طريقة الجريش
السلام عليكم ورحمة الله وبركاته
عدنا
هذي ثالث تدوينة في تحدي ( تدوينة لمدة اسبوع )
من زمان ما كتبت وصفات في المدونة ،
أحد أهدافي هالسنة اني أكمل تدوينة (منيو المدونة) وأوفر الوصفات لجميع الأطباق المذكورة في المنيو ليكون مرجع متكامل لكل أطباقي..
اخترت هالمرة :
طريقة الجريش
الجريش من أحب الأكلات الشعبية لي، وأفضل شخص يطبخها جدتي هيا الله يطول بعمرها بالعافية والسعادة،
لدرجة أن جريش جدتي هو أفضل جزء في العيد بالنسبة لي ..
لكن مهما شرحت لنا الطريقة استحالة يطلع مثل جريشها..
في الحقيقة ماعمري شفت بيتين جريشهم نفس الطعم
أذكر أول ماتزوجت بحثت عن طريقة الجريش في النت وبعد ماطبخته طلع لونه أحمر?
لا ومتوعده زوجي بجريش مايخرش الميه ، آخر شي اكتشفت انها طريقة اماراتيه وهم يحطون صلصة وحطيت معهم بدون أي تفكير
بس والله طلع لذيذ ، مختلف بس حلو
المهم بعد كم محاوله عرفت اسوي جريش يعجبني وسهل واعتمدت الطريقة واتمنى تعجبكم
?
المقادير :
- كاس جريش
- نصف كاس رز مصري
- ماء
- كاس لبن
- نصف بصلة
- صدر دجاجة او أي جزء من الدجاجة..(اختياري)
- بهارات وملح
- ملعقة زبدة
ممكن تستغنون عن الدجاج طبعاً ، لكن هذي الطريقة الي اسويها ..
أولاً انقع كاس جريش ونص كاس رز مصري في ماء دافي لمدة نصف ساعة على الأقل ، وكل ما تنقع أكثر كل ما كان أفضل وأسرع في الطبخ،
ثم على نار احمس نص بصله مفرومه قطع صغيرة مع صدر دجاجه مقطع صغار او منتف مع شوية زبدة،
اذا استوى الدجاج احط عليه مويه اربع كاسات تقريبا وملح وبهارات (استخدم خليط بهارات جاهز للأكلات الشعبية مع فلفل أحمر طازج أو مجفف)..
اللي يحب يضيف ماجي مع الماء او مرق الدجاج بدل الماء بيكون ألذ
بعد مايغلي الماء أضيف عليه الجريش والرز بعد ما أصفيهم من ماء النقع ..
أتركهم لحد ما يبدأ الماء بالغليان مرة ثانية ثم أخفض النار الى نار هادئة وانتظر لحد مايذوب الجريش تماما ويصير ليّن وكل شوي ممكن ازيد مويه اذا حسيته يحتاج زيادة ، لحد ما احس انه صار شكله زي الجريش المستوي،
اذوقه اذا طلع قوامه ذايب أضيف عليه كأس او كأس ونصف لبن..
اللبن أحطه آخر شي لأن لو حطيته في البدايه ماينضج الجريش بسرعة حسب ملاحظتي ، لكن البعض يحب يحطه من البداية مع الماء وينتظر أطول، أنتم بالخيار..
بعد اللبن أتركه على نار هادئه لحوالي عشر دقائق على الأقل ويكون جاهز، وممكن يترك على النار لوقت التقديم..
احب أقدم الجريش مع ليمون وشطه.. لكن ممكن اعيش بدون شطة أما اذا مافيه ليمون ما اصلح جريش?
?
?? الجميلات اللي في امريكا الجريش تحصلونه في والمارت وكل مكان باسم Cracked wheat
أو من المحلات العربية ..
أما اللبن موجود في والمارت وغيره باسم kefir
?
اللي يجربها يقولي رأيه بالطعم
واللي عنده وصفة للجريش لذيذة يشاركنا، أحب أجرب وصفات جديدة ..
وإذا فيه أي طبق شفتوه في حسابي وحابين تعرفون الطريقة لا تترددون بالسؤال ❤️
بالعافية عليكم
...
تواصلوا معي عبر :
انستغرام وتويتر : arwa_alomrani@
يوتيوب : arwa karu
سناب : arwakaru
اخترت لك:
As an Amazon Associate I earn from qualifying purchases
التعليقات ( 100 ) :
اترك تعليقاً
يجب أنت تكون مسجل الدخول لتضيف تعليقاً.
شكلها تششششششهي ???❤️✨ تسلم الايادي بجربها ان شاء الله
نفس الطريقه المعتمده عندي بس في اختلاف انا اكشن للدجاج وحده
يالله شهيييتين للجريش على هالصبح ?
يعطيك العافيه?
??شكله لذيذ ، اشتهيته الحين?بس ما يمدي يجهز على وقت الغداء?ان شاء الله بكره اجربه واقولك كيف طعمه????
أنا من عشاق الجريش الحامض، طريقتي اقطع بصلتين او اكثر (كل ما كثر البصل صار أطعم ) واحمسها مع اصبع زبده ( ادري كثير بس يطّلع الجريش ألذ ) أكون غاسله الجريش بدون ما انقعه مع شوي رد مصري و اخلطها مع البصل ، بعدها أحط عليها مرقة دجاج مذوب فيها ٥-٨ ملاعق حليب نيدو، و أحط بعدها علبتين الى ٣ زبادي و من كاس الى كاسين لبن واخليها تغلي وبعدها اوطي النار واخليها تطبخ ٣ ساعات ، طبعا مرقة الدجاج تكون كثيره لان الجريش يحتاج مويه كثيره ?? وبالعافية
امممم.. مظهرها جدااا جميل و اكيد لذيذة.. بس شو هو الجريش اروى ؟ فمح؟
قمح*
لا ، الجريش هو مثل حب الهريس بس مكسور، ان شاء الله اتكونين فهمتي علي
نعم قمح مجروش
تكون حبات القمح مكسره لكسر صغيره بس ما يكون طحين ناعم
تقريبا مثل البرغل الخشن
امنيتي اضبط جريش ??
جربت كل الوصفات وماضبط
بجرب وصفتك ان شاء الله تضبط ??
بصراحه ماعمري قد جربته شكله فاتني نص عمري ههههههه
لكن إن شاء الله أجيب طلباته وأسوّيه ،تسلم يدينك أروى ?
سر الجريش بالتحريك المستمر
تقريبًا كل نص ساعه او اكثر تعالي وحركيه
يذوب اسرع ويطلع طعم الذ وقوام اجمل
جميييييل
الجريش عششق خاصة اذا كان حار (فلفل)
ومع مسمنة احترافيه??
مع اني احبه لكن ما قد طبخته بنفسي يمكن لانه ياخذ وقت?
شكرا اروى شجعتيني اجرب طريقتك?
ماشاء الله ايش الجمال هذا ?❤️❤️
انا أحب الجريش بس ماقد سويته بنفسي ان شاء الله بجرب وصفتك وأسويه بإذن الله ، شكراً أروى الجميله ❣☘
انا اسويه بالبرغل لذيذ مرره
وأحيانا اسويه بدل اللبن جبن سائل وحليب خرافي :))
بالنسبه لي جرش ماما وغيره لا ومازلت احاول ولاطلع نفس اللي تسوي
وان شاءالله اجرب طريقتك.. يعطيك العافيه❤️
لا ، الجريش هو مثل حب الهريس بس مكسور، ان شاء الله اتكونين فهمت
الجريش بالطريقة الإمارتية مختلف وما انحط لا لبن ولا زبادي ، ان شاء الله اجرب طريقتك يا اروى
وعليكم السلام ورحمة الله وبركاته ?
مرحبا اروى
شكل لاسم (هيا ) سر في اتقان الجريش
امي كذلك -الله يرضا عليها – تتقن الجريش
وكل ماكثر اللبن في الجريش كل ماكان أطعم ⌒.⌒
?وكمان قبل نضجه انكب لي ألذ وأطعم
اذا سألت امي وش المقادير تقول ما تقدّر يعني تشوف القدر وتحط الكميات اللي تناسبه بنظرها ،من اساسيات جريش امي الماجي صح انه مضر والافضل الابتعاد عنه لكن مانحطه الا بالجريش فقط ويضيف للجريش نكهة رائعه
امي ذاك اليوم تسوي جريش للضيوف المهم إن الرز المصري خلص والجريش شوي أضافت شوربه كويكر ذاك الجريش كان ألذ جريش حتى الضيوف سألوا امي عن الطريقة
وان شاء الله أبطبق طريقتك لأن ودي اسوي وطريقتك واضحه
شكرا اروى?
أمي تحط بدل اللبن حليب طازج او حليب نيدو مذوب بموية ويطلع لذييذ واعرف ناس يضيفون عليه جبن زي جبن الكيري او جبن البقرات الثلاث ويطلع طعمه ليذيذ ومميز ???
معليش ? بدل الفيس الي فوق هذا ?
وان شاء الله اجرب طريقتك ?
ياليت تكتبين عن طريقة
الدجاج المشوي
الفلافل
الشابورة
بيستو
رز برياني
الله يسعدك ويحسن إليك ?
مثلي احب اسوي الجريش كل فتره واهم شي عندي حمسة البصل والفلفل اللي فوق الجريش يمي ??
الله يرضى عنك يا أروى شكثر استانس من أدخل مدونتك ???
لا تحرمينا يا جميلة !?
يممممي يممييي ماشاء الله عليك بالعافيه?
ما قد جربت الليمون! بجربه?
ماما تسويه نفسك تمام بس بدل اللبن ⬅️حليب السعوديه
وتزينه ببصل محروق للبني وذابل يطلع يقرمش
بدونه ما يصير جريش?
– وودي تنزلين طريقة البرياني وطرق ذكيه لرفع وتخزين الزائد من الخضار او الدجاج اي شئ ونستخدمها لبعدين لطبخه الثانيه?? ..
الله يسعدك ويقويك???
مممره تحمست اسويه لأني احب الجريش بس ما قد سويته ، وبجرب احط معاه بصل محروق عشان يكتمل الطعم ?❤️ .. يعطيك العافية
تسلم يدييينك
احب الجريييش مررره بس ماعمري سويته احسه شي صعب مررره ????
وعليكم السلام ورحمة الله وبركاته
ماشاءالله شهيتينى على الجريش وبالذات جريش امى الله يرحمها
كانت تحب تسوى الأكلات الشعبيه واختى اللى اصغر منى تسويه
بطعم خيالى يمكن نفس طريقتك بس تحط عليه سمن بلدى على حسب الرغبه وفوقه بصل مقلى عليه بهارات الجريش وليمون اسود مطحون فى صحن لوحده اللى يبغا يضيف ليمون على حسب رغبته
وبالهنا والعافية والف شكر ياقمر اللى تشاركينا فى اطباقك وافكارك سعيدة بمعرفتى لكى احبك فى الله
يسلم هالأيادي اروى
صحه وهنا حبيبتي
أنا ماعمري عملته !!! جالسه افكر اطبق طريقتك ?
و جمعتك خير و رضا يارب ❤️
في حفظه تعالى
انا سويته مره وحدة وطفشت لأنه ياخذ وقت فى الطبخ
وكانت محاوله فاشلة مااستوى زين ??
قبل فترة جابتلى اختى حافظه كبيرة جريش فى جمعتنا هى وصديقاتها
عندى فى البيت وكان لذيذ ?الله يجزاهم بالخير
ماشاء الله مره حبيت
بإذن الله اجربها ?❤
فعليا الجريش من أحب الأكلات لي
فترات كثير اشتهي اصلحها و اتكاسل ??
تدوينتك جات بوقتها اجااازة ??
ربي يسعدك اروى. جميلة جميلة جميلة مدونتك ماشاء الله ?????. خلاص خلي تحدي المدونة 360 يوم ???
اي والله ??
يالله اشتهيته وربي ??
طريقة جريش لذيييذة 🙂
ثلاث كاسات جريش (نورة أو التركي)موجود في العثيم غالبا.
كأس رز مصري.
وكأسين لبن وقد يحتاج ثالث .
وكأس حليب قبل ساعة من تقديمه.
كل كأس من الجريش والرز المصري مقابله أربع كاسات ماء.
وماجي وملح وكمون فقط.
لمدة أربع إلى خمس ساعات .
لأن مافي أحد من عائلاتنا يعرف للجريش أو يسويه كنت اذوقه من عند أمهات صحباتي في احتفالات الجنادرية في المدرسة ، مرررررة أعجبت فيه وصار من أكلاتي الشعبية المفضلة ? شكرا لك أروى حسيت الطريقة سهلة وأكيد الطعم لذيذ ?✨
بجّرب طريقتك بإذن الله, أنا طريقتي تختلف شوي,
أول شي اسلقي الدجاج وموية الدجاج هي اللي تستخدمينها بالطبخ.
بصله مقطعة
ثوم مهروس وبودرة الثوم.
زيت زيتون لحمس البصل والثوم.
مكعبين ماجي ” إذا متوفر”
زبدة أو سمن شوي.
حبتين جبن كيري “أو جبن مثلثات”
2 كأس موية “موية الدجاج”
1 كوب جريش مجروش ومغسول كويس ومنقوع نص ساعة (جايبه مع جريش من السعودية مايعجبني جريش أمريكا, غير جريش ضرما مافيه, الله يجزى خالتي خير اللي جابته لي).
ملعقتين زبادي مخففه بالحليب ويكون مقدار كأس (حتى يكون لبن, إذا عندك لبن كويس إذا لا سوي كذا)
شغلي النار هادية (بين 3-4 تقريباَ) واحمسي البصل والثوم مع شوي زيت زيتون لين يتغير لونها للأصفر بعدين حطي الجريش عليه وحطي الماجي والزبدة والجبن بعدين حطي المويه وخليه يطبخ نص ساعة مع التحريك كل 10 دقايق. بعدين حطي عليهم اللبن (الزبادي المخفف بحليب) وحركيه وخليه على نار هادية 2 وخليه يطبخ مع التحريك كل 10-15 دقيقة عشان ما يحترق من تحت, لين تذوقينه وتحسينه أستوى, تقريباً الحبات حقت الجريش تتحول للأصفر الفاتح مرة وتكون ذابت الحبات.
بعدين الحمسة اللي فوق, بصل مقطع ومحموس بكمون ولومي بودرة “ليمون أسود” أو دقي وحدة كبيرة واحمسيها معهم إذا ما عندك بودرة, والكمون كثريه شوي. ” أحب أكثر كمون لأنه لذيذ مرة”
وإذا استوى الجريش حطيه بالصحن وحطي زبدة أو سمن فوقه يذوب من الحرارة وبعدين حطي حمسة البصل بالكمون واللومي وبالعافية.
وأوقات أسوي صدور دجاج وأفتته وأحطه مع الجريش, طريقتي بتفتيته هي إني أسلق الدجاج وإذا أستوى وهو حار أحطه في بادية عميقه “زبديه أو صحن عميق” وأجيب خلاط الكيك اليدوي القديم وأخلطه ويتفتت معي ويطلع يا سلام.
ماشاء الله عليك أعجبني انك ماتكتبين الا بعد تجربه وخبره
ثانياً المحاوله حتى تنجحين أو تصلين لنتيجه مرضيه
بارك الله سعيك وحياتك وعمرك وجمعنا في الفردوس
لمن دونتي عن الميسون جارن طرت ع مطبخي?وطلع خلاطي ينفك من أسفل ماتتخيلين قد ايش فرحت لأن خلاطي بروان وغالي فخفت ماينفع له الميسون وأنا توني شريت الخلاط،…دمتي بفضل الله ملهمةً لمتابعيك
ما شاء الله تبارك الله ❤️
أول ماكتبتي الطريقة في الانستقرام .. حفظتها من بين الردود و طبقتها في يومها.
للاسف بهاراتي غير مخصصة للاكل الشعبي فكان الطعم غريب ?
بعدها استفزعت بخالتي المعروفة بجريشها اللذيذ مثل امك هيا الله يحفظها ?
و من أول محاولة ضبط ??
فيه نقطة تسهل عليّ كثير وهي اني انقع الجريش بماء مغلي في حافظة،
و اسكرها واخليه ساعه .. يقلل فترة الطبخ جددددددًا.
ومقاس الجريش: كل كاس جريش له بالطبخ كاسين مويه ونص كاس لبن. اكشن بصل أبيض بزبده ثم احط المويه واللبن وملعقه كبيره كمون مطحون وشوي ثوم بودره وملح و احط ماجي او دجاج منتوف مع شوي من مرقه. ثم احط عليه الجريش،
للتغطية اكشن بصل بزبده ومسمنه او بهارات
و فقط ??
فكرة النقع في الحافظه عبقرية ، باجربها في اسرع وقت ، اكثر شي اكرهه التنقيع والانتظار ، مره شكرا على عبقريتك
مرحبا اروئ كيفك ؟!!
حبيت اسألك يصير اصلح الجريش بـ جريش ناعم ولا لآزم خشن ?☹️☹️
يعطيك الغافيه
ينفع انقعه قبلها بلليل واحطه بالثلاجه؟
والطبخ مينفع قدر الظط؟
ايه ينفع
بإمكانك وضع الجريش كمان بالمايكرويف مع مويه وأختاري زر الأذابه يعطيك خمس دقائق ينقع الجريش اسرع .. ♥️
فكره حلوه الحافظة يعطيك العافية
يمي
يمي
?
أحبه بس عمري ما فكرت أصلحه، لكن الآن قررت أقلدك ?
أتمنى أروتنا المبدعة تعطينا الأشياء الي تعطي الطعام نكهة أجمل .. يعني مكملات لكنها تضفي نكهة مميزة
مثل البهارات سواء للطعام أو بهارات السلطات
خلطة تتبيل
خلطة الطماطم والليمون الي قلتي عليها قبل لايش تستخدم
ترى فيه شغلات صغيرة تعمليها تنقذنا وندعي لك عشانها، يعني لا تستصغري شيء
مرة شفت لك ورق الزبدة حطيتيه بالصينية وفوقه البطاطس اممم كم سنة لي أحفّر في المطبخ ودائما أرصّ الخضار كذا بدون ورق وأكره الصينية بعدها بس لما شفت صورتك على طول اليوم الثاني احط ورق الزبدة ويا سلاااام عالصينية الي ماعذبتني بغسيلها ?
الله يرضى عليك ويرضيك ?
يعني أكتبي لنا موضوع يكون قصاصات او فوائد قصيرة عن شغلات الطبخ والمطبخ بشكل عام
في جريش احمر اللي تضيفين له صلصله وفيه جريش ابيض بس طريقتك بالجريش تشبه طريقة السليق
انا أحب الجريش الأحمر
أحط قطع لحمه بالقدر وشوي زيت وفلفل اسود وفلفل احمر وملح وكزبره ناشفه واشوح اللحمه بعدها أضيف طماطم وبصل مفرومين واخليه يتسبك مع اللحم لا حسيته تسبك أضيف مويه حاره واكب الجريش عليه واخليه يطبخ وكل ما حسيته ثقيل ونقصت المويه
زودت عليه مويه واخليه يطبخ تقريبا ساعه ونص او ساعتين
وتقدرين تطبخين اللحمه ب قدر الظغط ( الكاتم ) عشان تستوي اللحمه بسرعه وبعدها أكب اللحمه على الجريش واخليه يطبخ
واسوي الشكنه واحطها على وجه الجريش ???
وطريقتك باينه لذيذه
تسلم إيدك ?
واحط مع الجريش رز مصري بعد
عشان يخليه يذوب
❤️
تسلم الايادي?
لنا تجربه فيه باذن الله❤️❤️
?
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه قبل فترة كنت ابحث عن طريقة جريش و لقيتك كاتبتها بحسابك نفس هذي الصيغه تقريباً و صارت الطريقه المعتمده عندي وحابتها ممممررره
حبيت تدوينتك و ياليت يصير تحدي تكتبين يوميا. لمدة شهر ???
دمتِ بود ??????
من أحب الأكلات بالنسبة لي ???خصوصاا في الشتاء اكثر شيء أقول لامي تسويها لانها ما تضبط معااي ???. ويعطيك العافيه ???
شكله لذيذ وغريب طريقتنا في الجريش مثل الاولين جريش فقط بدون رز مصري ومعه بصله مقطعه صغار برون حمس تكون معه وينطبخ بلبن فقط واللبن من مزارع مو من البقاله ويصير شي لذيذ وبعضهم يحطون معها شحم شخصيا ما احط واهم شي الكشنه نكشن لها بصل وسمن ونحط عليها بهارات مسمنه اسمها كذا(مسَمّنَه) واذا حمسنا البصل مع السمن قبل نحط البهارات نحط من السمن اللي اخذ نكهه وريحه البصل على الجريش ثم نحط البهارات واذا جهز الجريش حطيه وفوقه الكشنه واهم شي كمون ?
تسلم الايادي ومثل ما قلتي يا اروى كل بيت جريشهم له مذاق مختلف بالنسبه لي طريقتي في الجريش احس اسهل صحيح تاخذ وقت لكن سهله
كل كاس جريش له ربع كاس رز مصري وكاس مويه وثلاث كاسات لبن ( وممكن استبدال اللبن بزبادي او الخلط بينهم وافضّل الخلط بينهم يعني ٢زبادي وواحد لبن )
وملعقتين بصل مفروم او ممكن نحط البصل والزبادي واللبن في الخلاط افضل
وشوي كمون مطحون وملح
كل المكونات هذي اخلطها مع بعض بعد غسل الجريش والرز طبعا
وعلى النار حتى تغلي وبعدين في الفرن على نار هادئه جداً ويحرك كل نصف ساعه او كل ساعه (الوقت يعتمد على نوعية الجريش وكميته)
ممكن اضافة نصف اصبع زبده بعد ما يذوب الجريش وعصير نصف ليمونه قبل التقديم
ويمكن الاستغناء عن الزبده اذا حابه يكون خفيف
ومن الاشياء اللي تزيده لذه طبعا الكشنه
وهي عباره عن بصل مقطع صغير يحمس بالزبده ويضاف له كمون وفلفل احمر مطحون وليمون اسود وهذا اساسي للحصول على طعم حامض ولذيذ
وفيه خلطات جاهزه تسمى مسمنه لكن انا افضل اعمل خلطاتي بنفسي
يحر=يحرك* ?
حبيت اعلق على الكشنه ،حنا نحمس البصل بزبده او سمنه ونحط عليها ملعقة (بزار) كذا نسميه عاد ما ادري له اسم ثاني ويطلع ياسلام سلّم
اوف يالجريش احبه احبه بس معروفه انا اذا سويت طبخه ما استمتع فيها مثل لما اكل من طبخ غيري عشان كذا مافكرت اسوي جريش لاني احبه من امي ?❤️
وشكلي بحاول اجرب واشوف ✔️❤️
احنه بلعراق منحط لا لبن ولا رز بس الجريش ونفس الاضافات البقيه بصل ودجاج اكو جريش بيه شعريه ناعمه يطلع الطعم عجيب اشتري منه بكندا بجرب طريقتك ان شاء الله
جميل اروى شكله طبق لذيذ بجربه انا احب جريش جارتنا سعوديه نعرفها عمرنا كانها جدتنا طعم جريشها لاذقت لابعده ولاقبله ?
بس ان شاء الله اسوي جريشك?
ايوه صح احنا جريشنا اليمني ناخذ جريش ونغسله ونحطه بمويه ضعف كمية الجريش ونعلي النار عليه لين مايغلي ونخليه بنار عاديه ونقلب كل فتره ونحط ملح ولما يبدا يثخن لو اححتاج مويه نزيده وعلى اخف نار ومن ثم اخر شيء قبل يستوي بعشر دقايق نضيف حليب ابو قوس ونقلب عشر دقايق ونزينه بالسمن وممكن خبز التنور ناكله عليه طعم ولذاذه ?
وممكن بدال السمن قرفه يسوي لذعه لطيفه ?
جمييييل الموضوع مررة يا اروى وان شاء الله قريبا بتبع خطواتك واحاول اسويه ماعمري ذقته
مغري حقك ? من زممان نفسي اسوي جريش يوم شفتك منزله الوصفه انستقرام واروح اطبقها مرررره لذيذه وسهله الله يسعدك ???
شهتيني بالجريش يااروى ? راح جرب طريقتك قريبآ ??
الجريش الأحمر لذيذ جدا
احمس بصل مع لحم بشحم اللحمة اللي تكون على اطراف الجنب للخروف مع الجريش الأبيض او الأحمر ما فيه مثلها ثم طماطم معصورة وصلصلة وكمون وفلفل اسود وبزار تم مويه ثم الجريش المغسول وبعد ما يبدأ يغلي ادخله الفرن ،،الطريقه هذي مو لازم الجريش يكون ذايب بس لذييييذ
وبالهناء والعافية على قلوبكم❤️?
الجريش يعني قمح؟ ولا
لذيذ جدا…. يعطيك العافية
احنا جريشنا احمر ولازم حمسة دجاج بعظم وبدون لبن ولا حليب ولذذذذذذذذذيذ وقاتل جداً ?
شكراً لمخترع هذه الوصفة السحرييييةةةة ?
نفس طريقتك
بس بدون رز مصري
بس جريش
محزين طبق الجريش بكمية من كشنة البصل اللي هو بصل يتقطع شرايح ناعمة ونقليه في زيت .. اتوقع تسموها بصل محمر
وكمان نزين الطبق بليمون اسود ناشف مطحون
*ليمون مجفف و مطحون*
بدون الليمون الاسود ما نعمل جريش ?✋
نزين طبق الجريش**
جربت طريقتك وأضفت علبة زبادي كمان وضبط وانا باجتماع والجميع منهبلين عليه
شكرا لك ولتميزك ❤❤❤❤
بالعافية عليكم يارب اسعدتيني
الله يعطيكَ العافيه ، ☁️
جربيه مع البيتر ملك بدل اللبن يطلع نااااطع !
فيه جريش يجي بكيس مثل كيس الدقيق المعروف (عرفتوه صح?)
المهم مايحتاج نقع ينطبخ مثل الرز تماما وسوي كشنتك الحامضه لوحدها ?
جربتها وعجبتني جدا .. شكرا اروى
موضوع ررررررررررررروعة شكرا
انا بعد من عشاق الجريش بس للاسف مايضبط ومشكلته يستغرق وقت طويل في الطبخ
واتفق معك ان لكل بيت طريقة في صنع الجريش
ياليت تنزلين طريقة الكشري لاني من عشاقة
انا معروفه ومميزه بتصليح الجريش ابشرري اذا جيتي للسغوديه ابرسل لك وتذوقينه بس علميني وابشرري بالخير
حاليا اسوي طريقة جريشك ..سلمت يداك اختي اروى ??
بالعافية أروى.. تسلم يدينك
جربي تضيفين على الوجه الكشنة، ومقاديرها حسب طريقة امي:
بصلة محموسة بزيت زيتون
وملعقة كبيرة “او ونصف” ليمون أسود بودرة
وملح خشن 3>
وطبعاً اعصري ليمون اصفر بعد لو مثلي تعشقين الحوامض هههههه
اروى اعشق الجريش بالنسبة لي اللي يضبط الجريش اللي على اصوله انسان خبيررر
تحمست اجرب نفسي واطبخه واللي حمسني ان اكيد انتي بتطبخين مقادير على قدك انتي وزوجك فا باخذ بالضبط مكمية مقادير مع اني ابيها باللحم لكن اجرب اللحم بعدين …واستفدت من التعليقات جدااااا اول مره اقرا الين النهاية يعني التعليقات …بجربها واقولك تجربتي او بصورها لك واسوي شيررر
شكرا اروى بليز نزلي طبخات حلوه ثانيه
انتي جميلة ،
راح اجربه بحول الله❤️❤️
أحب هالأكلة وأتقنها الحمدلله
وعندي بعض الأسرار حتى يطلع الجريش يدوّخ ??
الحمدلله ما قد سويته في عزيمة ورجعت الحافظة فيها شي دائما تخلص ?
خطواتك لما قرأتها واضح ان النتيجة لذيذة وإليكِ بعض الأسرار ?
– كل ما طول فترة التنقيع كل ما سهل طبخه
– البصل يحمس في زبدة إلى أن يذبل
– الأفضل طبخ الجريش بـ لبن وحليب طازج بدون المويه
– إذا قرب يستوي أضيفي علبة قشطة + حليب الشاهي اي شركة عادي <<< تعطيه قوام وطعم خراااااافي
– البهار بس كمون والأفضل تطحنينه بنفس الوقت حتى يعطي طعم قوي
– الكشنة أحط معها فلفل اخضر مفروم بعد ما يذبل البصل ويحمر أضيفها وفقط اضيف ملح كمون فلفل اسود وشوي صلصة
اطبخ كل شيء الا الجريش أحسه صعب مدري ليه وكذلك الهريس اتمنى اكون شاطره فيهز????????????
ودي أغوص في مدونتك لطيفه مرتبه جميــــله مغريه الله يسعد قلبك دوووم مثل ما اسعدتيني – اختك المغتربه توافقك كثيراً في كل افكارك سبحان الله نفس ذوقي نفس شخصيتي انتِ انا ????دمتي بـكل حب و ود الله معك يا اروى الرقيقه واذا زرتي باريس لا تترددي في زيارتي ?❤️????
ماشاء الله جمييل ?واخيراً عرفت طريقه الجريش ….ياليت بعد تعطينا وصفات لأكل الاطفال بعمر ست شهور>>انا اثق فيك ويعجبني اطلاعك وممكن توفرين علي الشي الكثير من اكتشاف وجبات غنيه بالفتامين وشامله لاهم عناصر التغذيه
ماشاء الله بالعافيه ممكن تستبدلين اللبن بملعقه جبن سائله وقشطه ع حسب الرغبه وفي الكويت شفتهم يحطون لحم وكشنه طماط بس بدون لبن
لذيذ?
طريقتي في الجريش
اغسلي الجريش واحطه في قدرضغط و موية حارة و اشغل النارعلى اقل اقل الىقل درجة و اتركه ما يقارب الساعة بعدها اضيف كاسين لبن و موية و ملح
و اقفل القدر و برضو على نار واطية
اخر شي اكشن ٣بصلات. و اضيف لها ليمون اسودمطحون وكسبرة و ملح و قليل من البهلرات المشكلة
بعدها اضيف صدور دجاج مقطعة صغار مرة و صلصلة طماطم ودبس رمان
بعد ما يستوي كله
نغرف الجريش و يزين بخلطة الدجاج
لذيذمرررة
ربي يسعدك ?
وش نوع الجريش المستخدم قطري او تركي؟
لان سمعت يفرق بكيفية ومدة الطبخ..
انا تعلمت طريقة ثانية، مشابهة بطريقتك لكن ننقع الجريش بحليب بارد مدة ساعتين على الأقل.. بس يطلع لذيذ و يحتاج ساعة وحدة على النار اثناء الطبخ?❤️
??
جربت الطريقة اليوم .. لذذذذذاااااذة ??
متميزه اروى دايما ربي يوفقك يابنتي??
ما تطلع المقادير الباقيه
لوسمحتي حبيبتي اروي ما تطلع الاطباق عندي ولا المقادير
شكرًا لكِ أروى
جربت الطريقه
الجريش لذيييييذ 😋❤
انا من الجزائر وحبيت اجرب بس ما عرفت الجريش ؟؟ ممكن توضيح اكثر شكرا
سر الجريش الحامض😋😋
عرفته من طريقة الاستاذة أمل الجهيمي الله يسعدها وهو أضيف ربع ملعقة صغيرة من (ملح الليمون) مع الجريش أثناء الطبخ،
يطلع الجريش فيه حموضة لذيذة .
مشكورة اروى على طريقتك 💜💜
تسلم يدك يارب
اروى بعد عمري ممكن تصورين شكل اللبن انا في كندا عجزت الاقي لبن مادريت في ب ولمارت
وش اسم الرز المصري في ولمارت ؟