خطة الـ ١٢ يوم لحياة منجزة

السلام عليكم ورحمة الله وبركاته

أهلاً يا أصدقاء

 هذي ثاني تدوينة في تحدي ( تدوينة لمدة اسبوع )

1  .  2  .  3  .  4  .  5  .  6  .  7

?

خطة الـ ١٢ يوم لحياة منجزة

قبل فتره مشيت على خطة لمدة ١٢ يوم

وقلت لكم عنها وقتها في السناب بشكل مختصر قبل ما أجربها،

لكن قبل ما أشارككم الفكرة بالتفصيل، بأحكي لكم الأسباب اللي خلتني أفكر بها وانفذها

?

ابتكرت هالطريقة لأنها تناسب شخصيتي من ناحية العمل والإنجاز

مزاجية جداً – ملولة – إذا أجبرت نفسي على عمل بدون الرغبة فيه في نفس اللحظه ممكن أفقد الحماس له بالكامل – واذا ما انجزت اكتئب !

أتوقع كثير عندهم نفس هالنوع من المشاعر ولذلك المنجزين والناجحين القادرين على التحكم وضبط النفس على العمل قليلين في العالم ومميزين ..

الباقين يحتاجون أفكار وحيل حتى يصلون لهالمستوى من التحكم بالذات

لكن أنا أؤمن أن الإنسان يقدر يتغير ويقدر يدرب نفسه لتتطور وتتبنى سلوكيات إيجابية ..

المهم انه يسعى ويحاول مره تلو الأخرى بدون استسلام وبدون مايسلم نفسه لفكرة (هذا أنا وهذا طبعي)

يقول أليكس ووكر ” أكثر طرق الإستسلام سهولة وشيوعاً هي أن تؤمن أنك لا تملك أي قوة. “

?

نعود لفكرة الجدول ،

لأني عندي هوايات كثير في مجالات مختلفة ومشاريع في خيالي أكثر ومسؤوليات منزلية كنت كل يوم اصحى الصباح وافكر بكل الاشغال الي ودي انجزها،

ومن كثرها وتراكمها يجيني إحباط شديد على الصبح واتهرب من التفكير فيها ☹

وبالتالي اقضي اليوم كله بدون أي إنجاز بس ضياع وقت وتسحيب رجلين ، ويليت انبسط ؟!

ما اكون مبسوطه اصير زعلانه من نفسي وحاسه اني حوسة ومهملة.. وطول اليوم انبطاح ع الكنبة وتصفح في الجوال وأشوف المنجزين وأقول أبي أصير كذا وأزعل من نفسي زيادة 🙁

وحتى لو انجزت واشتغلت ساعتين وثلاث ، العمل اللي انجزه مقارنة بكل الأشياء الثانية في الحياة اللي تنتظر إنهاء يكون وكأن شغلي اللي سويته قليل وغير كافي!

يعني يصير لا الانجاز يفرحني ولا الكسل !

فقررت اسوي هالفكرة بما اني ما اقدر امشي على جدول صارم بسبب مزاجي الكريم، لان شغلي كله (اختياري) مو غصب اسويه مو مثل الوظيفة الإلزامية فما عندي DEADline يجبرني أنجز ..

يعني يجي يوم مالي نفس اشتغل اشغال يدويه بس عندي طاقة أدرس أو أتعلم شي ،

تجي أيام ثانيه مالي نفس اسوي شي لكن ممكن اطلع اشتري بعض الاغراض الي احتاجها من زمان ومأجلتها ..

وهكذا ~

الفكرة بسيطة وهي .. ١٢ يوم ، ٤ ألوان ?

خطة الـ ١٢ يوم لحياة منجزة

كل لون كتبت عليه لقب لليوم ونوعية الأعمال اللي فيه :

يوم خارق : هذا يوم الإنجاز ، لازم أنجز على الأقل شغلتين مهمات بهاليوم (وتكون محدده ومكتوبه على الورقه كل يوم مكتوب وراه شغلتين لازم أنجزهم)

يوم سعيد: ما أشتغل بشي ارتاح واستمتع بوقتي بشرط أطلع من البيت ، أقضي اموري الي احتاج اسويها خارج البيت ، مثلا اشتري غرض مهم أو أتسوق للمقاضي أو آخذ لي جلسة مساج)

أخلص أي مشوار خاطري فيه عشان مايعلق في بالي مع باقي الأعمال اللي ودي أنجزها..

يوم ميت: هذا اليوم مخليته لليوم اللي يكون مزاجي جدا سيء  ومايبي يسوي أي شي ومكتئب ومحبط،

غالباً مو بيدي أحس بهالمشاعر ، وماقدر أسيطر عليها وأجبر نفسي على الشعور بالسعادة أو الحماس أو التفاؤل ..

في النهاية كلنا كذا أيام حلوه وأيام لا بغض النظر عن الظروف اللي في حياتنا ..

إذا صحيت بهالنفسيه اختار اليوم الميت ، ويحتوي على لاشيء ماعدا شغله وحده بس من الشغلات الي مره ما أحبها ، مثلا أكوي ملابس، أو أمسح الأرضيات)

أسوي هالشغلات اللي ما أحبها عشان أربي نفسي على ردة فعل ومناعة من اني أصحى بمزاج سيء، لأن هالمزاج بيكون مرتبط بأشياء أنا بالعادة أتهرب منها بأي طريقة ..

وعشان إذا مريت بهاليوم السيء اكيد ماراح أرجع أختاره من بكرة لأني ماراح أكون انبسطت وباكون طفشت من الزعل والاحباط، بينما لو بدون جدول ممكن كل يوم يصير احباط ومافيه إنجاز بدون ما أحس ..

يوم تطور: في هاليوم حددت ٣ ساعات على الكمبيوتر اتعلم برنامج Maya برنامج ثري دي أطمح للاحتراف فيه ولو بعد حين حتى أقدر أسوي مقاطع أفلام كرتون قصيرة، فيحتاج ساعات دراسة وممارسة

وساعه واحدة أقرأ كتاب باللغه الإنجليزية حتى أطور مهاراتي اللغوية..

?

علقت الأوراق على الجدار وصرت كل يوم أول ما أصحى اتوجه للأوراق وأشوف وش أحس عندي رغبة له واختار اليوم ،

خطة الـ ١٢ يوم لحياة منجزة

وممكن أحدد اليوم اللي أبغاه بعد الفطور ،

وفي نهاية اليوم إذا أنجزته بنجاح أحط عليه علامه أو أشطب عليه..

المهام المكتوبه على الورقة ممكن تكون مكشوفه وممكن تكون مفاجأة ،

مثلا ، طالما عندك رغبه تطلعين من البيت ممكن تحبين تتفاجأين لوين رحلة اليوم ، وممكن تحددين بالضبط وين تحبين ، انا خليتها مفاجأة وكتبتها خلف الاوراق بحيث اختار اليوم وإذا قلبت الورقة أكتشف وش المطلوب أسوي..

الهدف : بمرور ١٢ يوم أكون أنجرت كل شيء مكتوب في البطاقات بإذن الله ، وبهالطريقة ما أجبر نفسي على شغل كثير ولا أترك عقلي يحس انه مهما فعل في اليوم فهو مقصر بسبب ان الانجاز قليل ..

يعني اريح نفسيتي وأعطيها مجال لقليل من المزاجية مع الحفاظ على أيام منجزة وأيام ممتعة وأيام تطويرية ..

?

النتيجة وتقييمي لأثر الجدول على حياتي 

انتهت الأيام بنجاح ،

أعطاني دفعة للأمام قوية ،

تعلمت عن نفسي أشياء ماكنت مدركتها قبل ..

نفذت كل اللي مكتوب على الكروت ماعدا يوم تطويري واحد ..

لكن بدل اليوم التطويري كانت عندي طاقة عالية وحماس اني أكمل مشروع كنت أشتغل عليه واستبدلته به،

أعمال كثير كانت عالقة ومؤجله وأنجزنها بسبب الجدول بعد فضل ربي،

كانت بعض الأعمال بمثابة حجرة في الطريق ما ان بدأت بإزالتها صار ما عندي مشكله أكمل باقي المشروع في الأيام اللي بعدها بسهوله..

لأني كنت أوقف عند نقطة معينة في نصف العمل و اتهرب من المشروع كامل بسبب اني اتعيجز اسوي أحد خطواته أو استثقلها، لكن ما أن انتهيت من هالخطوة بمساعدة الجدول حتى صار باقي المشروع عندي مايحتاج تحفيز وجدول ، صار يمشي بسلاسة

باختصار النتيجة كانت غير متوقعة ، حبيت الجدول جدا

ومن نجاحه ما احتجت اسوي جدول ثاني،

الـ ١٢ يوم كانت كفيله انها تحطني في وضع حماسي لأيام أكثر ،

مازلت لليوم أعمل بشكل يومي وأنجز بدون الحاجة لمحفزات ،

وأقدر أعيد الحركة متى ما رجعت لحالتي القديمة..

?

أيام كان مهم أنها تضاف للجدول 

يوم النظافة ، لاحظت لأني حددت الأعمال بدون ما أترك مجال لأعمال النظافة المنزلية صار عندي ضغط شوي في بعض أيام الجدول والتنظيف العميق ياخذ وقت وصرت أسويه في الأيام الميته ، وهذا شوي سبب لخبطه في مشاعر اليوم الميت لأني حسيت بالانجاز فيه والمفترض ما أحس هههههه

المهم انه كان لازم يوم مخصص للنظافة وغسل الملابس وغيرها لأن مدة ١٢ يوم طويلة بدون وقت مستقطع للترتيب والتنظيف ..

?

عمل جدول خاص بك:

عدد الألوان في الجدول وعدد الأيام وأسماءها كلها راجعة لك أنت وطبيعة حياتك

وممكن الجدول الأولي مايكون جدا ناجح وتكتشفون انه لازم إضافة يوم أو تفاصيل أو مهام وغيرها مثل ما أنا اكتشفت يوم النظافة ..

بعض البنات قالوا غيرنا من يوم ميت ليوم استرخاء وعناية ،

وبعضهم حطوا يوم للمذاكرة أو تعلم لغة، وبعضهم للزيارة وصلة الأقارب الواجب صلتهم وهكذا حسب نظام حياتك وأهدافك..

وحتى المدة ممكن تكون أسبوع أو شهر أو ١٠ أيام..

وممكن تكون مكتوبة على نوت أو على لوحة أو سبورة ،

المهم جوهر الفكرة

الهدف كله ان هذي الخطة توفر جو من الإنجاز ودافع للشخصيات اللي تتسم بالصفات اللي ذكرتها في المقدمة ، أما الناس الصارمين مع أنفسهم اللي مزاجهم ما يأثر على عملهم قد يكون فيه خطط أنسب لشخصياتهم ..

إذا أنتم مثلي وتجيكم نفس المشاعر والحالات اللي تجيني ، أتمنى تطبقون الخطة وتقولون لي النتائج ولو عندكم أي أفكار أخرى تحفيزية أو تنظيمية اقترحوها علي أجربها وإذا نجحت أكتب تجربتي عنها

?

دمتم منجزين 

وإلى اللقاء غداً مع تدوينة جديدة بإذن الله

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

235 تعليق على "خطة الـ ١٢ يوم لحياة منجزة"

avatar
فرز بواسطة:   الأحدث | الأقدم | الأكثر تصويتاً
سعاد
ضيف

وهذا لي ولأمثالي 🙂
‏يقُول حكماء الهند :
من أراد النجاح في هذا العالم
عليه أن يتغلّـب على
أسس الفقر الستة :
النوم
التراخي
الخوف
الغضب
الكسل
المماطلة

آلاء
ضيف

أروى كأنج قاعدة تتكلمين عني
كل ماقريت سطر اقول ايه انا كذا وكذا ?
مزاجيتي متعبتني جدًا ?
لكن مؤخرًا بديت انظم لي جدول اسبوعي
أكتب فيه مهامي اللي ابي انجزها خلال هالاسبوع
وكل يوم أصحى واختار شي منها يناسب مزاجي لذاك اليوم واسويها
وكل ماخلصت شي أحط عليه علامة
هالطريقة حمستني أنجز أكثر وفي نفس الوقت ماأضغط على نفسي وأسوي اشياء مالي نفس اسويها ??
الحين مر ثلاث اسابيع تقريبا من طبقت هالشي وسعيدة جدًا بالتطور الحاصل
لاحظت اني كل اسبوع اضبط نفسي اكثر وانجز اغلب المهام اللي محددتها لنفسي بالجدول ?

في النهاية حابة أشكرج على مواضيعج الملهمة ❤️

Beno S
عضو

أُعجبت جداً بالفكره ?، وجاري التطبيق ان شاءالله بالذات مع الدراسه عن بُعد وكمية التراكم فيها ?? ، وأطمح بالتدوين منذ مدة ايضاً لكن لم الفكره لم ترى النور حتى الان ?، يعطيك العافيه اروى لمُشاركتنا افكارك ??? ، الله يسعدك دنيا واخره ، مُمتنين لك ..

لطيفه
ضيف

حلوه الفكره تنفع لي وبقووووم بس اخاف تطلع كلها يوم ميت

نجود
ضيف

أنا سعيدة جدًا جدًا بهالتدوينات المتتالية ??
وكنت من قبل التدوينة أنتظر النتائج ودي أطبقها بالإجازة ()
أروى .. مدونتك مبهجة ملونة مفرحة
واعتنائك بالتفاصيل يضيف جاذبية عجيبة لمدونتك
يحمس كل زائر إنه يزورها مرات ومرات ..

متحمسة جدًا للبقية ،
وسعيدة بكل إيميل ينبهني بتدوينة جديدة ?

أنت بطلة ??????

نجود
ضيف

في شغلة صغيرة ؛
ودي الله يسعدك تفعلين زر المشاركة عبر تويتر وواتساب في نهاية كل تدوينة ..
جربت أسوي مشاركة عبر تويتر ما ضبط ..

أتوقع إن مدونتك ووردبريس
إذا إيه ، ممكن تفعلينه بسهول بالبحث في التولز اللي يقدمها ووردبريس مجانا

موفقة ، ودمت منجزة ??

افراح علي
ضيف

الله يسعد يومج بكل حب وموده

Atekah
ضيف

ما تتخيلين اقد ايش سعادتي????راجعه من المدرسه بعد دوام يوم خميس ميت ومواصله???عشان اشوف تنبيه في ايميلي انك نزلتي?????حمستيني استغل اجازة الاسبوع هذا ان شاء الله???

غدير
ضيف

جمييييييلة الفكره?? ،نفس حالتي عندي مواهب وبعد ما اتقنتها شوي احس اني سسساحبه مره مثل الكروشيه والرسم,ان شاء الله اطبق فكرتك بس لو بدت الدراسه يمكن تخرب علي?

Noüf
ضيف

اروى انا فاشلة في الرسم بس مررره حابه اتعلم وقوة الرغبة اللي عندي احسها ممكن تطلع مني شيء لذلك حابه تفيديني اذا فيه برنامج او قناة باليوتيوب تساعدني ع كذا ياليت تفيديني

رشا
ضيف

المفروض تحطين يوم خاص للمدونة.. راح يكون تغير كبير عليك وعلينا ??

RFAN
ضيف

اييييي والله صادقه رشا ?? مفروض تحط يوم خاص للمدونة ???????????????????

رووؤؤوح السماء
ضيف

ربي يسعدك يا أروى القلب ربي يخليك ويجزاك الجنه ويارب الزم نفسي ع الوصول لأهدافي والنجاح في حياتي يارب❣❤️

mimi
ضيف

انا متقلبه المزاج جدا وكذا مره حاولت التزم في جداول بس كلها فشلت وأصير طول يوم متسدحه على الكنبه وعلى قولتك ياأروى
أشوف المنجزين وأقول أبي أصير كذا وأزعل من نفسي زياده ?
بس أحسن مافيني اني مازلت مصره على الجداول دايم أحس أنها بتضبط يوم معي ?

Mariam_aboutouk
ضيف

يا الله لما كلامك في البداية كأنه أنا ??وهذا يصير خصوصا ايام الدراسة لا أنا اللي أدرس ولا اللي تركت الكتاب وخرجت واسمتعت
بسميها معلّقة?❤️ وفي الاجازات اعمل جداول شوية صارمة وما تمشي معي ، فاكتشفت انه لازم اسمع لنفسي واحترم مزاجيتها شوية???
ولأن هذا الجدول يحترم مشاعر الشخص ??#عطه_لايك
ووقت التدوينة جدا جدا مناسب والحمدلله اني شفتها اليوم بداية اجازتنا?الله يعطيك العافية ويجعلنا من المنجزين المتقنين لأعمالهم ويرزقنا الهمّة ???

مها
ضيف

فكره جميله جاري تنفيذ التجربه مرا فكره بطله خاصه للي يسوفون ومزاجيين شكراً لك مشاركتك لنا افكاروتجاربك ياجميله ?

LFLF
ضيف

انا من قوّة العجز والتكاسل ، ما أمزح متعيجزة أسوي الجدول !??

safa
ضيف

تمثليني 🙂

رووؤؤوح السماء
ضيف

الله يسعدك يا أروى ويبارك فيك باْذن الله اطبق فكرتك والزم نفسي ع الوصول لأهدافي ربي يبارك فيك

Bero
ضيف

صباح النشاط ?
فكرة جميل مع تقلب النفسيه بعض الايام بدون انجاز
جاري التجربه بإذن الله ?

ندى المغيدي
ضيف

حبيت الفكره جداً ،، عادة أسوي شي مشابه بس على ساعات مش على أيام مثل ماسويتي
وبالفعل لاحظت اني انجز بالشكل هذا
اكتشفت ان الاساس في الإنجاز هو التخطيط الجيد له ،، يعني ماينفع نخلي الأمور كذا عالبركه او عالمزاج ونبي نحقق انجازات عظيمه
فالتخطيط الجيد هو الجوهر ? شكرا لك

رووؤؤوح السماء
ضيف

ربي يسعدك يا اروى ويارب ألزم نفسي ع الوصول لأهدافي ❤️❣

NaDuSh
ضيف

انا نفس حالتك مزاجي مو ثابت ابجرب هالفكره واكتب لك اش صاار الله يوفقك يارب و يسعدك

Nasaiba Albalushi
عضو

جدا جميلة الفكره شفتها ف سنابك احسها مناسبة للعطلات الطويلة لانه ايام الدوام ما في وقت بجربها جدا اعجبتني

غاليه
ضيف

ماشاء الله تبارك الله عليك يااستاذه أروى كل يوم استفيد منك
شي والله اليوم اللي عندك ميت اعتبريه خارق لانك قاعده تفيدين بنات كثير وانت مو حاسه الله يحفظك ويسعدك كثر مااسعدتينا بأفكارك الف الف شكر

ربى
ضيف

جميله الفكره ??
وان شاء الله اني انفذها
لكن في مشكله عويصه وياليتك تتكلمي عنها وهي التسويف
ذبحني هالشي جدياً
دمتي بسعاده ❤️

لينا المالكي
ضيف

صايره انتظر تدويناتك ياليتك مسويه هالتحدي من اول استمتع جدًا اذا قريت لك ☹???
المزاجيه والملل والكسل اكبر نقاط ضعف بحياتي مع ان عندي اشياء كثير ابي اسويها بس اكتشف اني ضيعت ايام وانا منسدحه بدون ما اسوي شي لنفسي ??
باحاول اجرب هالطريقه مع بعض التعديلات الي تناسب شخصيتي بس العائق الوحيد “هل بامشي عليه ؟”

كوثر محمد
ضيف

جميييله الفكره اروى ماشاء الله شفتها ما ايام السناب وحاولت اطبق منها شي
الله يعطيك العافيه دايم مبدعه ماشاء الله

منى
ضيف

فكره حلوه واظن راح تفيدني كثير بما اني طالبة ماجستير وعندي مسؤوليات البيت والبيبي ????

ثناء علي
ضيف

ابتسمت وأنا أقرأ حاليا أمر بنفس مرحلتك قبل ال12 يوم وكلها أيام كسل وإحباط.. عطيتيني أمل ?
سعيدة جدا بتدويناتك اليومية ?

ghaniya
ضيف

حبييت الفكره ❤️ ، بس انا من النوع ال اسوي خطه و كذا بعدين أسحب عليها .. اخاف حتى هذي ما تمشي علي ??

ِعقيلة
ضيف

فكرة جداً ممتازة.. وكأنك توصفي حالتي.. عندي هوايات كثيرة وحابة أنجز الكثير ولكن.. مشكلتي ما عندي التنظيم المناسب لها..

يعطيك العافية

خدِيج ?
ضيف

مَاشاء الله افكارك جدًا رائعة يا اروى وتُلامس قلبيء،
بإذنِ الله اطبقها في الإجازة الكبيرة، لانها عادةً ماتنتهي
بدون انجازات كثيرَة، ولكن مع فكرتك بإذن الله تغير للأحسن ?

رورو
ضيف

ماشاء الله تبارك الله ..رائعه كعادتك …انا ام واكبر اولادي 16 سنه والله والله اتعلم منك ..واعشق حسابك لأنه مفيد ورائع ..

Rood
ضيف

صباح لطيف عليكم جميعاً ??
أنا أتابع جديدك منذ وقت ماشاءالله
ألهمتني بسبب كلماتك البسيطه في المُدونه او
الانستقرام وحتى التويتر بطاقه ايجابيه ساعدتني
لأغير أغلب الضنون او الإحباطات اللتي تواجهني ✨?
جزاك الله خير وشكراً لانك تُلهمين للأفضل ..

لبنى علان
عضو

???? و من يشك في قدراتك يا أروى؟؟؟ ها قد مرت التدوينة الثانية ما شاء الله.. اتمنى بعد هالاسبوع تتعودي عالتدوين السريع و بتصيري تتفاعلي شبه يوميا ما رح نثقل عليك و نقول يوميا ??اامهم.. فكرة الجدول ججدا اعجبتني من السناب والله و انا نفسك انسانة تجديدية و احب انجاز المشاريع و اكثر شي ذكرتيني فيه بنفسي لما حيكيتي انك بتحبي تنجزي كم مشروع سوا و في الاخير يصيبك احباط و ما تسوي شي.. هالجدول رح يفيدنا اكيد و انت حفزتيني اتطبيقو.. ??? شكرا لك يا اروى يا مصدر السعادة و اللطافة
دمتي بخير

مجد الحفظي
ضيف

انا مو مزاجية قد ما انا مكروفة مع الجامعة ? تاخذ كل جهدي النفسي و الفكري وكمان وقتي وراحتي..كانت عندي مدونة صغيرة و احب ارسم و أقرأ ويبدو أن فيه أديب صغير بداخلي .. حاولت اسوي روتين بس ف النهاية طلع يتمحور حول جامعتي و روضة بنتي .. يمكن لازم تتأجل بعض الأشياء لوقتها دام أزف التخرج الحمدلله..
شكرا أروى شكرا جزيلا .. ادام الله عليك النعم والسعادة واسبغ على قلبك الرضى و السكينة ..

بدور
ضيف

سبحان الله وأنا اقرأ قلت طيب ووقت النظافه والترتيب ?ولكملت لقيتك مستدركة فكرة جميييله ممكن اطبقها ???مبدعه اروى معادتك

بدور
ضيف

كعادتك

Daxmb1
ضيف

جاري تجربه الفكره ❤️ ججميله الفكرهه ماشاء الله ربي يسعدك ياحلوه ❤️☹

علير
ضيف

الله يسعععددك يا اروى انا للاسف مزاجيه فوضويه ملوله جدددا وهذي الفكره راح تساعدني كثيررر من الان بقوم اسوي لي كذا شكرا

جولزا
ضيف

صباحك انجاز اروى

و جاء اليوم الثاني وماشاء الله مستمره برافوو ، معك لباقي الايام بإذن الله

شفت هالفكره يوم نزلتيها بالسناب و مره حمستني جداً وحبيتها من هذا اليوم

و خاصة أني اشبهك بهالنقطه احتاج دايم دفعه و الهام و بوووش قوي للاني انجز الامر الي ابغاه بالوقت المحدد .

و ان شاء الله انفذ الفكره قريب

بكره ان شاء الله لنا لقاء مع تدوينة اليوم الثالث ?☕️

و في أمان الله

Rawan
ضيف

حبيت الفكره مررره يجزاك الخير يارب

بوح
ضيف

فكرة جميله ..جاري تجربتها

نوره
ضيف

فكرة مررره جميله ?
وجدا اعجبتني من يوم حطيتها ع السناب ??
انا كنت اسوي هالطريقة بواجباتي المدرسيه اني انجزها ?
احس اني كل يوم ااجلها لي سنه تقريبا معتمده ع هالطريقه?
ان شاء الله راح اطبقها باعمالي اليوميه ??

وسَن
ضيف

حبيييت الفكرة مرة ???، نحتاجها كثير علشان نجدد روتين ايامنا و يساعدنا اننا ننجز ، مٌبدعة م شاءالله عليكِ

Noüf
ضيف

جدا حبيت فكرتك ومن اول م شفتها بسناب كنت حابه اطبقها بس الوضع عندي م يساعد مررره انا نفس مزاجك ويمكن اسوا ?
دايماً احس بضغط وعندي مذاكرة ومشاريع في راسي ودي اطبقها وواجبات وعندي رغبات في اشياء ودي اطورها عندي وكمان زواجي قرب وفي اشياء كثير ناقصتني فصرت من كثر م اشوفها كثيره اتهرب وم اطبق شيء لذلك ذي الفتره فترة اجازه ح اطبق ذا الجدول ويارب ينجح معاي

نهى سعد
ضيف

إلهاميه دائماً ي اروى

فكرة جميلة صحيح كل يوم يروح عليك بدون ماتنجزين تحسين بضيقة قاسيه بس شوية تنظيم وانظباط يعطيك مشاعر ايجابيه

نتعلم منك كثير اروى

كل الحب

زهراء الصادق
ضيف

ما شاء الله تبارك الله ? دائما تحمسينا بإبداعاتك و إرادتك القوية رغم ظروف الحياة الصعبة ، الله يوفقك و ننتظر القادم من مدوناتك الجميلة بشوق ???

ريم
ضيف

فكره جميله وطرح اجمل من نزلتيها بحسابك وانا معجبه بها ومثل ما قلتي كل شخصيه لها جدولها المناسب وممكن تطبيق الفكره بعمل جدول لانجاز معين على مراحل المهم ان الفكره جميله وانيقه ?

مهوي
ضيف

فكره جميله جاري تنفيذ التجربه مرا فكره بطله خاصه للي يسوفون ومزاجيين شكراً لك مشاركتك لنا افكاروتجاربك ياجميله ?

هدى ?
ضيف

حبيت الفكره جدددا لانها تناسب شخصيتي .. فعلاً الشخص المزاجي صعب يتقيد بجدول صارم لكن فكرتك مرنه بحيث اختار الانجاز المناسب لمزاجي المتقلب .. ?
استمري في ابداعك لاني مستفيده جداً من حماسك وايجابيتك ماشاءالله .. بجد اعتبرك انسانه مُلهمه ومحفّزه ?

امل
ضيف

مره عجبتني الفكره وبطبقها ان شاء الله .لأن نفس نفسيتي أقوم مالي نفس اشتغل وبعض الأحيان اهرب من الشغل

Reemalaqeel
ضيف

السلام عليكم

Reemalaqeel
ضيف

الله يسهل لك

ALOY
ضيف

You are the best my dear ???❤️✨✨✨✨
ان شاء الله اطبق نفسك وأنجز أشياء نفسي فيها من زمان من ضمنها الخياطة بس شغلي فالبنك ما يسمح لي بعمل اي إنجازات تذكر ?? والويك اند يكون للراحة فقط كرهت روتين حياتي بس ان شاء الله احاول انظم روتيني للأفضل ?✨✨✨تحياتي لك يا مبدعة☺️❤️✨

لميس
ضيف

ماشاءالله تبارك الرحمن..من اشوف اسمك يجيني نشاط وحيويه واحس بتفاؤل طول اليوم..

اعجبت جداً بمدوناتك..ماقد حرصت اني اتابع مدونات شخص كثر ماحرصت على مدوناتك ..

يمكن انا اكبر منك بالعمر حبتين ☺️..لكن استفدت وتعلمت منك اشياء كثيره ..انتي تعتبرين طااااقه ايجابيه لي..

تمت المشاركه عبر تويتر ?

دمتِ بود ?

سارة المطوع
ضيف

ماشاء الله عليك اعجبتني التدوينة جداً وحبيت اعترافك بمزاجك انا عندي نفس المزاج بس اخجل بالافصاح عنه رغم ان ماعندي مشاعل اعترف بعيوبي الا بهذا المزاج ?
جاري المحاولة وشكرا والله يعطيك الف عافية ❤️??

‫wpDiscuz

أضف تعليق عبر الفيسبوك:





حمل