ثلاجتي الطباشورية السعيدة

السلام عليكم ورحمة الله وبركاته

أهلا يا أصدقاء

من فتره زبرقت ثلاجتي وصورتها مباشر على السناب، ومن ذاك الوقت تجيني طلبات أكتب تدوينة كاملة عن طريقة تصليحي لها ، وطبعاً ما أرد لكم طلب ..

أول شي بأقولكم قصة حياة ثلاجتي ،

ثلاجتي الطباشورية السعيدة

أول ماسكنا، جا صاحب البيت الباكستاني وقال معليش بالغلط حطينا لكم ثلاجة مقاسها كبير ومو مضبوط ، بنغيرها ونجيب وحده نفس المقاس ، نطيت أنا من اللامكان وقلت لاااا عاادي عادي هذي زينه ، استغرب هو احس في وجهه علامة “وش هالحرمة القنوعة ياحليلها”، والله من اللقافة فيني ، كنت خايفه انه ياخذها ويجيب هذيك الثلاجه اللي الفريزر يكون فوق والثلاجه تحت ، وأنا شخصيا ما أفضلها أحب الثلاجة الطولية أكثر لأنها فيها براده وصانعة الثلج وأحسها أسهل في الترتيب
لكن صارت الحقيقة المرة ان الثلاجات عمقها مقاسين وحده نفس مقاسات الدواليب ووحده أكبر 😂 ..

المهم ، هذا سبب ان ثلاجتي ناقزه من مكانها مو داخله مره ..

بعدها صلحت في المطبخ بعض الأمور وبديت أحس ان الثلاجة يبدو عليها الحزن والأسى، صاير لونها أبيض ناصع بالمقارنة بلون المطبخ الكريمي ، وصايره فعلا شكلها غلط من جميع النواحي اللونية والحجمية..

فكرت وفكرت كيف أخليها أكثر سعادة ،

من أكثر الأفكار اللي أعجبتني بعد مابحثت عن حلول في البنترست كان تحويل الثلاجة لسبورة طباشير ..

لكن المشكلة الأغلبية صابغينها بصبغة الطباشير و أنا ما ودي أصبغها أو أسوي عليها شيء ثابت ، خاصة إني مو واثقة انه بيطلع حلو عليها الأسود ..

وكملت بحثي ، حصلت ناس مغلفين ثلاجاتهم بورق التجليد ،

وهنا نقزت في بالي فكرة انه ممكن يكون فيه تجليد طباشوري مثل الشريط اللاصق ، وفعلاً بعد كم ضغطة هنا وهناك حصلت في أمازون الحب تجليدة رول كبيرة عبارة عن سبورة طباشير ..

يستخدمونها استخدامات متعدده ، البعض يلزقها على الجدار، أو الباب ، أو أي مكان، الحلو فيها انها تنفك بسهوله وماتترك أثر صمغ ، ممتازة لغرف الأطفال أو لأي مشروع..

نقزت للثلاجة أخذ مقاساتها وأعلمها عن فستانها الجديد وأتوقع انها كانت فرحانه جدا << ممكن أحد يجي يسكن معي شكل حالتي بدت تصير صعبة 😂

والحمد لله حصلت مقاس كبير يكفي لباب الثلاجة بالكامل ،

Self-adhesive Chalkboard Contact Paper Roll

ثلاجتي الطباشورية السعيدة

غلفتها بالضبط مثل ما أغلف دفتر ، افتح جزء منها وألصقه ، وبعدين أبدا افك التجليدة شوي شوي وألزقها ..

بس قبل ما أبدأ شلت مقبض الثلاجة عشان مايكون في الطريق ، وبعدين رجعت ركبته بعد التجليد..

(صور من سنابي arwakaru )

ثلاجتي الطباشورية السعيدة

ماقدرت أصور في هالأثناء لأنها كانت تحتاج دقه ماكان ودي يصير فيها عفطات .. لكن شوفوا هالفيديو فيه طريقة التغليف اللي أقصدها بشكل واضح

وماحبيت أغلف كل الثلاجة بالأسود ، حسيتها بتطلع غير جذابة وماراح تنحل مشكلة انها شكلها غريب في المكان ،

وكان خاطري أحط فيها صور لأني مابعد شبعت من مطبخي الانستغرامي إذا تذكرونه ، كتبت عنه تدوينة اضغطوا على الصورة تاخذكم للموضوع 🙂

ثلاجتي الطباشورية السعيدة

كان مره مسوي جو مرح لمطبخي ومغطي الجدار اللي كنت طفشانه من شكله،

فقررت اسوي بالثلاجة نفس الشي وأملأها صور الهامية تعطيني أفكار لطبخات أو معلومات للأكل ، تكون شي مساعد وملهم في المطبخ ويعطي منظر سعيد ومشرق،

فتحت موقع بنترست وبديت أجمع صور في ملف عشان أشارككم الملف للي يحب يطبع نفس الصور ،  وبعدها بديت أطبع بمقاسات مختلفة بشكل عشوائي ،

الطباعة

ثلاجتي الطباشورية السعيدة

طبعتها على ورق لامع ، لأن هالورق ما يتعفط من المويه ، والثلاجة معرضة للرطوبة لأن فيها برادة، المويه ممكن تأثر على الألوان بشكل بسيط ، بس ماتخرب الورق .. هذي النوعية اللي استخدمتها لكن مو مهم تاخذون نفس الشركة أي ورق مكتوب عليه Glossy photo paper أعتقد بيفي بالغرض

ثلاجتي الطباشورية السعيدة

وممكن بدل هالورق تستخدمون ورق عادي وفي النهاية تجلدون الصور بالكامل بتجليد شفاف ، لكن أنا متوفر عندي هالورق المقوى فاستخدمته ..

طبعت بطابعة HP Deskjet 3050 طباعتها للصور ممتازة لكنها قديمة من ٥ سنوات عندي فما أظنهم يبيعونها للآن .. كثير يسألوني ايش أفضل طابعة ؟ بإذن الله بأبحث لكم أكثر في موضوع الطابعات وكيفية اختيارها وأدون عنها ، لكنها تحتاج بحث ودراسة ومابعد صار عندي المعلومات الكافية اني أكتب لكم عنها بشكل دقيق وشامل، في المستقبل القريب بإذن الله..

المهم إعدادات الطباعة تكون مناسبة لنوع الورق .. من خلال صفحة إعدادات الطباعة تختارون الجودة ونوع الورق وتحددون النوع ..

أنا طبعت بجودة متوسطة لأني ماحبيت أخلص الحبر على صورتين ، ومع ذلك نتيجة الطباعة كانت جدا جميلة لأني اخترت من الإعدادات ان نوع الورق لامع ، فانتبهوا لهالنقطة ..

ثلاجتي الطباشورية السعيدة

القص

بعد ما طبعتها قصيتها بأداة القص حتى تكون مستقيمه وأسرع ..

أداة القص كان عندي ثنتين سابقاً وحدة من جرير ووحده من الشرق.. فممكن تحصلونها هناك ، واللي عندي حاليا من مكتبة في أمريكا ، اسم القطاعة حقتي تحديداً “Swingline SmartCut 12

ثلاجتي الطباشورية السعيدة

 موجودة القطاعات أيضاً في أمازون تحصلون هنا أنواع متعدده

المميز في االنوع اللي عندي انها مو بس تقص ، فيها خيارات ثانية مثلا تقص بشكل متعرج أو تحط فتحات صغيرة في الورقه بحيث تصير تنشق بشكل مستقيم مثل الموجود في الكوبونات او الشيكات ، وفيها خيار رابع تعفط الورق ، فيصير موقع العفطه مستقيم وهذا يحتاجونه اللي يصلحون بطاقات ..

شوفوا هالفيديو يوضح طريقة عملها ..

واذا معد صارت حاده القطعة اللي تقص نقدر نشتري قطعه صغيرة جديدة ونبدلها..

تقنية تلزيق الصور في الثلاجة

ثلاجتي الطباشورية السعيدة

أول شي جلست أنسق الصور على الطاولة بحيث تكون الألوان منتشره مايصير فيه جزء كله غامق وجزء كله فاتح،، وزعتها بشكل متساوي ، ونسقت الأحجام أيضا بشكل متساوي ،

ثلاجتي الطباشورية السعيدة

وبعدين بدأت عملية التثبيت

ثلاجتي الطباشورية السعيدة

في البداية بديت ألصقها بلصق عادي ، وطبعا يفي بالغرض، لكن بيكون باين شكله إذا دققتي فيه .. وبعدين قررت أشتري شريط لاصق يلصق من الجهتين وأكمل به ، تمنيت اني بدأت به من الأول جدا جميل ومايبين وقوي ..

ثلاجتي الطباشورية السعيدة

اسمه Double sided tape

حلو لتغليف الهدايا او تعليق الصور على الجدار ..

إذا ماحصلتوه في المكتبات أطلبوه من أمازون من هنا

النتيجة

ثلاجتي الطباشورية السعيدة

ثلاجتي الطباشورية السعيدة ثلاجتي الطباشورية السعيدة

حبييييت النتيجة جداً ، السبورة عطت جو ومتعة في المطبخ ، نكتب فيها ملاحظات ، رسايل ، منيو الأسبوع ، أشخبط فيها حسب الموسم (رمضان، عيد ، نفاس وغيرها)،

ممكن نكتب فيها ألعاب بحيث كل ما أحد راح ياخذ شي من الثلاجة يشخبط ويلعب اللعبة كذا تشجع اللي في البيت يروحون يشربون مويه أو ممكن لأطفالكم تحطون لهم سناك صحي في الثلاجة وكل مره ياخذون منه يحق لهم يلعبون دورهم..

أو حتى ممكن نكتب فيها المقاضي .. الأفكار ماتخلص خاصة للي عندها أطفال بيتونسون عليها..

ثلاجتي الطباشورية السعيدة

الكتابة ممكن بالطباشير العادي أو بالطباشير السايل ، الطباشير السايل ميزته انه واضح وثابت ما ينمسح الا بمنديل مبلل فقط، يعني ماراح ينمسح بالغلط باليد،
ويجي منه ألوان رايقة جدا وناعمة ،
هذي النوعية اللي عندي Chalk Markers by VersaChalk
كل قلم له طرف مشطوف وطرف مدبب..

ثلاجتي الطباشورية السعيدة

ثلاجتي الطباشورية السعيدة

~

ثلاجتي الطباشورية السعيدة

والصور تحمس وتفتح الشهية للطبخ والأكل وتعطي أفكار ممكن تكون غايبة عن البال ، وبعض الصور مفيدة من ناحية الجداول والمعلومات مثل صورة عدد السعرات الحرارية في الأكلات أو صورة مدة حفظ الأطعمة في الثلاجة وغيرها..

طبعاً مو الكل يناسبة نفس الذوق ولا كل المطابخ بتناسبها نفس الألوان ممكن تستخدمون الفكرة بطرق مختلفة ،

مثلا ممكن الصور تكون كلها بالأسود والأبيض ،
ممكن تكون الصور كلها بمقاس واحد ،
أو ممكن ماتتغطى الثلاجة كلها بالصور ،
انا غطيتها بالكامل لأني ما ابي اللون الأبيض يظهر ، لو كان لونها حلو ممكن اكتفي بكم صورة ، أو ممكن احط السبورة داخل برواز واثبته بالمغناطيس بدل التجليد ..

الأفكار ماتخلص وكل واحد يزين بالطريقة اللي يحبها ويستمتع بها 💕..

إذا تحبون هالشغلات اللطيفة ادخلوا هالرابط فيه صور لبعض الثلاجات والأفكار ممكن تلهمكم لتجديد ثلاجاتكم أو إخفاء عيوبها 🙂

وممكن تطبقون الأفكار على الفرن أو أدراج المطبخ أو أي عنصر تحسونه يحتاج ترفعون له روحه المعنوية

وأخيرا بعد مازبرقتها من برا حبيت أزيدها أناقه و أرتبها من الداخل ، عشان يصير الجوهر مناسب مع المظهر 😁

ثلاجتي الطباشورية السعيدة

استخدمت مجموعة منظمات تحصلونها في هالرابط ، وبعض المتابعات في الانستغرام  قالوا انه موجود مثلها في ساكو ومحلات الكماليات 💖

وهكذا انتهت قصة حياة ثلاجتي السعيدة 🙂

 وألقاكم على خير الخميس القادم مع تدوينة جديدة بإذن الله ^_^

أتمنى لكم يوماً ملوناً

ثلاجتي الطباشورية السعيدة

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

283 تعليق على "ثلاجتي الطباشورية السعيدة"

avatar
فرز بواسطة:   الأحدث | الأقدم | الأكثر تصويتاً
Sahar
ضيف

جميل جداً الله يسعد قلبك ❤❤

اسيا
ضيف

ماشاءالله عليك موفقه 🌸🌷

غادة
ضيف

عزيزتي أروى.. باختصار، إنتي انسانة رااااااائعة، مبدعة، جميلة الروح… ما شاء الله عليكي و على قدراتك. أتمنى تستثمري طاقتك الإبداعية الجبارة في مشروع يستفيد منه الآخرون مثل شركة تقدم افكارك الجميلة كخدمات للناس الراغبين فيها. شكرًا من القلب لأنك ملهمة الآلاف …

Lalisa
ضيف

السلام عليكم
الفكرة تهبللل ماشاء الله ! تحمسين الواحد يشتغل و يبدع بسبب أفكارج ! الله يوفقج و يحفظ تالا يارب 💙

عضو

جميل جدا 💘

تهاني
ضيف

دائماً مبدعه ام تالا بالتوفيق😻🌹

موني ❤️💕
ضيف

استمتع في افكارج الملهمه ماشاءلله 😍
وكنت انتظر هالتدوينه من زمااااان وكانت كافيه و وافيه
تسسسلم ايدج
استمري يامبدعه ❤️💕

أم رفو
ضيف

ماشاء الله سلمت يداك ,بصراحه صارت تحفه 😍

waad fahad
ضيف

يسسعدك ياررب 💕💕
سرت متحمسة ليوم الخميس مررة على حساب التدوينة 🍃🌧

عضو

جميلة تدونتك حبيبتي الله يجزيك الخير ومنك نستفيد بميزان حسناتك ان شاء الله

Reem
ضيف

ماشاء الله شغل يفتح النفس ويحمّس..
يعطيك العافيه 💐

اثوره
ضيف

الله يجزاك الخير ويجعل ايامك كلها ملونه بالفرح

منوش ٓ
ضيف

ي جمالك ✨💜💜
انتي شخصيه ملهمه جداً 💐👏🏽
استمتع جداً بحسابك 🌸

Atekah
ضيف

😢💘ازداد حبي ليوم الخميس مرررره😂😂💓مره حبيت فكره الطباشير 😍

حصة
ضيف

ما شاء الله جدا جميييل ايتها الفتاة الملهمه لما هو جميل

عضو

مبدعه ومتألقه بأفكارك الله يزيدك من فضله 🌹

هيفاء ام هاشم
ضيف

رائعه انتِ

بشاير
ضيف

ابدعتي …. استمعت بالقراءة يعطيك العافية

حنين
ضيف

جمييييل

هديل
ضيف

الله يجزاك خير 😍❤️تدويناتك جداً ممتعه وملهمه ❤️

Haya
ضيف

جميييييلة الفكره 😩💕💕💕👏🏼

نوره
ضيف

جماااااال ماشاءالله …😍

noha
ضيف

من جد شغل رايق احيي فيك 🌷🌹

noha
ضيف

هالابداع

سونا
ضيف

ماشاءالله …بارك الله في جهدك

فاطمه
ضيف

ماشاء الله لاقوةالابالله ابدااااع

ضحى
ضيف

فكرة جميلة

Sara
ضيف

حححبييتتت ماشاء الله عليك 💕💕💕💕💕

Alaa
ضيف

لطيييفه 😩💜💜💜

فاطمة
ضيف

ماشاء الله جميلهه..يعطيك العافية💜

أمل
ضيف

الله يسعدك ام تالا اضفتي ليوم الخميس اضافه استثنائيه وجميله جداً مستمتعه ومتحمسه كما لو انتظر برنامج تلفزيوني مفضل😍😍الى الامام ابداع دايم ومستمر 👍🏻😘

نورا
ضيف

كنت انتظر هالتدوينه من دهر شكراااااا يا جميله

غادة
ضيف

مو طبيعيه انتي 😢❤️❤️❤️❤️ انا مليانه حب و إعجاب لك و لأسلوبك و لكلامك 😢💜💜

ام مجد
ضيف

تابعت تزيين العروس معاك على سناب والحمد لله طلعت جميلة جدا وربنا يسعدك ويهنيك واحلى شي اسم تالا منور على السبورة ربنا يحفظها ويبارك لكم فيها 💞

أم إحسان تميم
ضيف

هلا ام مجد …
كلماتك جذبت انتباهي .. ممكن تخبرينا طريقة تزيين العروس ماعليك أمر لأني مالحقتها سناب … وألف شكر لك ياغالية

توكاا
ضيف

الشكل جدا جدا حماس ماشاء الله تبارك الله

نبهتيني على شغله كانت غايبه عن بالي… وهو عمق تصميم المطبخ مع عمق الثلاجه..😄 بنتبه لهالموضوع لاني جالسه بصمم مطبخ هالفتره…

انا ادواتي كلها ستانستيل .. ايش تتوقعو يناسب لون مطبخ( ابيض والا بني والاكريمي)؟ 😐 محتااااره..

ساعدوني بردودكم هنا واعطيني رأيك يا اروى اذا ممكن 🌹💗

Faten majestic7
ضيف

الستنسل غالبا يناسب معه الأسود، الكحلي، العنابي، والابيض الرمادي.

nada_moments
ضيف

ماشالله جمييييل جدا حبيييتها ..
الله يعطيك العافية ❤❤

Alreem
ضيف

ماشاء الله ذوق رفيع ومجهود رائع 👌🏻💖

شهد
ضيف
الله يسعدك ويوفقك يا أجمل انسانة تعجز الكلمات عن شكرك مرة الفكرة جميييييييييلة وفعلا الثلاجة صار شكلها يوحي بالالهام والنشاط وحسيت انه لو نسويها ونضبطها من برا بتخلي الواحد يحافظ على نظافتها وترتيبها من الداخل كمان جدا أعجبتني الفكرة وأتمنى إني أسويها لكن أعرف إخواني الصغار ماراح يخلونها في حالها إلا وبيقطعون ويخربون الصور والتجليد لكن أنا فكرت اني اسوي هالحركة مثلا على جدار غرفتي مثلا ألزق تجليد طبشوري في اليمين والصور في اليسار وطبعا مو كل الغرفة يمكن بس جزء بسيط منها وعالعموم نشكرك على كل شئ تسوينه لنا الله يخليك لنا ولا يحرمك مننا ويخلي لك تالا وكل… قراءة المزيد ..
غدير
ضيف

حبيت الفكرة تجيب السعادة لما تشوفيها احس 😍💜💜
ماشاءالله عليك فنانة 👏🏼💕💕

ليلى الحميدي
ضيف

جميله الفكره مثل صاحبتها حبيت تنظيمك وافكارك وانجازاتك بارك الله فيك ونفع بك لك مني خالص الود ********

Ghadir
ضيف

ماشاء الله عليك أروى ،،،مبدعه دائما ،،

A☘
ضيف

جداً أصبحت جميله الثلاجه وحبيت فكرة الصور مررره أعطتها منظر جميل مع التجليد الطبشوري 😍💕
شكراً على التدوينه الرائعه ومتشوقه ليوم الخميس القادم 🙊🍃💜

لولوه المريسل
ضيف

يعطيك العافيه تدوينه جميييله نفس روحك الجميله ودامت حياتك ملونه يارب😘

Huda
ضيف

تبارك الرحمن …مبدعة بالفعل اختي اروى…الله يسعدك

استمتعت كثير بالقراءة…أحب بإذن الله اطبق الفكرة في القريب العاجل…

N
ضيف

السلام عليكم أروى
حابه استفسر منك انا انشاء الله طالعه للدراسه في أمريكا الشماليه
بعد تقريبا ثمانيه شهور من الان لمده سنتين الى ثلاث سنوات
انا معي في يدي طفل عمره سنتين
فحابه استفسر متى بالضبط ابدأ اجهز للسفر
وفي رأيك ايش الاشياء المهمه اللي لازم اخذها من السعوديه
وهل تعتقدي انه مهم اكون هناك قبل مده طويله من بدايه الدراسه
لاننا مخططين نسافر قبل اسبوع من بدايه الدراسه هناك
مع العلم اننا حتى سكن ما قررنا الى الان ايش ناخذ
ادري الاسئله كثيره بس فعلا ضايعه
اذا تقدرين تفيديني بهالموضوع اكون شاكره لك💕

عائشة العنزي
ضيف

ما شاء الله 😍يعطيك العافية فكرة جميلة جدا حبيتها

أشواق
ضيف

مرررره جميله ويسعد لي ايامك

Wadiah
ضيف

ابداع الله يعطيك الف عافيه

جولزا
ضيف

افكارك جميله وابداعيه

يسعدك ربي و يحفظ لك تالا

استمتعت بالتدوينة و في انتظار الخميس القادم بإذن الله 🎀

في خفظ الرحمن

ام عمر
ضيف

رائع جدا بانتظارك يامبدعة

ام عمر
ضيف

بانتظارك كل خميس بإذن الله تعالى

ام عمر
ضيف

بانتظارك كل خميس بإذن الله تعالى

آنننتي
ضيف

شكلها جميل ولكن عندي ملاحظه احس الطباشير بعد ماتنمسح يطلع شكلها باين انه ممسوح و كانه مو نظيف حتى لو مسحته بمويا
مدرى اذا شرحي واضح بس اللي جرب يكتب على السبورات بيفهمني ليت القى حل حتى لو من امازون اطلبه

نوره
ضيف

استخدمي مناديل مبلله الجاهزه مثل جونسون وتشبز تمسح ومايبقى اي اثر

ام غلا
ضيف

woooow

أم إحسان تميم
ضيف

ماشاء الله تبارك الله

الصمت في حرم الجمال جمالُ

توتو 💗
ضيف

كلشي تسوينه جميل ماشالله احبكككككككك

شين
ضيف

ماشاءالله

‫wpDiscuz

أضف تعليق عبر الفيسبوك:





حمل