DIY صينية خشبية متعدده الاستخدامات
بسم الله الرحمن الرحيم
??
سابع تدوينة في تحدي ( تدوينة يومياً لمدة اسبوع )
وأخيراً وصلنا لنهاية التحدي
وإن شاء الله ماراح تكون نهاية النشاط والحماس في المدونة
كان صعب علي أدون يوميا وتأخرت في رفع بعض التدوينات لكن المهم اني أنجزت قدر ماكنت أتصور اني أقدر أنجزه خلال فتره بسيطة..
ولذلك قررت أعتمد نظام ثابت لمدونتي بحيث تنزل التدوينات بشكل مستمر وأسبوعي، خاصة بعد ما شفت التفاعل وطلباتكم لمواضيع مختلفة تستاهلون أقدم لكم المزيد وأجتهد أكثر في العمل ..
فشكراً لكم
??
هالتدوينة شرح لمشروع DIY عملته سابقا في السناب لكن ماوضحت خطواته بالتفصيل..
ونهاية التدوينة أفكار لاستخدام هذا النوع من الأعمال بطرق مختلفة و جميلة ..
أولا كلمة DIY هي اختصار لجملة Do It Yourself يعني بالعربي ، اصنعها بنفسك ، وصارت تطلق على أي مشروع مصنوع يدويا ، حتى انه صار معروف مصطلح الـ DIYers يعني الذين يصنعون بأنفسهم ، بس الترجمة مشوار نحتاج أحد يطلع لنا اختصار لو سمحتوا اللي عنده اقتراح يكتبه ?
المهم ، نعود لمحور الحديث
كان عندي قطعة خشب في القراج من مشروع سابق وحبيت أستغلها..
قررت أسوي فيها صينية خشبية ..
قبل ما أشرح الطريقة حطوا فبالكم أن هذي التدوينة ممكن تستخدمون خطواتها لأي مشروع يعتمد على الخشب ، سواء كان الخشب نفس اللي استخدمته أو أي نوع خشب..
تقريبا مثل تدوينة من ايكيا إلى بوتري بارن نفس الخطوات ممكن تتنفذ على مشاريعكم،
ممكن بدل الصينية تسوون حامل للأقلام أو أصيص خشبي للنباتات وغيرها بمجرد تغيير المقاسات..
??
الطريقة
هذا مقطع العمل في السناب حتى يكون الشرح المكتوب أوضح لكم :
حسابي في السناب : arwakaru
قطعت خشبة بطول ١٥ ونص انش وعرض ٩ ونص انش
وأربع خشبات
٢ منهم بطول ١٥ انش وعرض ١ ونص انش
و٢ بطول ٩ ونص انش وعرض ١ ونص انش
للقص استخدمت منشار كهربائي اسمه Circular Saw
، ميزته انه يقص مستقيم بدون جهد
لكن عندي منشار ثاني أسهل وأخف اسمه jig saw
هذا النوع الثاني من المناشير الكهربائية سهل جدا وكثير يستخدمونه أصحاب الأعمال اليدوية البسيطة لأنه خفيف وسهل التحكم به ويقص بأشكال وزخارف مو مثل بعض المناشير اللي بس تمشي مستقيم ..
وأيضا يقص خشب وحديد وغيرها من الأدوات
فأنصح به للي حابين يقتنون منشار للأعمال البسيطة
بعد ما تقطعت الخشبات بالمقاسات المطلوبة صنفرت الخشب حتى يكون ناعم وأطرافة ناعمة ..
ويكون باستخدام ورقة صنفرة ناعمه من ٢٠٠ إلى ٤٠٠
تحصلون ورق الصنفرة في ساكو ومحلات البناء وأعتقد موجودة في محلات الأعمال الفنية ..
استخدمت ورقة رقمها ٢٢٠ ، ويفضل ماتتعدون رقم ٣٠٠ لأن رقم ٤٠٠ وفوق بيخلي الخشبه ناعمه جدا وكذا ماتمسك فيها الصبغات بسهوله،
بعدين مسحت الخشب بفوطه مبلله حتى أزيل أي فتافيت خشبيه من بعد الصنفرة ..
ولأن الخشب اللي استخدمه جدا نحيف كنت أقدر أركبه مع بعض باستخدام صمغ الخشب ، لكن ماكان متوفر عندي فاستخدمت المسامير ..
لو الخشب عريض يكون أحسن نستخدم المسامير ، ولو نحيف احسن صمغ الخشب ..
المسامير ممكن تتثبت بالمطرقة ، لكن أنا استخدمت مسدس المسامير لأنه متوفر عندي من مشروع سابق فحبيت اختصر الوقت ..
الصبغة
بعد ما ثبت القطع في مكانها صبغت الصينية من الأطراف والخلف بأساس أبيض primer
هذا النوع من الصبغة للخشب ضروري قبل أي لون ، لأنه يعمل بمثابة المثبت اللي يثبت اللون بالخشب ..
لأن الصبغه ممكن تتقشر مع الوقت ، لكن البرايمر يخليها قويه وثابته ..
أيضا البرايمر يعطي خلفية بيضاء بحيث أي لون نحطه يصير واضح بالضبط مثل ما نبغاه مايكون شفاف ومبين من تحته عروق الخشب الغامقة ..
بعدها استخدمت لون اكريلك سماوي ، وقررت اترك داخل الصينية خشبي حبيته كذا بدون صبغة ..
آخر شي نصبغ داخل الصينية بطبقة حماية اسمها Polyurethane
هذي الطبقة تحمي الخشب من البقع ومن التأثر بالعوامل الجويه وتساعد في تنظيفه يصير مسحه سهل لذلك جدا مهمه الطبقة خاصة لو كان المشروع بيستخدم مع اشياء فيها رطوبه مثل أغراض المطبخ ..
فقرة اختيارية
لصقت قطع دائرية مصنوعة من المطاط تحت الصينية حتى تكون شوي مرتفعه وماتخدش أسطح الطاولات وأيضا تعطي ثبات أكثر للصينية ..
والآن انتهت خطوات العمل وبقي أفكار للاستخدام
??
للمطبخ
أحيانا المطبخ يكون نظيف ومرتب لكن بسبب كثرة الأغراض اللي نحتاجها على السطح يصير الشكل يبدو وكأنه حوسه دائما مهما رتبناه ،
لذلك أحب أحط أغراض المطبخ داخل صينية وأترك باقي الأسطح نظيفة ومافوقها أي شي قدر الإمكان، هذي الحركة تعطي شعور أن المكان مرتب أكثر ونظيف أكثر ، وتسهل علي مسح الاسطح واستخدام الأغراض ..
صينية للمكتب
نفس الهدف من فكرة المطبخ ان المكان يكون مرتب أكثر خاصة ان اغراض المكتب غالب تكون صغيرة ومتناثره سواء أقلام أو ورق أو فواصل وغيرها ، فأجمعها في مكان واحد أرتب وأسهل للإيجاد الاشياء بسرعة ..
طبعا أنا استخدمتها لهذا الغرض بهدف التصوير فقط لأني عندي منظم خاص بالمكتب كنت اشتريته قبل فتره لكن لو ماكان عندي أي نوع من المنظمات فهذا سيقوم بالمهمه بشكل جميل ..
زاوية القهوة أو الشاي
ممكن أيضا يستخدم في أي زاوية سواء للمطبخ أو لغرفة الضيف أو الصاله كركن لتحضير الشاي والقهوه مثل الموجودة في الفنادق ..
هذي الفكرة جميلة تجهزونها كهدية صغيرة في غرفة الوالدين غالبا يحبون يكون عندهم أغراض خاصه فيهم عن بقية البيت وسريعة للوصول بدل ما تنزل أمك للمطبخ لتحضير كوب شاي يكون عندها في الغرفة قسم جميل خاص فيها يحتوي على غلاية صغيرة وأكواب وبعض أنواع الشاي للاسترخاء..
على طاولة الصالة
جربت أحطها على طاولة الصالة أمام الكنبه تجمع الأغراض مثل الريموتات أو المجلات وغيرها سهلت علي تنظيم المكان بشكل سريع ..
مجرد صينية للتقديم
وبالطبع يمكن استخدامها كمجرد صينية لطيفة للتقديم
??
أتمنى أفادكم هذا الموضوع البسيط وطبعا ممكن تطبقون هالأفكار باستخدام صينية عادية جاهزة لكن تأكدوا أن أطرافها تكون زاوية قائمة حتى تكون أجمل ومايكون شكلها كأنها صينية طعام عادية ..
إذا تحبون هالنوع من الـ DIY عندي مشاريع كثيرة بأنفذها في الأيام القادمة بإذن الله باستخدام الخشب والإسمنت وغيرها فكونوا بالقرب وأستقبل اقتراحاتكم بكل سعادة ..
وأتمنى لكم يوماً ملوناً
...
تواصلوا معي عبر :
انستغرام وتويتر : arwa_alomrani@
يوتيوب : arwa karu
سناب : arwakaru
اخترت لك:
As an Amazon Associate I earn from qualifying purchases
التعليقات ( 125 ) :
اترك تعليقاً
يجب أنت تكون مسجل الدخول لتضيف تعليقاً.
جمييييل
ماشاءالله عليك يااروى الجميله حبيت شغلك وابداعك وسأكون منتضره جديدك وابداعك بشغف
جميييييييل ماشاء الله عليك
مبدعه يااروى تعجبني افكارك ماشاء الله
تبارك الله .. ابداااع اروى بالشرح والتنفيذ ..
على فكرة كل شوي اطل بالمدونة اشوف الشي اليديد الي راح تنزلينه ?
جميل جدا أروى ماشاء الله عليك .. ربي يوفقك دائما وأبدا ?
عاشت يدك فكره حلوه
ياحلوك يا أروى فديتش
مرحبا اروى
الف شكر على المدونة الرااائعة
ممكن موضوع جديد عن كيفيه ترتيب التسريحة ( ميز التواليت) اللي في الغرفة
ارتبة ويرجع يعتفس ابي طريقة سهله للترتيييب ماادري شسوي جربت كل الوسائل بس يرجع معفس وشكرا
جميلة الصينية ما شا الله .. عشقتها من حطيتيها سناب ?
وافكارها حلوة ?
تسلم ايدج ?
افكارك.جدااا جميله الله يسعدك دنيا وآخره يارب
ما شاء الله عليك?
جميلة جدًا الصينية انا من فترة افكر اسوي صينية بنفسي للعطور و صينية خشب للغلاية واكواب القهوة وللسكر وكذا وما لقيت شيء على ذوقي بالتصميم و الالوان ففكرت اسوي بس صراحة كنت متخوفه من سالفة المنشار ?
لكن حمستيني للفكرة مرة ثانية بعد هذي التدوينة ?
شكرًا لك مقدرين لك عطائك ??
استمتعت بتدويناتك لهذا الاسبوع ?
ما شاء الله يا أروى ابداع
عندي هالهواية وقوية جدًا ولي محاولات كثيرة سابقة لكن ما عندي الادوات التي تساعدني وتسهل علي
يا ليت تدليني على الاشياء واكون شاكرة وممتنة لك
ودي بجهاز صنفرة ومناشير ومسدس المسامير والورنيش
هذولا أهم شي
لأني ناوية ان شاء الله اشتغل على طبليات البلاط بالاجازة واسوي منها اثاث للحديقة بس مشكلتي بالادوات
احيانا اشوف روابط تنزلينها لمنتجات من امازون بس مشكلتي ما افهم انجليزي ابد ابد
أروى لا اعرفك ولا تعرفيني لكن أفدتيني كثير كثير بأشياء كثيرهودايم ادعي لك بظهر الغيب وأترك جزاك على رب العالمين
فجزاك الله عني خيرًا ?
فرحانه لك انه انجزتي هالتحدي????اللي كان اكثر من رائع اسمتعت معك في هالاسبوع?❤️وفعلا ابدعتي في كل تدوينه طرحتيها وكل الوصفات والافكار اللي طرحتيها كانت جميله ومختلفة??واي صح طبقت وصفة المكرونة كانت حيييل لذيذة????شيء شيء تبارك الرحمن ،وفي الاخير باحزن انه بكره ما راح يكون فيه تدوينه??ان شاء الله تسعدينا بتدوينات قريب وتحديات جميلة مثل كذا???دمتي في حفظ الله??
روووووعة ماشاءالله تبارك الرحمن …ابي زيادة اعمال يدوية ، شكلي راح ابدأ التنفيذ وأكسب مهارة بدل الهواجيس واحلام اليقظة?
الحمدلله انك أنجزتي التحدي بنجاح ❤️❤️❤️
عطيتيني دفعه كبيره اسوي لي مشروع لمده معينه اشوف قدراتي ?
بالنسبه للصينيه الخشب عجبتني كثيير إن شاء الله بسويها ??
ما شاء الله ..
دائماً متألقه بالذوق والإختيار ?..
تدوينة روووعة و مفيدة ما شاء الله♥
كل مواضيع المدونة إبداع مرة♥
شفت العمل بالسناب واعجبتني فكره الصينيه واستخداماتها جداا
مبرووك لك اروى الانجاز لهذا الاسبوع
كان اسبوووع راااائع وتدويناات جميله ومرتبه مثلك
اولا .. مبرررررروك أروى ??? كلنا واثقين كل الثقة انك قدها .. خلصتي التدوينات و بنجااااح كبييير ????????
ثانيا .. التدوييينة لططيييفة اكثر مما تتصورين ?? راقت لي جدا جدا جدا .. اعماالك تجدبني و باطبقهاا دايما .. كثري من مشااريع ال DIY لاني لما بشوفها منك بطبقها مباشرة ?? رح اطبق الصينية و بارسلك تطبيقي ?
أروى .. ما تتصوري قد ايش انبسط لما يوصلني ايميل من مدونتك او منك شخصيا .. شعوري زي شعور يلي بينتظر رسالة من البريد زمان ?? اححححبك اروى ?
so beautiful، continue *_*
شفت بالسناب عمل خطوات الصينية وماشاء الله عليك تعطين طاقة ايجابية وتحفزين الي يتابعك الله يحميك ??
حلوووه سلمت يداك ??
ماشاءالله جميله حبيتها ?❤️❤️❤️❤️❤️.
ياريت لو تقدري تتكلمي عن جهاز الليزر المنزلي ، سبق وان تكلمتي عنه في الانستقرام لكن ودي نعرف رايك فيه الان خصوصاً وان له فتره طويله معك ،،
وشكراً❤️
جميل جدا أروى البطلة ?
مبرووووك اروى❤️انجزتي ??
مبدعه ماشاء الله تبارك الرحمن ??
استمري?
الله يسعدج ?
ماشاء الله عليك مبددععه كالعااده ♥♥
الله يسعدك دنيا وآخرة ويبارك لك ♡♡ وما يحرمنا من إبداعاتك وإنجازاتك
لطافة
احببت هذا النوع من الاعمال و النتيجة رائعة و استعمالاتها متعددة و لقد رايت سناباتك عندما كنت تنجزين العمل . ما شاء الله عليك ربي يوفقك و ييسر امورك.
رائع ماشاء الله
شغل نظيف ومتقن ومرتب
جميلة ماشاء الله تسلم يدينك اروى?
الله يحفظك ويسعدك يارب
قدها و قدووود والله??
ربي يسلم يدينك ويعطيك الف عافيه????
وكثثرري من الDIY حييييل احبهااا من وانا صغييره ادور بالنت وأطبق ماشاءالله مع بنات الجيران?
جميله حبيتها و كثري DIY بليز
مرحبا أروى
الصينيه جماااااااال
صورك تجيب السعاده ??
ماشاءالله لاحول ولاقوة إلا بالله. مبدعة دائما أسأل الله لك التوفيق والسداد والنجاح والسعادة في الدارين ياحي ياقيوم
جدا جميل?
وحلو لما تسوي شي بيدك تحسّي بشعور لطيف وجميل لما تستخدميه وحتى لمّا تشوفيه تحسي بالإنجاز ?
حبيت لونه لطيف ويريّح ❤️
ماننحرم من حماسك أروى ??
الف الف الف مبروك ??اتممتي التحدي بنجاااح الله يوفقك ويسعدك
سعدة لإنجازك التحدي.. انتي رمز للأمل والاصرار على عمل شيء مفيد فيه منفعة لك ثم لانا..كانت ايام جميله بنسبة لي برفقة مدوناتك الجميله الرئعه…زادك الله علماً وتوفيقا ??
ماشاء الله تبارك الله، إنجاز جميل
وصينية رايقة وحبيت ألوانها ?
منتظرة أعمال يدوية أكثر ، بالتوفيق ?
مبارك اروى كسبتي التحدي ??. ودائما في انتظار جديدك على احر من الجمر .❤️
كنت اسولف انا وامي عن الصينيه بحسابك بالانستقرام بعد ساعه جاني تنبيه ع الايميل وصارت هذي التدوينه الجميله ??،ماشاءالله ياجمالك يختي وجمال الاشياء اللي تسوينها ??
شككككرا لك??
?ختــــــــ تحـــ أروى ـــــدي ــــــام ?
ومسك الختام
شكر الله ماقدمت أناملكِ وأثابكِ على حرفكِ ووقتكِ
بذرتِ وأبدعتِ ونفعتِ
طيب الله غرسكِ.
الناس اللطيفة مثلكِ لانستطيع أن نجازيها الإ بالدعاء
دمتِ موفقة ومن إنجاز الى إنجاز ?
عجبتني حركة الكتابه هههههه ابدعت .. الله يسعدك يارب
ماشاء الله تبارك الله
موهوبه وفنانه الله يديم عليك
تهببببببببل ما شاء الله تبارك الرحمن ?
إعادة تدوير بفكررة ذكية ..مرره أعجبني الشكل النهائي
و مبارك لك إنجازك المبهر و ما استغربت صراحة
كنت متوقعة انك قد التحدي و مو بس أي كلام تحدي + مثابرة + مصابرة = إنجاز ??
الله يثيبك و يرزقك من حيث لا تحتسبين
حلوه الفكره ومتعدده الاستعمال يعطيكي الف عافيه أروتي بانتظار المزيد من اعمال الـDiy حبيت الاختصار ?
ومبسوطه انو كل اسبوع رح يكون في مدونه ? قلبي يرقص فرحاً ?
اتمنى انك تكملين دروس الرسم اللي باليوتيوب وبالتوفيق 3>
جميله جداً?
جمييييل ??
رووووعه الفكرة وعجبتني مرره لما شفتك بسناب وقبل فتره شريت صياني خشب مضغوط وبصبغها مثل طريقتك والمدونه جت بوقتها تسلم يدينك جعلها محرمه عن النار ?
وعليكم السلام ورحمة الله وبركاته
عجبتنى الصينية ماشاءالله عليك اروى مبدعة
واستفدنا من تدويناتك الجميلة كجمال روحك
العذبه فى انتظار المزيد من ابداعاتك
ماشاءالله عليج ???
ماشاءالله انجاز عظيم كملتي التحدي ^^
فكرة الصينية جمييييييلة وطبقتها من اول عرض لكِ بالسناب :”)
الله يسعدك وبانتظار المزيد و المزييييد ..
مبدعة كالعادة بارك الله لك في وقتك وعملك ننتظر المزيد
ابداع ماشاءالله
روعه
ماشاءالله
أُطالب < رجعت لاولئ ابتدائي أإأُ !! المهم : أُطالب بوضع تقيمات على مواضيعك يا اختي احتاج اوضح كمية اعجابي مايصير كذا 🙁
يازينك ياشيخه ، اسعدتيني بردك الجميل الله يسعدك
ارجو ان تجعلي قسم للتجميل البشرة و الشعر ارجوك مهم جرا
جمااااااااااال
مبدعة كعادتك…
أستمتع كثيراً بأعمالك الفنية..
ياليت تكثرين منها وماتحرمينا من هالإبداع…
لك كل الود .
انا مرررره تعجبني دي الاشياء .. ياليت تقدمي لنا افكار اكثر ❤️❤️❤️
اهلين اروى
لك وحشه
انا اشتريت منشار الخشب النوع الثاني الخفيف سهل الاستعمال
بس كيف اثبت الخشب وقت القص جربت على نهاية طاوله بس ماعرفت شلون?
اهلا لولو ، التثبيت تثبتين علىطرف طاوله او قطعه خشب ثانيه بأداه المشبك اللي تشبك خشبتين في بعض اسمها clamps : http://amzn.to/1Wyvvip
مدونتك تعطيني طاقه موطبيعيه??لازم شبه يوميا اقرا التدوينات كلهم عشان اتحمس انجز وابدع
جميييييييييييييييييييييييييييييييييييييييل
السلام عليكم.. اخبارك؟
سؤال برا المضووع بس شفت هالشئ يتكرر معك كم مرة وحبيت استفيد منك .. القفازات كلمينا عنها انواعها استخدامتها افضل شيء ومن وين تاخذينها ؟؟ لان استخدمها بكل شي الغسيل والتنظيف والتقطيع واستخدم نوع واحد بس الوان مو مرتاحه لهم ابد
وووشككرا لك مقدما
عزيزتي أروى ،،
كل شيء يأتي منك يجذبني ويسعدني ،، مدوناتك وصورك في الانستغرام والسناب جات ،، كلها تبعث فيني الراحة والسعادة والإيجابية
أصبحت أحرص على متابعة كل جديد ،، وبلا شك أخرج منك بفائدة أو معلومة لطيفة ،، <<< كلمة (لطيفة) تعلمتها منكِ
أحاول تطبيق أفكارك ونصائحك قدر الامكان
غالبا يكون لدينا رغبة في انجاز الكثير من الاشياء
لكن ينقصنا الاصرار والعزيمة ،،
وهذا ما شاء الله متواجد عندكِ لهذا انتِ مميزة
أشكركِ كثيييييييرا على حبك في مشاركة قليلا من عالمك الجميل معنا
أتمنى لك كل التوفيق عزيزتي ،،
احبك
لي سنتين تقريبا أتابعك ولأول مره ادخل مدونتك جميله مره وشغلك ماشاء الله نظيف يدك تشتغل بدقة ماشاء الله حبيت فكرة الصينية جدا موفقه يابعدي
اروى حبيبتي ممكن تنزلين الجهاز حق المسامير
مرررة حبيت النتيجة !!
استمري !
أنتي من الأشخاص الملهمين لي ?
* متى تنزلين موضوع المضله الي سويتيها وموضوع الثلاجة الي اضفتي لها صور .
ياحبيلك .. انا مشكلتي اشتغل بمليون مشروع بوقت واحد ، وكثير منها ما اشاركها بالنت عشان كذا شغلي صاير بطيء ، بس ان شاء الله بارفعهم باقرب فرصة
Good job ?????????
الله يرزقك ويحقق امنياتك استفيد من بكثره
ماشاء الله عليك… ملهمه جدا…. فكره رائعه أفكارك صارت مرجع لي.. الله يديم عليك ويحفظك..
ماشاء الله عليك بس وانا اشوف شغلك جاني فضول اعرف كيف اتعلمتيها هل دراستك بهالمجال والا كيف..؟ لاني احب اسوي هالشغلات تجذبني لكن مااجرب احس لازم واحد دراس وفاهم فيها.
وكمان من فين الخشب تشتريه خصوصا ف الدول الأجنبيه عشان لو بحاول اجرب? لاني زيك مغتربه
لا مجرد هوايه ، تشترين الخشب من هوم ديبو او لوس
ماشاءالله عليك ياأروى تسلم يدك كلك ذوق واذا سمحتي ايش اسم شركة الآلوان الي استخدمتيها وحابه اسوي ابيض ولايكفي اللون حق الحماية
يعني يكفي بس احط اساس ابيض بدون لون ابيض ؟
الله يسعدك كما اسعدتنا اختي اروى وماشاءالله مبدعه وحبيت افكارك
امممم ، لا مايكفي ، لان الاساس ملمسه خشن شوي ومصمم انه يمسك الالوان ، فالاساس بيكون قابل انه يتوسخ اسرع بكثير
يعطيج العافيه اروى مبدعه دائما
ما شاء الله عليك يا اروى ، دائماً وابداً تبهريني ب انجازاتك ?? ! مشاريع الـ DIY جميلة جداً كثري منها بارك الله فيك وبإذن الله ناويه انفذ عمل والله يسهل ، احببببك في الله ???
مررة جميلة الفكرة وننظتر ابداعاتك القادمة
شكرا أروى لافكارك الحلوة . الك تحية كبييرة من المغرب
فكرة جميلة استمري
اروى انتي مميزه ربي يسعدك بدنيا والاخره
جمييييييييييل ماشالله ومرتب
اروى عندي عربه عاجبني لون الخشب بس ابي ملمع لها استخدم الصنفره قبل الملمع !؟
ممكن تعملي طريقة طباعه الصور على الخشب لاني سويتها وماضبطتت مع اني اخذت الادوات والطريقه بالضبط من بينرست
ماشاء الله بالتوفيق التطبيق جميل كجمال روحك
الله يوفقك ويبارك فيك وينفع بك الاسلام والمسلمين .. مبدعه ومنجزه .. أروى ياليت تشاركينا أهدافك في الحياة.. وكيف تنعشين روحك وتستمرين بانجاز الأعمال والإستمتاع بها❤️ شاكره وممتنه مقدماً
شكراً أروتي?
مبدعة ????
??
اهلا اروى??
الفيديو عندي مو واضي يشتغل مادري ليه هل انا الوحيده الي مابيشتغل عندها؟؟!
اروى ابي اصبغ سرير الغرفه ابيض وهو كان اسود ، السرير خشب من ايكيا ، ايش اشتري بويه واساس ؟ وكيف الطريقه
شكرا لذوقك وافكارك الجميلة
وياريت تكترى من الاعمال الفنية واعادة التدوير
وسلم ايدك مرة ثانية
انت مبدعه مدري وش الكلمه اللي ممكن توصفك أكثر
السلام عليكم ،،
اروى ياحلوه من وين المصحف الملون انا طلبت منه كان ب70 بس ضاع الموقع من عندي
جميل ??
والله فكرة جميلة
ماشاءالله كل تدويناتك جميله واستفدت منك وانتي انسانه خلوقه وجميله استمري في ابداعك ❤❤
حلوه
الله يسعدك
ما شاء الله مره حلوه
جميل ماشاءالله
ماشاء الله تبارك الرحمن ربي يسعدك ويزيدك من فضله استمتع بمتابعتي لك سناب انستقرام وهنا بالتطبيق
عندي سؤال الخشب وين احصله بالرياض ؟؟تحمست اصنع سرير لولدي وابي خشب ?
تسلم يدك
ابداع
جميييييل ابدعتي ❤️
احب اعمال الـ DIY روعه 🌹
الله يعطيج العافيه ابدعتي ❤️ ✨✨✨
اروى شغال جمييل كجمالك 💕.. لكن عندي استفسار ايش نوع مسدس المسامير اللي تستخدمين وهل هو ضروري في الاعمال ممكن يسهل بعض الاعمال ؟
جميل جدا
مشاء الله يا اروى اعمالك دايمن جميلة مثلك💓💓
الخشب من وين جايبتة انا في الكويت
الله يسعدك
جميل لاقوة الا بالله
ممكن اعرف من وين المنشار ؟ وماهي ماركته يالحبيبة ؟
صراحة هو حلو بس شو
المشكلة انا ما عندي الأغراض ما شي فكرة ثانية واجمل
جميله جداً والاجمل ذكرك للتفاصيل ربي يسعدك واصلي استمتع جداً مع كل حرف وكل معلومة من أناملك المبدعة 👍🏻🌷🌷🌷
ماشاء الله عليك واجد جميل أعجبتني فكرة جميلة نستغل وقت الفراغ في صناعة أشياء جميله
اروى انتي من ويين
روووووووووعه إبدااااع ماشاء الله حبيت الفكرة