تدوينه دسمه وغنية بالمعلومات والابداااع😍😍
خلاصة تجارب سنين تجمعت فيها💖
عجبني انك ركزتي فعلا على المهم،،
الاضاءة ثم الاضاءة ثم الاضاءة كل مالي اقتنع انها هي السر الأول👍
اذا عندك نوافذ كثيرة وكبيرة وشمس قوية فهذا انسب جو للتصوير😍👏
والباقي سهل تعلمه..

اروى الكلمات لاتكفي لشكرك😘 التدوينه كنز وبتصير مرجع مهم💖
احب اخلاصك في طرحك وحبك للإفادة الله يجعله في موازين حسناتك😍👍

ريم
ضيف

الله عليك يا أروى👍🏻💕 انا احب شخصيتك
ولمساتك الي أحس فيها بأي شئ تسوينه
سلمت يمينك على التدوينات الجميلة
اختك/ريم

ريم
ضيف

ماشاء الله تبارك الرحمن انا ما اتحمس كثير للتصوير عشان كذا فتحت التدوينه بحماس اقل من المعتاد
لكن استمتعت بها وادهشتني التفاصيل والتوضيحات اللي ما توقعتها
بصراحه ابدعتي اروى الله يحفظك ويزيدك من فضله 😍
ياليت التدوينه القادمه تكون الجزء الثاني وتكتبين فيها اللي ما قدرتي تكتبينه هنا ! تحمست مع اني ما لي في التصوير 😅

misk85
ضيف

ماشاء الله
آبدعتِ
ويعطيك العافيه ي جميلة ومتحمسسسه للتدوينة اليوم

جولزا
ضيف

رائعه يا اروى

استمتعت جداً و استفدت من النقاط اللي ذكرتيها وخاصة امية التوازي ما كنت انتبه لهذي النقطة بالتصوير ، اشكرك على التدوينه المميزه ، اسلوبك بالشرح واضح و مبدع .

في أمان الله

جولزا

ساره
ضيف

موضوع جميييل وحتما راح يكون مرجع لما اشتري كاميرا

وعد
ضيف

موضوع جداااا جميييل الله يسعد قلبك مرررره استفدت زاتمنى استفيد اكثر 😍😍💙💙💙💙💙💙

سمر
ضيف

جدا عجبتني التدوينه يعطيك العافيه ع المعلومات والأحساس وطريقة صياغة الموضوع بشكب سهل ووممتع للقارئ ومفيد ❤

الاء العمراني
ضيف

موضوع جداااا ممتع و مفيد تعلمت أشياء جديده للتصوير ما كنت ادري عنها 🍃💜💜💜 ربي يسعدك 🌷🌷.

عضو

الله يعطيكِ العافية يااروى على الموضوع .. باين تعبك ومجهودك فيه إنك لمتي أغلب نواحي ومشاكل التصوير

مشككككوره موضوع أكثر من رائع

عضو

جزاك الله خيرا على هذه التدوينة الجميلة . انا من محبي التصوير و أسعى لان تصبح صوري اكثر احترافية

manal
ضيف

اسلوب رائع وبسيط وواضح … مبدعه كعادتك ننتظر منك المزيد (:

Muneerah
ضيف

“أحتاج سلسلة أو كتاب كامل حتى أقدر أقول كل اللي في خاطري ..”

تستحق المكتبة العربية هذا الكتاب 🙏🏼💜

‫wpDiscuz

أضف تعليق عبر الفيسبوك: