السلام عليكم و رحمة الله وبركاته

أسعد الله صباحكم / مساءكم بكل خير ?

رمضان مبارك أصدقاء أروى، تقبل الله منا ومنكم الصيام والقيام وصالح الأعمال ?

أنا صديقتكم أطلال سبق و نزلت تدوينة هنا : ” كيف تحول قطعة عديمة الفائدة إلى فائدة أنيقة “، و لعل هذا المكان المبارك صار يحمس للأفكار والإبتكار ?

.

موضوعي اليوم او عملي البسيط هو كيف نسوي محطة لطعام الطيور في البيت او أي مكان حابين نحطها فيه. قبل فترة اقتنيت واحد جاهز و حطيته ببلكونة البيت، وصارت البلكونة حيّة بزيارات الأصدقاء الللطيفين ?. الى ان جاء اليوم الحزين ?. صحيت أحد الصباحات وما حصلت المحطة ! و بعد كم يوم اكتشفت انها طايحة من فوق لوسط الأشجار تحت و تحطمت ? عرفت بعدها ان سنجوب هو الفاعل. قفز عليها و انسحبت من العلاق وطاحت و تكسرت 🙁 !

مرت الأيام و انشغلت و ماشريت جديدة و الحمد لله انها خيرة ?. عندي علبة شوفان اسطوانية و محتفظة فيها لأن كنت متأكدة إن اعادة تدويرها راح يكون ممتع ومفيد. و فجأة جتني فكرة إني أسوي محطة بأبسط طريقة و بأغراض غير مكلفة.

رحت لمحل الأشغال اليدوية ( MICHAEL)  للي بأمريكا أكيد تعرفون حجم جمال هذا المحل ?. و اشتريت بعض الأغراض الأساسية الناقصة مثل بخاخ للصبغة و خيط التعليق و بخاخ حماية ضد الماء.

.

هذي الأغراض اللي احتجتها :

• علبة الشوفان الملهمة ?
• صحن فخار خفيف ( اخترته يكون فخار عشان يعيش اطول فترة ممكنة بدون ما يتأثر بعوامل البيئة)
• بخاخ للصبغ اخترت الذهبي المطفي
• بخاخ للحماية ضد الماء.
• سلك عشان تعليق المحطة
• صمغ مسدس ( و كل ماصار نوع الصمغ قوي صار أفضل)
• اضافات أخرى حسب الرغبة للتزيين.

هذي تفاصيل الخيط الي راح أستخدمه، مخصص لتعليق الأشياء الثقيلة. مكتوب يتحمل إلى ٢٢ كيلو ! ??

هذي العلبة المستخدمة: فتحتها فتحتين من تحت لأن راح تتثبت في وسط الصحن فراح نحتاج مكان عشان ينزل الأكل منه للصحن. سويت هالعملية قبل الصبغ.

ع اليمين بخاخ مقاوم للماء ( بما ان العلبة كرتونية و راح تكون برا فحبيت أحط حماية عشان وقت الأمطار). ماقد جربته قبل كذا بس لما سألت عنه في المحل عطتني هذا و قالت أفضل شيء للأشياء الي تكون برا.

و ع اليسار لون ذهبي مطفي للصبغة .

الصبغة سريع سريع بما اني ما أقدر -حاليا- أطول في استخدام هالبخاخات بسبب ريحتها القوية ?.

و بعد ما نشفت تقريبا ربع ساعة بخيت عليها الحماية. وخليتها لما نشفت تماما و كملت الشغل.

الصبغة فيها اخطاء. كان وقت الشغل هواء قوي و هبل فيني شوي اللون و تبقع ?.

هذي المهمة الأصعب. احتاج افتح فتحتين صغار من فوق وتكون متقابلين عشان الخيط الي راح نعلق فيه المحطة. و تمت المهمة بنجاح 🙂

احترت مره كيف اقدر اثبته بشكل قوي. فيه كم طريقة لكن تحتاج أغراض وانا مستعجلة وودي أخلصه قبل دخول رمضان ( كان وقت الشغل قبل رمضان بيومين).

بثبته بالصمغ زين ثم لفيت عليه خيوط مطاط و حسيت فعلا انه تثبت كويس الحمد لله. ( كل هالحوسة داخل العلبة ما تبين). 

 

نسيت غطاء العلبة ما بخيته? قررت اغطيه بشكل مؤقت بهالورق عشان الشكل بس. 

 

تمت التعبئة و بنجاح الحمد لله ?.

وهذا الفيدر الجميل بعد ما علقناه، ع أن الشغل سريع سريع و متواضع إلا اني مبسوطة بالنتيجة ?.

ولكن في اليوم الثاني حصلت كارثة حزينة أخرى ?.

?????

هجم سنجوب للمرة الثانية وعلى مسمع من آذني 🙁 !

نط عليه و طاح الفخار و تكسر ?.

ما آقولكم قد ايش حقدت عليه وقتها و كرهته ?. بس يلا الحمد لله بتتعوض.

الخطأ ان الخيط كان طويل اتوقع وقدر يوصل للمحطة بسهولة.

مر كم يوم وانا افكر وش أحط، لأني فعلا اشتقت للعصافير و اصواتهم بالبلكونة.

فحصلت غطاء علبة عطور كنت مضبطته ع السريع و مستخدمته لشيء ثاني. 

 

قررت أستخدمه مؤقتا لما أفضى و أروق لشيء صالح و عملي أكثر.

 

ماعليكم من الألوان اهم شيء الغاية ??

و إلى الآن الوضع مستمر و آمن ان شاء الله من هجوم سنجوب الملقوف ?.

.

الحمد لله ع ان العمل بسيط و متواضع إلا اني انبسطت بشغله. و الهدف اطعام كبد رطبة و الله يكتب الأجر يارب

أعتذر عن رداءة جودة بعض الصور لان أغلبها تصوير جوال سريع لتوثيق العمل ومشاركتكم إياه?.

في بنترست أفكار كثيرة و جميلة وسهلة التطبيق . 

اكتبوا بخانة البحث ( birds feeder DIY ) و استمتعوا بالصور و التطبيقات ?.

.

شكرًا مرة ثانية أروى الحبيبة، والله يكتب أجرك على ما تقدمين و ينفع بشغلك و عملك و علمك ?.

و شكرًا يا أصدقاء ع المتابعة الى هذا الحد. اتمنى فعلا وصلت الفائدة ().

.

صديقتكم أطلال

ع الإنستقرام هنا : @third_world93 ?

.

دمتم في رعاية الله ?.