بلكونة جميلة ، لحظات أجمل ..

بلكونة جميلة ، لحظات أجمل ..

السلام عليكم ورحمة الله وبركاته

اتمنى انكم بأفضل حال 💕

اليوم جو روقان و تدوين وثرثرة

ومافيه شي يروقني أكثر من الطبيعة، الأشجار، أكسجين الصباح ،

بالنسبة لي وجود مكان خارجي  ولو كان صغير جدا مهم ويعطيني طاقة وحيوية ..

ومثل أغلب الناس، سهل اني أستهين بالمكان وما أستمتع فيه وأهمله إذا كنت أحس انه صغير ومافيه خضرة وطبيعة وماينجلس فيه مثل حالة أغلب البلكونات اللي في الشقق والحدائق المبلطة والصغيرة اللي في البيوت ..

لكن لكل مشكلة حل ، وأي زاوية ممكن تكون جميلة ببعض التعديلات و الاختيارات المناسبه للمكان..

بأعطيكم بعض الأفكار اللي نفذتها على بلكونة شقتي في كاليفورنيا ..

أولا على طاري كاليفورنيا ، فيه سؤال غريب يجيني بشكل متكرر وكل مره أستغرب منه بس حسيت مناسب أجاوب عنه هنا

انت ليه ساكنة برا ؟

ووجه الاستغراب اني أتوقع انه الكل يعرف انه فيه مجموعة كبيرة من السعوديين والخليجيين عايشين برا للدراسة، فأي شخص ساكن برا يا مبتعث أو مرافق مع مبتعث، أو في حالات نادرة موظف في أحد السفارات أو الجهات أو مرافق معه ..

المهم 🌱

قد قلت لكم أنا من الناس اللي مره صعب يعجبني شي إذا كنت أحس اني بألتزم فيه وقت طويل ، يعني صعب أقرر بسرعة على بيت معين أو شقة أو حتى كنبه..

أي شي أحس اني بأقضي فيه وقت طويل وما أقدر أغيرة ممكن أجلس شهور وأنا أبحث عن المكان المناسب اللي أحس اني بعد فترة ماراح أندم على قراري..

وهالشي متعب لأني أدقق على كل نقطة ، ومافيه شي كامل، إلا مايطلع شي غلط أو شي مايعجبني في المكان..

مع ان متطلباتي سهلة (من وجهة نظري طبعاً ههههه)

أهم شي عندي في السكن يكون فيه شبابيك كبيرة ومو مكشوف للناس، ومايكون دهاليز من جوا أكره الأسياب تجيب لي تكّه.. ويكون فيه مكان خارجي سواء حديقة أو بلكونة

طبعاً في البداية كنت أبغا بيت ، أبي أزرع وأعيش جو، لأن الجو الحلو فرصة ماتتعوض..

دورنا ودورنا ..

ويأست من البيوت ، بيوت كاليفورنا غير انها مره غاليه ، مره قديمة ، وبعيدة عن الجامعات ، غير عن الشقق اللي تكون فيها صيانة دائمة وكل شي جديد وكل الخدمات قريبة منك ..

فَـ بقلبٍ مثقل قررنا نشطب فكرة البيت وندور شقه ..

كثير من الشقق يجي معها بلكونة صغيرة أو مساحة خارجية لو كانت في الدور الأرضي ،

المشكلة ان البلكونات غالبا تكون مكشوفة ، وهذ الشي جدا مزعج لأنه مافيه خصوصية وبأحتاج ألبس كأني بأطلع عشان أطلع فيها..ومستحيل أسوي كذا،

وبعد كان فخاطري مكان خارجي تجيه الشمس و أقدر أسوي فيه تان << عايشة فلم في راسي بلكونة فيها ذاك الكرسي الانسداحي < بس خلونا ماندخل في التفاصيل ههههه

وبعد فترة لقيت شقة مرتبة وقريبة من الجامعة وجديدة والجميل فيها انها واسعه وشبابيكها كبار ومشرقة ، لكن كالعادة كانت مشكلة بلكونتها انها مكشوفة ..

لقيت صورة بالضبط نفس بلكونتي من نفس الشقق اللي كنت ساكنتها ، لكن بلكونتي بدون كراسي وطاولة واصغر من هذي شوي

بلكونة جميلة ، لحظات أجمل ..

بحثت عن حلول عشان أخلي المكان خاص وفي نفس الوقت ما يكون مكتوم ومغلق ..

لحسن الحظ ، بلكونتي كانت تطل على أسطح قراجات (مواقف سيارات) من جهه ومن الجهه الثانية فيه شقق وبلكونات..

صحيح منظر القراجات بشع لكن على الأقل ماكان فيه بلكونات مقابلتني مباشرة مثل الجهه الثانية ..

يعني لو غطيت الجزء المكشوف بيكون المكان مستور وأقدر أطلع فيه بلبس البيت..

كان فيه خيارات كثير لقيتها مثل الستائر ، بارتشن خشب ، بارتشن من اغصان البامبو ، وقماش مخصص لتغطية البلكونات ..

مثل هالأشكال تقريباً:

 بلكونة جميلة ، لحظات أجمل .. بلكونة جميلة ، لحظات أجمل .. بلكونة جميلة ، لحظات أجمل ..

لكن ماعجبتني هالخيارات ، صحيح انها توفر خصوصية ، لكن بتحجب أشعة الشمس لأن بلكونتي لها سقف ..

كنت حريصة تدخل الشمس لأني أبغا أحط بعض النباتات الخارجية 🌼 ولأني أحب النور يدخل على الصالة ..

لو ماكان لبلكونتي سقف كان الاختيار بيكون أسهل ..

وأنا أتمشى في محل النباتات لقيت عندهم ألواح خشبية مخصصة للنباتات المتسلقة ، وفجأة خطرت فبالي فكرة اني أستخدمها كحاجز واحط عليها نبات متسلق ، بهالطريقة النور يدخل و أنا أقدر أشوف المنظر من فتحات الخشب لكن الناس مايكشفوني لأن الفتحات صغيرة مايمكن تكشف من بعيد بعكس اللي يكون قريب منها ..

مثل النظر من خلال فتحه صغيرة ، عينك ممكن تشوف كل شي برا الفتحه لكن البعيد مايقدر يشوف شي منها ،،

المهم ، اخذت ثلاث ألواح للتجربة ، وركبتها على سور البلكونة بحبل قوي ،

وكانت النتيجة مرضية .. جدا عجبني المنظر ، كان منظر القراجات والشقق غير جذاب ، بس بعد ماحطيت الخشب صار فتحتات نور جميلة ..

بلكونة جميلة ، لحظات أجمل ..

كنت بارجع آخذ زيادة من الألواح لكن فضلت أترك نصف البلكونه مكشوف لأنه ماكان مقابله أي شقق وماكنت ناوية أجلس فيه فتركته بدون ألواح .. لكن لو كان مكشوف كنت زدت الألواح للأخير ..

الآن حلينا موضوع الخصوصية بنجاح ..

لكن باقي مشكلة المكان أبدا مايبعث على الراحة ،

الأرضية اسمنت مبقع مو مره نظيف وخشن ما أرتاح أمشي عليه بدون جزمة، حتى سليبر البيت الي يكون من تحت قماش أخاف أطلع به يتوسخ ويتشقق ..

فبدأت رحلتي الثانية عن حلول للأرضيات ..

لقيت ناس حاطين فرشه مخصصة للساحات الخارجية ، لكن استبعدت الفكرة لأني خفت المطر يبللها ..

ولقيت ناس مبلطين البلكونة ببلاط حجري جدا جميل ، لكن استبعدت الفكرة لأن مو مسموح لنا نسوي تعديل مثل هذا على الشقق ، غير كذا مكلف وبنجلس سنتين ونتركه فما يستاهل أبدا التكاليف ..

بحث كثير لحد ماطحت على شي جددددا جميل وقعت في حبه من أول نظره ،

اللي هو الخشب المتنقل ..

بلكونة جميلة ، لحظات أجمل ..

غير جمال المنظر ، الخشب هالنوع يتركب وينفك ، يعني أي مكان ننقل له بكل سهوله نشيله معنا ونركبه في أي مكان ..

واللي ريحني كثير انه فيه فتحات وتحت الخشبات فيه بلاستك يرفعه عن الأرض، فلو جا مطر او طاحت الاوساخ او جت حشرة كلها تكون تحت الخشب تنزل من الفتحات ، فيصير نظيف ولا يتبلل

مشكلته الوحيده انه شوي مكلف أكثر من البلاط والفرشه ، لكن في الجانب المشرق هي مره وحده وخلاص يبقى معنا للأبد لأنه خشب أصلي ممكن يتصنفر ويصير جديد ..

قست البلكونه وطلبت الخشب من هالشركة Build Direct وقتها ماكان متوفر في ايكيا ولا في اي محل مشهور عشان كذا ما اكتشفته الا بعد بحث ، حتى المحلات اللي تبيعه ماكانت كثير ..

الحين موجود منه في ايكيا ارخص من المحل الي طلبت منه وسعره جدا معقول وان شاء الله انه نفس الجودة .. الفرق بس ان اللي في ايكيا كل مربع بداخله ٤ مربعات صغيرة .. حقي كل مربع مافيه الا خطوط ، فالشكل النهائي بيكون مختلف شي بسيط ..

ابحثو عنه باسم deck tile

بلكونة جميلة ، لحظات أجمل ..

وممكن مانشتري الخشب للمساحه كاملة ، شفت ناس مركبين خشب وحاطين معه حجر ناعم اللي يستخدم للزينة ،

يعطي شعور مريح كأنك في سبا ومكان للاسترخاء ..

ممكن نفرغ بعض المربعات ونحط بدالها حصى لو ماكفى عدد الخشبات للمكان .. وطبعاً يقلل من التكلفة

بلكونة جميلة ، لحظات أجمل ..

بعد ماركبتها تحولت بلكونتي تحول هائل ..

طلعت توحي بمساحة أكبر بكثير من الي كانت عليه ، وطلع شكلها نظييييف حتى ممكن أطلع بدون ما ألبس سليبر البيت من نعومة الخشب ونظافته ..

طبعا بعد ماركبت الخشب ركضت لمحل النباتات وخذت لي كم اصيص وكم وردة وشجرة وصفيتهم

وتارا بدا يستكشف الوضع ويتأكد من خلو المنتجات من الحشرات المثيرة للصيد

بلكونة جميلة ، لحظات أجمل ..

على طاري الحشرات ، لا مافيه حشرات في النباتات إلا لو كانت مهمله وماتتغير تربتها أو نبته مريضة .. إيه فيه نباتات يمرضون ويجيهم سوس بعد ههههه

المهم بعد ماوزعت الورد والنباتات طلع المكان مريح ويفتح النفس الحمدلله وصرت أحب أطلع فيه كثير خصوصاً الصباح أفطر برا ، أكسجين الصباح غييير

بلكونة جميلة ، لحظات أجمل ..

ما اشتريت كرسي خاص للبلكونه كنت حابه أحط كرسي وطاولة أو كرسي هزاز ..

بس انشغلت بأشياء ثانية ومؤقتا حطيت واحد من كراسي الأكل وبعض المخدات ..

حتى من داخل البيت تغير شكل الصالة لأنها صارت تطل على حديقة صغيرة وخضرة بدل ماكانت تطل على حديد واسمنت واسطح قراجات..

بلكونة جميلة ، لحظات أجمل ..

 التصوير صار ممتع وله خلفية جدا جميلة وتوحي بالنظافة والترتيب والطبيعة..

 بلكونة جميلة ، لحظات أجمل ..

أنا استخدمت هالأفكار لأنها ناسبت مع مساحتي ومع احتياجاتي ومع ميزانيتي ،

وتعرفون طبعا نقلت قبل فتره من شقتي واخذت خشبي وان شاء الله أوريكم المساحة الجديدة خطوة بخطوة ..

انتم ممكن تستخدمون أفكار ثانية لحدائقكم أو بلكوناتكم حسب اللي يتناسب مع الظروف والميزانية والبيئة بعد ،

هذا موقع جدا جميل تكتبون فيه كلمات مفتاحية للبحث ويطلع لكم أفكار جدا جميلة

pinterest

مثلا إذا عندكم مشكلة الشمس اكتبوا patio shade أو balcony shade

إذا المشكلة انه الجدار سيئ اكتبوا patio wall او balcony wall

ترجموا أي كلمة تمثل المشكلة واكتبوها في البرنامج،

لحد يقول لي عندنا غبار ماينفع نحط شي، زي ماقلت ، لكل مشكلة حل, وبالعناية أي مكان بيطلع جميل ..

طبعا الكلام هنا عن البلكونات والمساحات الخارجية .. أما مشاكل البناء والغرف هذي صحيح لها حلول لكن أحيانا ماتكون بمقدورنا نتصرف فيها ..

عشان كذا من الحكمة اننا في حال بحثنا عن سكن نحاول مانتنازل عن الأشياء اللي مانقدر نحلها مثل تقسيم البيت او عدد الغرف او حجم الشبابيك، ونتنازل عن الأمور الأسهل أو اللي بمقدورنا نتصرف فيها او نستغني عنها ، مثل المساحات الخارجية ونوعية الأرضيات والجدران ودورات المياة ..

وبالنسبة للغبار،

ممكن يتسكر المكان بزجاج أو مظله أو شي مثلها بحيث تدخل الشمس ولا يدخل الغبار ، او حتى مو لازم شمس في المناطق الحارة الظل أفضل ..

ودائما حتى لو حر ومانقدر نطلع في المكان طول اليوم على الأقل الصباح الجو حلو وفي المسا يكون رايق مع الشموع أو الأنوار المعلقة والأشجار وممكن نركب رذاذ يلطف الجو..

أو يكفي انه منظر يجمل البيت من جوا ويعطيه مطل حلو ..

وخذوا صورة تحفيزية لحديقة نقطه عشان لا أحد يحقر صغر المساحة ههههه

بلكونة جميلة ، لحظات أجمل ..

اكتبولي رأيكم و عطونا مشاكل مساحاتكم ندور لها حلول مع بعض..

وجدا استمتعت بالحديث معكم ،

أتمنى لكم يوماً ملوناً ..

 🌷

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

308 تعليق على "بلكونة جميلة ، لحظات أجمل .."

avatar
فرز بواسطة:   الأحدث | الأقدم | الأكثر تصويتاً
نورة
ضيف

الطبيعة الخلابة تبعث البهجة في النفس
اعجبني تنسيقك جعلتي المكان جميل رغم إنه صغير
انا افكر أحط جوى الشبابيك شتلات صغيرة ورد وخضرة بتعطي خلفية حلوه وكل مافتحت الشباك أحس بهواء نقي وخضرة كاني عايشه جوى حديقة 😂💕
الله يسعدك أروى ويرزقك ماتتمنين وزيادة🌼☁.

ام عمار
ضيف

تجنن البلكونه ماشاء الله عليك
انا افكر اسوي بلكونه جبتيلي افكار جزيتي خيرا🌹

nada khaled
ضيف

رائعة الفكرة 👍🏼 مااشاء الله😍
عندي بلكونة ونفسي اسويها كذا 😭 بس الجو هنا مايسمح حر ورطوبة 😩😭

A☘
ضيف

تدوينه جميله جداً وملهمه 💜
اعجبتني الادوات الي استخدمتيها ، ونبهتيني على أفكار
كثيره في استغلال المساحات ..
شكراً لك جداً ✨

Bero
ضيف

جمييييله ماشاء الله 😍🌱

فاطمه محمد
ضيف

فكرتك حمستني ودفعتني لتحسين حوشي المهمل وبالفعل خلال اسبوعين تغيير المكان واصبح لا يمل الجلوس فيه. كنت اتمنى ارسلك صورته وتشوفين كيف التغيير. وبالفعل حابه تشوفين المكان قبل وبعد لكن كيف ارسلها لك.شكرا لك

😘بنت فلسطين
ضيف

ههههههههههه
اي والله

أمل حمد
ضيف

إبدااااع تبارك الله اتمنى لك مزيدا من التقدم 💞

ندى أحمد
ضيف

ماشاء الله بارك الله .. أروى أنت انسانة ملهمة ، حفظك الباري

اريج الشويعر
ضيف

السلام عليكم
هلا …. اروى 🌺
ماشاء الله بارك الله انا من المتابعين الجدد واستمتعت جداً برؤية افكارك في المدونه انت انسانه رائعه ومبدعه بكل ما تعنيه الكلمه اتمنى لك التوفيق والنجاح 💕🎀💕🎀💕🎀💕🎀
عندي استفسار اذا سمحتي
عندي في بيتي مساحه صغيره وودي احوله لحديقه اجلس فيها انا وعائلتي
فطالبه مساعدتك اذا تكرمتي 💗🎀

اريج ناصر الشويعر
ضيف

💕🎀استمتعت جداً أروى بمدونتك انا من المتابعين الجدد لحسابك صراحه ماشاء الله تبارك الله انسانه مبدعه بكل ماتعنيه الكلمه 💕🎀
عندي استفسار اذا تكرمتي 🌺🌺
ودي تساعديني في مساحه خارجيه في بيتي ودي اصلح حديقه صغيره
مثل بلكونتك الجميله 🎀🎀💗💗

منال
ضيف

جداً استمتعت بالافكاار وماشاء الله شكل البلكونه جميل جداً جدا

طيف
ضيف

ماشاء الله تبارك الله 😩💜💜💜💜💜💜💜

فاتن
ضيف

ربي يحفظك وين ما كنتي

نوف
ضيف

جدا جدا جميل الموضوع وجاء في وقته اشكرك من اعماق قلبي❤️❤️

Abrar
ضيف

جمالك وجمال افكارك 💖💖

أمينة
ضيف

تعجبيني أروى بترتيبك واختياراتك ربي يسعدك ❤️

عائشة
ضيف

جميييل جداً يا مبدعة ماشاء الله 😍

Zooz
ضيف

كالعاده موضوع ممتع و متكامل 😍

Salam
ضيف

رائعة 👍🏻👍🏻👍🏻
ممكن أسألك من وين الألواح الخشبية اللي استعملتيها حاجز انا بأميركا في ولاية أوهايو عندي patio مكشوفة من جهة وحدة بس عالجيران وحابة اعمل مثل هالحاجز كثير حبيته 😊😊

ام مها
ضيف

الله ينفع بك 💕💕💕

Sora
ضيف

حبيييت ، الله يسغدك يا أروى كثر ما تسعدينا و أكثر 💞

Jojyreemy
ضيف

رائع جدا، شكراً جزيلا على المعلومات القيّمة😘

منال
ضيف

واللي ماعنده بلكونه أبدا بس شقه

عهود
ضيف
اهلاً اروى 💕 استمتع جداااا بأفكارك و طاقتك الايجابيه ما تتخيلين كيف توصلني و تسعدني .. بما انك قلتي بتساعدينا يلا تحمليني 😂 انا ساكنه مع اهل زوجي قسمي فيه باب زجاجي ينسحب و تطلعين على السطح و المساحه مو صغيره و لا كبيره مره بس جداً مهمله احواض نباتات كبيره جدا و الزرع فيها ميت ما فيها انوار كثيره يمكن لمبتين الميزه الوحيده انه نظيف يستخدمون المكان فقط بنشر الغسيل كثيير حاولت استغل المكان و اعدله لكن خفت اتكلف و الجو ابدددا ما يساعد انا في الشرقيه و رطووبه بالشتا خليت عامل يركب لي كم عمود بشكل مربع و… قراءة المزيد ..
نوف
ضيف

ممكن تزينينها باللي ودك بس حل الحر ممكن تحطين مكيف صحراوي وزينيه من الجوانب وكذا وبيطلع بارد وشكله حلو
أو اذا تعرفين المروحة السواداء الطويلة جيبي ثنتين او ثلاث او اكثر حسب المساحة الموجودة عندك
مدري كيف أوصف لك شكلها لكن هي من تحت مربع زي العلبة كبيره شوي تملينها موية باردة بعدين عمود طويل يوصل بالنهاية للمروحة ومعها رذاذ خفيف وممكن تحطينها ع مكان واحد وممكن تدور يعني زي اتعرفين بس مره حلوه لا يصير الحر دافع وحادز انك تتركينها بالعكس تحمست اجي عندك وازين ههههه

ام عمر
ضيف

اللهم بارك 😍😍😍 ذوووق

اميره
ضيف

ماشاءالله عليك ، اروى انا بيتي شقه وفيه سطح وناويه اسوي فيه حديقه ومزرعه صغيره ازرع فيه الخضار اللي استهلكها كثير للسلطه ، ابي اعيش الجو هذا .. لكن لا اعرف شي عن الزراعه والعنايه فيها ..

في خيالي تصميم للسطح لكن اذا طبقته راح ارسلك صورته .
احبك في الله

آم تكي ❣
ضيف

كانك تتكلمين عن بيتي نفس بيتك انا شقتي بلملحق والسطح عندي مساحه لاباس فيها وناويه نفسك على انه ازرع اكثر حاجه استعملها طماطم نعناع ليمون خيار وورد للحين اجمع افكر 😭 لسى مانفذت حاجه 🤕اذا سويتي شي ابغى اشوف اخذ منك افكار😅

هيفاء الربيعه
ضيف

مبدعه كالعاده ، تبعثين روح التفاؤل بلمساتك .. لك ذوق جميل يميزك عن غيرك💕

غالية
ضيف

موضوع مهم و رائع يعطيك العافيه 😍🍃

عضو

موضووع لطيييف جدا جدا جدا .. يبعث الاسترخاء و الهدوء ..
و انا اقرا الموضوع حسيت بالنعاس هههههههه .. مكان لطييف و مرتب و النباتات جميلة و كل شيء رايق ..
يعطيك العافية اروى .

وُجود
ضيف

يا حلوك يا أروى ويا حُلو سواليفك المليانه فوائد ♥️♥️
من زماان من لما كنتِ في كالفورنيا وأنا معجبة ببلكونتك ماشاءالله
جميلة جدًا جدًا وشرحة وألوانها جذابة ماشاءالله 💘
أنا ساكنة في دور وعندي مساحة خارجية -سطح- ومو عارفة كيف أستغله لأن المساحة كبيرة شوي والمكيفات للأسف موزعة فيه ومخربة المكان 👀، ولحد الحين مابعد عرفت كيف أسوي لي جلسة وحديقة خارجية تناسب أجوائنا الصحراوية وتناسب سطحي 💔 ..
المُهم التدوينة ملهمة 😍♥️ شكرًا لك 💕

Atekah
ضيف

🙈🍃💕افكر اسوي لي شيء مثل كذا مكان صغير وهااادي وفيه كم نبته ويونس😍💘بس بيكون في غرفتي😂💔عاد ما ادري اذا باقدر او لا🤔فكرت مثلا طاوله صغنونه فيها كم نبته وشمعه وكرسي هزاز فيه وسادات ناعمه وكتاب ومشروب وبعض الحلويات💕المشكله في تقسيم الغرفه احسها واسعه وضيقه في نفس الوقت والشبابيك والارضيه مزعجين نوعا ما😂😩وبس والله ما تتخيلين اقد ايش تونس هالتدوينه😍🙊وحطيت ببالي افكار حلوه🌈واتمنى لك يوم جميل ايضا😁

شاز
ضيف

حلووة حركت ..
بالعكس الشبابيك الارضية حلوة

Ghadah
ضيف

عاشت يدك اروى ماشاء الله ذوقك راقي لازم ادرسين شي خاص بdesign افكارك دائما تعجبني اني من محبه الترتيب وديكور وان شاء الله اكدر بيوم ادرس اختصاص خاص بيه بلنسبه الي اني ساكنه بكندا بشقه بس للاسف اهل العماره ميقبلون نحط اي شي بلبلكونه فمحرومه من الحديقه ومن الزرع بس حاطه بشقه جم زرعه بس تبقه شقه مساحتها صغيره دمتي ودامت ايامج كلها تفائل وجمال ❤️

سُميه
ضيف

جميله جدا ياروى، حسيت بالدفء والايجابيه… الله يباركلك حبيبتي ويسعدك 💜💜

twense
ضيف

جمييلة جدا ماشاء الله 🙆🏻
حبيتها خصوصا اني من اللي يحبون هواء الصبح والنبات والشمس وووو تخيلت الراحة واستمتعت بجد الله يهنيك💕

حنو
ضيف

يازينك ويازين افكارك مره تعجبيني ماشاءالله عليك من زمان عجبتني بلكونتك والحين عشقتها ماشاءالله الله يسعدك 💕💕 وان شاءالله اسوي لي مكان مرتب من زمان افكر فيها 🤔😍

وفاء
ضيف

يعطيكي العافيه،انا انسانه رومانسيه واحب ضوء الشمس والصباح واكره الليل،واحب هذي الاجواء الرايقه لكن للاسف الى اﻵن ماحصلت عليها

طموح
ضيف

جدا جميلة ماشاءالله عليك

مروة الحربي
ضيف
ماشاء الله تبارك الله روووعة ,, انا اشق الجلسات الخارجية في بيت اهلي الحديقة تعتبر جزء مهم من البيت ونقضي فيه وقت العصرية الى المغربيه , بعد ماتزوجت نقلت ايرلندا وكانت البلكونة من المحرمات لانها كشف 😛 ,, الان نقلت استراليا ومازالت البلكونة خارج موضوع النقاش , بعد بحث طويل لقيت ان فيه اشياء تغطي البلكونة بحيث انها ماتكتمها , والحمدلله جاتني الموافقه , بلكونتي مترين في متر ونص , وابدا مامنعتني المساحه انه اسوي لي مكان اهرب فيه , خاصه ان الجو الان متقلب وتجي اوقات هتان خفيف ونسمة هوا باردة جميله , ماشاء الله بلكونتك جميله جدا ,… قراءة المزيد ..
أفنان
ضيف

يسعد قلبك يارب على هالثرثره الجميله 💕
موضوعك رايق كان عندي بلكوني وانا باستراليا وحنيت لها من موضوعك 💔😭
الان للأسف شقتي بدون مساحات وهالشي مره مضايقني بس بإذن الله الأيام الجايه أجمل ❤️

شكراً أروى الله يسعدك كثر ماتسعدينا 💕💋

مريم
ضيف

اللهم زد وبارك في ابداعات اروى الجميلة بجد الفكر راقية وجميلة سلمت غاليتي

عضو

اروى بلكونتك روعة روعة روعة بكل ما تعنيه الكلمه من روعة .. اتمنى يكون عندي بلكونة و اسووي زي مدا و احط نباتات .. عند اهلي في نباتات كنت كل يوم اهتم فيهم و انضفهم بس هنا في امريكا ساكنة في ابرد ولاية اللي هيا منياسوتا 🙁😕🙁 فما تنفع تسوي زي كدا ببلكونتك لانو جدا برد شيء مستحيل احد يطلع لها ..

رؤى العبدالله
ضيف

موضوع جميل جداً.. سلمت أناملك💜

Nada
ضيف

ماشاء الله تبارك الله
مكان جميل ومريح

ساره
ضيف

رائع جدا عندي نفس المساحه بأمريكا وانوي عمل نفس الشي اذا رجعنا في سطح بيتي
الخضره والشمس ضرووووريه للاحياء بدونها يشعر الشخص بالاكتئاب
وافكارك دااائما شامله ومانتي مخليه اييي تفصيل يفووت الله يوفقك ويبارك لك في وقتك وجهدك

masheal saadi
ضيف

افكااارك مررة ذووووق 🌸

دورا
ضيف

ماشاء الله
تدوينة جميلة وأفكار ملهمة فعلا
حمستيني أغير في اللي عندي
ألف شكر 💜💜💜

Nada.M
ضيف

ماشاءالله مبدعه دائماً👏🏻
من عشاق الحدائق والنباتات لكن بعد ماجبتهم داخليه جوا البيت ماتوا💔 وتحطمت واصبت بخيبة أمل😢

Assar
ضيف

يوم بتشترين النبات اسألي الزراع اللي في المحل كيف تعتنين فيها .. وكم مرة تحتاج سقاية في الاسبوع .. والسماد والتربة اذا يحتاج تبديل بين فترة و فترة ولا لا

تراها تسوى التعب لانها تعطي جو حلو في البيت 😘

سارا
ضيف

ما شاء الله مررره جميل
وافكارك دايم حلوه والموضوع هذا يفتح النفس
جاني حماس اروح الحين اجيب الادوات واسوي نفس كذا ههههههههه

ام مجد
ضيف

سلمت يمناك … وجزاك الله عنا كل خير لما تقدمين من أفكار وخبرات ومعلومات . احبك في الله اروى العمراني ❤️

Haneen
ضيف

براڤو ✔️💛💛💛💛
حبيت مرا استغلالك للأماكن اللي تجلب لك الراحه 💟
عطيتيني افكار اني استغل جزء من السطح 😍✔️

أروى☁️
ضيف

تدوينه جميلة كعادتك ماشاء الله وفيها كمية لطافه😻✨
ننتظر تدوينه شقتك الجديدة احب افكار الديكور🙊
واتمنى لك يوم لطيف💛

Bainah
ضيف

ماشاء الله تبارك الرحمن جميله وحلوه افكارك 💜💜

mimi
ضيف

فكرة الخشب جدا جميله وانت جميله ياأروى ربي يسعدك مواضيعك جدا ممتعه وأحب اقراها بتركيز 😊 ..بس سوالي مع الوقت اذا دخلت الاوساخ في فتحات الخشب كيف انظفها لها طرق تنظيف او لها فتحات جانبيه ؟!

وفاء محمد
ضيف

ممكن انو تشيل الخشب وتنظف الي تحته وترده ؟

Assar
ضيف
موضوع حلو انا من فترة سكنت بيتي الحمد لله بعد انتضار البنيان مدة سنتين .. احس بنيان بيتي نفس ذوقج .. كنت جدا حريصة انه ما يكون في ممرات و غيرت و عدلت عالمخطط لين الحمد لله استغليت المساحات بدون ممرات و بلكونه .. مع انه البيت صغير لكن المساحات مستغلة ولله الحمد وبلكونتي فرشتلها ارضية خشب من ايكيا بعد ما جفت صورج وانتي تعدلين الخشب في الانستا .. شكرا كان مفيد لي .. بلكونتي بما انه انا بانية البيت خليتهم يحطون بدال الحاجز الحديد طابوق مال اكثر من متر ارتفاعه و الباقي سويتله حديد مشغول وعلقت عليه اصايص (… قراءة المزيد ..
Reem
ضيف

Love ur ideas ., and your negative spirit

Sam.Siyabi
ضيف

يااااا رائعة…. أنت كنت أتجنن عاى بلكونتك من وأنتي في كالفورنيا.. وفعلاً أفكارك ملهمة…
كنت أدور كثير على الخشب (أيامها ما كنت أطلب اونلاين)
المهم سبحان الله من فترة حصلتهم في كارفور قسم الجلسات الخارجية ،.
وأخذتهم وطبعاً بنترست وأنتي .. نظفتهم ورتبتهم في مكان بالسطح لأنها المساحة الوحيدة المتوفرة لي ..
الحين المرحلة الثانية في الديكوورات .. وآخر شيء النباتات لأنه لسه ما انتقلت لبيتي ..
واني اشوف موضوع عن ارضية البلكونة مرة… اتجننت

Halimah Mohammed
ضيف

صباح الخير🎀🌞
اولا: شكرا على جهودك الجميلة والجبارة
تعطينا دائما نظره مختلفه وايجابية من جميع الزوايا

ثانيا:اتمنى جد اعمل بلكوتني لكن جدارها رفيع فقط
سقفيه مكشوفه وكل ما اشتري اصيص ورد يموت ماعندي خبرة بالورد ونباتت ولكن حمستيني اليوم اشتغل عليها
وببتدي من الأرضية💪💕

شكررررا لك أروى❤💓🌹🌷

Wallaa najep
ضيف

يعطيكِ ألف عافية ، ماشاءالله مررة جميلة
و فكرة جداً جداً حلوه ، حسيت بحماس 😍😍😍😍

وفاء محمد
ضيف

الله نقسيتي انفتحت ما شاء الله تبارك الله 🙂
مرره فكرت اعمل زي كذا في بلكونة ستي بالذات انو هي تحب هذه الاشياء وحقتها مقفله من الجوانب من صعب بس المشكله انو مفتوحه من فوق وجمبنا عمارة بتنبني يعني العمال الي في العمارة يشوفوا لانها طويلة ( يشوفونا من فوق و حتى الله يهديهم يجلسو يرمو الاسمنت عليها 🙁 فا اخاف لو قفلتها من فوق بحاجز ولا شي يصير مافي مكان للشمس وتتصير غرفة من كل مكان مقفلة
ايش ممكن اعمل 🙁 ؟

هجير الشمس
ضيف

وعليكم السلام ورحمة الله وبركاته
هلا غلاتى منوره ياعسل افكارك وصورك ورسوماتك عاجبتنى مافيها كلام
انتى مبدعه ماشاءالله تبارك الله واهم شئ انك تفيدين وتستفيدين
انت رائعه اروى ارجو لك من الله دوام السعادة والرضا

لمياء الرشيد
ضيف

ابدعتي يامبدعه ماشاء ٱلٱـَّہ على الافكار ترقبي حديقتي الصغيرة قريبا 😉😁 اناا عندي مشكلة اللي بلط البيت موب زين فيتكسر خاصه اماكن معينه تكسر وطلع التراب وصار خطر حتى على ولد افكر اعبي الاماكن اللي تكسرات عشب صناعي او حجر 😥

هجير الشمس
ضيف

زين انك تستفيدين من افكارك وتفيدين وهذا شي جيد لكى
خير الناس انفعهم للناس انا مبسوطه انى اتعرفت عليك
قبل ثلاث اعوام كنت ساكنه فى قريه وعندى فيلا حوليها سور بجنب البيت
وكنت زارعه ورد وريحان ونعناع وليمون وسدرة نبق وشجرة زيتون
وشجرة اسمها شار عاد هذى محل ماتحطين منها ورقتين تنزرع فمليانه حديقتى المتواضعه 😀 وبحكم المدارس جينا المدينة 😢 ساكنين انا واولادى واحفادى فى شقة مافى لاشمس ولاسطوح

سامية
ضيف

بصراحة أنت قمة بالروووووووووعة كلامك وترتيبك يعجز الشخص لتعبير عن روعة أفكارك

عضو
تسلم الايادي اخت اروى فكرة جميلة حلو اننا نحاول نبث الجمال في كل ما حولنا ونحاول نبتكر افكار تزين منازلنا حسب اذواقنا و حاجاتنا و ميزانياتنا انا كمان عندي مساحة خارجية تابعة لمنزلي بتطل على قناة مائية مساحتها معقولة لما استلمت البيت كانت كلها رملة وفيها عمود إنارة شكله حلو بس ما بيشتغل و بعدين جبتلها ارضية اسمنتية وغطيتها بالكامل اخذتلها سياج بس لسه ما ثبتناه بحس ان شكلها كئيب وما عرفت كيف اغيرها بس مدونتك اليوم بثت فيا روح الحماس رحت جبت بيت عصافير وعطيتها لون بالدهان الازرق وحطيت كم اكلة للعصافير وشلت السياج وحطيته على جنب عشان يجف… قراءة المزيد ..
‫wpDiscuz

أضف تعليق عبر الفيسبوك:





حمل