اسهل طريقه لصبغ جدران البيت بنفسك


مساءكم / صباحكم روقان وشوية سناعه .. ?

اروى الجميله شكرا لوجودك في حياتنا انت انسانه جدا ملهمه

من القله اللي احرص على متابعتهم رغم ضيق وقتي?

من سنوات كنت اقول لزوجي خلينا نغير جو يوم واحنا بنفسنا نصبغ جدران البيت بويه

وكان يحطمني يقول ايش عرفك وترا مو سهل مره وتعب .. لمن يأست منه

وقبل فتره غيرت جزء من الوان جدران البيت وكلفني شغل العمال مبلغ ..

بعدها حلفت انه انا راح اكمل الباقي بنفسي

وشفت اروى الكيوت قبل فتره صبغت جدار بيتها قلت مايبغالها والله وعزمت امري

وقلت لزوجي واصريت على رائي قلت له ماراح انتظر اكثر تبغى تساعدني مرحبا فيك

ماتبغى انا متكفله بكل شي ههههه الحمدلله انه ساعدني

اسهل طريقه لصبغ جدران البيت بنفسك

النقطه اللي اهتميت فيها ذاك اليوم اكلت اكل كويس

غُذيت جسمي بطاقه جيده للاكل وانطلقنا في منزلنا الجميل نعدله

ايش نحتاج لصبغ الجدران :

اسهل طريقه لصبغ جدران البيت بنفسك

بدايه نحتاج لصق عشان نلصق اطراف الاماكن اللي ماتصبغ ..

برضو نحتاج نايلون كبير نغطي في الارضيه انا استخدمت سفره بس ماانصحكم فيها ابدا ..

اساس مائي قبل البويه  ..

صبغ ( بويه ) اللون والنوع اللي تفضلينه

اسهل طريقه لصبغ جدران البيت بنفسك

مااعرف ايش اسمها بس الفرشه اللي تجي بعصا زي الرول موجوده في الصوره  ( يفضل انه العصا تتحكمي بطولها من ناحيه انك تقصيرها او تطوليها )

فرشه صغيره

الطريقه اللي اعتمدتها وحسيتها سهله :

بداية استخدمت اساس مائي لونه ابيض خفيف نصبغ فيه كل مكان نبغى نحط عليه بويه

فائدته : يخفف من اللون السابق على الجدار يسهل انه البويه يمسك لونها في الجدار بسهوله ..

نترك الاساس ساعه بسرعه ينشف ماياخذ وقت مده سهل اسهل من البويه بكثير

بعدها نبدا نمد االبويه لكن قبلها في كثير من الصبغ يحتاج تخلطينه مع شوية مويه

اسهل طريقه عند خلط البويه مع المويه :

طبعا نخلط الصبغ مع مويه عشان بصير قوامها اسهل في المد واسرع

نحتاج علبه فارغه نفرغ فيها الصبغ من علبته

بعدها نحط تقريبا 3 اكواب مويه كبيره  لو كان علبة الصبغ صغيره وممكن اكثر

وابداي امزجي الخليط اذا حسيتي انه مازال ثقيل ارجعي حطي كميه مويه ..

طريقة المد :

نحط الرول او الفرشه في الصبغ ونترك شويه ينزل الزائد بعدها

نبدا نمد الاساس او البويه على الجدار بصعودا ونزولا في حالة الرول

لكن عند استخدامك الفرشه يفضل يكون باتجاه واحد

الفرشه الصغيره تستخدم للزوايا واطراف الجدار والاماكن الضيقه

من اهم الاشياء عند الصبغ لازم تنتبهي لها :

كميه الصبغ اللي يكون في الفرشه مو كثير عشان ماتحوسين في مدها

طريقة المد يكون صعودا ونزلا لين تنتهي من مد الكميه اللي في الرول

واهم نقطه تنتبهي لها تلبسي لبس قديم وشوز قديم وقفازات مع انه البويه تنظف من اليد تماما

واذا حبيتو تصبغو السقف كمان البسو قبوع او كيس نايلون عشان شعرك..

بالنسبه ليا صبغت السقف بدايه بالرول لكن كان جدا متعب

وبدلت الرول بالفرشه الصغيره وصبغت فيها السقف كامل

مع وجود سلم طبعا وحتكوني طالعه نازله طبعا بس كويس اصلا الرياضه جيده ?

بعض الصور للمكان  قبل :

اسهل طريقه لصبغ جدران البيت بنفسك

اثناء مد الاساس مثل مو واضح لكم اللون خفيف

اسهل طريقه لصبغ جدران البيت بنفسك

مقطع فيديو يوضح لكم طريقة مد الصبغ

بعد الانتهاء

اسهل طريقه لصبغ جدران البيت بنفسك

هل الصبغ سهل او لا ؟

ماابغى اقول سهل مره لانه يختلف لمن تصبغي جدار واحد ومايكون فيه جبس في السقف

عن لمن تصبغي مساحه كبيره مع السقف وغيره

شفتو اللي يقولو انه سهل ممتنع هو كذا

بس شي مره جميل وكمان غيرنا جو وخليت اولادي الكبار يصبغو معانا

خصوصا في الاساس لانه سهل وانبسطو

اطفالكم الصغار طلعوهم من البيت افضل او يكونو في مكان شويه بعيد

مع انه الصبغ حاليا صار بدون رائحه او رائحه لاتذكر

الله يرحم ايام زمان اذا احد صبغ بيته الحاره كلها تعرف وننكتم كمان  ?

الحلو في الموضوع اخذنا صور حلوه لبعض وبرضو

راح تكون ذكرى حلوه في عقولنا انا وأطفالي ووعدهم انه نغير لون صبغة غرفتهم

اسهل طريقه لصبغ جدران البيت بنفسك

وشكرا اروى على مدونتك الجميله وروحك الاجمل ،،

دمتي بعافيه انت ومتابعينك وتالا الجميله ،، ❤

انستقرامي :. http://INSTAGRAM.COM/SARA_DREAM_



As an Amazon Associate I earn from qualifying purchases

التعليقات ( 16 ) :

  1. يقول ?Remas:

    حلوووو مرره وبدال مأنتي طفشانه تسوين شي مرره جميل وتستمتعين انتي وعيالك?♥️

  2. يقول حنين:

    جمييل جدا ماشالله عليكم ?? احلا شي خليتي العيلة كلها تشارك ? حاليا انا افكر بعد اصبغ غرفتي بنفسي، لكن مترددة، بسألك اذا ممكن، عدة الصبغ الرول و الاساس، تاخذينها من نفس المحل الي تشترين منه البويه؟ وعن الريحة هل مرة مايبان اثر؟ وهل فيه نوع معين؟ لان من فترة قريبة جبنا عامل وصبغنا غرفة بالبيت ويالله الريحة صكت روسنا اكثر من شهر او شهرين! كانت ريحة تنر، وللاسف شبابيك الغرفة ماتنفتح! فهل هذا السبب؟؟

  3. يقول ?ضحى?:

    فكرة حلوة وأحس يبغالها جهد شوي
    سوير لاتحرمينا طلاتك????

  4. يقول Amani37:

    اعتقد من عشر سنوات وانا أفكر بالموضوع بس مابعد جت الجرئة والعزيمة ? لكن قاعدين تحمسونا والله وتسهلونها علينا? أفكر اصبغ غرفة الملابس سابقا واللي بتكون لولدي لكن الدولاب بيبقى مكانه لانه مفصل على مقاس الجدار وأحس بيكون صعب اصبغ المساحة الصغيرة اللي بين الدولاب والجدار والمساحة اللي فوق الدولاب. يعطيك العافية على مشاركتك لنا بتجربتك الجميلة وشكرا لك وشكرا لأروى ?

  5. يقول Ahoud:

    يعطيك الف عافيه شغل بطل وتجربه جميله ?

  6. يقول Nora-mo:

    جميل ماشاءالله ✨???

  7. يقول Bint Hamad⁵⁶?.:

    بصراحه تحمست اجرب ???
    الله يسعدك حبيبتي

  8. يقول norah_fahad:

    شي جميل صراحه ابدعتي

  9. يقول 3atoga:

    ماشاء الله تغيير جمييل صار المكان شرح أكثر يعطيك العافيه ..
    تغيير البويه من الافكار اللي تدووور دايم براسي لكن مابعد نفذتها ?

  10. يقول بيان:

    مررره حلو ماشاء الله جد لي فتره أفكر اصبغ شكراً عطيتني دفعه أبدا ان شاء الله ???

  11. يقول نون:

    اسلووبك مرررا حمسني اعزم النيه واقوم اصبغ الحين??❤️❤️❤️❤️??
    يعطيك العافيه والله✨✨✨

  12. يقول رحمه:

    جميل جداً يا اختي من زمان خاطري اجرب اصبغ بنفسي و تحمست معاك ?❤️❤️

  13. يقول grv.x1:

    ودي بالاجازه اصبغ بس متردهه وبعد كلامك تحمست

اترك رداً على Amani37 إلغاء الرد


أضف تعليق عبر الفيسبوك: