كيف تعلمت اللغة من الأنترنت

كيف تعلمت اللغة من الأنترنت

أهلا بكل شخص حماسي داخل يقرا الموضوع عشان يلقى طريقة يتعلم فيها ويطور نفسه .. أرفع لك قبعتي الاحترامية،

بأكتب لكم قصتي وَ بعض المواقع التعليمية وَ مميزات التعلم من الانترنت.

وهذه قصتي ..

كيف تعلمت اللغة الانجليزية في ٦ أشهر من البيت ؟

((أولا)) نبذة عن تاريخي البائس مع اللغة:

أنا ولله الحمد تخرجت من مدارس تحفيظ وهذا يعني أني درست نصف منهج اللغة الانجليزيه بالنسبه للمدارس العادية.

وكنت أكره شي اسمه انجليزي، وكنت يمكن أسوأ وحدة في الفصل بسبب مدرسة كرهتني في اللغة.

بعد ماتخرجت من الثانوي بدا اهتمامي بالانترنت واليوتيوب يكبر و صرت ابغا اتعلم اكثر عن الرسم لكن كلش انجليزي

وكل المقاطع انجليزي، شوي شوي بدت عندي “رغبة” في تعلم اللغة ..

((ثانيا)) جربت اجيب مدرسه في الصيف وجربت اروح اكاديمية الفيصل وباختصار ما استفدت اي شي يمكن كلمتين او ثلاث واقولها بصوت واطي وبدون ثقه انها صح ..واطفش مع الوقت من الدراسه معهم وانسى كل الي قالوه

((ثالثا)) قرأت مره عن عالم افتراضي مثل اللعبه .. دخلته من باب الفضول كان عباره عن شخصيه تمشين بها وتوديك للاماكن وتتكلمين مع ناس ثانين كذا بس لعب.

تركتها ورجعت لها بعد اكثر من سنه صارت تطورت واكتشفت ان في هذي اللعبه يوجد مدرسه لتعلم اللغه رحت كذا من باب التجربه والا انا ماكنت اعرف وش الفرق بين (كيف الحال)و( مين انت) بالانجليزي؟؟

كانوا يتكلمون عن الالوان والاشكال وحاطين عرض باشياء اشوفها قدامي ، حسيت اني استفدت كم كلمه بس كنت على الصامت مستحيه اتكلم عندهم وانا ما اعرف شي..

 قالوا لي اذا تبين تدخلين المدرسه الرسوم ٣٥ دولار يساوي حوالي ١٣٠ ريال في الشهر.. مبلغ مره بسييط بالنسه للاكاديميات.. ومتواجدين على مدار الساعه وهذا شي حلو لاني كنت اسهر وادخل المدرسه الفجر ، والي حمسني ابدأ واتكلم انه محد يشوفني ما انحرج من لغتي قدام احد..

والمدرسات يشجعون على الكلام بشكل كبير يخلونك ماتستحي من لغتك وكل الي حولي او بعضهم من الطلاب جنسيات مختلفه ولغتهم الانجليزيه زيي مايعرفون شي..

 وصرت ادخل يوميا اقضي وقتي ع اللابتوب وادرس معهم كانت غالبا محادثه اكثر من كونها دروس كنت اتجنب حصص القواعد والقراءة لان حصص المحادثه اونس، ادخل المحادثات والالعاب ومع الوقت صرت اول شي افهم وش يقولون واللي اكثر شي فرق معي اني صرت ما اخجل من الكلام باي شي لان اذا تكلمت يصححون لي اما لو اكون ساكته ما اتطور، كنت في نفس الوقت اي شي احب اتفرج عليه احرص ما يكون فيه ترجمه حتى لو مافهمته اعيده ..

..

وعلى هذا الحال ثلاث اشهر تقريبا صرت اتكلم واعبر عن اي شي بخاطري بس لغه مكسره شوي ، بعد شهرين زياده اختبرت وصار مستواي (متقدم) وطلبوا مني اكون جزء من طاقم الاستقبال للمدرسه كمثال على الطلاب الي بدأوا من الصفر عشان يتشجعون الي يدخلون ..

 اقدر اقولكم بعد كذا صرت اتكلم وافهم اغلب المقاطع الي اشوفها او الافلام بدون ترجمه لدرجة اني بعد ماسافرت لامريكا واختبرت في معهد جدا قوي حطوني في المستوى الثالث الي هو باقي لي مستوى واصير انقبل في الجامعه ، وقالوا انه لو بس مستواك الكتابي بنفس مستواك في النطق كان على طول دخلت الجامعه ..

 في امريكا المدرسات يسألوني عن لغتي وكم سنه عشت في امريكا و اذا قلت لهم تعلمت من النت وانها اول شهور لي في امريكا ينبهروون ويستغربون ..

أنا مافيني شي مميز عنكم اذا انا قدرت انتم بعد تقدرون واحسن مني بعد اذا كنتوا ملتزمين بالجداول والحصص والواجبات انا ماكنت مره حريصه كنت ماخذتها لعب..

الموقع التي تعلمت منه ماصار يستقبل افراد عشان كذا تأخرت ادور لكم البدائل

..اسم الموقع الي تعلمت منه

languagelab.com

كان يحتاج سماعات ومايك ، ويحتاج تحميل برنامج اللعبة

 لكن هالموقع بالذات للاسف صار يدرس موظفين الشركات بحيث يتعاقد مع شركة كاملة..

يعني معد يستقبلون طلاب جدد افراد..

لكن هذا كله وتجربتي كلها مجرد مثال وممكن نلقى اساليب مطابقه لطريقة تعليمهم وفكرته وممكن بعضها يكون احسن من الي انا جربته..

في المواقع التالية:

englishtown.com

virtuallanguageschool.com

virtualenglishtraining.com

openenglish.com

هذي المواقع تصفحتها وقرأت اساليبهم وتقريبا نفس فكرة المدرسة الي تعلمت فيها وشكلها مدارس حلوه ومفيده جدا وسهله التسجيل .. (ما جربتها شخصيا )

 ممكن الواحد يستعين بشخص يعرف شوي لغه يضبط له البداية والتسجيل..

المهم اتمنى اتمنى تجربون هالمدارس بتفيدكم كثير في اللغه وتعطيكم دفعه قويه وان شاء الله كم شهر يصير الواحد يقدر يفهم ويتكلم انجليزي بشكل مقبول او ممتاز حسب همته وعزيمته..

اخر شي بالنسبة للناس الي عندهم لغه ، لا تخلونها تضيع بسبب عدم الممارسه حسافه الدراسه والتعب ادخلوا مواقع تواصل وتعرفوا على ناس اجانب مارسوا لغتكم او اقروا كثير في المواقع الاجنبية اهم شي مايمر يوم بدون ممارسة اللغة لو شي بسيط..

تمنيت ان نفس مدرستي تكون فاتحه عشان ادخل من جديد واساعد الي بيسجل لكن ان شاء الله ان البدائل الي حطيتها افضل ومتخصصه اكثر..

—–

مميزات تعلم اللغة عن طريق الانترنت:

١-سهولة ومرونة في أوقات الدروس.

في اي وقت يكون متواجد مدرسين على الموقع ٢٤ ساعه لانهم يراعون ان الطلاب من انحاء العالم.

٢- مدرسين لغتهم الانجليزية هي اللغة الأم (الاساسية)

٣-مافيه توتر أو خجل لأن الاشخاص خلف الشاشات فتكون مرحلة جيدة لكسر الحاجز والانطلاق بالحديث مهما كان مستوى اللغة.

٤-لغة الطلاب الاخرين متنوعة مما يجعل اللغه الوحيده للتواصل هي الانجليزيه بعكس ما لو كان الصف كله عرب.

٥-رسوم قليلة جدا مقارنة بالمعاهد.

٦-لايوجد تكاليف مواصلات للوصول للمعهد.

٧- القدرة على الانتقال للاماكن المختلفه والتطبيق عمليا ، مثال:

اخذنا درس عن السباحة والشاطيء فذهبت بنا المدرسه الى الشاطيء الافتراضي فيكون امامنا كل شيء موضح بالحركات والصور وكأننا فعلا في شاطيء حقيقي الجميع يمكنه السباحه وهكذا.

 بينما المعاهد لاتستطيع تدبير رحلات الى اي مكان ومن الصعوبه ان تعرض المدرسه في المعهد كل كلمة بالصور التوضيحيه..

٨- سهولة تبديل المدرسين او الدروس بحسب الرغبة ولا يحكمك جدول اجباري، مثلا رغبتك ان تتعلم الحديث فقط يمكن تخطي الدروس الخاصه باي شيء اخر بينما في المعهد يجب ان تدرس كل شيء معا..

٩- يمكن حضور الدرس وانت في العمل او اي مكان. كان معنا طلاب صينيين مايتحدثون ابدا طوال وقتهم المايك مغلق ويقولون انهم عملهم مكتبي ولكن يحبون في اثناء العمل الاستماع للدروس والحضور سماعا فقط لانه يطور جوانب كثيره لديهم.

١٠-التعرف على ثقافات جديدة ومعلومات عن البلدان والجنسيات وغيرها بسبب تعدد جنسيات الطلاب. وهذا مكان جيد لنشر الثقافه وتعريفهم بثقافتنا.

..

أعتقد كل هالمميزات كافية لجعل التعلم عن طريق الانترنت افضل واسهل وامتع من التعلم عن طريق مدرسة حقيقية او معهد في دولة عربية..

وأنصح أي أحد يطمح للابتعاث او الدراسة في معهد في امريكا او غيرها ان يبدأ التعلم قبل الذهاب للبلد الاجنبي لأنه من غير الجيد ان الواحد يروح “على وجهه” مايعرف شي ويطيح في مواقف محرجة كثيره ربما تسبب له قلق وخوف وشعور بالفشل..

ايضا يؤهله ثقافيا انه يتعلم بعض عادات البلد ويفهم بعض افكارهم حتى مايرتكب بعض الامور الي تكون غير لائقة عندهم بدون مايشعر..

أتمنى التوفيق للجميع يارب

و أتمنى لكم يوماً ملوناً

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

155 تعليق على "كيف تعلمت اللغة من الأنترنت"

avatar
فرز بواسطة:   الأحدث | الأقدم | الأكثر تصويتاً
Bassam Alshabibi
ضيف

فعلا انا تخصصي لغات وترجمة في جامعة الملك سعود ومدة الدراسة كانت ٥ سنوات … ولكن اكثر ما تعلمته من اللغة من خلال مواقع الانترنت ومن خلال متابعتي للأفلام …
ازيد ايضا على المواقع اللي ذكرتيها موقع اسمه
http://livemocha.com/
موقع تختاري فيه اللغات اللي تحبي تتعلميها وتحتكي بمتحدثين متحرفين باللغه و دروس مباشرة و اختبارات جميله وممتعه

الموقع اشبه ما يكون بفيس بوك بشكل تعليمي يمكن عمل صداقات ومساعدات من native speakers ..

حبيت اعلق لأنه شدني الموضوع وفعلا اللغه ممارسه ورغبه واستخدام يومي احدى الطرق اللي كنت احكي عنها هي
totale emerge يعني الانغماس الكامل باللغه

اعتذر ع الاطاله 🙂

mmksa
ضيف

طيب اختي تنفع للمبتدئين؟

لبنى علان
عضو

حبيبتي أروى … ابشرك .. الحمدلله بفضل الله ثم بفضلك اليوم اشتركت في موقع englishtown و توني رح ابدا اول شهر ان شاء الله .. رح جرب و ا حكيلكم عن تجربتي ان شاء الله .. شكرا جزيلا لك بحجم السماااء ،، دمتي بخير !

تام
ضيف

ها بشري ؟ كيف طريقتهم وكم رسومهم احكي لنا

reem
ضيف

حبيبتي بسالك باي صفحه سجلتي؟
لان لهم صفحه انجليزيه..وصفحه عربيه وبها ارقام سعودية

حاولت اسجل مو راضي يسجلني؟؟
يطلعلي تنبيه اذا سجلت بياناتي والفيزا ان التاريخ غلط وانا متاكده
احد يعرف الحل

احلام
ضيف

قولي تجربتك

منيره
ضيف

السلام عليكم …ياليت تذكرين تجربتك مع الموقع لان حتبه اسجل

انا
ضيف

شصار معك كم الرسوم تنصحيني اجرب

mmksaa
ضيف

وش صار استفدتي من الموقع؟

Nisreen
ضيف

كم اشتراكك

Seham
ضيف

الله يسعدكم اللي اشتركت في انجلشتاون كيف اشتركت لانه كلمني شخص واضح من لهجته انه مغربي ومدري حسيته نصاب

Seham
ضيف

عزيزتي ممكن تتكلمي عن تجربتك ف الموقع

arwa
ضيف

جربتي؟وكيفالتجربة معك؟

Nihal
ضيف

جزاك الله خير على طرح تجربتك

وأحب اضيف أكاديمية ENGLISH PLACE

للأستاذ السعودي ابو عمر

تابعوا قناته على اليوتيوب

بارك الله فيكم ياأحبة

ghadah
عضو

اهلًا اروى شيكت الموقع الاول “انجلش تاون” بدولار واحد للفترة التجريبية مدتها ١٤ يوم وبعد الـ ١٤ يوم تدفعين ٦٩ دولار وتدخلين قروبات محادثة ودروس تفاعلية وتهيئة للتوفل
او تدفعين ٩٩ دولار وتدخلين قروبات محادثة ودروس خاصة وخطة دراسية فردية خاصة فيك وتوفل ولغة البزنس بالانجلش
ايش رايك اختار الي بـ ٦٩ او ٩٩ ؟

asooi
ضيف

انا سجلت بنفس الموقع بس احس اني ضايعه شوي ..

آية محمّد
ضيف

أروٓى الجمِيلة ، جزٓاكِ الله خيراً ❤️
ومبرُووك ع المدوّنة الأكثر مِن جميلة ( أول تعلِيق ليّا :$ ) ،

أنا سجلت فِ موقع من فترة إسمو دولينجو ،
الموقع سهل وحلو بس مشكلته إنه يعلم إنجليزي أمرِيكي وإحنٓا ندرس بالمدرسة برِيطاني وكمان البرنامج مو موجود بالعربي ع الجوّال ،
وطبعاً أكسل أفتح اللاب فٓ ما صرت أفتحُه

آية محمّد
ضيف

فِ عدد معين للكلِمات ؟

المُهم بجرّب المواقع الي كتبتِيها وإن شاء الله تفِيدني ،
مِن زمان وأنا أستنّى تفتحِي المتجر وجدّاا فرحت بالمُدوّنة ،

عذراً ع الإطالة :$ ، وبالتّوفيق ❤️

F.a
ضيف

وانا سجلت فيه وصار له نسخه عربيه في الجوال
وانقطعت الحين عنه ولكن لي رجعه بإذن الله

نوف
ضيف
فيه نسخة عربية له حبيبتي آية حملته وكل يوم يحطون لك درس او أكثر حسب همتك وأول ماتسجلين فيه يقولون لك تبي تبدأ من الصفر أو إذا عندك معلومات بسيطة يسوون لك اختبار ويحددون فيه مستواك. ويرسلون لك ع البريد كل يوم الدرس عشان ماتنسين و مدته خمس إلى عشر دقايق ماياخذ وقت أبد وانت تتصفحين الجوال ادخليه وممكن تعيدين الدرس عشان يرسخ اكثر مره حلو الأبلكيشن تعليمي من السماع والكتابة والنطق وكل فترة مؤشرات القوة تضعف لأن مع مرور الوقت تنسين الكلمات إذا مافيه ممارسة فاللي مؤشراته ضعفت تروحين تقوينها وفيه تحت خيار تقوية المهارات الضعيفة الي وأنت تاخدذين… قراءة المزيد ..
فدوى
ضيف

دحين صار متاح ع الجوال وانا اتعلم فيه واانا ع جوالي?

Mezo
ضيف

ممكن الاسم بالانجليزي؟

arwa
ضيف

انا عندي دولينجو بالجوال واحسة مرة حلو وفادني كثير

The
ضيف

انا جربت موقع كان يعلم الانقليزي للاطفال لما كنت بالابتدائي لان المدارس الحكوميه يبدا بس من سادس ما اذكر اسم الموقع لكن كان جدا ممتع
بعد ما عرفت الاساسيات صرت اشوف افلام واقرا الترجمه واعيد الكلمه اللي تشدني اكثر من مره ومع كثرة الافلام اللي شفتها اتقنت اللغه بشكل جيد

بشرى
ضيف

أهلًا بك أروى

شكرًا جزيييلًا على الإفادة و أضيفك على كلامك بالتأييد لأني جربت التعلم بنفس هالطريقة في موقع englishplace للأستاذ أبو عمر واستفدت الحمد لله =)

^^
ما شاء الله تدوينتك مفعمة بالفائدة و الجمااااال دايم أزورها أطلع منها مبتسمة..

هنا بيتي لو حبيتي تزوريني =)

http://bushraspace.blogspot.com/

نورا
ضيف

وايد حمستيني بخاطري ادخل معهد بس ما عندي وقت اذا جربت احد المواقع بدز لج تجربتي عشان الكل يستفيد ، تسلمين وماقصرتي

Arwa samer
ضيف

شكراً كثييير جزاك الله خير وحمستيني الله يسعدك

ميم
ضيف

الله يسعدك اروى نحببك بالزاف
والله يبارك لنا بأوقاتنا

غداء
ضيف

يازينك اروى حمستيني مرره لهالمواقع ، وشكراً على هالمدونه الى موب جميله

غيداء
ضيف

يازينك اروى حمستيني مرره بهالمواقع بجربها باذن الله وبدعيلك

Nahla
ضيف

الله يسعدك اروى مثل ماتقولين تجاربك يختي في كميه طاقة ايجابيه مشالله الله يزيدك يارب والى الامام

Ohood Hawsawi
عضو

يسعدك ربي على هالمدونة ..
وربي يعلمك ماينفعك وينفعك بما تعلمتيه ويزيدك ..
شجعتيتي على المدونه بصراحه كانت خطوتي القادمه بعد الكتاب ولما شفتك اتحمست اكثر ..
وبخصوص اللغة احلى نصيحة افادتني لاتخجل من الحديث بلغة غير لغتك الأم (:
هالشي شجعني اتكلم مع الموظفات الأجنبيات معي في عملي عندي خلفيه جيده من الكلمات واقدر اتخاطب ، امارس لغتي كمان في موقع english town وقبلها كنت مآخده دوره في english teacher
طرق التعلم متاحة ومتعدده الأهم الارادة وقوة النيه و الأفكار الايجابية(:

منى
ضيف

الله يعافيك حابه اسألك عن انجلش تاون ، استفدتي منه كثييير والا لا ، حسيتي انك انطلقتي باللغه بفضل الله ثم فضلهم يعني ؟! حابه اسجل فيه بس خايفه من اني ما امشي .. والله يسعدك ويوفقك ردي على سؤالي

أثير
ضيف

من ضمن خططي هالسنة إن شاء الله إني أتعلم اللغه ومرره شجعتيني

جربت اكثر من طريقة لكن للاسف ما مشت معاي ان شاء الله بجرب المواقع *.*

بالنسبة ل second Life دخلته وسجلت فيه بالمجاني لكن مافهمت طريقة اللعبة بالضبط وايش فكرتها؟

إذا ممكن توضحين لي أكون لك شاكرة ()

ميساء
ضيف

الله يسعدك يا أم ريان مره أستفيد من البوستز اللي تنزلينها فالانستقرام ؛؛ والمدونه جميله ومرتتتتبه ,,, حبيت اشارك بهذا الموقع https://www.duolingo.com/ جداً جميل وأستفدت منه كثييييير فاللغه . 🙂

ساره
ضيف

أروى أنتي انسانه رائعه … قبل كم شهر اول ماقريت كلامك في الانستقرام غيرتي فكرتي كليا عن تعلم اللغه ! انا اعتبر نفسي جيده في الانقليزي والكتابه والاسبلنق جيد جدا لكن مشكلتي المحادثه يصيبني حرج والخبط مع اني عارفه كيف ارد وافهم واتابع افلام بدون ترجمه … قررت ببداية الشهر القادم اسجل بانقلش تاون والفضل بعد الله لك ياجميلتي .. ربي يسعدك دنيا وآخره :*

الخزامى
ضيف

ادرس حاليا ب معهد لغه في بريطانيا بس مررررره مررره خجولة مم قدرت انطلق بالاسبيكنق وغير كذا متردده حتى لو إجابتي صحيحه

Suha
ضيف

رائعه اروى ماشاءالله
أنا اذكر العالم دخلت كذا والمستوى اﻷول وحجزت المقعد وكل شيء تمام الحمدلله بس مشكلتي الصغيره ماكان عندي مايك !!
تصوري مادخلت معهم وهي شهر ودافعه وككل شيء بس مايك اللي ردني
يلا أن شاء الله خيره 🙁

جوريااآ
ضيف

بسالك حبيبتي عادي بالجوال ولا لازم لاب

ميساء
ضيف

مرحبا أروى
الموضوع جمييييل الله يجله فموازين حسناتك ويوفقك يا جميله.
انا امكن اشتغلت ع اكثر من 30 موقع و ما فادتني او بالأصح ما عرفت طريقة التعلم كويس فيها ’’’ دخلت سكند لايف من فتره واليوم رجعتلها بس مني عارفه أسوي شي فيها ولا لقيت مدرسة اللغه بس امشي ,,, اذا تعرفين موضوع أوقناه يوتيوب أو طريقه تعلم اللعبه ياريت تفيديني وتحطلي رابط .
خالص حبي وتقديري لمجهودك الجميل 3>

لمى
ضيف

حبيبتي تقول الموقع قفل حبيت افيدك بس ♥

Fatima
ضيف

مرحبا اروى شحالج عساج بخير
انا مشكلتي ماعرفت اشترك فالمواقع اللي تسوي دورات
وقلت ببدا اشوف ف يوتيوب اشيا بالانجليزي بس ابد ماستفدت وحسيت بملل ووقفت ولاجني سويت شي !!! وفعلا اانا انسانه كسوله ولكن اتمنى من كل قلبي اني اكون بيرفكت فاللغه الانجليزيه وجدا حزينه على حالي مش قادره اوصل للي اتمناه هل فعلا بجيد اللغه اذا عندج اقتراحات ياختي ساعديني وشكرا ،، وسامحيني عالاطاله اسعد الله ايامج

Reem
ضيف

انا تخصصي هندسه ولغة الجامعه المعتمدة انجلش لكن المدرسات من الهند وباكستان وماافهم عليهم ولغتي ع قدي الحمدلله اعرف اقرا واكتب مره كويس ، لكن محادثه أبدا ميح والكلمات كثير كثير اللي حافظه الحمدلله لكن وش الفايده ????

Maha
ضيف

أهلاً اروى
شكرا مرهه على مدونتك الجميله??.
انا ادرس بالجامعه تخصص انقلش وابغى اطور اللغه عندي لان مستوى نازل مرهه مو عارفه حاجه في الانقلش شوي يعني شلون اطورها؟؟
الله يجزاك خير ويسعدك ??.

حصه
ضيف

الله يسعدك مرره تحمست للتعلم استفدت كلامك

ساره
ضيف

أنا احتاج لمثل هذي الموقع لأَنِّي درست اللغة كاملة في أمريكا وماودي تضيع حسافة .. الله يجزاك خير على الطرح المفيد.

Nada.M
ضيف

دائمة تحبين تفيدين الغير ماشاءالله ،، باالتوفيق لك دوووم يارب

ريم
ضيف

الله يسعدك ممرره تحمست الله يجزاك خير

AMOSHl
ضيف

السّلام عليكم ورحمة الله و بركاته :””()

نوسساا
ضيف

إن شاءالله بجربة الله يسسعدك يارب

فاطمة ~
ضيف

أهلاً اروى ، شكراً لك تحمسسست كثير إني اتقن اللغة اللي انا حبيتها ، الحمدلله انا مستواي كويس مقارنة بـ زميلاتي ف المدرسة ، كنت احتاج احد يشجعني ولقيتك انتي ، شكراً جزيلاً اروى ، الله يسعدك

ود
ضيف

تجريبه جميله جداً بصراحهه حبيتت إصرارك على تعلم اللغه ، تجربتي انا مختلفه شوي تعلمت اللغه الانجليزية من الأفلام الي تنعرض بالقنواتت ومرا استفدتت منها صرتت اتكلم انجليزي بس مشكلتي خجوله

Hanan
ضيف

الله يسعدك ويجزاك كل خير ع المدونة الجميلة
حمستينا صراحة نجرب هالمواقع .. بإذن الله اجربها ونستفيد كلنا
كل مواضيعك جميلة مدري اعلق ع شنو ولا شنو

ميمونة
ضيف

امنيتي والله اتعلَّم يارب يسر ..وشكرا لك

رقية عطية
ضيف

الله يسعدك ويجعله في موازين حسناتك قد ماتفيدينا

شهد
ضيف

ياحبيييلك اروى ❤️
مررره هالتك ايجابيه ياحبي لك :”❤️
اول مانزلت هذا الموضوع في الانستقرام مرره شدني وانبسططت ورحت
دخلت المواقع بس للاسف حاولت اسجل فيها ماعرررفت مرره
وبدت الدراسة ولهيت عاد الحين بما انه وقت اجازة بحاول اعيد تجربتي
ان شاء الله

مرام
ضيف

الله يسعدك يارب ، خذيت لي فره على مدونتك
كالعادة مميزة واسلوبك بالكتابة جميل وتصويرك ورسمك وكل شي
الله يحفظك يااارب ويخلي لك ريان ويخليك له يارب

نوره
ضيف

الله يسعدك اروى موضووعك يحمممس قريته قبل .. وتحمست اتعلم انجلش وفتحت المواقع وماعرفت اسجل ..بس الحين رجعتي حمستيني ابحاول اشوف احد يفهم يسجلني

Nouf
ضيف

تجربة ملهمممة جددداً وفريدة يا أروى!
الله يجزاك خير يارب ويكتب أجرك .. أنتِ نموذج رائع ومشرّف للفتاة المسلمة العربية والسعودية أيضاً! أتمنى لك المزيييد من الإنجاز والتوفيق في حياتك :””)

Ladyloleeyt
ضيف

الله يبارك لك لأَنِّي أقيم في مونتريال كندا ومخلصه لفل ٣ بس معيا أطفال ومفيش وقت اروح علي الجامعة

Ghaidaa
ضيف
One of the best posts I’ve ever read. I was just like you,I studied in a similar school. I tried really hard to develop my language when I was younger. I failed terribly so many times but I had passion and I wanted to learn no matter what. I’m studying English literature at college now and I was really bad at first since my English was really poor at that time. I failed a lot and that never stopped me to motivate myself and keep trying. I had faith that I’ll be better than I was hoping. I started to… قراءة المزيد ..
inssaf ch
عضو

ااحد اهدافي لهذا العام ان احسن من مستواي في اللغة الانجليزية اعطيتيني دافع قوي بالتوفيق يا اختي

Asmaa mukhtar
ضيف

ما شاء الله عليكِ الله يوفقك..موضوع جدا جميل وملهم ..ان شاء ابدأ اطبق الفكرة هذه..❤️شكراً

خولة
ضيف

السلام عليج أروى ، داً مستمتعة بمدونتج و ما يمر يوم بدون ما أجيك عليها ، بس حبيت تفيديني ، أدور مدونات أجنبية لليوميات و الطبخ و إلخ ، فلو تقدرين تنزلين موضوع في المدونة بكون متشكرة أوي هههه ، دمتِ و دام أميرك الصغير بخير

سلامه
ضيف

السلام عليكم أروي
الصراحة انا حاسه بتجربتج لاني تقريبا مريت بنفس التجربة ايام المدرسة و كنت نفسج أكره الانجليزي و تعقدت منه من مدرسة بعد ، بس عقب لما درستني مدرسة ثانية و حببتني باللغة و حاولت معاي ، صرت ادرس عمري بس كنت أشوف الأخبار و المسلسلات الانجليزية وأيد و الحين اللغه عندي تتطورت وأيد بس للأسف بعدني ضعيفة من جهه الكتابة بس الحمد الله افضل عن قبل

leen
ضيف

صراحه اكره الانجليزي مدري ليه دايم احاول اتعلمه بس مقدر! عموما استفدت منك كثير شكرا لك❤

Eiman sh
عضو

أروى يا أروى ، نحبك والله ()

يارا
ضيف

شكرا أروى. أنا طول عمري أحب أتعلم لغات بس جتني فترة تكاسلت وصرت أقول ما فيه ممارسة بتضيع اللغة!
وقريت شخص رد على وحده كتبت له نفس هالحكي قال “مين قال لازم ممارسة؟ هذا احنا نفهم فصحى وما نمارسها” كلامه فعلًا أعطاني دفعة إيجيابية وحاليا مركزة ع الانقلش وحأتنقل للفرنسية قريبا.
فيه موقع جميل برضو اسمه : engvid وحاولوا تتابعون حسابات بكل مكان اجنبية وبرضوا فيديوهات يوتيوب مو شرط تعليم لغة، ممكن ميك أب! حتستفيدي وسوري طولت بالحكي بس لأن فعلا مهم واللي ما عنده لغة انجليزية هالوقت كأنه أمّي.

Sara
ضيف

شكرًا جزيلًا أروى الله يسعدك

مها العمري
ضيف

ماشاء الله مواضيعك جدا مميزه واسلوبك جدا سلس ياصديقتي

لطيفه
ضيف

ماشاء الله عليك يا أروى مبدعه وهالكلمه قليله بحقك ، طريقه تدوينك وافكارك وتنظيمك وترتيباتك والمجهود الواضح شي يشكرر عليه من اعماق القلب ، للأمام يااختي وعقبال مانشوف لك برامج على الصعيد العالمي بإذن الله

joji
ضيف

انا نفس الشي كانت اككره حصصه عنندي ههي الانجليش حتى دخلت المتوسسطة اعجبت باحدة الفنانات من هوليوود و سرت ادخل الانترنت اسمع اغانيها و انا موفاهمه شي بحثت في كلمات الاغاني و ترجمتهم كلمه كلمه وحفظتهم واغنيه ورى اغنيه فلم ورى فليم حتى صارت مادتي المححبه الانجلليش صرت افلل المادة حتى بالثانوية العامة كانو المدرسات يستغربو من الاكسنت يحسبوني رايحة امريكا لان منهجنه هو بريطاني و اللهجة حقتي امريكيه يعني كان اللكسنت عندي ميه ميه

لمى
ضيف

حبيبتي اروى
انا رسلت لك عالدايركت ابغااك تساعديني بشيء ممكن تردي علي

yasmyna
ضيف

لازم يا اخت اروى سمعات ومايك طيب لو مش عندى ايه الحل ضرورى هاالسمعات ارجو الرد

‫wpDiscuz

أضف تعليق عبر الفيسبوك:





حمل