خلاط المطبخ والميسون جار

السلام عليكم ورحمة الله وبركاته

أهلا يا أصدقاء

ومع أول تدوينة في تحدي (تدوينة يوميا لمدة أسبوع)

1 .  2  .  3  .  4  .  5  .  6  .  7

الصراحة تحدي كبير شوي علي لأن تدويناتي متعوده أنها تاخذ مني كم يوم وأكتبها بدون حساب للوقت أبدا ..

لكن أحيانا حلو الإنسان يختبر ويكتشف طاقته القصوى وإمكانياته وين ممكن توصل له..

يحط نفسه تحت الضغط ويحاول يلتزم ، أو بعبارة أخرى يجرب يخرج من دائرة الراحة الخاصة به

هذا النوع من اختبار القدرات مهم للتطوير الذاتي والعملي، وإن شاء الله أقدر أكمل التحدي ..

خلاط المطبخ والميسون جار

المهم اخترت أتكلم لكم اليوم عن الـ Mason jar

أكيد كلكم شفتوا هالنوع من العلب المسماه بـ الميسون جار

خلاط المطبخ والميسون جار

اشتهرت كثير على مواقع التواصل وصرت أشوفها في كل مكان في البنترست والانستغرام ، اللي يشرب فيها واللي يستخدمها كعلب تخزين والبعض يستخدمها حتى في تقديم الهدايا وديكور الحفلات ،

خلاط المطبخ والميسون جار

ولاحظت كثير مطاعم تقدم فيها المشروبات .. والـ DIY اللي ممكن تحصلونها للميسون جار والأفكار اللي معها مالها
نهاية ..

خلاط المطبخ والميسون جار

باختصار الميسون جار صارت موضه

عام ٢٠١٣ صرح مسؤول التسويق لجاردن (الشركة المسوقة للميسون جار) انهم باعوا خلال تلك السنة كمية من الميسون جار لو يصفونها جنب بعض بتدور على الكرة الأرضية مثل الحزام بمقدار ٩٠ ٪ ههههه والله حسبتهم إبداع بعد

خلاط المطبخ والميسون جار

من ذاك الوقت أتوقع أمداهم لفوا كم مره ماشاء الله

ما أعرف ايش سبب الشهره الفجأة هذي ؟

كنت أتوقع انها اشتهرت استخداماتها بسبب انها متوفره بكل مكان وزمان هنا في أمريكا ، بس يبدو أنها متوفره في كل مكان وزمان بسبب هالهبة وليس العكس..

المهم اللي يهمنا ان صار فيه أفكار كثير

في هالتدوينة بأركز على أكثر ميزتين تعجبني في هالعلب ..

أولاً : التركيب على الخلاط

قبل فترة أكتشفت حركة بالخلاط رهيبة جدا وعملية ،

خلاطي المنزلي من شركة Oster هذا هو :

خلاط المطبخ والميسون جار

لكنه زي أي خلاط طبيعي مافيه شكل مميز أو قطع خاصة ،

العلبة (الجيك) عبارة عن زجاج والقاعدة الحديد (الشفرة) اللي تخلط قابلة للانفصال مثل أغلب أنواع الخلاطات..

كنت حابه نظام الخلاطات اللي يجي معها زي الكاسات أو العلب مثل هذي :

خلاط المطبخ والميسون جار

، لكنها ما تغني عن الخلاط ، والكاس المخصص لها شكله مايشهي للشرب أو التقديم وزيادة على كذا وقت شرائي له ماكنت حابه أجمع قطع وأجهزة كثير وأحوس مطبخي لأنه كان جدا صغير فاخذت خلاط عادي وحرصت يكون تقييمه ممتاز ويكون زجاج لأني أحسه أجمل وأنظف وأقوى ..

بعدها بفتره كنت أتصفح النت وشفت وحده أجنبية بكل سعادة تفك جيك خلاطها وتركب بداله علبة زجاج (ميسون جار)

خلاطها كان مختلف لكن قالت انه ينفع لأغلب أنواع الخلاطات ،

ماصدقت خبر رحت ركض للمطبخ فكيت جيكي وركبت الميسون جار و ضبطت

خلاط المطبخ والميسون جار

فرحت بالاختراع ، هذا يعني إمكانيات ومميزات للخلاط ماكانت متوفرة قبل

جربته مع فواكه مثلجة وثلج وخلطها بسهوله ،

خلاط المطبخ والميسون جار

سويت فيديو بسيط يبين كيفية الفك والتركيب ..

من المميزات

أولا : اني أصلح الخلطات بعلبها مباشرة

مثلا الآن بكل بساطه اعبي العلبة طماطم وليمون وأسوي صلصة الطماطم وإذا خلصت أغطي العلبة واحطها في الثلاجة ،

وبعدها مباشره أقدر أعبي علبه ثانيه فواكه واسوي لي عصير على السريع..

بدون تغسيل جيك ولا شي

والأجمل أن علب الميسون جار الزجاجية تجي بأحجام وأشكال يعني بالضبط حسب الغرض وينخلط مباشرة في علبته نفسها ويتسكر ..

خلاط المطبخ والميسون جار

فلو حبيت مشروب لشخص واحد ما اتكاسل مثل لو كنت باستخدم الجيك كامل لكاس واحد

حتى الكمية أكون عارفتها بالضبط

خلاط المطبخ والميسون جار

الميزة الثانية ان الميسون جار نفسها لها غطا

صرت إذا بيجيني ضيوف ممكن أخلط بالعلب واسكرها واصفها في الثلاجة محكمه الإغلاق وجاهزه حتى للتقديم لأن شكلها لطيف ومقبول جدا وصار يعتبر حركه هههه

خلاط المطبخ والميسون جار

وممكن أصلح لنفسي عده عصيرات وأخليها في الثلاجه لوقت استخدامها او حتى بالفريزر لأن العلبه آمنه للفريزر

خلاط المطبخ والميسون جار

كنت أصلح فيها وجبات مهروسة وأفرزنها عشان وقت الحاجة وضيق الوقت أو الطلعة يكون فيه أكل نظيف وجاهز لطفلي بدل الوجبات الجاهزه من برا أو السيريلاك ..

وحتى للوجبات اليومية كنت أحط المكونات في العلبة وأركب عليها قطعة الخلط وأخلطها بعلبتها والأكل يكون مباشرة من العلبة.. مع انها صغيره بحجم الكف الا أن القطعه تكفيها 🙂

أفضل بكثير من خلط كميات صغيرة في جيك كبير وحوسة..

خلاط المطبخ والميسون جار

فاصل ريفيو سريع عن الخلاط،

كنت أعطيه ٤ من ٥ قبل ما أكتشف حركة الميسون ، فقط لأنه ماتجي معه الأداة اللي تدف المكونات باتجاه الشفرة فأحيانا إذا بأصلح سموذي ثقيل ممكن احتاج أوقف وأفتح العلبة وأحرك شوي وأرجع أخلط..

بس بعد الميسون خلاص معد أحتاج هالحركات فصرت أعطيه ٥ من ٥..

لأنه من كل النواحي الثانية القوة والجودة جدا ممتاز ..

عموما اللي تفكر تشتري خلاط ويهمها يكون يركب على هالعلب لا تتعدا شركة oster جدا عملية..

مع الأخذ في الحسبان أن الأجهزة إذا بتطلبونها من أمازون الأمريكي بتكون ١١٠ ، اطلبوها من أمازون البريطاني أو من المحلات ..

نعود لمحور الحديث 🙂

السؤال المهم ، كيف تختارون حجم الميسون جار اللي بيكون نفس مقاس خلاطكم ؟

الميسون جار له مقاسين فقط للغطا (الفتحة العلوية في العلبة)..

حجم عريض – Wide mouth

  مقاس القطر 86mm

وحجم عادي – Regular mouth

مقاس القطر 70mm

بمعنى أن جميع أحجام وأنواع وألوان الميسون جار في الحقيقة تتغطى فقط بحجمين من الأغطية ،

فنحدد حجم الفتحه هل خلاطنا يحتاج مقاس عادي أو عريض .. مافيه خيار آخر ..

بعضكم سألني كم الكمية اللي تسعها هذي العلب ؟ ،

لقيت صورة جميلة واضح فيها المقاسات

خلاط المطبخ والميسون جار

الميزه الثانيه للميسون جار : قطع الاكسسوارات الخاصة بها متنوعة

تعجبني الشركات اللي تواكب الأحداث، تشوف وش الناس تستخدم وتبتكر أفكار مساعده ..

من القطع المفيدة قطعة خاصة بتفريغ الهواء من الميسون جار .. لكن ماراح اتكلم عنها هنا لأني شرحت بالتفصيل كل شي عن تفريغ الهواء مع الميسون جار في التدوينة الخاصة بجهاز تفريغ الهواء ..

خلاط المطبخ والميسون جار

تفريغ الهواء جميل لتخزين المكسرات والحبوب وغيرها يحافظ عليها لفترة أطول بكثير ويحافظ على نكهتها..

عن نفسي استخدم الميسون جار لأغلب أنواع التخزين، يعجبني انها شفافه ومقاساتها نفس اللي أفضله وتعطي شكل مرتب في الدولاب

خلاط المطبخ والميسون جار

قطعة ثانيه : أغطيه فيها فتحه للمصاص

حلوه لوقت الطلعة برا أو في السيارة أو للصغار (أو المطفوقين زي ناس أعرفهم ههههه )

خلاط المطبخ والميسون جار

قطعة ثالثة : غطا صابون

مره حبيت الحركة سهله وعملية ، وأحس بتكون حلوة بالذات في المطبخ لصابون المواعين بدل مايكون في علبته العادية..

وبكل سهوله ممكن نصلحها في البيت مايحتاج نشتري القطعة

ناخذ اللي يضغط من صابون ثاني علبته خلصت ونفتح فتحه فوق وندخل الانبوب ونثبتهم على الغطا ..

موجودة الطريقة بالتفصيل في البنترست اضغطوا هنا

خلاط المطبخ والميسون جار

هذي بالنسبة لي أجمل القطع،  اللي يحب يشوف زيادة من هالحركات تحصلونها هنا تفرجوا الإمكانيات والخيارات،

أو في البنترست تحصلون الأفكار كلها وكيف ممكن تتصلح في البيت بدون ما تشترون الإضافات pinterest

والآن السؤال اللي أنا أطرحه عليكم ،

وين ممكن تحصلونها في السعودية ؟؟

للحين قالوا البنات انها موجودة في ساكو والهزازي ونجم العروبة وأبو ريالين ومحلات الكماليات .. بس يقولون اللي في ساكو هي الأصلية ، وموجوده في ليكلاند بس يبدو اللي عندهم أغلى من ساكو..

وأخيرا ماراح أدخل في موضوع الدي أي واي والابتكارات اللي الناس مسوينها مع الميسون جارز خارج نطاق الأكل

لأن لها أول ولا لها تالي فممكن أخصص لها تدوينة خاصة مع تطبيقي لبعض الأفكار بإذن الله (في البال كم مشروع)..

وإلى اللقاء غدا مع تدوينة جديدة ^ـ^

أتمنى لكم يوماً ملونا

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

149 تعليق على "خلاط المطبخ والميسون جار"

avatar
فرز بواسطة:   الأحدث | الأقدم | الأكثر تصويتاً
3noo
ضيف

كالعادة إبداع
تعجز الكلمات عن وصفه
هذه المدونة،،،،
تجعلك تنظرين للحياة بمنظور مختلف
تساعدك على الاستمتاع بأدق التفاصيل

أسعدك الله في الدارين عزيزتي❤️🌹

بشاير
ضيف

ايه صادقه مدري وش سبب شهرتها كذا
يعطيكك العافيه تدوينه رائععه ❤️❤️
بانتظار ابداعك بكره 👌🏻😘

Muhra 🕊
ضيف

تدويناتك تبارك الله
كل موضوع احسن من الثاني 😍❤️❤️

نوره
ضيف

يا بنات جربت الميسون جار وايد ماوث على مطحنة بانسونيك اليابانية واشتغلت وصرت اطحن كل بهار في الجار حقه بدون خلط روائح 😭😍💜💜💜💜💜💜💜

نوره
ضيف

ياليت تصورينها لنا 3>

بشائر
ضيف

مرحبًا نورة🌷

أنا خلاطي بانسونيك وجربته مع الميسون جار الفتحة الكبيرة هي اللي ركبت مع جهازي .. كان ينزل موية العصير إذا قلبت العلبة 🙁 + علبة الميسون جار ما تضغط على زر الأمان بقوة وبالتالي ما يشتغل الخلاط …

كيف ضبط معاكِ؟ 😩

ام عبدالملك
ضيف

انتِ انسانة جميييييلة الله يسعدك سعادة ابدية قد ماتفيدينا ❤️

ميسون
ضيف

شي جميل ورائع والاجمل ان الاسم مثل اسمي😍

دمتي مبدعة كما عهدناك 🌹

الهنوف
ضيف
الله يسعدك أروى بالنسبة لميسون جار شفتها بساكو وكانت الأغطية بألوان بعد الحجم العادي وشريت منها بس لها مسكة زي الكاس اربع حبات وجداً حبيتها❤️❤️ لطيفة بشكل واستخداماتها كثير ومن زمان كنت ادور عليها لما شفت افكارها بالبنتريست .. وبحثت عن الحجم الصغير مالقيته طلبته من أمازون و وصلني وما تتخيلين قد ايش مستفيدة منها كل بداية اسبوع اسوي فيها سلطات لكامل الاسبوع عشان أخذها معي الدوام وحلو ان تسكيرتها قوية وأمنه احط احياناً سموذي فيها يعني جداً ممتازة المشكلة ساكو ما لاحظته يوفر كل الأحجام والأنواع يمكن خلصت !! 🤔 بس على العموم حلوة وللحين ما جربتها على الخلاط… قراءة المزيد ..
عبير
ضيف

الله يعافيك اروى على المعلومه جربت على خلاطي وضبط الحمدلله👌🏻
خلاطي hamilton beach

نوره
ضيف

عزيزتي من وين اشتريتي خلاطك ؟ وايش خطه ؟ ١١٠ والا ٢٢٠ ؟

عضو

مرحبا .. وين ممكن القى الخلاط ؟؟

Mnoony_dairy
ضيف

💕🕊العلب هذي لقيتهم في ساكو اربع حبات ب٤٢ ريال وفيه مجموعه كثير
ومن مميزاتها ماتصدي الحين المحلات العاديه صارت تبيع تقليد زيها بس طلعت وزاره التجاره وحذرت منها لان الغطا يصدي

وصباح الخير اروى💕🕊❤️

AseelAziz
ضيف

أهنيك على فكرة التدوين بشكل يومي لمدة أسبوع..قريت من قبل أنه مفيد جدا للشخص انه يضع اهداف قصيرة المدى بحيث تساعده مستقبلا يحقق أهداف على مدى أطول.. غير انه حلو اصلا الواحد يشغل وقته بشي مفيد .. يفيد ويستفيد.. الله يسعدك مرررررره اعجبتني الفكرة مع اني مابعد هبيت فيهم بس ولو ههههه
ننتظر تدويناتك الله لايحرمنا

وسَن
ضيف

مشكورة على هالتدوينة الرائعة 😍😍 حمستيني اجربها

نور
ضيف

افكار رووووعه يعطيج العافيه بجرب على خلاطي يمكن بعد يضبط هههههه ..في قطر عندنا هالغراش في محل اسمه ليكلاند ..اذا موجود هللمحل فالسعوديه اتوقع بيلقونه هناك ..هو محل بريطاني عنده ادوات مطبخ واواني واجهزه

أم أسيل
ضيف

ليكلاند موجود في السعودية الخبر مجمع الظهران وفعلا موجوده هالقلب

أم أسيل
ضيف

رائعه التدوينة ودي اجرب انا خلاطي كينود المشكله الشفره بس اللي تنفصل من تحت مو كامل الحزام اللي آخر الخلاط ماادري إذا بضبط >>>مدري ماعرفت كيف اشرح أن شاءالله احد فهم علي

عضو

صايرة من اصحى افتح المدونه و اشوف اذا فيها شي جديد حلوه الفكره اسمري 💚

رقيه العزواني
ضيف

تدوينه رائعه أروى
كعادتك أنيقه..استمري

ام فيصل
ضيف

ربي يوفقك ويسعدك

عضو

مثل ماقالوا في التعليقات احرصوا انكم تشترون الأصلي لأأن المقلد فعلا يصدي (عن تجربه), وشكرا عل التدوينه الرهيبه اشتهيت اسوي اي شي بالخلاط بس عشان أجرب

Khloodnista
ضيف

صراحه هي روعه انا عندي منهم اخذتهم من ساكو ، درزن ١٢ حبه بسعر جدا معقول في الخمسين اكثر او اقل بشوي ، جدا استفدت منها في تحضير الوجبات والعصيرات ناويه اجيب المقاس الصغير منها كمان ، برضو ما استخدمتها استخدامات ثانيه حاليه للمطبخ بس
ويعطيك العافيه اروى فعلا من اجمل المدونات بالنسبه لي ، الله يسعدك حبيبتي

hader
ضيف

طيب فيه اللي يسحب منها الهوا؟

kadojah
ضيف

العلب موجودة في ساكو وفي ليكلاند
بس فرق السعر قوي بينهم، من ساكو افضل 👌🏼

وفكرة التدوينه اليومية جميلة 😍👌🏼
عالقوة يارب 💪🏼

ام لين
ضيف

جميل جدا ماشاء الله ياكثرها عندي ولا توقعت منها فايده غير بالتخزين والان بدلع نفسي مع اجمل سموثي 😍

هند الحقباني
ضيف

تبارك الرحمن الله يسعدك ياربي تدوينه رائعه بكل تفاصيلها
والعلب موجوده عندنا في محلات نجم العروبة والهزازي وغيرها من محلات الكماليات
الله يوفقك ويزيدك من فضله

ام سالم..
ضيف

ما شاء الله عليج يا اروى..

موضوع رائع ..

ربي يعطيج العافيه وتسلم الايادي على الشرح الوافي..

جاري البحث عنه في الامارات فكرته سهله و صحيه ..

دمتي بود يا غاليه..

Reem
ضيف

جدا جميله اقتبستها منك زمان من سنتين اعتقد لما نزلتي الفيديو بالاسنتقرام .. الله يسعدك اروى ويعطيك العافيه

Atheer
ضيف

ايش هو نوع خلاطك ؟ انا شريت مثل حقها طلبته من امازون وللأسف طلع
110 خطه 💔

رؤى
ضيف

وايش فيه لو كان ١١٠؟

Haya
ضيف

الميسون جار شفته باكثر من محل
موجود في ساكو وموجود بهزاز الخبر
وشفته عند بو ريالين بس ماادري عن جودته

يعطيك العافيه ع التدوينه الجميله والمفيده
وبآنتظار تدوينة بكره بآذن الله

مريم
ضيف

جزاك الله خيرا أخية
أستفيد كثيرا من مواضيعك
لا حرمك الله الأجر 💜🌹

Goodjob99
ضيف

حبيت فكرة الخلاط مشكوره ع موضوع بتوفيق

سعاد
ضيف

سعادتك حين اكتشفتي فائدته مثل سعادتي حين كتبتي عنه منذ مدة ورحت أركض لمطبخي لأرى هل يناسب خلاطي أم لا ..

ممتنة لك أكثر مما تتخيلين للكثير الذي قدمتيه ومازلتي
وسعيدة جدا لأسبوع مميز ومثري ينتظرنا بحول الله منك ماشاءالله وبارك

Atheer
ضيف

ايش هو نوع خلاطك ؟ انا شريت مثل حقها طلبته من امازون وللأسف طلع
110 خطه 💔

Fatom
ضيف

عادي اشتري محول واشبكيه عليه

نوره
ضيف

مشاءالله اعجبني طرحك للموضوع والعلب متوفره بااغلب المحلات اشوفها كثير

hope4ever
ضيف

يعطيك العافيه 🌸 حبيت فكرة التدوين كل يوم .. راح يزيد من مواضيع وتنوع المدونه واكيد راح ينعكس عليك بشكل ايجابي ويشعرك بالانجاز 💪🏼

الى الامام ي أروى و بانتظار تدوينة الغد ان شاء الله 💋💜

عضو

تدوينة رائعة جدا كعادتك😍
حبيت الافكار المطروحه😍.. احلا مافي الميسون جار انها زجاج تعطي شكل جميل في التخزين وآمنة للأطعمه👍
جدا استفدت من المقاسات اللي وضعتيها اعتقد مقاس خلاطي الفتحة العريضة

ريم
ضيف

تدوينه وافكار رائعه
وليس غريباً عليك.

Atekah
ضيف

😭😭💕💕وش هالزين كل يوم بيصير فيه تدوينه😱😍شيء شيء الميسون جار😩👌🏻بس عاد وين نلقاه😢

أسماء
ضيف

من جمال تدوينك تمنيت يكون هالتحدي شهر 😍
ما عرفت فكرة الخلاط إلا منك 👌🏻
الله يزيدك جمالاً على جمالك ويسعد حالك وبالك ❤️

عضو

موضووع لطييف و كيوووت و جمييل جدا 😍😍😴 الله يعطيك العافية و منتظرييين التدوينات الجاااية 😎😎

Shatha
ضيف

يسعد قلبك على الهدف الرائع (تدوينه يوميا لمدة اسبوع )
اظن بيكون اسعد اسبوع لي
وتدوينة اليوم رااااائعه اعجبتني فكره انه يركب في الخلاط انجنيت عليها
بأنتظاار ابدااعك وتدوينات تاخذ العقل اكثر واكثر

آلاء الطعيمي
ضيف

موضوع جميل 👍
انا بصراحة ما شريت ولكن جربت قوارير موجودة عندنا بعد ما ننتهي منها مثل قوارير مربى وغيره جربته على الخلاط للأسف ولا قارورة ثبتت بالخلاط فأتوقع خلاطنا مو مناسب، عندي تساؤل احس اخاف استخدم القوارير بالخلاط اخاف ينكسر 😅

ياسمين
ضيف

أهلاً أهلاً أروى 😻,,
اولاً ياحظنا بالتدوينات والفكرة الجديدة 😂..
حبيت ثقة الشركة بمنتجها انها تدور ع الارض هههههههه ، جداً جميلة هالعلب انا استخدمتها اكثر من مره بالهدايا وتخزين الحبوب ، ومثل ماقلتي لها العيد من الافكار بالبنترست ، وشكلها جميل مع الورد وحتى العصائر ..

شكراً اروى و بانتظارك 💜💜

nora
ضيف

شي جميل هالميسون جار

لان حجمه وسعته تكفي لاشياء كثيره

و احسه يساعد في تنظيم الوقت لانك تكونين مخلصه شغلك وحاطته بالميسون جار واذا احتجتيه استخدمتيه وبعد زجاج يعني جدا مناسب لحفظ الاطعمه

شكرا على التدوينه الجميله

ترنيم ❀
ضيف

يسعد قلببك أروى .. كعاادتك تحبي تنفعي االجميع ♥

منى العضياني
ضيف

روووووعه العلب وأنتي أروع يا جمالك 😍

أم عبدالله
ضيف

جمال تدويناتك وحساباتك يدل على جمال روحك جزاكِ الله خير على كل شي جميل تقدميه وربي يبلغنا ويجمعنا بكِ في الدنيا والآخرة

ام مجد
ضيف

دائماً أشوفهم ولا عمري فكرت اجربهم، أعطيتني دافع قوي لتجربتهم 👍🏻💞

وعد
ضيف

ما أجمل اني اصحى من النوم وألاقي ايميل باسم أروى العمراني والله شعور كذا يفتح نفس الواحد ولا يوصف لأني دوبني جديده في المدونه ..
تسلم يدك ع التدوينه الجميله حبيت الفكره وياااارب تضبط على خلاطي ما فيا اروح اشتري خلاط ثاني وتصير حوسه وزحمه عندي 😧💔

انا سويت بميسون جار كريستالات وطلعت تجنن واللي بقي في الجار “موية الكريستال” كبيتها وكانت فيه حبات كريستال لاصقه في نفس الجار وطلع شكلها يجنننننننن ويخرفن وكل شي وجا في بالي احط جواتها شمعه وبالفعل طلعت مره حلوه بحاول ارسلها لك في سناب وان شاء الله توصلك

هديل
ضيف

جميل ربي يسعدك💜💜

سوسو
ضيف

ساكو بسعر ممتاز جدا

مها العزيزي
ضيف

موضوع جميييل وقيم بصراحه خاصه للي يهتمون بالترتيب والتنسيق ف المطبخ والبيت بشكل عام .. شكرا للمعلومات حبيبتي💘💘 وشكرا على وقتج اللي تشاركيه معانا ..

منى عبدالله
ضيف

جزاك الله خير مدونة رااااااائعة سؤالي هل الخلاط 220 أو 110 ؟!

أم رفو
ضيف

الله يسعدك فكره جميله جداً وبإذن الله راح أجربها وإن شاء الله تركب ع خلاطي لكِ مني كل الشكر .

Lama
ضيف

اعجبتني فكرة تدوينة كل اسبوع

جولزا
ضيف

مساءك سعاده أروى

تدوينه جميله كعادة تدويناتك ، فعلاً الميسون جار استعمالاتها كثيره ومفيده في كثير مجالات ، و حبيت الخلاط مررره 👌🏻❤️ حلو انه تركب عليه الميسون جار وخاصة اني اوقات اتكاسل لما ابغى اعمل عصير مثلاً لي بس فأفكر بغسل الخلاط ، لكن الان فعلاً شي عملي و حلو انه بعلبة الميسون جار نفسها اهلط المكونات 👌🏻

جولزا

ريم
ضيف

ماشاء الله كعادتك اروى تدويناتك ممتعه وشامله ومفيده يعطيك العافيه الله يبارك لك وفيك 👍🏼😍

اسراء احمد
ضيف

روعة التدوينة اروى ماشاء الله ابدعتي 👍🏻👏🏻❤️🌹
تحدي جميل وانتي قدها 💪🏻💪🏻

nada khaled
ضيف

تدوينة جميلة 😍 استمري اروى 👍🏼👏🏼

Deema
ضيف

بصراحه مره حلوه الفكره واللي عجبني فيها للعصيرات دايم اتورط ابي اسوي شوي وماعرف اضبط الكميه ! وانقهرت اني توني شاريه خلاطه مو نفس الماركه 🙆🏻

عضو

تدوينة جميلة ما شاء الله.أفكار روعة😍.ربي يوفقك

‫wpDiscuz

أضف تعليق عبر الفيسبوك: