كيف نحافظ ونستمتع بالوقت مع زحمة الأعمال المنزلية..

السّلام عليكم ورَحمة الله وبركاته

كيف نحافظ ونستمتع بالوقت مع زحمة الأعمال المنزلية..

أهلا يا أصدقاء ..

كيف خميسكم؟

أنا الحمدلله بخير، ومبسوطة من نظام التدوين الجديد 🙂

في هذي التدوينة أحب أشارككم بعض الخطوات والأفكار اللي تسهل عليكم التحكم بأيامكم وحياتكم وترتيبها بطريقة تسعدكم وتجعلكم أكثر راحة وإنجاز..

قد تكون تدوينة اليوم طويلة نسبياً ، فكرت أقسمها لجزئين لكن ماحبيت يتشتت الموضوع✨،

فاقرأوها في وقت راحتكم 💜

كيف نحافظ ونستمتع بالوقت مع زحمة الأعمال المنزلية..

أولا، أبدا بقول اني أبدا مو مثل ماتتخيلون من انستغرامي ومدونتي كل شي مرتب طول الوقت ورايق وهادئ..

بالرغم من أنكم تشوفون الجانب المشرق فقط من حياتي لأني مصورة والمصور دائما يخرج أي شيء من الزاوية الأجمل وما تصل للآخرين إلا بعد التعديل والتنقيح،
إلا أنه لازم تعرفون اني مو هذي حياتي دائماً، أوقات أسحب على التنظيف والترتيب والنظام وأجلس اتفرج تلفزيون بالساعات،
أوقات أحس بالضغط والطفش من الأعمال المنزلية وأنام والبيت حوسة والصحون المتراكمة تملأ سطح المطبخ.. وهي أيام غير نادرة أبداً..

لكني استفدت في السنوات الي راحت من أخطائي وقررت أشارككم الأشياء الي نفعتني أحافظ على وقتي باعتبار اني عندي طفل وماعندي خدم..

الأشخاص اللي عندهم أكثر من طفل أو وظائف تاخذ أغلب وقتهم قد مايجدون أنفسهم قادرين على تطبيق بعض الخطوات والأفكار اللي ساعدتني أنا بتنظيم وقتي ،
وطبعاً ما أعرف ظروف الجميع، أكيد كل انسان ظروفه تختلف،
البعض ظروفه أسهل والبعض ظروفه أصعب

لكن حبيت أشارككم تجربتي لأنها قد تفيدكم في بعض النواحي أو تلهمكم تخرجون بأفكاركم الخاصة اللي تتناسب مع أسلوب حياتكم ..

من الأشياء المهمة جداً بالنسبة لي اني ما أكون مضغوطة بشغل البيت أو بالأحرى، ما أحب يروح يومي كله في العناية بالبيت،

أحب يكون عندي نوعاً ما وقت فراغ أقضيه براحتي كل يوم..
ولذلك أنا دائمة البحث والقراءة والتجربة في هالمواضيع..

فلسفتي هي باختصار اني جدا أقدرّ الوقت اللي أقضيه مع طفلتي أو أشتغل فيه على المدونة أو بالرسم أو بهواياتي بعيداً عن العمل الروتيني اللي ما أشوف له نتيجة عظيمة في مستقبلي ،

صحيح أن التنظيف والطبخ والغسل أعمال مهمة لحياة مرتبة وهانئة ، لكنها لحظية ،
الأرضيات اللي مسحتها الاسبوع الماضي مازالت بتحتاج مسح الاسبوع هذا ، وهكذا الشغل من هالنوع ما راح ينتهي ومن غير الجميل اني أعطيه وقتي واهتمامي كله..
لازم أستثمر جزء من الوقت للأشغال اللي إذا أنجزتها بأطلع عليها لمستوى أعلى في المستقبل، مثل القراءة ، التربية، تعلم مهارات جديدة وممارستها..

وحتى أحصل على جزء من الوقت الثمين لاستثماره لازم ما أكون مضغوطة أو مرهقة وما أحتاج إلا وقت راحة عشان أحط راسي وآخذ غفوه ،
أحتاج وقت وأنا بكامل نشاطي وطاقتي..

بأكتب لكم كل اللي أؤمن أنه مفيد لإزالة الشعور بالضغط أو ضيق الوقت أو زحمة الأعمال..

طبعاً مايلزم نطبق كل الأفكار بيوم واحد وما أتوقع ممكن أي إنسان يقدر يضبط نفسه بالشكل “المثالي” طوال الوقت، الكلام أسهل من الفعل بكثير،
لكن ممكن يستفاد منها على أوقات متفرقة وخطوة خطوة لحد ماتصير هالممارسات روتينية ماتحتاج جهد أو ضبط نفس بل تصير أشبه بنظام حياة..

كيف نحافظ ونستمتع بالوقت مع زحمة الأعمال المنزلية..

عوامل المحافظه على الوقت والانجاز والاستمتاع بالحياة

أولا: الاستيقاظ المبكر..

كيف نحافظ ونستمتع بالوقت مع زحمة الأعمال المنزلية..

قال صلى الله عليه وسلم “في البكور بركة”

الصباح فيه بركة سبحان الله،

نشاط الجسم يزيد إذا النوم كان مريح وليلي،
والعقل يعمل بأعلى جودة وبالتالي يعطيك حلول أسرع وقرارات أسلم ونفسية أفضل بكثير بإذن الله.

وأهم نقطة للي وظائفهم من المنزل أو ربات البيوت أن فترة الصباح تقل فيها الملهيات، غالبا الاطفال والازواج والناس في الدوامات.
وهذا أسميه الوقت الذهبي
طبعاً ممكن تستغلينها بزيادة نوم كم ساعة،
لكن إذا أنت تنامين كفايتك بالليل وحابه يكون لك وقت خاص بك في اليوم ،فالأفضل تستغلين هالساعات وتتركين الفراش مع الناس اللي تداوم..

نقطة مهمه : الاستيقاظ ما يبدأ من وقت ماتفتحين عيونك من النوم ، يبدأ من وقت مغادرتك للسرير ، أما فقط الاستيقاظ وبعدها ساعتين على الجوال هذا محسوب مع النومة..

🍃

ثانياً: الإفطار وبداية اليوم بالطريقة الصحيحة

كيف نحافظ ونستمتع بالوقت مع زحمة الأعمال المنزلية..

عندي أهتمام بالصباح و بوجبة الفطور بشكل خاص ..
بالرغم من أن نظامي الغذائي في بقية اليوم وبشكل عام ماراح آخذ عليه ميدالية أفضل نظام صحي في العالم،
لكن وجبة الفطور تحديدا أحرص كثير انها تكون منوعة ومليانة فيتامينات ومتكاملة..

لأن الفطور هو أهم وجبة في اليوم وعليه يترتب نشاط الجسم وقوته لبقية اليوم ويروح الخموول والنوم ،
وهذا يساعد أن يومنا يبدا بسرعه بدل مانجلس كم ساعه خدرانين وبدون طاقة.

🍃

ثالثاً : تحديد يوم أو أيام للأعمال المتفرقة

كيف نحافظ ونستمتع بالوقت مع زحمة الأعمال المنزلية..

إذا فيه يوم محدد لعمل معين، ماتكون المهمه عالقة في الذهن طوال الأسبوع ومشعرتك بالإهمال، لأنك خلاص تتركين التفكير فيها نهائياً إلا بذاك اليوم ..

يعني مو كل يومين رايحه اغسل لبس والا انظف دورات المياه بشكل عشوائي،
يكون فيه يوم كل أسبوع او أسبوعين لهالاشغال، وممكن يوم اسوي شغله والاسبوع الي بعده اسوي شغله ثانيه..

مثلا غسل الملابس وترتيبها كل جمعة ، التنظيف العميق كل سبت ، وهكذا،

مو ضروري الملابس تنغسل بسرعة، ومو ضروري دورة المياه كل يوم تنمسح وتطلع لمعه،
فيه أولويات أكثر من لمعة البيت، وهي لمعتي أنا ✨
إذا كل شي بالبيت على أكمل وجه على حساب اني أنا شاحبه ومتعبة هذي صفقة خاسرة بكل تأكيد ..
فنسترخي شوي ونتقبل واقع أن لنا طاقة وحدود في الشغل ونتعرف على قدراتنا ولأي مدى ممكن نقدم لبيتنا وللآخرين بدون مايكون هذا على حساب صحتنا ومستقبلنا 💕..

رابعاً: اختصري وقت الاعمال المعتادة بطريقة (الإعداد المسبق)

كيف نحافظ ونستمتع بالوقت مع زحمة الأعمال المنزلية..

بما اني مسؤولة عن وجبات المنزل، كانت تاخذ مني وقت طويل
لكن لاحظت ان إعداد الوجبات يروح اغلب الوقت في التقطيع والتحضير وتغسيل الأدوات اللي أستخدمها كل مره..
فقررت عمل جدول اسبوعي للوجبات بحيث اكون عارفه تقريبا الوجبات اللي عندي مقاديرها خلال الاسبوع كامل وفي يوم واحد أشتري وأقطع الاشياء اللي احتاجها لبقيه الاسبوع أو لثلاث أو ربعة أيام قادمة حسب مدة صلاحية الأغراض،

كيف نحافظ ونستمتع بالوقت مع زحمة الأعمال المنزلية..
هالحركة جدا ممتازة وتكلمت عنها كثير في سنابي والانستغرام،
لانها ايضا تقلل من المشتريات وتقلل من خراب الاشياء في الثلاجة وتقلل من الطلعات الكثيره للسوبرماركت خلال الاسبوع.

أمثلة على التحضير المسبق: تقطيع الدجاج واللحوم وفرزنتهم بحيث يكونون جاهزين للطبخ،
جربت أعمل حمسة بصل مع طماطم (مطبوخة) بكمية تكفي أيام وأفرقها بكميات صغيرة لكل وجبه وأفرزنها.. بهالطريقة اختصر على نفسي كثير من وقت التقطيع والتنظيف وحمس البصل والطماط،
والطبخ يكون مريح وممتع أكثر..

فيه ناس مايهمهم يقضون ساعة زيادة في المطبخ يومياً لأنهم يبغون كل شي مقطع بوقته ، هذا خيارهم الشخصي،
بالنسبة لي الأولوية هي حفظ أكبر قدر من الوقت مع القدرة على أكل وجبة طازجة وصحية،

وبعض الخضار أشتريها مفرزنة ومقطعة ،

معلومة : القيمة الغذائية للخضار والفواكه اللي نشتريها مفرزنة أحيانا تفوق القيمة اللي في الخضار والفواكه الطازجة إذا كانت الطازجة موجودة بالثلاجة أو المحل لأكثر من يوم أو ماكانت في موسمها..
لأن المفرزنة تم قطفها وفرزنتها مباشرة ، بينما الخضار الطازجة تقطف وتنقل وتنتظرك في المحل ثم في ثلاجتك وكل يوم يمر من هالأيام تفقد جزء من قيمتها الغذائية..
النقطة الثانية اللي تجعل المفرزن أفضل في بعض الأحيان، أنه يقطف بعد مايكتمل نموه وينضج تماما، وبالتالي تكون قيمته الغذائية في أعلى درجة ،
بينما الطازجة تقطف قبل النضج حتى ماتفسد بسرعة قبل ما تصل للمستهلك، وهذا يجعلها غير مكتملة القيمة..

🍃

خامساً: أطلبي المساعدة

كيف نحافظ ونستمتع بالوقت مع زحمة الأعمال المنزلية..

مافيه مشكله ولا عيب ولا نقص انك تطلبين من اللي عايشه معهم يساعدونك في بعض الاشغال،
يعني مو شرط يوميا لكن مثلا اليوم في الاسبوع اللي تحضرين فيه الوجبات لو ساعدوك فيه هذا يجعلهم في الواقع ساعدوا كل الأيام..
أو تطلبين المساعدة في أمور البيت الثانية بينما انت مشغوله تطبخين أو تشتغلين بشي..

لاتتحملين كل شي بنفسك بصمت لو كان فعلا مرهق وماخذ وقتك كله.. من حقك تعيشين براحة وتحصلين على وقت خاص لنفسك..

بالنسبة للمتزوجات إذا حابه تطلبين من زوجك المساعدة اعرفي كيف تتعاملين معه وكيف تطلبين ..
الأفضل ما تقولين له طلبك بصيغة الشكوى المبهمة مثل (أنا تعبانه من شغل البيت أو كثير علي أو أو)… أغلب الرجال مايفهمون هالتلميحات انها طلب مساعدة ويعتبرونها تذمّر.
أطلبي المساعدة بطريقة مباشرة جدا : (ممكن تصلح (كذا) لأنه كثير علي، ولا تقولين ممكن تساعدني في المطبخ أو شغل البيت وتسكتين، حددي بالضبط المهمه الي تحتاجينه يساعدك فيها مثلا (الله يعافيك أتمنى ترجع الأواني اللي تستخدمها للمطبخ بعد ما تنتهي منها) ( وهكذا .. وطبعا هذا بشكل عام بعض الرجال لهم طريقة خاصة تحفزهم للتعاون أنت أعلم بطريقة التعامل اللي تناسب مع زوجك أو أهل بيتك)..

اذا ماكان وضعهم يسمح بالمساعدة، ممكن توظفين وحده بالسّاعة كل اسبوع تجي تنظف وتساعد في البيت او تاخذين خادمة اهلك يوم واحد إذا عندهم خادمة،

ماكنت أحب أعتمد على أحد يساعدني قبل،
كانت فكرتي انه “شي اقدر اصلحه مايحتاج احد غيري يسويه عني”
وكان هذا نظامي لمدة خمس سنوات حتى لو انضغطت،
لكن بديت أفكر ان وقتي أثمن من انه كله يضيع مابين تنظيف و طبخ وبيت..
احتاج وقت أجلس بهدوء مع طفلي وعائلتي واشتغل على احلامي ومشروعي وهواياتي..

وفعلا قبل شهرين وانا في الشهر التاسع من الحمل ومرحلة النفاس اضطريت وجربت أوظف وحده تجي يوم واحد كل أسبوع أو اسبوعين أو كل ما حسيت اني تعبت وأحتاج مساعدة، تجي كم ساعة تنظف وتغسل الملابس وتنظف دورات المياه وتروح، وماتتخيلون قد ايش مساعدتها ريحتني عن أول الحمدلله..

فلا تتخوفون أو تترددون مثلي بطلب المساعدة لأنها فعلا مفيدة..

🍃

سادساً: أتركي التسويييف..

التسويف يضيع عليك ايام واسابيع ويبقى هم الشغل فوق راسك لا أنت اللي ارتحت ولا اللي أنجزت،
لذلك اذا عندك شغله تبين تسوينها ومتعيجزه قولي بأعد إلى ثلاثه وأقوم .. خلصيها في وقتها وبعد كذا بترتاحين جدا واشغالك بتكون اقل واحساسك انك انسانه مشغولة ومضغوطة بيختفي.

فيه طريقة تعلمتها وساعدتني جدا من ناحية التسويف ..

اللي هي قاعدة الخمس دقائق

القاعدة تقول ، “أي شيء يستغرق أقل من خمس دقائق لإنجازة إفعله حالاً”

صرت إذا رحت للمطبخ ومعي صينية فيها صحون وكاسات أقول هل يستغرق اني ادخلها لغسالة المواعين أقل من خمس دقائق؟ الجواب يكون غالباً نعم ..
فمباشرة أبدأ أدخلها بدل ما اترك الصينية في المطبخ وأروح أسوي شي ثاني ..

وأحيانا بعد ما أدخلها أشوف شي ما انغسل او شي ما رميته في الزبالة وأسأل نفسي هل يستغرق رميه أقل من خمس دقائق ؟ الجواب نعم ، وارميه ..

ما أدري إلا وأنا منظفه المطبخ كله،
ومع الوقت خلاص مايصير فيه شي يحتاج اني انظفه لأني أعوّد نفسي ان أي شغله ماتاخذ أكثر من خمس دقايق أسويها مباشرة ، فصار مطبخي على طول مرتب طالما أنا ماشية على القاعدة ..

أو ممكن تحطين منبه على الجوال عداد بوقت معين تنجزين فيه الشغلة ..

حفزي نفسك بأي طريقة المهم ما تتأجل ليوم ثاني..

 لأن كثير أمور كل ما تاخرت كل ما صعبت العمليه عليك وخذت وقت أطول منك،
مثل غسيل المواعين كل ما تأخر صار التغسيل متعب والاشياء اللي على الصحون ناشفة وتاخذ وقت اطول من لو مباشره سويتيها.

🍃

سابعاً: تعرفي على أعداء وقتك

 كيف نحافظ ونستمتع بالوقت مع زحمة الأعمال المنزلية..

بالنسبة للأغلبية،

العدو الأكبر للوقت : مواقع التواصل والجوال

أحياناً إذا سويت حاجة رايقة أو دقيقة تجيني تعليقات على الانستغرام ، مثل ( ماشاء الله عليك فاضية تسوين هالشغلة ) (من وين تجيبين الوقت لهالأمور) (والله من الفضاوة) وغيرها من التعليقات اللي فعلا أتعجب منها لأن صاحبتها في اللحظة الي كتبتها فيها كانت فاضية جداً وعندها وقت تجلس على جوالها وتتصفح بالساعات وتتفرج علي وش جالسة أسوي وتكتب تعليق،
لكن توهم نفسها أنها مشغولة وماعندها وقت للاسترخاء والروقان، لأن أعمالها متراكمة في عقلها ومحسستها بالشغل والضغط لكن الحقيقة ان وقتها بيدها وهي صرفته في أشياء تضيع عليها وقت إنجاز كل الأمور المهمة..

العدو الثاني : الأفلام والمسلسلات والتلفزيون ،

تضيع الوقت جددداً، خذي منها إجازة كم يوم أو حددي لها أوقات معينة تستمتعين بها،
لأن المشاهدة تسبب الإدمان ،
بمجرد ما أتفرج حلقة خلاص انسوا الموضوع اني أقوم وأشتغل بشي، أشغل اللي بعدها واللي بعدها أو اجلس كذا ما أسوي شي..
وأعيش مرحلة كسولة وغير جميلة ولافيها اي ذكريات،

ممكن بدل تأجيل مشاهدة المسلسلات والبرامج تصيرين تتابعينها وأنت تشتغلين بعض الشغلات اللي ماتحتاج تركيز عالي،

 بيكون عندك أعمال كثير  روتينيه مثل تنظيف الصالة أو التحضير المسبق للوجبات، أو الطبخ، أو الكوي، تابعي وانت تسوين هالأعمال،
لان مو معقول كم ساعة يومياً تروح بس على التلفزيون أو الجوال،

وكل إنسان له ملهيات أخرى مختلفة وأعداء لوقته، تعرفي على أعداء وقتك وتحكمي فيهم ولا تتركينهم يتحكمون في أثمن شيء تملكينه..

🍃

ثامناً: إدمجي المهام

كيف نحافظ ونستمتع بالوقت مع زحمة الأعمال المنزلية..

الأنثى تتفوق على الرجل ببعض نقاط القوّة ، ومنها قدرتها على التركيز بأكثر من شغلة بوقت واحد،
استغلي نقاط قوتك لصالحك واستخدميها بذكاء..

اهتمي كثير بالاعمال الي ممكن تكون في وقت واحد،
حاولي قد ماتقدرين تدرسين محيطك وايش الاشياء الي ممكن تتسوا في لحظه وحده،
مثلا ممكن ترتبين المطبخ بينما الاكل في الفرن بدل ماتجلسين تنتظرينه يجهز وانت على الجوال،

ممكن وانت ترضعين ولدك تستمتعين بمشاهدة شي أو تخلصين الاعمال اللي تحتاج مكالمات او حجز مواعيد،
أشياء كثيره تختلف بحسب الظروف لكن حاولي تنسقين بين الشغلات..

كيف نحافظ ونستمتع بالوقت مع زحمة الأعمال المنزلية..

وتوفير دقائق من هنا وهنا بيعطيك نتيجة ساعتين ثلاث باليوم لنفسك بدل ماتكون دقائق مهدرة⌛..

مثلا أغلب تدويناتي أكتبها على النوت في الآيفون وأنا أرضع بنتي، لأني أرضع رضاعة طبيعية فما يحتاج أمسك رضعتها وأركز معها بقوة،
تحتاج بس اني أبدأ بقراءة المعوذات وأخليها تحس اني مركزة معها وأحن عليها كم دقيقة وبعدها خلاص باقي وقت رضاعتها أمسك الجوال وأشتغل،
التدوينات تاخذ ساعات من الكتابة ، ما أكتبها بجلسة وحدة ،
استغل الدقائق اللي مثل كذا واكتبها فيها بدل ما أكون جالسة أتابع أشياء في الجوال ماتنفعني ولا تمتعني..
نفس الشي الرد على تعليقات الانستغرام أو متابعة السناب وغيرها أعملها في وقت الترضيع أو الانتظارات،
ما أخليها تاخذ من وقتي جزء كبير والا ماكان بقي لي أي وقت للأعمال الثانية..

🍃

تاسعاً: رتبي الأولويات

كيف نحافظ ونستمتع بالوقت مع زحمة الأعمال المنزلية..

مهم تكونين واضحة مع نفسك وتحددين أولوياتك في الحياة ، وعلى أساسها تقسمين يومك بطريقة عادلة ومرضية لك ولأهدافك..

كل وحدة فينا لها أهداف وأولويات مختلفة ترتب على أساسها،

لكن لا تنسين ، راحتك وصحتك من الاولويات، فاعتبريها وانت ترتبين اولوياتك ، يعني جزء من اليوم للراحه والعناية بالنفس أو الاسترخاء يعتبر اولويه،
لا تقضين ايامك بس شغل وأعمال وزحمة لأنك بتطفشين وتصيرين تهملين وبالتالي ايام مزدحمه وحياة غير سعيدة..

يفضل ترتبين أولوياتك بطريقة كتابتها على ورقة من الأهم للأقل أهمية
ثم تقسمينها على ساعات اليوم،
طبعا مو الهدف انك كل يوم تتبعين هالجدول بدقة، مش ممتعة الحياة العسكرية
الهدف انه يكون قدامك شي واضح نسبياً بالمهام الي تحتاج انجاز بشكل عام
ومادامت في ورقة أمامك يعني ما تاخذ مساحة في عقلك على الفاضي بدون ماتدرين أنت وش تحتاجين تسوين..
مجرد شعور سيء بالضغوط المنزلية بدون جدوى..

🍃

عاشراً: استعيني بالأجهزة

كيف نحافظ ونستمتع بالوقت مع زحمة الأعمال المنزلية..

اشتري اجهزه تسهل حياتك، مثل غساله المواعين مثلا،
أو إذا كنت موظفة جربي القدر الي يطبخ بالبطيء Slow Cooker
يتم إعداد الاكل فيه بداية الصبح وتفتحينه بعد عدة ساعات يكون جاهز وهذا يخليك تقدرين تحضرين الغدا قبل ماتطلعين للدوام واذا رجعتي يكون الاكل توه جاهز وساخن..
وتكسبين كم ساعة من الظهر للراحة بدل وقفة المطبخ بعد الدوام..
كثير من الطلاب والموظفين في أمريكا والدول الأخرى يتبعون هالطريقة وينصحون بها..

وحسب احتياجك ابحثي إذا فيه شي يسهل عليك واشتريه، اعتبريه استثمار للوقت والجهد.

الحادي عشر: قللي أغراضك

 كيف نحافظ ونستمتع بالوقت مع زحمة الأعمال المنزلية..

خلي بيتك سهل لك، لا تقربعين كثير وتشترين اشياء صعبه عليك تحافظين على نظافتها،

خليه مناسب لاحتياجاتك، خصصي مكان لكل شي، واتركي تجميع التحف والملابس والشنط والأحذية..

كل ماكانت أغراضك أقل كانت حياتك أسهل وترتيبك أسرع..

أذكر كان عندي ٧ شنط للجامعة، خلال سنتين بس، ليه؟ وش الحاجة لها؟ المفترض شنطة أو شنطتين أو ثلاث بالكثير استخدمها طول السنة وإذا حبيت شي غير أتصدق بالشنطه أو أعطيها أحد يفرح بها وأشتري جديدة..ونفس الشي الأحذية وغيرها وخاصة الكماليات،

قرأت دراسة عجيبة تقول أن نظام التجميع هذا يزيد الحياة توتر بدل زيادتها سعادة بسبب القلق على الأغراض والحيرة في الاختيار،
بالرغم من أن الكثير يعتقدون أنهم إذا حصلوا على أغراض أكثر بيكونون أسعد..

لكن الحقيقة أن السعادة مالها علاقة بالأغراض والماديات،
سواء أغراضك كثيرة أو قليلة،
ومالها علاقة بجمال البيت وأناقته وراحته،

السعادة في العلاقات داخل البيت والنفسية والإنجاز والقناعة.
وأناقة المنزل متعلقة بالذوق .. ولا شي منهم متعلق بالعدد والكمية..
أعرف شعور شراء غرض جديد ، شعور ممتع ، لكنها متعة مؤقته ،
ما أقول لا تشترين شي، أنا نفسي أحب أشتري أشياء مالها داعي أحيانا ومو ضرورية،
بس اللي أقصده نحاول قدر المستطاع ما نجمع حولنا أشياء تزيد تعبنا في الترتيب.

🍃

الثاني عشر: ضعي قوانين لمنزلك

اذا تعب عليك تجمعين الصحون والكاسات من البيت حددي مكان للاكل وامنعيه من الغرف وغيرها،
وفهمي افراد الاسره ان اي صحن مايرجع للمطبخ ماراح تنظفينه أنت،
إذا يتعبك تجميع ألعاب الاطفال حددي لها مكان أو غرفة ماتطلع منها، وعودي أطفالك يجمعونها بأنفسهم بأساليب تربوية صحيحة،

مهم تحطين قوانين وعقوبات على أي شي تعتبرينه يسبب لك مشكلة وهو سهل تفاديه
مثلا الملابس لا تغسلين الا الموجود في السلة والي يرمون ملابسهم برا السله على الأرض يتحملون بعد اسبوعين ان شاء الله على دورة الغسيل الجاية،
وهذا بمثابة العقاب لهم يتحملون مثلا يروحون بمريول ما انغسل أو ما انكوى ويتفشلون ومعد يتعودونها (صارت لي)🤓

بيصير صعب عليهم وعليك في البداية انك تمسكين نفسك بس مع الوقت بتفرق حياتك للاسهل والاحسن بإذن الله..

وتذكري جيداً أن الأم وإن كانت ربة منزل هي ماتعمل عمل الخادمة لأفراد المنزل، البيت اللي يختار انه يعيش بدون خدم يجب أن أفراده يتعاونون فيما بينهم ويتعلمون على تحمل المسؤولية..
وتربيتهم على هالمسؤولية تحتاج جهد منك وإصرار، لكن نتيجتها أفراد مسؤولين عن أنفسهم وتبعات تصرفاتهم، فلا تستسلمين لهم وتساهمين في صنع جيل إتكالي..

🍃

وأخيراً: اهتمي بصحتك..

كيف نحافظ ونستمتع بالوقت مع زحمة الأعمال المنزلية..

إذا عندك إرهاق زايد وكل وقتك تحسين بالتعب ممكن يكون عندك نقص فيتامينات أو لخبطة هرمونات،
فاحرصي على تحاليلك السنوية وفيتاميناتك وتغذيتك إذا عندك نقص فيها لأن النقص يسبب الخمول والكسل وحتى يلعب بالنفسية والرغبة في الإنجاز..

الرياضه تساعد من هالناحية ، ممكن مشي سباحه او تمارين خفيفه المهم تكون باستمرار حتى لو قليلة وبسيطة..

*أتمنى ما تقنعين نفسك ان هالخطوات والأفكار مستحيله بالعكس والله جدا ممكنه ومجربه بعد، بس تحتاج عزيمه وصبر أول الامر لانه بيكون شي جديد،
لكن طبعا ممكن تنفذين النقاط على أوقات متفرقه و بالتدريج وبتكون مقدور عليها بإذن الله،

وتذكروا انه فيه غيركم حياتهم أكثر ضغط منكم وعندهم اطفال أكثر وأعمال أكثر وممكن دراسة أو وظيفة ولا عندهم خدم ومع ذلك عايشين بنظام وراحة،
كل الامر في الالتزام والاستمرار وتعاون أفراد الأسرة والتخطيط والمحافظة على الوقت،

وكما تقول الحكمة ” إذا كنت تريد ستجد السبب، وإن كنت لا تريد ستجد العذر “

وأولاً واخيراً ادعوا ربي كثير يسخر لكم ويكون معكم ويعينكم ويسعدكم وربي وعد انه ما يخيب دعوه خرجت بيقين..

🌺

والآن جاء دوركم،

لو عندكم أي أفكار زيادة لاستغلال الوقت أو تنظيم الحياة أو قواعد جميلة جربتوها ونفعتكم، اكتبوها لنا في التعليقات وأثروا بها الموضوع 🙂

أتمنى لكم حياة ملونة وسعيدة ومشرقة ومن تحبون 💕

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

372 تعليق على "كيف نحافظ ونستمتع بالوقت مع زحمة الأعمال المنزلية.."

avatar
فرز بواسطة:   الأحدث | الأقدم | الأكثر تصويتاً
NOURA 💓
ضيف

صرت اشيك دايم اذا نزلت تتدوينه ولا لا 💗
كلام جميييل جدددا ✨
ومن بعض الطرق اللي استخدمها لترتيب ساعات يومي
أختار وضع الطيران للجوال واشغل عداد الوقت
مثلا : وضع طيران + وضع عداد الوقت ( ساعه ) مثلا
وأقول لنفسي ماراح امسك جوالي ولا ألهى بأي شيء ثاني غير تنظيف المطبخ بالكامل وكنس أرضيات البيت الى مايدق المنبه !
وبصراحه اكون سباق مع الزمن يا أنا يالمنبه 🙊⏰
واكثر شعور يسعدني اذا خلص المنبه وانا خلصت من الشغل المحدد 👏🏼
وهذي الطريقه كنت استخدمها قبل بالجامعه بطريقة المذاكره ، واستخدمتها الحين بطريقة ترتيب بيتي 💗✨

وشششكرا ثاني مره يا أنيقة 💕

شيخه الشمري
ضيف

لتنظيف المطبخ احط عداد الفرن علشان صوته يحمسني اخلص هههههه..

حدائق الفانيليا
ضيف

جميله الفكرة 😍

Mnoor23
ضيف

فكرتك مررره جميله و مفيدة نورة😍💖

اروى صراحة استمتعت بكل سطر و كل افكارك جميلة و جاري التطبيق إن شاءالله والله جد متحمسسه💗💗😄.

ام روان
ضيف

جميله الفكره

عضو

اهلا . ممكن تفيديني بطريقتك للمذاكرة ؟ ، شكرا مقدما

Mleeksh
ضيف

حبيييت طريقتك رح اعتمدها😍👌🏼

أشواق الأسمري
ضيف

فيه طريقه استخدمتها مؤخرا وساعدتني في عدم التسويف .. أسمها ” لا تفوت الرحله ”
انا انجز الصباح ومن يبدا المغرب وتغيب الشمس ارتاح
فاقول براسي كأن عندك رحله المغرب , لا تأجلين شي نفذي وانجزي والحقي وخلصي شغلك قبل تفوتك الرحله عشان تنعمين برحله جميله خاليه الذهن من التشويش ..
وراحتك رحله تستحق الاستمتاع طبعا

Mleeksh
ضيف

👍🏻

نوره
ضيف

ماشاء الله تبارك الله
الله ينفع بك ويبارك لك ويزيدك من فضله 💜
شكراً على كل كلمة كتبتيها موضوع جا بوقته 👌🏻

أحب أضيف بعض النقاط اللي تزيد من بركة الوقت بإذن الله :
– التوكل على الله
– الإكثار من قول “لاحول ولا قوة إلا بالله”
– تخصيص وقت لقراءة القرآن
– نذكر دائماً قبل النوم “سبحان الله ٣٣ والحمدلله ٣٣ والله أكبر ٣٤”

حدائق الفانيليا
ضيف

فعلا صادقه اختي 👍

ميمي محمد
ضيف

جزاك الله خيراً للتذكير💗 الاستعانه بالله اساس النجاح👌🏻💞

حدائق الفانيليا
ضيف
من الافكار الي استخدمتها وساعدتني كثير اني اترك جوالي في الليل في غرفه ثانيه وبدون ما اشحنه فلما اصحى الاقيه طافي واحطه في الشاحن (لاني اخاف اشحنه بعيد عني وانا نايمه ) فاكتشفت اني انجز مرررره كتير الين ينشحن الجهاز اعمل وجبات شبه جاهزة زي شاورما او صينينه بيتزا يكون بس عشان تجهز احطها نص ساعه في الفرن او بس اشوح الدجاج على النار ودي الوجبات اخليها لحالات الطوارئ الشديده مثلا يوم عندي مجلس امهات حارجع متاخرة ما يمداني اجهز الاكل ومن النقاط المهمه كمان اني اول ما اصحى اشوف نفسي قبل ما اخرج من الغرفه احط كريماتي وازبط غرفتي… قراءة المزيد ..
عائش الحب
ضيف

مره عجبتني فكرتك حقت الجوال
جزاك الله خيراً

أم ود 💕💐
ضيف

صح وربي يأخذ ساعات مني و كمان يطير النوم مني 💔
جاري تنفيذ فكرتك

هند العبدالله
ضيف
الله عليك ماشاءالله .. فعلًا ومرات كثير أطبق بعض الخطوات هذي وأحس يومي يمر خفييييف وفيه إنجاز! بس نحتاج عزيمة 👍🏻 وفيه معلومة حبيت أضيفها إنه لما يكون يومك مزحووم شغل وضروري تخلصينه ، ابدأي بالشغل الذهني اللي مايرهق جسدك مثلًا للمعلمات لازم تسوي تحضير أو خطة او او .. الخ تبدأ فيه ، وبعدها تبدأ بالشغلات اللس تحتاج جهد جسدي طبخ وغسيل وتنظيف ؛ لأن المخ يدري كيف أكنس وأغسل مايحتاج أفكر فيخلص بسرعه .. بعكس لما تقول بخلص شغلي الجسدي بعدين تكون مرهقة وتروح تنسدح على اساس تسوي اعمالها الذهنية تلاقي نفسها تعبانه وحيلها مهدود وتفكيرها مقفل 🙂… قراءة المزيد ..
عهود
ضيف

يعطيكي العافية استفدت

حياة
ضيف

الله يسعدك هنوده نبهتيني لشيء مهم… أحيانا يروح يومي كله ما أنجزت شيء مهم

ريم
ضيف

شكرا فعلا كلام منطقي وبطبقه ان شا الله

عضو
تدوينة رااااائعة جدا وملهمه استفدت منك ومن متابعاتك اشياء كثيرة شكرا لكم بحجم السماء شكرا لبياض قلوبكم .. أحبكم ♡ فيه اشياء اسويها ذكرت قبل وبذكر بعض الأشياء فادتني ممكن تفيدكم .. اكتشفت ايش يضيع وقتي ببرنامج للجوال رهيييب حملته اسمه * Time Tune * يحسب لي الروتين اليومي كامل حتى ساعات النوم ويعطيني تنبيه قبل بداية اي روتين أو عمل بأسويه .. برنامج ممتاز جدول لطبخات الأسبوع وأغراض البقاله * food planner * .. برامج أجنده لتنظيم يومي وأعمالي بجدول فيها تنبيه للمهمه وكم باقي وقت لها واختار الوان الأجنده وستيكرات كيوت * Jorte * .. قراءة ورد من… قراءة المزيد ..
عضو

عزيزتي
بحثت اسم البرنامج لتحميلة ماطلع معي
هل أكيد اسمة time tune ?
وشكرا😘

عضو

ايوا timetune اكتبي بالشكل دا مشبك يمكن يطلع لك و علامته دائرة برتقاليه فيها TT

Zooz
ضيف

👏👏👏👏👏
نحتاج هذي القناعه تمر على جميع النساء
انا في صراع مع اللي حولي لمن اقولهم ان التنظيف و الاهتمام المبالغ فيه مجرد هدر ل طاقتي ووقتي اللي تستحقه نفسي و هوايتي والمجتمع اللي حولي يعني شي م يصنع ذكريات و لا يطور مهارات استمتعت بقراءة كل سطر والى الامام اروى كوني قائدة لتغيير بعض الافكار الباليه عن ربات البيوت
محدثتك كتبت التعليق و هي ترضع بنتها 😂😂😂

فاطِمة
ضيف
حبيت الموضـوع كثير ، انا ام لِ طفلتين .. ( سنتين ونص ) ( اسبوعين) < يعني تو نفاس😁😅 ، انا ادرس واشتغل ببيتي ( ماعندي خدم) اضافة لدوري كزوجة وام … ايام تمر علي بنفجر من الضغط _ لكن اقوووول كل التعب بيزول لانه اشتغل على حلمي .. كنت اضيع وقت ماانتظر الطبخه ع الجوال بس استغليتها وصرت اغسل الصحون واكنس الصالة وغيرها من حاجات وبنفس الوقت اشغل حاجة اتابعها وانا اشتغل كذا اختصرت علي الكثييييير وحطيت جدول اسبوعي كل يوم لمدة ساعة اسوي حاجة عميقة مثل تنظيف الفرن يوم السبت مسح الابواب+ الافياش يوم الاحد وهكذا وحييييل ارتحت… قراءة المزيد ..
سنابل
ضيف

أيضا من الاشياء اللي تساعد هي متابعة ناس ملهمين.. بالذات في مواقع التواصل الاجتماعي زي قنوات اليوتيوب والانستقرام وغيره..
فيه كثير مهتمين بالترتيب والنظافة او الطبخ الصحي أو أي نوع من الهوايات مو شرط اعمال البيت..
يعني الواحد يحاول يخلي محيطه مليان بالناس اللي يحفزونه للأفضل

Mleeksh
ضيف

صحيح👍🏻

حوريه
ضيف

شكراً لكِ ياخي احسك تكلمتي بواقعيه بعيداً عن المثالين اللي اتعبتنا شكراً من كل قلبي لك
اسعدك ربي وادامك لنا ياملهمه تسلم يمين من ربتك ❤️❤️❤️
فيني طبع مدري اشوفه ايجابي لما اتضايق او تتعب نفسيتي اقوم انظف تنظيف عميق غالباً يكون شيء مأجلته 😰 ولما اروق افرح اني انجزت هالشغل 😐💔

نجمة الزهراني
ضيف

زي وضعي لما اكون معصبه او متضايقه من شيء استلم البيت بالتنظيف
اتوقع شيء ايجابي لاننا انجزنا ووفجرنا عضبنا لشيء مفيد 😊

مريم
ضيف

ههههههه انا مثلك،، لان شكلنا تربينا على ( نظفي غرفتك وبتنفتح نفسك ) 😂

هند
ضيف

ختمت مدونتك حتى الي مايعنيني منها،
أنت انسانة ملهمة وحبيت اقول لك هالشي ولو قال لك قبلي الكثير نفس الكلام،
انا وامي واخواتي وخالاتي والبنات نتخابر بكلامك وافكارك،
الله يرفع قدرك ويجمعنا معك والقارئين في جنته

ALOY
ضيف

آميييين😘😍❤️✨💐

آم حنان
ضيف

ماشاءالله الله يزيده من فضله ومحبة الناس له

أشواق الأسمري
ضيف
ياحلوك وحلو تدويناتك .. مهما طوّلت مانحس من بساطة اسلوبك ولطافتك وسلاستك انا شخصيتي قرييبه منك واغلب الي كتبتيه اطبقه لكن مشكلتي اني اكبر وحده ببيت عائله, ومختلفين عني مره وكبار صعب اغيّر فيهم ويشوفون مختلفه لان لي ترتيبي واهدافي ونظامي , لكن الحمدلله صبوره فأتجمل لما يقطعون هواياتي او يشغلوني بوقت راحتي من الاشياء الي تساعد على الانجاز بعد انك قبل تنامين تفضين الي بمخك في ورقه وتصحين تنجزينه , واكثر شي يساعدني وملحوظ لما اصلي بوقته احس يترتب يومي .. وطبعا لازم بريك من السوشل ميديا يوم في الاسبوع عشان ترتيب الافكار وانجاز افضل اعتذر طوّلت صار مدونه… قراءة المزيد ..
روابي عبدالله.
ضيف

كان التدوينه صديقتي في اكل العشاء ، قراءتها بكل شغف وخلص العشاظ بدون ما احس 😂💖.. الله يرفع قدرك على هالكلمات💖.

روابي عبدالله.
ضيف

قرأتها* العشاء*

ilamees
ضيف
استمتعت جدا وانا اقرا التدوينة 😍 تسلمي ع المجهود صراحة قرئتها في السيارة توفيرا للوقت😂 اتمنى تسدحيلنا موضوع مفصل عن الطريقة الصحيحة لحفظ الاطعمة اقصد مثلا لو قطعت نوع معين من الخضار كيف احافظ عليه اطول فترة ممكنة ايش طريقة الحفظ الصحيحة سواء بالثلاجة او الفريزر اظن الفريزر غالبا حيكون مجرد تفريغ هواء وفرزنة وخلاص اللي يهمني طرق الحفظ بالثلاجة 🙈😘 عندي ملاحظة صغيرة ياليت بعد الشرح تكتبيلنا النقاط الرئيسية ورا بعض عشان نقدر نعمل لها كابتشر و يسير سهل نوصلها 🙈💞 لاني احيانيا اكتب النقاط اللي تهمني واحطها قدامي عشان ما انساها 🙈💞 واخيرا شكرا على كل دقيقة تقضينها… قراءة المزيد ..
Deem
ضيف

تدوينه جميلة ومفيدة جدا ( جاري التطبيق )

A☘
ضيف

جمال التدوينه حسستني بعالم أنيق وملهم ⛅️✨
وكل الأفكار والخطوات عمليه وإن شاء الله نقدر ننفذها ونستمتع بأوقاتنا شكراً جزيلاً ، يعطيك العافيه 🌷💜

آلاء
ضيف

جزاكِ الله خيرآ أروى، نقاط جميله و أسلوبك أجمل 🙂 أستأذنك بإضافة نقطة مفيده خاصه للمغتربات، هي العنايه بالحياة الاجتماعيه، جميل تحديد وقت للقاء الصديقات، فهذا مما يخفف من شدة الغربه برأيي.

ريم
ضيف

يوم قلتِ ترا الام مو خدامة حسيتها طلعت من قلب😂😂
تسلمين أروى💗

ام عمر
ضيف

تدوينة رائعة كصاحبتها…جزاكي الله كل خير
والله لو تكتبي تدوينة من هنا الى بكرا ما اشبع من قرأتها جدا رائعة.وممتعه وخصوصا بالعرب قليل التدوين الجميل .
شكرا اروى من القلب

لجين
ضيف

سبحان الله كنت افكر بهالشي وشوي يجيني ايميل عن مدونتك و عنوانها 💜انبسطت و صدق استفدت و ان شاء الله بطبق و الله يجزاك الجنه😍

اسماء
ضيف

الله يسعدك على هالكلام الحلوو صحيح كثيييير مرره وتعبت وانا اقراه لاكن مفييييد وكل كلامه منه استفدت منها وإن شاءالله إذا استقريت بحياتي اول ما ابداء بطريقتك 😍

jawaher
ضيف

مرحبا
انا جديده في المدونه و حبيت كل شي تطرحيه في مدونتك جزاك الله الف خير عزيزتي وبنسبه لي مدونتك و كلماتك واعمالك ملهم لي

موضوعك مررره جميل
ومثل ما قالت اختي في الله (deem) ” جاري التطبيق …” باذن الله

تهاني العايد
ضيف

يازينك ويازين تدوينتك وسواليفك تخيلتك قدامي وانتي تسولفين الله يسعدك يارب

هند🎈
ضيف

فكرة تقطيع الخضار وفرزنتها او حتى تنظيف الدجاج وتتبيله كانت في بالي من زمان كنت ارجع من الدوام ويكون وقت تحضير الغدا وطبعاً اكون مرهقة ففكرت بهالفكرة والحمد لله لقيت احد مثلي كنت احسب اني بصير رفله . 😊

آمنه
ضيف

جدا استمعت بقراءة هالتدوينه 😻الله يسعدك سعادة الدارين ويحفظ لك غواليك جدا استفدت من قاعده الخمس دقائق وفرت علي وقت ومجهود انا جدا أييد فكره المفرزنات خصوصا الخضار جربتها وعجبتني جدا والله ماياخذ وقت ف الطبخ اول كان يضيع بين التقطيع والغسل والبعض تحتاج سلق لكن المفرزنه اريح ايضا جربت اني أعيش يوم كامل بدون جوال طفى جوالي ولا شحنته والله كان يوم جميل مع اطفالي قضيته سوينا كيكه وسولفنا اكثر من اي وقت سابق ،، استمعت بأمومتي معاهم وطفولتهم رجعت للزمن الجميل وكيف كانت طفولتنا 🙏🏼

Arwa sul
ضيف

كلام رائع ، وجزء كبير منه طبقته خلال السنتين ولاحظت فرق في حياتي

احب اضيف كم نقطة سهلت علي إبقاء المنزل منظم وهي :

1- عدم شراء الكثير من ألعاب الاطفال والإكتفاء بالألعاب ذات القيمة
2- امتنعت عن جمع الجرائد والبروشورات والملصقات والاعلانات والاوراق التي يتم توزيعها .
3- المواعين البلاستيك ما استخدمها ابدا وبكذا تكون حجم سلة المهملات اصغر وما تتعبى بسرعه .
4- تصفية الاغراض أول بأول من ملابس احذيه تحف ألعاب .

أم الوردات
ضيف

الأفكار حمستني جداً ماشاء اللہ
حبيت أضيف أنه من أكثر الملهيات الارتباطات والزيارات المتكررة والغير ضرورية لاهي زيارة مريض ولا زيارة ذات أسباب مقنعة وهذه الزيارة لها تبعات من تجهيز أصناف وحلويات وشغل الوقت واعداد ملابس مناسبة .. هذه من أعظم سارقين الأوقات

جاد
ضيف

كانت من الاشياء اللي تسهل الغداء بعد الدوام ان امي تطبخ الغداء بالليل وتحطه بصحن فرن لمانتعشى وننظف الاواني يكون قد برد ونغطيه بسفره ونحطه بالثلاجه ونداوم وانا كنت بالثانوي ارجع قبل البقيه كنت اطلعه واحطه بالخبازه يسخن وبعده اغير ملابسي واسوي سلطات واجهز لحد مايجون من دواماتهم ونحضر الغداء وماكان يتغير طعمه ابدا كأن توه مطبوخ وكانت الحركة مره تسهل علينا وتغنينا عن المطاعم 😌✨

ALOY
ضيف

و نـجيب السناگس و نقول هلآ بأحلى سهرة😍👏🏽😁😁💐✨❤️

Mrwa🌸
ضيف

أروى 💙
أنتِ شخص مفيد جدًا ومُلهِم ❤️
بكل بساطة ، لأنكِ تقدّمين حلول عملية رائعة جدًا ☁️
أتمنى لكِ الّسعادة ☁️

كلّ التقدير والحبّ 🌸

فرح
ضيف

اروى سوي لك كتااااب . بكون اول وحدة تشتريييييية

فطوم
ضيف

بطلة الفكرة ♥️

Ahlam
ضيف

الله يجزاك خيير
😘😘

رهام
ضيف

ربي يسعدك يا اخت اروى موضوع جميل كجمالك وروعتك

عضو

أفكار وخطط يوميه راااائعه
انا عندي خمسة أطفال والبيت دور كبير وماعندي خادمه وعندي مواهب وهوايات متعدده
لا انا اللي انجزت في شغل البيت ولا انا أنجزت في هواياتي

عضو

حبيبتي السمية منى 😍😂
مواهبك وهوايتك مهمة جداً لايوجد من يعوضها لك
حاولي تأتين بخادمه كل اسبوع
اذا انت في الرياض الحمدلله لدينا شركات عاملات مضمونه ومريحة

واعانك الله 🍃

فاطم
ضيف

جدا جدا رااااااااااااااااائع.. الله يكتب أجرك وينفع بك يا حبيبة💖

توكاا
ضيف

ياعمررري اروى الله يجزاك الجنه .. مدونه رائعه تناسب الاغلبيه وفعلا مرت سنين علي كنت ماشيه ع التسويف وكنت ساكنه شقه وكنت اتعب… واللحين الحمد لله يارب استقريت في فله وتنظيم الوقت ساعدني اجلس فترات طويله بدون اي شغل 💃🏼

شاشو الشمري
ضيف

ماشالله تبارك الله طاقه ايجابيه كامله الله يزيدك وينفع بك بغيت اعلق ع نقطه ياليت تكون بعض يومياتك بالسناب من الجانب الكسول بيومك مثل تعاجزتي عن غسيل الصحون كيف تحفزين نفسك ونكون معك لايف ع السناب يعني حنا نتحفز معك بشكل مو طبيعي بالاشيا الايجابيه طيب والسلبيه !!!لازم نتحفز نقضي عليها بكذا تساعديننا كثير وشكرا

الشهد
ضيف

اروى ممكن تخصصين تدوينه عن الباركيه ومحاسنه ومساوؤه

ارجوك اروى

Maha
ضيف

ماشاء الله عليك ،،،انا كانت مشكلتي التسويف اشغل نفسي باي شي ماعدا شغل البيت وبعد قاعدتك ( خمس دقايق ) والله تنظمة حياتي بشكل صرت اطبخ وانظف حتى ازرع 🙊 الحمدلله الف شكر لك ولطاقتك الايجابيه اللي توصلني كل ماشوف سنابك

ilamees
ضيف

ملاحظة اخرى احب تدويناتك الطويلة استمتع فيها جدا😌💞

Nadalisaa
ضيف

وعليكم السلام ورحمة الله ..
مرحبا اروى
قاعدة الخمس دقائق و دمج المهام
مرات اسويها من غير تخطيط !
لأني مؤمنة أن الـ multitasking جواتنا كأناث
يبقى بس نركز على ايش ننظم ونرتب
ويعطيك العافية اسهبتي في كلامك عن تحديد ألأولويات
شكرًا 💜

Samar
ضيف

ماشاءالله ياأروى عليك .. صار لي اسبوع اتابعك وجداا حبيت اسلوبك العفوي المريح والي يعطي الانسان تفاؤل .. في اشياء كثير حسيتك تشبهيني فيها خصوصا اني مغتربة وفي اشياء استفدت منها وان شاءالله اطبقها مستقبلا .. الله يوفقك ويسعدك يارب

الاء الرحمن
ضيف
قريتها وانا برضع بنتي😃 كلامك فعلا صحيح. انا كنت بفضل انا خمس دقائق زياده ولا اصحى وانظم اموري بالراحه قبل لاطلع للمدرسه. واطلع مستعجله ومضغوطه بدايه غير جميله لليوم، بس كنت افطر لاني ما استغني عنه. الفرق كان اني قبل لاتزوج كانت امي تسوي الفطور فانا بس اجي وافطر واختي الصغيره تسوي لي سندوش المدرسه (بعرف ما بستحي). وانا حامل اكلت الهم كيف دحضر معي شخص في الصباح قبل لامشي ع المدرسه (بشتغل معلمه) وانا نفسي ما بصعوبه كنت احضر. فصرت اصحى بكير وهنا كان السحر. صرت الحق احضر حالي واحمم بنتي الرضيعه وكمان اسوي وجبات فعلب لي ولزوجي مش… قراءة المزيد ..
Goodway
ضيف

تدوينة جمييييلة مثل باقي تدويناتك❤

جوجو
ضيف

ممكن بعد اثناء القيام بأعمال المنزل نردد الاستغفار والتسبيح 🌷ومشكورة يااروى على التدوينه الرائعه

Nawal
ضيف

اسعدني ايميلك اختي اروى تذوقت طعم كل حرف وكلمه كتبتها في هذه المدونه من اجمل المدونات التي قرأتها بارك الله فيك ولاشي يفوق ماكتبتي رائعه منذ ان تابعتك وفقك الله اختي اروى.

سعاد
ضيف

الله يشرح صدرك
المتابعة والقراءة لك ولأمثالك فقط هي من أعظم الأفكار التي تجعلنا نجتهد لننظم حياتنا …

ام لطيفة
ضيف

أروى ممكن تخصصين تدوينة
عن قدر الطبخ البطئ إيجابياته وغيرها

وصفات تعملينها فيه

ملاحظاتك عليه

شيماء الاحمدي
ضيف

الله يسعدك يا اروى عالكلام اللطيف اللي مليان ايجابية 💕💕

سٌعدت جدًا بالمدونة

سهام
ضيف

أشكرك على هذه التدوينة الملهمة 🌹👍👏

noha
ضيف

السلام عليكم

الله يعطيك العافية ويوفقك

ما شاء الله عليك غيرتي من ترتيب بيتي و وقتي بشكل كبير ودايم أدعي لك
ساعدتيني بشكل كبيييير

الله يوفقك ويخلي لك غالينك يا رب

Zina
ضيف

تدوينة جميله وأسلوب بسيط قريب للقلب .. أنتي طاقه إيجابيه في حياتي شكرا لك* أروى*

شاشو
ضيف

ماشالله تبارك الله طاقه ايجابيه كامله الله يزيدك وينفع بك بغيت اعلق ع نقطه ياليت تكون بعض يومياتك بالسناب من الجانب الكسول بيومك مثل تعاجزتي عن غسيل الصحون كيف تحفزين نفسك ونكون معك لايف ع السناب يعني حنا نتحفز معك بشكل مو طبيعي بالاشيا الايجابيه طيب والسلبيه !!!لازم نتحفز نقضي عليها بكذا تساعديننا كثير وشكرا

shishooo
ضيف

ماشالله تبارك الله طاقه ايجابيه كامله الله يزيدك وينفع بك بغيت اعلق ع نقطه ياليت تكون بعض يومياتك بالسناب من الجانب الكسول بيومك مثل تعاجزتي عن غسيل الصحون كيف تحفزين نفسك ونكون معك لايف ع السناب يعني حنا نتحفز معك بشكل مو طبيعي بالاشيا الايجابيه طيب والسلبيه !!!لازم نتحفز نقضي عليها بكذا تساعديننا كثير وشكرا

شاشو الشمري
ضيف

ماشالله تبارك الله طاقه ايجابيه كامله الله يزيدك وينفع بك بغيت اعلق ع نقطه ياليت تكون بعض يومياتك بالسناب من الجانب الكسول بيومك مثل تعاجزتي عن غسيل الصحون كيف تحفزين نفسك ونكون معك لايف ع السناب يعني حنا نتحفز معك بشكل مو طبيعي بالاشيا الايجابيه طيب والسلبيه !!!لازم نتحفز نقضي عليها بكذا تساعديننا كثير وشكرا

جواهر
ضيف

تدوينة جدا رايقة ماحسيت بالملل ابدا وأنا أقراها نحتاج ناس ايجابية مثلك ي أروى
يعني كل اللي حولي يحسسوني أن كل شي صعب ويالله فلانه رايقة وفاضية اكيد ماعندها شي يلهيها بالعكس هي انسانة منجزة وانت مهمتك بس تتفرجين عليها ونفسك تكونين مثلها بس ماتقدرين فتحبطينها ،،

حنان
ضيف

من اعجابي بها صورتها..اشوق

‫wpDiscuz

أضف تعليق عبر الفيسبوك:





حمل