تركيب رشاش الماء (للمبتعثين)
السلام عليكم ورحمة الله وبركاته
اتوقع من العنوان بتقولون زودتها أروى بتدخلنا في السباكه
بس أوعدكم شي مره سهل ولا يحتاج أي معدات ولا خبره
من أكثر الأشياء اللي يعاني منها المبتعثين أو أي أحد يسكن في الخارج هو عدم وجود رشاش الماء الخاص بدورات المياة (أو بعبارة أخرى الشطاف) !
طبعاً ما كنا لنستسلم للأمر الواقع ونستخدم (جيك أو علبة مويه) طول مدة الإقامة،
لأنه شي مثل كذا من الأساسيات اليومية وبيكون جدا متعب ومزعج العيش بدون الشطاف .. فلازم حل
في البداية رحنا لمحل Home Depot محل معدات فروعه في كل أمريكا, سألتهم عن الرشاش وجلست أشرح لهم ساعه وشو هذا الاختراع اللي يرش جنب التويلت أبدا ما استوعبوا الفكرة
وأنا لليوم مو مستوعبه انهم عادي عايشين بدونه ..
المهم، حصلنا نوع واحد بس في المحل لكن ما اعجبني استخدامه صعب،
وبعد بحث حصلنا في أمازون أشكال كثير مصنفينها باسم diaper sprayer
بأشرح لكم طريقة التركيب، لا تحسبون إني اكتشفت الطريقة بنفسي وأطلقت السباكه التي بداخلي فجأه،
زوجي الي ركّب الرشاش وشرح لي بالخطوات وصورت شغله عشان أنقل لكم الطريقة 🙂 ..
أولا : تشترون الرشاش ، لازم من أمريكا لا تجيبون رشاش معكم لأن ممكن مايكون نفس مقاساتهم (أو حسب البلد اللي انتم فيه اطلبوا منه)..
جربنا ثلاث أنواع وهذا أفضل نوع منهم:
اضغطوا ع الصورة وتطلع لكم الصفحة الي طلبت منها
(ملاحظة: التدوينة مكتوبة من سنوات فهذا النوع تحديداً ماعاد موجود وطلعت بدائل كثيرة وتقييماتها ممتازة في أمازون تجدونها في هذا الرابط اختاروا الشكل اللي يعجبكم وأهم شي انتبهوا للتقييم.. أو ابحثوا عنه باسم Toilet Sprayer أو diaper sprayer )
هالرشاش استخدمناه سنتين تقريبا ولما صارت فيه مشكله راسلنا الشركه وأرسلوا لنا واحد جديد مجاناً ومازلنا نستخدمه لليوم..
طريقة التركيب
هنا رقمت القطع حتى يكون الشرح أوضح
أول خطوة في التركيب نشوف تحت التويلت الوصله اللي من التويلت للجدار لازم نقفلها بواسطة المثلث اللي تحت حتى توقف المويه تماما ..
ملاحظة : اللي ماعنده هالقطعة ممكن يقفل المنفذ الرئيسي للمويه وبعدها ممكن يشتري هالقطعة ويركبها .. لكن الغالب انها موجوده الا في دورات المياه القديييمة جدا
هذا شكل القطعة وتحصلونها هنا
بعد ما نوقف الماء نسحب السيفون كم مره لحد ماتتفرغ الموية من الصندوق ونتأكد ان مابقى أي موية الا لو كانت قليلة جدا ..
وبعدها نفك نهاية الأنبوب المتصلة بالتويلت
بعد ذلك نمسك الجزء العلوي الظاهر في الصورة و نركب فيه القطعة المستطيلة ( رقم ١ )
ونركب القطعة المستطيلة من الجهه اللي فيها بلاستك أبيض على التويلت في نفس المكان اللي كانت مشبوكه فيه الوصله سابقا..
واضح شكلها جدأ كأنها تركيبه .. ومن الجهه الأخرى نرجع نركب الوصلة الي للتو فكيناها ..
يتبقى فتحه واحدة في القطعة رقم ١ ، نشبك في هذي الفتحه ( القطعة رقم ٢ ) من الجهه ذات النهايه السداسية
ومن الجهه الدائرية نشبك الرشاش ( القطعة رقم ٣ )
باقي القطعة رقم ٤ و هي المعلاق ، ممكن تركبونها على التويلت مباشره أو تثبتونها على الجدار أو أي حته تناسبكم ..
جدا شي مريييح و التركيب ماياخذ وقت ولا جهد ..
طبعا ما يحتاج أذكركم ترجعون تفتحون المويه الي سكرناها أول خطوة ..
وعلى طاري التويلت .. فيه ناس سألوني من وين أخذت الستاند الرمادي اللي خلف التويلت ..
أخذته من Target ، وفيه أشكال أكثر و أجمل هنا
بالعادة أحط سله على الرف فيها الأغراض الخاصة بالتويلت أو أغراض النظافة الشخصية .. وبعض النباتات على الرف الثاني ..
وبما أني ما أتوقع أجيب لكم سيرة التويلت مره ثانيه في حياتي فرصة أقولكم عن هالاختراع الرهيب
سبري ينبخ على الموية اللي في التويلت بحيث مايطلع اي ريحه بعد الاستخدام ، مره مهم و لطيف في حمام الضيوف منعا للإحراج لأن ملطفات الجو أحيانا ماتكون فعالة بشكل مُرضي .. ماله داعي ندخل في العميق . . . .
تحصلون البخاخات هنا .. التقييمات عليها خرافية ..
وبس أتمنى من كل قلبي يفيدكم هالموضوع
و بأكون سعيدة جدا لو شاركتوا هالتدوينة لكل المبتعثين اللي تعرفونهم 🙂
دمتم بخير وسعادة يارب
...
تواصلوا معي عبر :
انستغرام وتويتر : arwa_alomrani@
يوتيوب : arwa karu
سناب : arwakaru
اخترت لك:
As an Amazon Associate I earn from qualifying purchases
التعليقات ( 140 ) :
اترك تعليقاً
يجب أنت تكون مسجل الدخول لتضيف تعليقاً.
شكرا لك اروى .. كالعادة مبدعة ف مدوناتك ❤️
اي والله كل شي منها حلوو
جميل جداً، سلمت يداكِ
الله يعافيك اروى شرح واضح
انا في ولاية أريزونا ويباع عندنا ب home depot
فعلا شيء اساسي ونحتاجه
نااايس الموضوع ومفيد ماكنت ادرس انهم عايشين بدونه …
بس عندي طلب?
يليييييز نزلي درس ع الرسم الرقمي وتلوينه واهم شي ابغى اعرف شلون المخلوقات اللي رسمتيها ف رأس الصفحه تفتح عيونها وتقفلها نزلي شرح لها اكووون ممنونه لك???
ههههههههه حبيت المخلوقات .. ابشري بانزل الطريقة
**ماخاب من استخار وماندم من استشار**
لاني تفكيرك وابداعك اعشقه واميل له ويعطيني الهام وابداع ،، كثير يهمني رايك بموضوع ماله علاقه طبعا بالرشاش ?? لاكن بحكم اخوة الغربه والابتعاث ? اذا ممكن تسمعين لي وتعطيني رايك اكون ممتنه وشاكره لك?
الحاجه أم الاختراع ..ونحمدالله على نعمه الاسلام ..لازم تستخدمون أفكاركم ببلاد الغرب ..وفقكم الله وردكم سالمين ياالمبتعثين
مرحبا .. الله يعطيك العافيه ياارب .. انا متابعه جيده لك ف كل كل مكان ?.. بس كنت بضيف شي انه ممكن يركبون الرشاش ف ف البزبوز تبع المغسله عشان المويه الحاره للناس اللي عايشين ف اماكن بارده و مرره طريقته سهلله..
كيف انا ماقدرت اركبه بالبزبوز
الأخت أروى سلمت يمينك
دائما كعادتك متالقة في طرح مواضيعك و تلامسين ازمات حساسة بصراحة هههه .. احسنت اروى ..
شكرا لبنه اسعدتيني ..
مرحب??
جزاج الله خير .. كنت اعاني من موضوع الغسيل ف السفرات .. موضوع مهم والشرح بسيط ..
ربي يسعدج دنيا واخره ويرزقج بالذريه الصالحه وكل خير يارب??
هههههههه الله يسعدك تدوينه حلوه وغريبه ? بس من جد للحين ماني مصدقه ان في امريكا مايستخدمو مرشات المويه ?
في أغلب الدول الغربية حتى في شرق أسيا 🙁
مش بس الاجانب .. انا رحت لمصر ولقيت مافيه رشاش ?!!
اموت وافهم الفكرة و هل فعلا كل الناس عادي عندها !
في مصر فيه رشاش مخفي داخل الكرسي! ما ينحب لكن أفضل من لا شيء
لا يا حبيبتي موجود بس بعض الفنادق السياحيه في شرم الشيخ وهيك اماكن مثل الاجانب واحنا كمصرين بنعاني نفس المشكله اما نروح نصيف
جميل ماشاءالله عليك مبدعه
Thank you so much
الله موضوع شدني مع اني مو مبتعثة، بس احب السمكرة والسباكة ?
تستغربون لو اقولكم: كل شيء في البيت اسويه، كهرباء، سمكرة، سباكة، زراعة البتاع كله ?
يسعدك اروى على المعلومات المفيدة اللي تفيد فيها الآلاف ❣
ممكن تسكنين عندي ؟ هههههه
شكراً شكراً أروىٰ المبدعة ✨
وفقكِ الله لما يحبه ويرضىٰ
❤️
يسعد يومك آروى .. جزاك الله خير على هالتدوينة 3>، قبل فترة فكرنا نركب بس استصعبنا الموضوع وكنسلنا الفكرة لعدة أسباب من ضمنها هذا اللي ودي أستفسر عنه وهو: كيف مستوى برودة الماء ؟ مزعج جدا لو كان بارد 🙁
مويه عاديه ، في الشتا عندي مويه المغسله ابرد منه بكثير ، بس ما احسه مره بارد
يعطيك العافية أروى ?? موضوع مهم بالنسبة لنا المبتعثين.. بس عندي سؤال⁉ الماء ?يكون بارد الي طالع من الرشاش والا فيه امكانيه نتحكم بحرارة الماء ؟؟؟!
مافيه تحكم بالحراره ، بس عادي بالنسبه لي ما احسه مره بارد
تمام عليك موضوع مهم جداً صراحه
يعطيك العافيه تسلم يدينك ()
يعطيك العاافيه ماقصرتي ❤️
اي والله ويلمونا في امازون اول شي اطلبه الرشاش في كل حمام ??? والبخاخ الريحه مااااره جميل وعجبني اكثر شي ريحته الي وردي واسود لونه ??
كم جربتي من لون ؟؟ محتاره اي واحد اجرب غير الاساسي ، جربتي الاساسي ؟
انا مقيمة بالخارج وعن جد فادني الموضوع جزاك الله خير
وعليكم السلام ورحمة الله وبركاته
كيفك ياحلوه ?
فكرة طرح روعه علشان اللى مايعرف يستفيد
انا بحكم سنى وبحكم كان زوجى عسكرى ودائم منتدب
كنت اضطر? اسوى كل شئ بنفسي كهرباء سباكة تصليح الدواليب
ووو الى آخره ومو مدح فى نفسي بس احسن الواحد يعتمد على
نفسه? جزاك الله خير يالغلا ويسعدك ربى مثل ماتسعدين الناس
بس الغريب انهم مايستعملون الشطاف ?صدق النظافه من الإيمان
والحمدلله على نعمة الإسلام واسعدتنى المشاركة فى موقعك
جاء بوقته يا أروى?? كنت أدور بأمازون ومحتاره أي نوع آخذ.. شكرا الله يجزاك خير❤️
مبدعه ماشاءالله عليك ان شاءالله اذا ابتعثت استفيد منها ان شاءالله ههههه♥️♥️
يعطيك العافيه أروى تدوينه قيّمة
بس حبيت اذكر الأخوات اللي معاهم أطفال وحابين يركبون الرشاش
ينتبهون على أن الحمام خشب أصلا
فالطشطشه ممنوعة عشان لاينعدم مع مرور الوقت
جزاك الله خير..
فعلا التدوينة مفيدة جدا
وعندي أيضا قطعة ممتاااازة ورائعة اشتريتها من أمازون للحمام للشطاف بعد استخدام عدة منتجات كلها فاشلة ..
بإذن الله أشارككم الفكرة أو أرسلها لك أروى بالطريقة التي تناسبك ؟؟ بلغيني
اهلا دارين ، اتمنى تراسليني على بريد الاصدقاء .. arwa@arwa.cc
الله يسعدك عطيني صوو للس استعملتيها وفشلت وصوره للي زبط معاك
يازينك أروى … ? يعطيك العافية ماقصرتي …??
شكراً اروى
قال ﷺ
ومن مشى مع أخيه المسلم في حاجته حتى يثبتها له، أثبت الله تعالى قدمه يوم تزل الأقدام،
فعلاً موضوع مهم … بالنسبة استخدمنا المغرف فترة من الزمن و لكن الان اولادي كبروا و احب انهم يعتمدون على انفسهم في النظافة الشخصية بدون ما يكون هناك اي فوضى في الحمام …. فطلبت من قريبتي المقيمة في الامارات ان ترسل لي شطاف المسافر …. و ان شاء الله سيصلني خلال يومين …. اتمنى ان يناسبنا هذا الحل … و اذا لم يناسب سأجهز عدة السباكة و نتبع خطواتك عزيزتي ?? مشكورة مقدماً ??
تدوينه رائعة كروعتك…
لي ملاحظة بسيطة… ” يجب التعامل مع الملطفات و أشباهها بحذر فهي في النهاية مواد كيميائية و ضررها على صحة الإنسان والبيئة ليس سهلاً، وتجنب استخدامها هو الأحرى”<<<< خوذي العلم مني ككيميائية 🙂
دمتي بود
تسلم يدك ومايحرمنا طلتك
الموضوع فعلا مهم لنا كمغتربين
ونعاني من هالموضوع جربنا انواع كثيره ماضبطت
يعطيك الف عافيه حبيبتي??????
مشكورة حبيبتي أنت رووووعه
الله يسعدك اروى جد مريح الفكرة وجات بوقتها … جاري التطبيق باردة الله انا استخدم اللي ينشبك بالمغسلة جد متعب وشكله احس يشوه الحمام ??
مبدعة ??⭐️
وفقك الله اخيتي ??
الله يسعدك وينور عليك??انا استخدم الرشاش الابيض مررره مبهذلني يعلق?وشكرا ع المعلومات القيمة????
فعلا جدا سهل وماياخد عشر دقايق
امس ركبته وكنت برضو جايبته من امازون..
يعطيكي العافيه اروى ماتقصري ..
بدي اسالك سوال اوف توبيك?..
الجو حاليا بنيويورك تلوج وبارد ونفسي اجيب زرع بالبلكونه بس خايفة يموت من البرد، تعرفي انواع تتحمل البروده؟؟
بالنسبه للداخلي،
ايش اسماء النباتات اللي سهل العنايه فيها وتعيش لفترة طويله؟
شكرا مررره مستفيده من مدونتك ومواضيعها??
You do a good job Arwa,
Rawan
احسن شي للنباتات انك تروحين للمحل بنفس الموسم وتشوفين نبتاتهم الخارجية وتسألين المحل مباشره عن الجو والعناية .. فاهمين هم وبيعلمونك كل شي تحتاجين له
جزاك ربي كل خير
انا كنت ماخذه من ساكو حاجه تصلح للحمام وانتي بكرامه زي الجالون تعبيه مويه وفيه لي بس للامانة مب عملي ماكمل معاي شهرين 🙁 عاد الحين ان شاءالله بسوي طريقتك ..
الله يسعدك دنيا واخره
صراحة جدا سهله و ما يبيلها ، جزاك الله خير ..
فيه كمان طشاش للماء من ساكو ( خاص بالمسافر ) بس فقط يحتاج تركيب .. واظن له انواع بالحجم ..
يازينك
اليوم من وقت ماصحيت اقول لاختي اروى نزلت الموضوع يلا روحي شوفيه وسويه لنا بس ماش محد سمعني هههههه
طلبته والله يستر مااعرف اذا راح يجي نفس المقاس او لا ؟ مدري هي الانابيب كلها نفس الحجم او لا !
عاد بكرا ان شالله بيوصل وبنكتشف الحقيقة 🙂
أروشه شرايك تفتحين محلك التجاري للشطافات ?
أحب ابداعك ياجميلة ??
مرررره جميل تبارك الله ….. شكراً أروى يعاطيك ألف عافية ❤️❤️❤️
اختك اروى تدوينه رائعه ومفيده
انا عندي الرشاش الأبيض له سنتين وزياده والحمد لله تمام ما خرب بس الصدق المويه بارده ? منطقتنا بارده في الشتاء متعبه شوي..
بخاخ الريحه ما جربته معتمده على الفواحات الكهربائية بس مدام عند امازون لازم نجربه ..
شكرًا على وقتك وجهدك ،،
مبدعه كالعاده اروتي ? يعطيكي العافيه
السلام عليكم يعطيك العافيه اروى ربي يسعدك على وقتك و مجهودك الي تبذليه عشان تساعدي محبينك ومتابعينك ربي يجعله في موازين حسناتك ?
الله يسعد قلبك ماقصرتي ذكرتيني بشهر العسل اخذت معي شطاف المسافر من ساكو مريييح جداً لان مثل ماقلتي ماعندهم شطافات حتى في اوروبا وقليل جداً تحصلين فندق موفرها
موضوع جميل جداً ومفيد اخوي برا برسله له يمكن يفيده ويفيد أصدقائه ❤️ يعطيك العافية أروى
شكراً لطرحك النافع ☘
شكرا
جميل جداً .. نحن بعد من وصولنا لامريكا واستقرينا ركبنا مثله .. لأن مستحيل نظل كم سنة على الجيك او غيره .. بيكون الوضع صعب وغير عملي على الدوام ..
جميله المدونة ومواضيعها ماشاء الله .. الله يوفقك ويرزقك من واسع فضله ..
بالتوفيق والى الأمام ان شاء الله ..
شكراً على على التدوينه حبيبتي أروى ?
وانا جديده في تدوينتك واستفدت وايد منها ?
شكــراً لكـ ??
الله يسعدك ي أروى
جُزّيتي خيراً وجنة ?
فككرة جداً رائعة اتمنى يستفيدوا منها المبتعثين.❤
جزاك الله الف خير?
سلام أروى
انا كمان ساكنة في امريكا و كنت حابة اركبه من زمان حبيت أسألك احنا شقتنا كراء ممكن نركب فيها ؟؟
و في البيت اذا كان ملكك في علاقة بعداد الماء يعني ما يسببلوك أي مشاكل
شكرا حبيبتي على الموضوع الله يعطيكي و يغنيك .
مافهمت حبيبتي ايش يعني كراء؟
كراء يعني بيت أجار تقصد ?
??????????
تسلمين يالغالية
ربي يعطيك العافيه اروى مشكووووووره لانك دايما تفكرين بالغير قممة اخلااق ربي يسعدك
مُبدعه كعادتك ❤️?
ماشاءالله
جميل يا أروى !
سلمت يمناك اروى وربنا يحفظك ويعطيك الصحة والعافية
يعطيك العافيه اروى
كنك حاسة فيني شايله هم الموضوع هذا
انا رايحه بريطانيا بعد عشرة ايام ومو عارفه اذا فيه رشاش او لا
وشكله مافيه بس هل ينباع هناك نفس اللي عندك؟؟
وايش رايك اللي في ساكو ينفع او لا ؟؟
اهلا ، ما اعرف والله ماجربت حق ساكو بس اظن الافضل تاخذين من نفس البلد عشان المقاسات تكون نفسها
???الله يكتب أجرك حنا ف بريطانيا جبنا الشطاف من السعوديه وشبكناه ع مغسلة اليدين والحين نقلت بيت جديد وللاسف المغسله فيها صنبورين حار وبارد??? ماينفع نشبك عليهم ببحث ف امازون وارد لك وش يصر معي
بجد وش وضع الصنبورين
من يستخد البارد او الحار لحاله
معاناة والله ?
❤️❤️❤️❤️مبدعة ودائما تقدمين لنا الراقي والمفيد الله يبارك لك ويرزقك من حيث لاتحتسبين
تسلم يمينك الله يكتب اجرك جميل شرحك جدا ❤❤..
فعلا شيء مستفز عدم وجود الشطاف ?
موضوع مفيد كثير
مع اني مو مبتعثه بس لا سافرت لدول برا معاناه مع الحمام الله يكرمك
يعني جد جد شي مهم
شكرا على فقرة السباكة اللطيفة
أروى جميلة إضافاتك كالعادة
إذا ممكن تقولي لي ايش قالب الووردبرس اللي تستعملينه
❤
اهلا ،، شكرا لجمال كلماتك .. ما استخدم قالب جاهز ، المدونه مصممه خصيصا لي
يعطيج العافية فديتج ما قصرتي والشرح واضح ومفيد.. مشكورة فديتج
يسعد قلبك وكل ايامك اروى
انا لما ركبتة قبل فترة بنفس الطريقة واجهتني مشكلتين :
١- الموية بااااااردة مرة ماتنفع مع الشتاء ?
٢- بعد شهرين او ثلاث حصل تسريب داخلي فالمواصير وانعدم الدور اللي تحت الحمام بالموية بقع وخرب البوية وحرق اللمبة مع ان الحمام والشطاف فوق كانو مزبوطين كيف صار كذا مدري ،، متحمسة ارجع اركبة بس خايفة ينعاد نفس الشي
ايش تعتقدي السبب برأيك وشكراً جزيلاً الله يجزاك ووالديك الفردوس ويرضى عنكم دنيا وآخرة يارب ❤️
اهلا ، ما اتوقع التسريب له علاقه بالرشاش لانه يكون متركب خارجيا ومافيه اي عبث بالمواصير لكن اعتقد التسريب صادف الوقت الي ركبتوا فيه الرشاش .. بالنسبه للبروده انا اعيش في منطقة حاره في الصيف وباره في الشتا لكن الشتا نكون فاتحين التدفئة وطالما الجدران مو بارده مواصير المويه ماتكون مره بارده ، يعني مو دافي ابدا لكن بروده محتمله ، بالنسبه لي شخصيا ما امانع انها تكون بارده ، اهم شي يكون فيه مويه جاهزه بدون حوسه ، خاصه ان المويه الدافيه ايام الشتا نجلس ننتظرها فتره وانا ما احب اهدار المويه بهالشكل فعادي متعوده اني اتوضا واغسل بالماء البارد .. اتوقع انه حسب كل شخص وحساسية بشرته للبروده ..
أفادكم الله
دائمًا أسمع المغتربين يشتكون من عدم وجود الشطاف لكن أول مرة أقرأ موضوع يطرح الحل بالتفصيل 🙂
الله يوفقك
بس عندي تعليق بالنسبة للصدأ? خذي قطعة قصدير وافركيها على الصدا وبتشوفينه راح ويلمع ✨✨
اول مره اسمع بهالحركه ، باجربها باذن الله شككككرا لك
مرحبا اروى مشكوره على كل شي انتي تساويه ترى ذي التدوينه مفيده حتى لغير المبتعثين يعني اذا خرب رشاش المويه حقنا نصلح واحد جديد بانفسنا مايحتاج نجيب سباك ومدري وش على اشياء سهله ثاني شي ودي اسئلك مدونتك على اي نضام مسويتيها يعني مو بلوجر ولا وورد برس اتمنى تفيدينا لان عندي مدونه وما حبيت بلوجر
شكرا سارة .. مدونتي وورد بريس لكن تصميم وبرمجه خاصه مو جاهزة .. بلوجر وورد بريس كثير يتشابهون له ماحبيتيه؟
الله يسسسعدك يا عسسسل جالسه أفكر إذا رحت وش أسوي شكراً من القلب يا جميييله ?
أحبك في الله ?
ياليت يا أروى تدخلينا بالابتعاث أكثر وتكلميننا عن حجابك وأيش تلبسين ومن وين ممكن نشتري ؟
خاصة الاماكن الباردة
ماشالله عليك اروى مبدعه كالعاده ?
مرحبا ?فيه شطاف مرا جميل يوم كنا ف امريكا كنا نستخدمة تركبيتة مع الحنفية من فوق و تقدرين تتحكمين فيه زي الحاجة مدا مركبة معه اقصد انو تفتحين وتقفلين عشان الشطاف والحنفية وحار وبارد ( معليش شرحي اهبل ) ? طلبناه من موقع ويتاخر في توفيرة سعرة اذا منب واهمة ٥٥$ ومرا ماذكر الموقع بس ان شاء الله احاول ابحث عنه .
الله يجزاك كل خير يا أروى
أنا لي سنه ساكنه بأمريكا ومره مستصعبه فكرة انو أركب رشاش
بس لما طلبت من أمازون نفس رشاشك
واتبعت خطواتك حرفيا ، الموضوع ما أخذ معاي سبع دقايق بالضبط
تحسفت على أيامي الي راحت بدونه هههههههههههه
مررررره شكرا
سعييييدة جدا انه فادك .. فعلا الموضوع سهل لكن يبغاله قرار هههه
للاسف شرينا الرشاش من امازون بس ماقدرنا نركبه لان الماسوره حقت الكبنايه قديمه ماقدرنا نفكها
llكن تحتاجون أداة (ابو جلمبو) او مدري وش اسمها اللي تفك بقوه لكن تأكدوا من اغلاق المنفذ الرئيسي للماء .. حقنا كان زيكم قديم وفكيناه بالقوه .. او ممكن تستعينون بسباك
الله يعطيك العافية أروى.. موجود أيضا ب تويز ار اص واسمه diaper sprayer. استخدامهم له غريب صراحه المهم انه يناسبنا ان شاء الله.. ماجربت هالنوع لكن اكثر من وحده علمتني عن
الله يسعدك اروى ويحقق امانيك ويرزقك من واسع فضله ???
باختصار أحبك في الله ???
افكارك دايم تبهجني وتسعد القلب ?✨ربي يحفظك
الله يسعدك ???
انتي مُذهـله ومُلهمه ربي يوفقك ويسعدكَ ??
اهلن الأخت اروى
حبيت أسأل اذا عندك علم
وين ألاقي مثل هذا ف بولندا
لان تعبنا وحنا ندور ووو
فأتمنى تفديني ?
أهلا ،، والله ماعندي علم ، ممكن في محل بيبيز ار اص حصلناه بأكثر من مكان
شكرا أروى يعطيك العافية مدونتك تفتح النفس ماشاء الله 🙂
مدونتك من أهم الأشياء في حياتنا ??.
يازينك والله
اخخخخيرا شرح واضح
شكككرا لك فكيت ازمة
http://mtatar.com/ts4/register.php?ref=20
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تتكلمون من جدكم مايستخدمون المويا بعد ال…..
يارب لك الحمد على نعمه الاسلام
الله يسعدك ، انا مبتعثه فرش ههههه مالي اسبوع وصلت وجبت معي رشاش من ساكو وع الفاضي مافادني ?? بطلب نفس حقك
ممتاز جزاك الله خير … وبالفعل شي مهم وبسيط وأريح من الجيك ?
البخاخ احسه ينفع لشهر العسل اكثر شيء ?? منعاً للاحراج يعني ههههه بيفيد والله مره خصوصاً للعروس لكن كيف طريقة استخدامه عذراً على الشفافيه …. شكراًجزيلاً يا اروى
للاسف ماطلع يركب!
تصميم الحمام عندي الله يكرمكم غريب شوي لانو مودرن وماقدرنا نركبه ..
عالعموم الرشاش موجود عندي اللي تبيه لانو فات الوقت ماقدرت ارجعه:(
ي زينك ي اروى والله?? لكل مشكله عندك حل ???
جزاك الله الف خير
جزاك الله خيرا أروى ♡♡
رواك الله من خيراته ♡
من الجميل أنك ما استحقرت مثل هذه المعلومة التي تفيد الكثيير
مرحبا اروى..
بما اننا بموضوع التواليت حابه أسألك عن فلتر الشاور الي ينحط على الشاور نفسه من وين اخذتيه وكيف طريقة تركيبه والتفاصيل كامله
لان هنا بامريكا مويتهم عددددمت شعري مره ومااردي وش النوع الزين صراحه فياليت تسعفيني وتنزلين تدوينه بهذا الخصوص اكون شاكره لك ,,
شكككرا مره الله يجزاك الجنة يارب
روحي يا شيخه ربنا يفتحها في وشك قادر يا كريم
انسانه مبدعه بمعنى الكلمه الله يحرسك
جميل جدا ولطيف وكالعادةابدعتي
الله يسسسسسعدك??? والله ضحكتيني من قلبي على الاندومي الأصفر ?وعلى حمام الضيوف وباقي القصه?
اليوم دمك شربات??
شكرا أروى على المعلومات المفيدة ، بدي اقلك بس اني بقرا في التدوينة واضحك .. شكرا لدمك الخفيف. .
مرحبا
انا اشتري هالرشاشات من البحرين واخذهم معاي لاوروبا لكن مع الاحظ انهم يختربون بسرعه + الماء يكون بارد ❄️+ احيانا ينقط وتتبلل الارضيه ? الحل ان استخدم ابريق لري الزهور ? امليه ماء دافئ افضل و حجمه صغير والضيوف للمسلمين يعرفون فائدته ويستخدمونه معانا
في بعض الجوامع او المراكز الاسلاميه في اوروبا يحرصون على تركيب الرشاشات او الشطافات للطهاره ?
جربي لصدأبايكروبونات الصوديم بعد تخفيفها بشوية مويه تحطي منهاعلى الصدأ تخليها عشر دقائق تقريبا بعدها افركي بفرشه ناعمه او…..* ماتكون المويه اكثر من البودره اهم شئ
وااااااااي وفرتي علي مشوار طووووويل … ويريت تكتبين لنا تجربتك مع الماي بامريكا لان الاستحمام في الماي الي كله كلور تعيس … يعدم الشعر
ملاحظة :
ماي بالكويتي
مويه بالسعودي
عزيزتي أروى ?..
لدّي إستفسار ، وأتمنى منكِ مساعدتي لو استطعتِ ..
هل بالولايات المتحدة يوجد مدارس تعليم باللغة العربية ؟
شكراً لكِ .
هههههههههه والله انتى عثثثثل وكل مواضيعك جميلة
مش فاهمة ازاى فيه ناس عايشيين من غير شطافات ^_^
مشكوره على الفكرة ياعسل
بس تنبيه صغير ومفيد للي عندهم أطفال ويحبون اللعب بالمويه ببتتعبين مع التنظيف وتنشبف المويه خاصه ان الحمامات مافيه تصريف للمويه مجربه سابقه الامر جداً متعب
انتي تجنني
شكراً لك أروى كلعاده اروى دائما مبدعه❤️❤️
يعطيك العافيه افدتيني❤️❤️❤️
بارك الله فيكي
انا مبتعثه والحمدلله بيتي فيه طشاش بس صحباتي مايقدرو يركبو مدري ليش برسلهم التدوينه يمكن انهم ماعرفو يركبوها
السلام عليكم، سيدة أروى، أشكرك من كل قلبي، وأدعو الله أن يجزيك خير الجزاء، وأن يكرمك بكرمه، ويعطيك من عطاياه الجزيلة، أنا مقيمة في أمريكا منذ أكثر من سنتين، وبستفيد كثيييييير من تجاربك وخبرتك ومعلوماتك الرائعة كروعتك، وكل ما استفدت بشيء بدعيلك من قلبي.