نصائح لطلاب المرحلة الثانوية

نصائح لطلاب المرحلة الثانوية

 

 

السلام عليكم ورحمة الله وبركاته..

موضوعي اليوم يخص طلاب المرحلة الثانويه بشكل كبير من الدخول وحتى التخرج..

طبعا بتعمق بالتفصيل عن التخصص العلمي بالثانوي لذلك لو كنت مفكر تدخل ادبي ابحث عن معلومات القياس بهالتدوينه ممكن تفيدك..

.

اول شيء..كطالب في الثانويه اهم شيء تستفيد بالقدر الكافي كمعلومات لك ولنفسك قبل ما تكون ارقام مكتوبه بالشهاده ..

– حاول تحسن من شخصيتك حاول تفهم كل الكلام وتستوعبه اكثر من انك تحفظه من اجل الاختبار ، لو طبقت هالكلام بتلاحظ انك تبذل مجهود اقل باستذكار الدروس وحتى ممكن تكون اكثر حماس بالحصص الدراسيه ..

– رتب يومك ، لك وقت للدراسه ووقت للعب ..

– راجع وافهم الدروس اول باول قد ما تقدر ولا تسمع كلام الناس المحبطين من حولك!! “هذا صعب” “هذا ماراح نستفيد منه ليه ندرسه” …الخ

– طبعا لو قررت تدخل علمي ركز على ٤ مواد ولا تترك ولا درس واحد من هالاربع مواد ما فهمته ..

١ـالرياضيات

٢ـالكيمياء

٣ـالفيزياء

٤ـالاحياء

ـ هذي المواد بتجيك بالتحصيلي وبتلعب بالمركبه لعب لو ما حليت كويس، لذلك لازم تركز عليهم من اولى ثانوي حتى لو المعلم او المعلمه مو مهتم او يحذف جزء من الماده لازم ترجع للبيت وتفهم الدروس من اي مكان سواء اونلاين عن طريق اليوتيوب او تسأل احد فاهم الدروس او تدرس عند مدرس خصوصي “لو كان المعلم ما يشرح .”

– لازم ما تستخدم وتعتمد عالاله الا بالارقام الكبيره مره مثل الالاف وفوق، لان هذا ممكن يكون السبب ببطئ حلك بالقدرات لان الاختبار يمنع دخول الحاسبه الاليه. اتعب شوي اجمع اطرح اضرب اقسم بنفسك ولا تتعود عالاله الحاسبه مهما صار ..

– مفردات وقواعد اللغه الانجلزيه ايضا مهمه..لو بتدخل تخصص علمي الاغلب بيكون فيه انجليزي ، لكن ليست باهميه الاربع مواد

خلصت اولى ثانوي وفهمت الاربع مواد ، نجي لثاني ثانوي..

ـ-سمعت بشيء اسمه قياس؟ قياس هو مركز يختبرك “كطالب ثانوي” اختبارين :

١-اختبار القدرات العامه.: وهو اختبار يختبر مستوى قدراتك بالرياضيات الاساسيه اللي اخذته بالمتوسط والابتدائي وبقدراتك الفهميه بالنسبه للقراءه والحصيله اللغويه..وينقسم لقسمين كمي(رياضيات)ولفضي(استيعاب المقروء ومفردات)، وهذا الاختبار يعتمد على مهاراتك وسرعه حلك ..

اختبار القدرات يختبرونه طلاب الثاني ثانوي فما فوق..

٢ـاختبار التحصيل الدراسي : وهو اختبار يختبر حصيلتك الدراسيه لكل المستويات ب الرياضيات والفيزياء والكيمياء والاحياء، وهذا الاختبار يعتمد على حفظك وفهمك للدروس بالمدرسه..

اختبار التحصيلي يختبرونه طلاب الثالث ثانوي ويكون بنهايه ثالث ..

كيف استعد لاختبار القدرات ؟

اختبار القدرات يحتاج تدريب ، لانه غالبا تجي اسئله نقدر نحله لكن تاخذ وقت طويل بالحل لو ما تدربنا عليها”بالذات الكمي”

تقدرون تدربون عن طريق منصة نون بتطبيق الجوال او اونلاين وهذا استفدت منه بشكل كبير شخصيا..

عن طريق الكتب اللي تنباع بالمكتبات..

وعن طريق موقع اسمه Khan academy ، طبعا هذا الموقع باللغه الانجليزيه لو عندكم مشكله لا تدخلونه لكن تراه جدا مفيد ومرتب..

بعد ما تتدربون ممكن تدخلون على موقع قياس وتختبرون اختبار تجريبي نتيجته تكون قريبه من نتيجة الاختبار الحقيقي، عندهم ثلاث اختبارات تجريبيه وعند منصة نون اختبارين تجريبيين..

تدربت وخلصت وش احتاج؟

اول شيء تحتاج انك تدخل عالموقع حقهم وتفتح لك حساب عندهم وتعبي جميع البيانات، ولو ما عندك بطاقة احوال تحتاج تطلع بطاقه من قياس ..
لك ٥ فرص ممكن تاخذ ٤ ورقي وواحد محوسب او ٣ورقي و ٢ محوسب ، المحوسب مفتوح طول السنه تحتاج انك تحجز قبله بفتره ..
اما الورقي فهم يحددون وقت اسبوع او اسبوعين وانت تدخل وتحجز يوم من الايام اللي محددينه لك ، طبعا فيه حرب عالمقاعد فحاول انك تدخل بدري ولا بيروح عليك الاختبار او الاماكن..

استعديت وحجزت لك بس ما تدري كيف طريقة الاختبار وخايف ؟

تحتاج انك تكون مرتاح ورايق ولا تتوتر، وقبل الاختبار بيوم لازم ما تفتح ولا تدرب ولا تسوي اي شيء من المفترض انك تكون استعديت وخلصت من قبل صح؟ ارتاح ونام لان وراك اختبار متعب وطويل، تحتاج تحافظ على اللياقه لحل اكثر من ١٠٠ سؤال لمده اكثر من ساعه ونص ..
بهذا اليوم سولف مع اهلك او ممكن تستغله انك تدعي لنفسك بدرجات عاليه..

لازم تنام قبل الاختبار (الورقي غالبا بعد المغرب والمحوسب يكون صباحي)، رتب نومك بحيث تكون صاحي قبل الاختبار باربع ساعات عالاقل..

لازم تروح قبل موعد الاختبار بساعتين عالاقل للامتحان لان الطريق بيكون مزحوم وفيه سالفه وين قاعتي ووين مقعدي و و والخ.. انتبه تشرب سوايل كثير لان وقت دورة المياه بيكون من وقت الاختبار ماراح تقدر تحل كويس..

تحتاج تجيب معك بطاقة الهويه والجوال فقط وممكن مبلغ مادي لو طلعت وحسيت بجوع او عطش من التعب وتحتاج تلبس لبس ثقيل لان القاعات بارده، ممكن تجيب معك جاكيت خفيف مع لبسك العادي لو كان برد تلبسه(لان البرد يزيد التوتر بشكل مزعج حتى لو ما كنت متوتر)..
الهويه فقط اللي تكون معك في الطاوله ، بيمنعونك من الجوال / الساعه العاديه او الذكيه واذا بنت لازم ما تلبسين العبايه ..

الاختبار بيكون مكون من ٥ اقسام كل قسم فيه لفضي وكمي على عكس الاختبار التجريبي والمحوسب ، انتبهوا وانتم تضللون كل شوي شيكوا على رقم السؤال اللي انتم فيه والرقم اللي ضللتوه ترا لو غلطتوا بسؤال واحد بالبدايه ممكن كل الاختبار يكون غلط عموما هم بيشرحون لكم كل شيء ، واذا انشقت او انقطعت الورقه وانتم تضللون اسكتوا لا تعلمونهم ترا بيجيبون لكم ورقه بديله وبيضيع وقتكم تضللون ، السؤال اللي انقطع بيضيع عليكم درجه وحده ولا يضيع الاختبار كامل ، وانتبهوا لا تقطعونه بالضغط القوي عالقلم ..

باذن الله بتكونون خلصتوا الاختبار كامل ، اول اختبار بتتوترون كثير لكن البقيه بتكونون اقل توتر ..
حاولوا ان الدرجه العاليه تكون بثاني لان ثالث اكثر ضغط واحتياجم للدرجات بيكون اكبر، لو قدرتوا تجيبون عالي بثاني بيكون افضل، فوق ٨٠ درجه كويسه ، بس ٥٪؜ اللي يجيبون فوق ٨٠، اما لو جبت ٩٠ وفوق هذا مره عالي..

ثاني بس ركز عالقدرات وعالاربع مواد اللي قلت لك عليهم قبل، وحاول ترفع النسبه لكن لو ما يأثر عالقدرات ولا يأثر عال٤ مواد..

طبعا كل ماده له وزن حسب عدد الحصص بالاسبوع..

مثلا الرياضيات ٦ حصص اذا نضرب الدرجه ب ٦ بينما المهارت حصه ف نضربه ب ١، نفهم من هالكلام انه اذا نقصت درجه بالرياضيات كأنه نقصت ٦ درجات ، يعني لو كنت مضغوط وعندك اختبار رياضيات ومشروع مهارات ايهم تسويه؟ مشروع المهارات عليه ٣٠ واختبار الرياضيات عليه ٢٠ لكن ال٢٠ هذي مضروبه ب٦ ، يعني المهارات عليه ٣٠ والرياضيات عليه ١٢٠ ، وضح انه اختبار الرياضيات اهم بمراحل من مشروع المهارات ، لازم تذاكر اول واذا عندك وقت خلص المشروع<الافضل تسوي كل الاثنين لكن هالكلام لو صار لك ظرف ما ، واحتجت انك تقصر بواحد من الاثنين..

نجي لثالث ثانوي..

ارجع واقول افهم الرياضيات والفيزياء والكيمياء والاحياء ولازم هالسنه تجيب درجات عاليه عشان ثالث هو اللي يرفع لك التراكمي او ينزله ..

الترم الثاني بيكون ضغط بشكل كبير بسبب اختبار التحصيلي فحاول انك تقسم المذاكره كل يوم من بدايه ثالث ليوم الاختبار وقبل الاختبار بيوم يفترض انك ترتاح وما تفتح شيء، لانك لو ما ارتحت بتتعب نفسيا وماراح تحل لان الاختبار طوييييل..

الاختبار يكون متوزع على الرياضيات والكيمياء والفيزياء بالتساوي ..
ولكل ماده ٥٠٪؜ من ثالث ٣٠٪؜ من ثاني و ٢٠٪؜ اولى..

الاسئله تكون واضحه تعرفه او ما تعرفه، بالنسبه للكيمياء والفيزياء حل المعادلات ما يحتاج حاسبه حتى لانه يكون نفس الجواب بس الفرق بالسالب والموجب او العشره الاس حقه كم “اشياء واضحه وبديهيه ” ، ممكن يجي سؤال صعب لكن سؤال او سؤالين بس..
الاسئله اللي ما تعرف جوابهم اختر حرف واي سؤال ما تعرفه لازم يكون نفس الحرف (مثلا كل الاسئله اللي ما اعرفهم جوابهم أ)..
نحل الاسئله السهله اولا ثم الاصعب ، لان درجه السهل والصعب وحده..فممكن اضيع ٥ دقايق على سؤال صعب كنت اقدر احل بوقته ١٠ اسئله سهله..

تقدر تتدرب على التحصيلي عن طريق الكتب – منصة نون -كتبك الدراسيه..

بعد كذا تحتاج انك تقدم عالجامعه ، وتكون انتهيت من الثانويه..

اتمنى من الاعماق تكونون استفدتم او رتب لكم الطريق عالاقل ..



As an Amazon Associate I earn from qualifying purchases

التعليقات ( 20 ) :

  1. يقول رورو:

    شكرراا مممررا استفدت

  2. يقول جوزاء محمد:

    وفقك الله وجعله بميزان حسناتك..
    *ملاحظه بسيطه..ماعاد فيه درجة موزونه لمواد معينه..جميع الثانويات الآن نظام مقررات كل المواد موحدة الدرجه من 100

  3. يقول انوار:

    مره شكراً افدتيني جداً💗💗💗

  4. يقول dalia kaddaf:

    الله يجزيكك خير على هالنصايح حييل استفدت الله يسعدكك يارب

  5. يقول mach:

    شكرا مرة مع اني ثاني مقررات بس تستيفيدين منها 🙂

  6. يقول Mashael:

    أنا بالجامعة بس عجبني موضوعك وقلت لأخويه عليه 👌🏻💖

  7. يقول Safa:

    مشكوره والله على الموضوع لكن حابه استفسر عن شي الحين المعدل التراكمي موجود بنظام المقررات وكيف طريقته ؟ وهل ينحسب من اول ثانوي

  8. يقول سمرا:

    الله يسععدك ي رب ويكتب اجررك

    حبيت اسكتوا لا تعلمونهم🤣❤️❤️❤️❤️

  9. يقول Arwa:

    حبيت الموضوع شامل ومرتب ومليان تفاصيل 😍😍

  10. يقول sffan502:

    هذا عن النظام الفصلي بناات المقرررات الي كل اولى الحين انتبهوا ترى يحسبون المعدل من اول سنة بنسب ثابته يعني مافيه العب باولى واجتهد بثاني ، غلطط بيضيع عليك نص المعدل لازم من اول سنة تجتهدين

  11. يقول امل:

    السلام عليكم
    من فضلك انتي اعلنتي مره عن مدرسة انجليزيه للاطفال ياليت رابطها او ان امكن ترد علي احدى الاخوات؟؟؟

  12. يقول reemjoly8:

    عن جد مرا استفدت وانا مقبله على الثانوي يا ربي تسعدك و توفقك♥️♥️

اترك رداً على xdll.98 إلغاء الرد


أضف تعليق عبر الفيسبوك: