تجربتي مع غسّالة الصحون ، وكل مايتعلق بها ..

بسم الله الرحمن الرحيم

أهلاً يا أصدقاء 🌷

بأحكي لكم في هالتدوينة بإذن الله عن تجربتي مع غسالة الصحون وكيف نختار أفضل نوع وطريقة استخدامها والعناية بها ..

تجربتي مع غسّالة الصحون ، وكل مايتعلق بها ..

غسالة الصحون في أمريكا من الأمور المسلم بها والموجودة غالبا في كل منزل أو شقة، لكني ألاحظ في السعودية مازال فيه ناس متردده انها تشتريها..

وأعتقد السبب يرجع للإشاعات اللي تحاصر غسالة المواعين انها ماتنظف زين أو مالها فايدة أو الغسل باليد أسرع وأنظف وغيرها من الإشاعات السلبية اللي في أغلب الأحيان لاحظت أنها تصدر من أشخاص ماسبق جربوا الغسالة أو اعتمدوا على تجارب أشخاص إما ماعرفوا كيف يستحدمونها أو أجهزتهم فيها مشاكل..

وبالرغم من اني في كل جهاز أتكلم عنه أقول انه يناسب ناس وممكن البعض مايناسبهم أو عادي يستغنون عنه إلا إني هنا اليوم عشان أقنعكم أنه غسالة المواعين حاجة ضرورية من أساسيات البيت،

سواء كان عندك خادمة أو ماعندك وسواء كنت توك متزوجة وماعندك مواعين كثير أو كانت اسرتكم كبيرة ، في كل الحالات ، غسالة المواعين لازم تكون موجودة في البيت ..

بالنسبة للي ماعندهم خادمة ، أتمنى تدركين أن وجود غسالة مواعين بمثابة خادمة تعمل عدة ساعات باليوم في بيتك،

لا تقولين كلها صحنين وكوبين وقدر باليوم ، لا أبدا ، أنا أعرف انك تقضين وقت لابأس به تغسلين مواعين بالمطبخ وباقي الوقت أقدر أتخيل شكل المطبخ إما صحون متراكمة في المجلى تتنقع أو انك من النوع اللي معتمد على صحون وكاسات البلاستك بالبيت ..

أو انك فعلاً تتعبين لإبقاء مطبخك نظيف ومافيه مواعين متراكمة..

كيف أعرف؟

لأني جربت تخرب غسالتي كم شهر وماقدرت أتحمل الوضع

كان عندي خيارين فقط إما أتعب وينهد حيلي من شغل المطبخ أو ان المطبخ يكون حوسة..

لكن مع غسالة المواعين أقدر أقلل المجهود بشكل هائل وأحصل على مطبخ مرتب أغلب الوقت..

أما بالنسبة للي عندهم خادمة أنا أشوف ان الغسالة أنظف من كثير من الخادمات هذا غير انك بتوفرين لها عدد ساعات عمل إضافية بدل الوقفة في المطبخ..وغير كذا احتسبي الأجر تخففين عنها بعض الأعباء اللي ترهقها ما دام فيه البديل ..

الأمر الثاني المهم وضعه في الاعتبار أنه مثبت بالدراسات أن غسالة المواعين أكثر توفير من الغسل باليد ، لأنها تستهلك فقط سدس كمية الماء اللي يستهلكها الشخص لغسل نفس الكمية من الصحون ، وتستهلك نصف الطاقة اللي تستخدم لتسخين الماء وكمية أقل بكثير من الصابون .. فهي تعتبر أيضا استثمار في هالجوانب لتقليل استهلاك الماء والطاقة ..

والآن نجي لأكثر الأسئلة شيوعاً..

💦

هل غسالة المواعين تنظف فعلاً؟

نعم غسالة المواعين في كثير من الأحيان أنظف من التغسيل باليد وباسفنجة استخدمتيها كم اسبوع ..

خاصة للكاسات والصحون الزجاج تطلعها تلمع وجافه وجاهزة تنحط مباشرة بالدرج بدل ما نرجع نمسحها بفوط ما تنغسل يوميا وماندري إذا معقمة بشكل جيد أو لا..

يقال أنه لازم أنظف الصحون قبل ما أدخلها بالغسالة ، وش الفايدة مادام بأنظفها أغسلها مرة وحدة؟

لا أبدا مو صحيح انك لازم تنظفينها أو تغسلينها، بس المقصد انك ما تحطين الصحن وفيه بقايا الأكل، لازم تكبين بقايا الأكل قبل ما تدخل للغسالة..

أنا بعد ما أخلص أكل لو كان فيه مثلا رزتين أو قطعة بصل وهكذا امسحهم بمنديل أو اشيلهم بالملعقة وأحط الصحن مباشرة بالغسالة بدون ما أشطف الصحن بالموية ، يعني مثلا لو فيه بقايا دهون أو بقايا صوص السلطة او الزبادي أو الحروق اللي بالقدور كلها عادي تدخل بدون مسح ولا تنظيف مسبق .. بس بقايا الأكل أمشي على كل الاطباق بمنديل واحد مسحه خفيفه وأدخلهم مباشرة..

💦

إيش ممكن أدخل بغسالة المواعين؟

كل شي يدخل بالغسالة، صحون قدور كاسات ملاعق، بلاستك او صين أو زجاج، ماعدا أشياء محدده ويمكن الاستغناء عن أغلبها وهي :

  • أي شي خشبي مايدخل للغسالة ، ملاعق خشب قطاعات خشب وماشابهها ماتدخل ..
  • بعض أنواع القدور ماينفع يدخل مثل الحديد و الالمنيوم غير المعالج والنحاس، لكن أساسا الالمنيوم غير المعالج والنحاس غير صحي للطبخ فنستغني عنه بالمرة أفضل..
  • ترامس الشاي والقهوة والحوافظ ، فيه ناس يدخلونها ويقولون عادي ماتخرب وتنغسل زين ، بس هالاشياء يكون مكتوب عليها انها ماتدخل الغسالة فالأفضل نتجنب تدخيلها ..
  • بعض أنواع الصحون الفخمة اللي فيها (ذهبي) ، الحرارة الشديدة والصابون ممكن تبهت الذهبي ومع الوقت يروح
  • البيالات او الكاسات الكرستال الرقيقة جدا اللي تنكسر من الحرارة إذا صبيتوا فيها الشاي ، داخل الغساله بيكون حار وقت الغسل فنتجنب نحطهم عشان ماينكسرون.
  •  الأدوات البلاستك الخفيفه اللي نستخدمها استخدام واحد..

عن نفسي ما أشتري أي غرض للمطبخ بغرض الاستخدام اليومي الا وهو يقبل الدخول بالغسالة يعني ما اشتري أطباق خشبية ، قطاعاتي الخشبية استعملها فقط للخبز والامور الخفيفه وعندي قطاعات ثانية بلاستك جدا ممتازة أستخدمها بشكل يومي تدخل الغسالة وطبعا مصنوعة من مواد آمنة ..

ما اشتري ملاعق تحريك خشب ولا اشياء فيها مقبض خشبي ..

وطبعا البلاستك حق الاستعمال الواحد مايحتاج نغسله نستخدمه ونرميه..

وما أشتري قدور نحاس أو ألمنيوم مو معالج ولا حديد لأنها كلها إما غير صحية أو صعبة جدا للاستخدام فحتى لو ماعندي غسالة ما استخدم هالنوع من القدور..

استخدم القدور الكورية المصنوعة من الالمنيوم المعالج ، وقدور الستيل والنون-ستك تدخل للغسالة..

وبالتالي الآن ماعندي ولا غرض استخدمه بشكل يومي مايدخل الغسالة ماعدا ترمس القهوة فقط ..

(ممكن اشتري حاجة نفسي فيها أو للضيوف أو التصوير حتى لو ماتدخل الغسالة ما أحرم نفسي تماما لكن لأني ما استخدمها دائماً ماتتعبني كثير)

وأي شي جديد أشتريه أقرأ المكتوب عليه اذا يدخل أولا ونادر جدا أصادف شي مايدخل الغسالة..

ولذلك قدوري وصحوني وقطاعاتي وسكاكيني كل شي ادخله ..

يعني الاسفنجة اللي بالمجلى ممكن تجلس كم يوم ما استخدمها،

كل شي يروح مباشرة على غسالة المواعين ..

أفضل نظام اني آخر اليوم أدخل كل شي استخدمته بالمطبخ في الغسالة وأمسح طاولات المطبخ وإذا صحيت الصبح أول شي أسويه أفرغ الغسالة مباشرة على الأدراج وأستمتع بمطبخ نظيف بدون تعب يذكر ولله الحمد..

بينما الأيام اللي ماكان عندي غسالة، أحيانا أكون تعبانة بالليل وأترك الصحون والمواعين ما انغسلت وأقوم بكرة بأطبخ وأضطر أبدأ أغسل، ما أخلص إالا وأنا تعبت ومعد لي نفس أطبخ ويادوب انتهي من الطبخ مستحيل أرجع أغسل من جديد فتتراكم علي..

هذا غير أن أغلب الوقت كان مطبخي شكلة حوسة إما أطباق متراكمة ما انغسلت أو أطباق متراكمة مغسولة وأنتظرها تجف ..

فمن هذا المنطلق أنصح بشدة أنك تفكرين جدياً بغسالة الصحون ..

إذا فيه مساحة بمطبخك جنب المجلى جيبي شخص يشيل واحد من الأدراج ويهيئ مكان للغسالة..

إذا ماعندك مكان بالمطبخ،

 فيه نوعية مناسبة للي ماعندهم مكان مخصص لغسالة المواعين ولا يقدرون يركبون وتجي أصغر من الحجم الطبيعي وتنحط على كاونتر المطبخ أو فوق الثلاجة بالقرب من المجلى..

اسمها countertop dishwasher .. اضغطوا على الاسم ويطلع عدة خيارات منها ..

تجربتي مع غسّالة الصحون ، وكل مايتعلق بها ..

قد مايبدو شكلها الأكثر جاذبية في المطبخ لكن مثلها مثل المايكرويف ..

هذي الغسالة تقييمها عالي وناس كثير مجربينها اضغطوا على الصورة يطلع لكم تفاصيل أكثر عنها:

تجربتي مع غسّالة الصحون ، وكل مايتعلق بها ..

صديقتي لمى السليمان صار لها عدة أشهر تستخدم الغسالة الصغيرة من هالنوع وقلت لها تحكي لي تجربتها وترفق لي بعض الصور والفيديو لكم لأن اللي يتكلم عن تجربة مو مثل اللي ماجرب..

سألتها الأسئلة التالية :

هل تكفي لأغراضك كامله والا تضطرين تشغلينها أكثر من مرة باليوم؟؟

اشغلها مرة وحده يوميا وتكفي كل شي نستخدمه لأننا شخصين بس بالبيت

لكن إذا تركت مواعيني تتراكم أكثر من يوم ممكن أحتاج أغسل على دفعتين.

وتكفي لكل أغراضي حتى صينية الفرن الكبيرة تدخل وأكبر صحن عندي تكفيه المساحة ، و بعد ما اشتريتها صرت احرص ان الأغراض الجديدة اللي أقتنيها ماتكون عملاقة بحيث تدخل بسهولة..

هل هي عملية وتنظف زين فعلا؟

جدددا عملية حتى الحرق اللي يجي بطرف صينية الباشميل تسحقها ماشاء الله ويطلع كل شي يلقلق ..

كيف شكلها بالمطبخ؟

أنا حاطتها جنب المغسلة ، بالبداية حسيتها ناطة ومالها مكان لكن صار لها مكانة بقلبي وحبيتها وصرت أستملح شكلها أحيانا..

هل تنصحين بها؟

والله إني كل يوم أشغل فيه الغسالة أحمد ربي انه وفقني أشتريها وأرتاح، والحين أنا جدا مستغربة من اللي مانصحوني بغسالة الصحون ماأقدر أستوعب كيف عايشين بدونها، أنصح بها بشدة أشد شي في الحياة..

وأرفقت لي صور غسالتها وفيديو كانت مرسلته لصديقاتها تشجعهم يشترون الغسالة ويرتاحون ، مصورة قبل وبعد التنظيف ..

تجربتي مع غسّالة الصحون ، وكل مايتعلق بها ..

وهذا المقطع تشرح لكم فيه طريقة عمل الغسالة بشكل سريع

وهذي هي الغسالة اللي تستخدمها هي اضغطوا عليها لباقي التفاصيل

تجربتي مع غسّالة الصحون ، وكل مايتعلق بها ..

شكراً لمى الجميلة على وقتك و على مداخلتك القيّمة جدا💕

كيف نستخدم الغسالة ؟

تجربتي مع غسّالة الصحون ، وكل مايتعلق بها ..

جاني هالسؤال كثير ، الغسالة جدا بسيطة ، طبعا ما أقدر أعطي تعليمات دقيقة لأن كل شركة تسوي الغسالة بتصميم مختلف مثل الأفران، تحصلون شي فيه أزرار متعلقه بالوقت وبعضها مافيها وبعضها فيها خيارات أكثر أو أقل حسب نوع الشركة وكلها واضحه ومشروحة في الكتيب اللي يجي مع كل غسالة ..

بس بشكل عام ، فيه بعض الخطوات المشتركة في كل الغسالات وهي كالتالي:

وضع الأواني :

تجربتي مع غسّالة الصحون ، وكل مايتعلق بها ..

نحط الصحون والأواني بشكل طولي والجهه المتسخه فيها متوجهه لنصف المغسلة مثل الصورة اللي فوق..

 الملاعق والسكاكين نصفها بمكانها المخصص.

والكاسات والأكواب بشكل مقلوب.

نحاول ما نراكم المواعين أو نزاحمها يعني نراعي ان الماء لازم يدور و يمر على كل المناطق فمانلزق صحنين ببعض مثلا لأن كذا الموية ماراح تقدر تدخل بينهم وتنظفهم..

بعد ما نصف الأواني بالشكل الصحيح

نحط الصابون بمكانه المخصص ونسكر الغسالة ونضغط زر التشغيل ..

أنواع الصابون للغسالة:

لاحظت أحيانا ناس تشتكي ان صحونها يجي عليها طبقة أملاح أو تبهت أو الصابون مايغسل بشكل جيد ..

الغسالة تحتاج ثلاث أشياء فقط : صابون ، ملح ، محلول الشطف rinse aid

الصابون :

أنا جربت عدة أنواع منها سائل ومنها بودرة ..

أفضل نوع جربته هو المكعبات اللي تجي بودرة مع سائل وأستخدم اللي من شركة cascade

تجربتي مع غسّالة الصحون ، وكل مايتعلق بها ..

البعض يفضل مكعبات فينيش ، من رأيي تجربون أكثر من نوع حتى تحصلون على النوع الأنسب لغسالاتكم ومواعينكم ونوع المياه اللي في المنطقة لأن كل هالأمور تأثر على أداء الصابون..

محلول الشطف (الملمع) :

تجربتي مع غسّالة الصحون ، وكل مايتعلق بها ..

فيه محلول يجي من عدة شركات اسمه Rinse Aid .. هالمحلول يساعد انه الصحون تنشطف بالشكل الصحيح وماتكون باهته وعليها بقع ماء، يعني يخليها تلمع أو تلقلق على قولة لمى 🙂

ينحط هالمحلول في مكانه المخصص داخل الغسالة ويختلف مكانه حسب الشركة ..

هالمحلول ما نحطه كل مره ، يجلس أسابيع داخل الغسالة فيه علامه توضح إذا يحتاج زياده أو لا..

ملح الغسالة :

تجربتي مع غسّالة الصحون ، وكل مايتعلق بها ..

الملح مخصص انه يوازن نسبة المعادن بالموية ، يعني الملح هذا مايجي على الأطباق ، بس يساعد الغسالة انها مايكون فيها تكلسات بالماء وبالتالي يطيل بعمرها وتصير تشتغل بأفضل مستوى.

البعض يستغني عن محلول الشطف وعن الملح ويكتفي بالصابون،

في الواقع، صحيح أنه الصحون راح تنغسل بشكل جيد حتى لو ما استخدمنا الملح والمحلول ، لكن بيكون فيه خطر ان الغسالة تخرب ويضعف أداءها مع الوقت بسبب التكلسات .. فالأفضل نستخدم الجهاز بالطريقة الصحيحة ..

ملاحظة : المقصود بالملح هو ملح مخصص للغسالة وليس ملح الطعام..

💦

تنظيف الغسالة :

تجربتي مع غسّالة الصحون ، وكل مايتعلق بها ..

الغسالة نفسها تحتاج تنظيف من الداخل حتى تتعقم وتصير ريحتها منعشة ..

ثلاث خطوات لو نكررها مره بالشهر بتكون كافيه بإذن الله

أولا: ننظف السلة اللي تمسك بقايا الأكل داخل الغسالة ، كل الغسالات فيها هالسلة قابله للفك نفكها ونغسلها يدوياً..

ثانياً: نحط مقدار كوب خل داخل صحن أو كأس ونتركه في الرف العلوي للغساله ، لا تحطونه مقلوب خلوه مستقيم مانحتاج نكب الخل نبيه يكون داخل الكوب ..

ونسكر عليه الغسالة بدون أي أطباق ثانيه ونشغلها دورة غسيل كامله طبيعية..

ثالثاً: نرش مقدار كوب بيكنغ سودا (بيكربونات الصوديوم) على أرضية الغسالة ونشغلها دورة قصيرة مايحتاج دورة كاملة..

بعد هالثلاث خطوات المفترض تكون ريحة الغسالة نظيفة ومنعشة ومافيها أي روائح أو بكتيريا..

وممكن نختصر الخطوتين الأخيرة ونستخدم محلول مخصص لتنظيف الغسالة اسمه dishwasher cleaner نحطه فيها ونشغلها وتصير نظيفة ..

 💦

كيف نختار الغسالة المناسبة ؟

تجربتي مع غسّالة الصحون ، وكل مايتعلق بها ..

أنا ما جربت إلا نوعية Whirlpool وجدا ممتازة عندي لكن ما أقدر أقول أنها أفضل الموجود لأني ماجربت غيرها ..

بحثت كثير عن أفضل ماركة وكثير يمدحون GE و LG

فاللي أقدر أفيدكم فيه من ناحية الاختيار إني أحرصكم تشيكون على التقيممات في المواقع اللي تبيع الغسالة واقرأوا رأي الناس عنها، غالبا اللي أربع نجمات وفوق تكون ممتازة ، وتجنبوا أي غسالة أقل من ثلاث نجمات ..

خذوا اسم الغسالة واكتبوه في جوجل وتصفحوا المواقع الأجنبية اللي تبيع أغلبها يكون عليها تقييمات توضح لكم رأي الناس عنها وتجاربهم.

الشي الثاني حلو لو تختارون غسالة يكون فيها خيار التعقيم ( sanitazing )

وهذي صفحة فيها بعض المقارنات لأفضل الغسالات لعام ٢٠١٦ ممكن تفيدكم

ملاحظة : جميع أجهزة أمريكا خط ١١٠ ، فخلوها ببالكم إذا بتتطلبون من أمازون الأمريكي..

هذي صفحة أمازون البريطاني فيها جميع الأجهزة ٢٢٠ (اضغطوا هنا)

💦

وهكذا نكون وصلنا لنهاية التدوينة، إن شاء الله أكون غطيت جوانب الموضوع بشكل كامل وواضح لكم ،

أتمنى يفيدكم الموضوع وتدعون لي بظهر الغيب..

ويليت تشاركون الموضوع بالقروبات لعل أحد يستفيد منه 💕

ولو عندكم أي اقتراحات أو اسئلة بأكون سعيدة بالإجابة عنها

أتمنى لكم يوماً لامعاً ✨

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

280 تعليق على "تجربتي مع غسّالة الصحون ، وكل مايتعلق بها .."

avatar
فرز بواسطة:   الأحدث | الأقدم | الأكثر تصويتاً
Ndo_fz
ضيف
انا لو اقدر ابوس الغساله بستها بس فيها شبه التماس مخوفني 😂 مثلك استغرب من الناس اللي تقول ما يحتاج غساله الوقفة لحالها وطرطشة المويه بالشتاء تخليك تقتنعين غصب فيها 😭❤️❤️ عن نفسي تزوجت وجلست سنه وشوي بدونها بغيت انهبل واقنع في زوجي ويقول شلون ذي بتكسر مواعينا 😂😂😂 لين صار شيء بحياتنا واستغليت الموقف وطلبتها 😂😂 والحمدلله هذا ثاني رمضان معها راحة نفسية وجسدية وبدون تعب وقلق المواعين طبعا اقول راحة نفسية لإني انسانه تراكم المواعين وينحاس مطبخها لدرجة امر عالمطبخ وتجيني الصيحة واكش عليه واطلع واخليه 😂😂 بعدين ارجع ارتبه اذا هدت النفسيه ولو يصممون لنا جهاز نحط… قراءة المزيد ..
نوال
ضيف

الالتماس يا حبيبتي عشان فيها قطعة مانعة للصواعق ركبوها من الشركة اللي مصنعتها عشان تمتص الصواعق اذا ضربت البيت .. بس في السعودية الحمدلله البيوت آمنة وما تجيها صواعق .. جيبوا مهندس من نفس الشركة او المحل اللي اشتريتوا منه وخلوه يفك هالقطعة منه وبس 🙂

ام جنى
ضيف

تخيلي إنّو فيه دايما اشوف الأجانب يستخدموه يحطو فيه كل شي ويشتغل كم ساعة وخلاص😌..بس طبعا ما تنفع فيه كل الأكلات 😝

بدور الروقي
ضيف

غسالتك لازم الكهربائي يشوف الفيش اللي بالجدار هو سبب الالتماس .. خليه يضيف سلك صغير جوى الفيش اكيد لو كهربائي شاطر بيفهم المطلوب .. انا غسالتي كانت كذا فيها التماس بسيط وطلبنا صيانة الشركة الي شريناها منها واضاف سلك بالفيش لان فيشنا خارجي ساحبته من فيش ثاني .. والحمدلله راح الالتماس

Norah
ضيف

الالتماس الي تقولين عنه لاتستهينين فيه ، انا مثلك لما جت الصيانه تشيك عليها قالت بسبب ان مافيه خط أرضي للبيت كامل ، انتبهي على نفسك وبيتك ماينفع تتركينها بدون تعديل

Sereena14
ضيف

طيب انا من النوع الي اطبخ وراغسل ع طول و ماعندي شغالة و بيتي طابقين تنصحوني فيها و لا لا

kann
ضيف

طبعا ننصحك فيها حبيبتي .. حتريحك كتتير

انسام ربيعيه
ضيف

الله يعافيك أروى
وجعل ماتكتبين في موازيين حسانتك يوم القيامه 😘
انا عندي غسالة اريستون المشكلة اول ماركبوها تشتغل بعدها ماتقعد دقيقتين الا المويه تطلع من الغساله بدون ماتدخل على المواعين اللي داخل الغساله 😭
وجبنا كم واحد ولا عرفوا السبب 😓

sharifah
ضيف

اهلين ..
قد صارت لي نفس سالفة غسالتك و قد صارت لاحد اقاربي انا كانت المشكلة من خرطوم التصريف لازم يكون ارتفاعه اكثر من 40الى 80 سم لما رفعته زانت الحمدلله ؛ و احد اقاربي كان سبب ان النظام عندها تعطل ف شوفي المحل الي شريتي منه الغسالة لان عنده فني متخصص في الغسالة يزينها لك و تصلح 👌 ؛

أسماء
ضيف

انا نفس مشكلتك يا انسام
انا اخذتها مستخدمه واول يوم ما اشتغلت بعدين اشتغلت وصارت تدخل مويه خمس دقايق وتطلعها بدون ماتغسل وانوارها تأشر مدري وين المشكله😰
اذا عرفتي الحل قولي لي 🌹

ام ديم
ضيف

لازززززم ترفعين خرطوم الماء . حاولي انك تربطينه ع الصنبور نفسه ,, ان شاءالله تضبط

عبير
ضيف

حقتي ويرلبول تهبل ❤️❤️❤️❤️ ومرات اجمع بها المواعين يومين او ثلاثه واشغلها مره وحده ، وشريت قبلها جهاز التعقيم لافنت للرضاعات واغراض البيبي وتحسف يوم شريت الغساله لان فيها خيار تعقيم ،، واذا سافرت برا اشتري مكعبات فنش لانها دايم ارخص بربع السعر الموجود عندنا خاصه بتركيا

ندى الورد
ضيف

فكرة جبارة يبغالي احط في بالي الموضوع دا 😂😂 لمن اسافر

ام رنووودي
ضيف

يعطيك العافيه اروى عندي نفس غسالتك (ويرلبول) وتمام التمام استخدمت مسحوق ومكعبات فانِش المكعبات افضل بكثيييير لكن صار عندي بالفتره الاخيره مشكلة ماتستهلك الصابون احياناً كثيره
رغم ان كل شي يطلع نظيييف وصار نادراً ماتخلص المكعب في الدوره الواحده (وللمعلومه عمر الغساله عندي سنتين ونصف )
ياليت اذا عندك خلفيه عن المشكله تفيدني ولك جزيييل الشكر 🌹

ندى الورد
ضيف

مويتك صارت افضل من الاول عشان كدا تكتفي بكمية صابون اقل .. اول مويتك كانت فيها ملوحة زايدة فالصابون يستهلك عشان يرغي .. ان شاء الله لاتقلقي مافيها الا العافية

Asho
ضيف

عندي نفس حقتك اروى بس تعقدني احس لازم انظف الصحون تماما من الاكل لو دخلت صحن فيه نتفه اكل تنثره على كل الصحون الباقي والمشكله الثانيه ان الصابون احطه بالمكان المخصص ولايذوب وتخلص الغسله وهو ف مكانه !
ويعطيك الف عافيه افدتينا كثير ❤️

Norah
ضيف

اذا الصابون مكعب حطيه على الباب ارميه كذا بدون لاتدخلينه في مكانه المخصص وبيضبط معك ان شاء الله

wrda
ضيف

يعطيك العافيه موضوع جدا قّيم وكثير يجهلون اهميتها كنت دائما اسمع كلام سلبي عنها، الين ماضاقت فيني من هالمواعين وقلت لازم اجيبها والحمدلله جدا مريحتني استخدم غساله بيكو ٥ انظمه عمليه وسهله 💗

جوجو
ضيف

كيف استخدامها لان عندي نفس شركها وماعرفلها

منال
ضيف

نفس غسالتي جدا جميله
و فعلا كثير م حمسوني اشتريها بس الحمدالله اشتريتها و م ندممممت ممممرا مريحه وتوفر وقت و جهد و صرت انصح كل الناس تشتريها

الله يديك العافيه اروى تدوينات و لااروع

خلود اللهيبي
ضيف

ياعمري يا أروى والله كل شي تقوليه ما اجادلك فيه .. ماشاء الله
احسك ملمه بكل النواحي … الله يزيدك من فضله
الموضوع جججججاء بوقته..

عزيزتي اروئ اتمنى لك حيااااه ملونه 😄😍

وجدان
ضيف

اروى بسألك هل عادي ادخل فيها الصحون المزخرفة مثل اطقم السفرة الثمينة؟؟
طبعا غسالتيً فيها خيار الاشعة الفوق بنفسجية للتنظيف العميق ماادري خايفة ما يناسب اطقم السفررة ؟؟
الله يسعدك ساعديني لو بمعلومة

الجوهرة العفالق
ضيف
شكرًا على الموضوع الجميل. المعلومات اللي كتبتيها مفيدة لكن لأَنِّي عارفتها دخلت عشان أعلق لأن عندي خبرة لابأس بها عن غسالات الصحون وأنا من المؤيدين لها بشدة. أصلا مدري كيف الناس عايشة بدونها! جربت ٣ غسالات مواعين بأمريكا في كل شقة نروح لها وكانوا ممتازين. نظافة وراحة صراحة. لكن بالسعودية لما جيت أخذت الغسالة الصغيرة بشقتي ماركة Magic والمكينة حقتها من LG ب ٢٤٠٠ ريال (نفس قيمة الغسالة الكبيرة لكن لأن مافي مكان بمطبخ الشقة) لكن لايقارن الأداء مع غسالات أمريكا. أحيانا تبقى بقع الدهن و البيض بالصحن ماتروح. فقرت إني أنقع الصحون بعد الاستخدام مباشرة عشان البقع الصعبة قبل… قراءة المزيد ..
Aioosh
ضيف

بما ان عندك خبره ياليت لو تكونين عارفه مشكله غسالتي اول ماشغلها يطلع صوت تك تك تك كنه شي يشتغل فيها ويروح الصوت وبعدين يرجع بنص الغسيل جاء بعد ماتركتها شهر كنت مسافره ولا ادري وش قصتها الحين 💔💔💔💔

نور
ضيف

انا عندي الغساله لاكن ماتجفف دائما يمكن بس مرتين مادري ايش فيها مع انها دائما نظيفه وأيضا الملح والملمع والصابون موجود 😔

روابي
ضيف

الله يعطيك العافية أروى…تقرير ممتاز جداً🎀

mayaablog
ضيف

كنت افكر بالغساله من اول ماتزوجت وقررت اجيبها بس اللي صار ان بنقل بعد كم شهر وصراحه خفت تنكسر مع النقل خصوصا من مدينه لمدينه ..
جد استفدت من الموضوع يعطيك العافيه ❤️👌🏻

وجدان
ضيف

الله يسعدك توني شريتها موضوعك جاء بالوقت المناسب ، لكن ما ادري وين احط الملح والصابون لو تشرحين لنا بالسناب نكون لك شاكرين ❤️❤️
الله يجزاك الجنة يا اروى

Rueim 🌙
ضيف

اكتبي بقوقل اسم غسالتك وكيف استخدمها ، اذا ال جي تلقين جوا فيه ورقه بوسط الغساله تعلمك كيف 💗💗

Amal
ضيف

مساء الخير اروى
فعلا الغسالة روعة من تجربتي من ثلاث سنوات مريحة جدا وانا من النوع الا عندي سوسة نظافة لكن مع الغساله ارتحت نفسيا الصحون والكاسات معقمة ونظيفة ومطبخي ماشاء الله دائما نظيف بالرغم احنا شخصين في البيت لكن مريحة نفسيا واقدر استغل باقي الوقت في اشياء مفيدة
فالاجهزة الكهربائية نعمة اغسالة الملابس المجفف وغسالة الصحون واي جهاز كهربائي مريح اشتريها من غير تردد .
شكرا لك أروى اتمنى لك يوما جميلا كجمال روحك 🌹

عضو
أفضل اختراع بالنسبة لي هو اختراع غسالة المواعين. أنا صراحة حتى ملاعق البلاستيك القوية أوقات أكون مزنوقه فاضطر أغسلها وأستخدمها مره ثانيه كاستخدام خفيف مثل فقط تحريك أو غرف, بس أخذ نوع الملاعق اللي تتغسل مرة وحدة مو الملاعق العادية الخفيفة. مرة استغرب من الناس اللي تذمها, لأنها جداً اختراع مفيد. جربت أنا ماركتين من الغسالات, النوع الأول كان جداً سيء وهي ماركه مو مشهورة فما أتذكرها صراحة, كانت تأذيني من ناحية الصابون يطلع برا الغساله وما تنظف مهما سويت, وبلغت السكن بالمشكلة وللاسف ماحلوها. والحمدلله جاني نقل, ونقلت لمدينه ثانيه حبيت الماركة حقت الغساله تنظف من قلب, ومافيها مشاكل.… قراءة المزيد ..
ebtisam
ضيف

انا غسالتي BOSCH … حجمها كبير، نفس الي عندج وممتاااازة!!! مستحيل اتخيل اعيش بدونها الصراحة! تتازم حالتي النفسية لما اروح بيت اهلي وماعندهم الدش واشر!!! ^ـ^”
احنا شخصين وطفل فلبيت والغسالة الكبيرة وايد تنفع، حتى احط الجدور مع نفس الدفعة

Maimonh
ضيف

أنا عندي غسالة اريستون ماشاء الله كبيرة وتاخذ كل شي بس ما قد جربت احط فيها اواني ستيل او استناليس ستيل حتى القدور اللي معدن (قدر ابو عراوي لى قولة اهلي ) ..؟
فحبيت أسأل ينفع احط هاذي الأشياء بالغسالة؟
^
^
احس اللي يقرا يقول وش تحطين اجل ..

امل
ضيف

موضوع رائع، كنت بحاجه لهذا الموضوع من شخص اثق فيه تماما، شككرر من القلب اروى ♥

عضو

يعطيك العافية جميلتي أروى .. شكرا

Umlara
ضيف

شكرا ارو الجميلة على الافادة

Assar
ضيف

شكرااااا عالموضوع 💕💕💕
صراحة انا كنت اتشاور اجيب غسالة صحون خاصة انه الخادمة يوم تنظف ما احس اني اكون راضية و اتم أوسوس الاسفنجة نظيفة ولا لا .. وممكن تروح عنها بعض الاماكن وما تغسلها و يتم دهن شوي او وصخ
بس كنت دايما اقول ما عندي مساحة .. بس اول مرة اعرف عن الغسالة الصغيرة 💘
جاري البحث 👌🏼

ريم
ضيف

الموضوع مفيد👍🏻
ورائع.
جزيتي خيراً على بذل المجهود.

Snoopy8woody
ضيف

انا من اشد المعجبين بغساله المواعين..لسى ماعندي لين اسكن البيت الجديد بس اقول الغساله تدخل قبلي ..وامشي وانصح العرايس واللي اعرفهم يشترونها ..ايدي اليمين في المطبخ بتكون 😍شكرا وضحتي لي ايش اللي اقدر اغسله وايش لا..قريت عنها كل شي الا هالنقطه غفلت عنها…شكرا اميرتي❤

وجدان
ضيف

تدوينة رائعة قاعدة افكر بمطبخي الجديد وما فكرت بغسالة صحون
بس دحين بالفعل ان شاء الله رح تكون من الالويات شكرا لك اروع على الشرح الواضح مرة شكرا

ربى
ضيف

كنت قبل أقول ماأحتاجها ماعندي احتياج كثير.. لكن بعد ماصار عندي طفلة وطفل أفكر جديا بشراءها. ..يعطيك العافية على الطرح الجميل..

Zahra
ضيف

شكراً
الموضوع جا بوقته لي سبوع اقراء عن الدشوشر واقارن بالمواقع

الله يقويك

Zahra
ضيف

حسب مقارنتي للدشوشر
ماركه بوش ممتازه وعليها تقايم عاليه وفيها خاصيه تقليل الطاقه المستهلكه وفيها عادة تكرير للماء (A+++)
والافضل اختيار الصناعه الالمانيه مو التركيه لان لها عيوب التركيه
( متوفره في محلات عبداللطيف جميل وهوه الوكيل- اكسترا )

وماركه ميلي
بنفس مواصفات البوش وقد تتغلب على البوش
صناعه المانيه

غسالة
ضيف

شكرًا لك زهره
ابحث في نفس المجال ولاحظت نفس الامر فارق السعر بين الماركتين وباقي الماركات ملحوظ

Rueim 🌙
ضيف

والله اول يوم رمضان داخله مدونتتك ادور موضوع عن الغساله لان عندي وماقد استخدمتهاا
بس بديت استخدمها يالله فررررق 😩❤️
احسها احسن من تنظيفي على اني دقيييقه بالتنظيف بس هي تخليهم كانهم جدد 💙

ام تومي
ضيف

اروى انا سكنت بيت جديد وكنت مخططه ع الغساله .. بس بعدين لخبطوني المحلات .. لاني كنت ابي غساله بلت ان ( اللي تكون داخل الدرج ) وكنت ابيها من ولربول او اريستون وقالو لي م تجججي ☹ .. والحين انا محتاره واصلا من فصلت الدرج حطيت لها مكان وللحين فاضي ☹ ف وش تنصحيني ؟

Njood
ضيف

فيه محل في طريق الملك عبدالله يسويها لك بلت ان اسمه اكسايت المحل كويتي

آم تكي🍃
ضيف

أروى انتي الانسانه الوحيده الي تجزئلي الموضوع وتشرحه لي من الي زي مايقولون 💕💕غسالة المواعين كنت ماافكر فيها ابدا ومازلت متردده بسبب اني ساكنه برياض والمويا تجيب الهم ترسبات ملحيه مقرفه واستخسر اشتري غاسلة للملابس او للمواعين بسبب الترسبات
لكن اليوم بدات اقتنع 😃بس سوالي فين احصل الغساله الصغيره لان حسيت تناسبني لانا شخصين وطفل صغير واعجبتني فكرتها وعندي مساحه لها😅 مسرع ماخططت وين احطها ههههه وهل لو اطلبها من امازون بتتاثر من الشحن والا موجوده برياض اروح اشتريها ؟؟؟ وشكرا شكرا شكرا على مدونتك الرائعه 🌹🌹 دمتي بخير وبركة 🌹💕

شفاء
ضيف

اروى احنا فالبيت امي تشتري منتج من فانش يجي فيه سائل اللي لتنظيف الغسالة تفتحينه وتحطينه فيها وهو موجه للاستفل وتشغلين الجلاية
وبس تصير نظيفة كنك شاريتيها من يومين

شفاء
ضيف

اقصد فينيش 😂😂😂😂😂😂😂😂😂😂

Meem
ضيف

ممكن طريقته بالضبط لاني شاريته و احسبه هو نفسه الملمع 😢

Sora
ضيف

يعطيك العاافيه أروى الجميله 💙
و الله إني مقتنعه فيها و احتاجها في الحياه .. بس انتظر زوجي يقتنع 😂

شهد القرشي
ضيف

انا من الناس اللي تحب تسوي كلشي بنفسها > يعنني بطله 🙃
وتمر اوقات مالي حيل اغسل المواعين واتركها وتمر ايام اندب اللحظه اللي فكرت اتركها فيها وطوال هالمده المواعين بالمغسله 😓

صح ما يروح وقت كثير بحياتي اليوميه بس وقت يكون عندي ضيوف ولا بسوي طبخ وباخذه معاي يستهلك جهد، والحين ع وشك ولاده واتوقع ان بعدين ما بيصير في وقت زي قبل لذلك قررت اشتريها بعد ما ارجع 😼💪🏼

>> حيزدهر سوق الغسالات بالسعوديه بسببك 😅 🌚
جزاك الله خير،

منال الجابر 💓
ضيف

وصح بالنسبة للترامس
أصلاً هي أمرها سهل ماتتعب بالتنظيف لكن لو حبيت تدخلينها بالغسالة فكيها ، يعني فكي الغلاف البلاستيكي والربل اللي فوق والقاعدة البلاستيكية الدائرية ويطلع لك جوا الترمس الستيل ، هو اللي تدخلينه الغسالة وتشيل لك الريحة والتصبغات 👏🏻 حتى تقدرين تستعملين ترمس الشاي للقهوة والعكس لأن الريحة راحت ، لكن لو كانت تجربتك الأولى لوضع الترامس بالغسالة يمكن تحتاجين كم مرة غسيل عشان يتنظف زين عقب مرات ومرات من تنقع المشروبات فيه وبس 💕

افراح
ضيف

الله جميله الفكره بسويه🕊👋🏻👋🏻💓😭

فاتن
ضيف

مستحييييييييييييييييييييييييييييييل !!

الموضوع من جد جاء بوقته T^T
يعطيك ربي العافية

لي عودة D=

لميس
ضيف

انا عندي وحده من ARISTON كلامك صحيح توفر وقت ومجهود ومره وقفت علي وانقلب المطبخ فوق تحت 😢😂 بس الصابون انا استخدم فانش المكعبات الي زي القوالب وأحياناً سائل فانش بس المكعبات اشوفه أفضل للصحون بس يبقي اثر في الكاسات والسائل يبقي في الصحىون عجزت يعني ما تكون جافه لما أمسكها يبقى فيها والله وكيلك صرتي اغسلهم بيدي ففكرت مره أعيد عليها ٨ دقايق مويه والحمد لله شكراً كثييييير يالطيفه بسيييطه وأحب بساطتك هاذي مرررره 💗💗💗💕

SARA
ضيف

غسالتي ارستون ، جاا فتره صارت ماتجفف وطلع في مشكله بالتسليك وتصريف الماء ، استدعي سباك خبير بالموضوع ولو من الصيانه افضل لان السباك من الخارج هو الي ماسلكها صح وتصير تجفف تماما👍

ارروى
ضيف

نفس مشكلتي مع غسالتي سامسونج..كدا اعملها شطف اضافي بعد ماتخلص..بس قلت حاجرب صابون اريال الاخضر. جربتيه?

فاتن
ضيف
يعطيك ربي العافية من جد كان الموضوع شاغل بالي طول شهرين ! لاني كنت احاول اقنع امي اننا نشتريها بس كان لازم تكون عندي فكرة عنها اخذت فكره بسيطة جداً عنها والحمد لله امي اقتنعت xD إلي كنا شايلين همه وين نحطها وتمديد الموية ووين نصرفها الغسالة الي تنحط على الرف جداً حلوه اول مره ادري عنها بس احنا عائلة ما تكفي o_o ! نرجع للغسالة العادية أجل xD قريت بعد انها تغسل وتعقم ادوات المكياج مثل الفرش والعاب الاطفال . . قد جربتي تحطين شيء غير المواعين ؟ بعض الصحون البلاستيك لها انواع يعني القوي والي عادي . .… قراءة المزيد ..
المها
ضيف

ايه فيه علامة زي المربع جواته صحون
زي شكل الغسالة هو
أو مكتوب dishwashable

و البلاستيك اذا فيها مثلث و جواته رقم 5
هو اللي يتحمل الحرارة

فاتن
ضيف

شكراً
يعطيك ربي العافية 3>

Sano
ضيف

فكرة حلوة
للمقبلات ع الزواج😥

ساره
ضيف

يعطيك العافيه اروى جداً استفدت انا عندي غساله صحون الكبيره لكنها عطلانه ولاني مستاجره البيت فمابفكر اجددها على حسابي ، من خلال تدوينتك قررت اني اشتري الغساله الصغيره ماكنت اعرف ان في هذا الخيار✨

Boshra
ضيف

نفس تفكيري بس المشكله ماادري من وين اشتريها اذا عندك فكره علميني الله يسعدك

غاليه
ضيف

ماشاء الله عليك رائع بالطرح مواضيييع رائع جدا ..وانا من المؤيددين للغساله ومااستغني عنها ابد لو تخرب يوم نفسيتي تصير تعبانه مشكككوره على الموضوع الجميل اللي استفددت منه الكثير

إبتسـام
ضيف

تسلمين اروى عن جد انا احس احتاجها بس الناس ما تمدحها و ماكنت مقتنعه بكلامهم و الحين تاكدت انها ضروريه شكرررررا من القلب 💕💕💕

هناء الوليعي
ضيف

الموضوع جا بوقته توي خلصت تغسيل مواعين وظهري يوجعني 💔 لي يومين اقنع زوجي فيها ومو مقتنع 🙄 يارب يوافق

نوره
ضيف

لازم أرسل موضوعك لأمي عشان تقتنع 😂👌🏻
شكرًا جزيلًا 💕

khawla
ضيف

الله يسعدك أروى الموضوع جاء بوقته تمامًا ❤️
أنا تو اشتريت غسالة واستعجلت بشراء المنظفات حقتها والحين توهقت ب وين وكيف أستخدمهم 🙊
اذا تعرفين أو أي أحد عنده خلفية عن منظف finish بس مكتوب عليه انه جل. ماعرف هل يعتبر زي الصابون أو الزيت الملمع؟
ويعطيك العافية 💕

أسماء
ضيف

ايوه عزيزتي هذا منتج جديد ومثل الفيري لكن لغسالة الصحون فقط (أكيد الشركة سمعت انه فين ناس تحط فيري في الغسالة فانتجته ) (:

اسماء
ضيف

يعطيك العافيه ويجزاك الجنه
معلومات التعقيم زادت رصيد الخبره عندي
تقديمك للمعلومات جميل وبسيط

مريم
ضيف

يعطيك العافيه
انا ماكنت مقتنعه فيها وختى جبتها وﻻ استخدمتها اﻻ الان
غسالتي ماجيك كورية صغييرة
حطيت بدل الملمع سائل التنظيف بريل كيف احل المشكله ومافيها نور يبين اذا الملمع خلص ولا باقي
هذا اللي طفشني

وبالنسبة لسائل التنظيف كيف اوازن الكميه حسب اختيار نوع الغسل

Zekra
ضيف

عزيزتي من وين أخذتيها ماجيك الصغيرة ؟

ابتهال
ضيف

بالنسبه لمكان الغسالة ممكن يجي تحت المجلى ؟ وهل لها تمديدات من اسلاك او مواصير للماء معقدة ؟ انا مطبخي صغير جدا و فيه مكان بعيد عن المجلى لكن مدري هو هو مناسب ام لا لان زوجي يقول لها تمديدات و كذا

نوال
ضيف

فكي دولاب جنب المجلى و ركبي فيه

Layla
ضيف

السلام عليكم بحثت عن غسالة لمى و سعرها مناسب جدا لكن ماادري عن تكلفة الشحن على كل كيلو او كيف ياليت لو عند خبر تفيديني

Maimonh
ضيف

على حسب شركة الشحن..
تقريبا ارخص شركة هي ارامكس واسعار شحن طرد من امريكا للسعودية:
100 ريال لأول نص كيلو بعد كذا تدفعين 35 ريال لكل نصف كيلو زيادة..
^
^
^
هذا اسمه الوزن الفعلي..
(الطول بالسم * العرض بالسم * الارتفاع بالسم) مقسوما على ٥٠٠٠

الناتج من هاذي العملية يسمى الوزن الحجمي
وبالغالب تاخذ الشركة السعر الاكبر

والأفضل لك اذا كنتي تقدرين انك تاخذين الغسالة من محل بمدينتك..
أكثر أمان من ناحية انهم راح يعطوك ضمان ويركبونها لك وينقلونها ..
ويمكن ما تعجيك او مايناسبك حجمها فتضطرين ترجعينها ..

أتمنى أكون أفدتك..

ديمه
ضيف

ماشاء الله الله يسعدك على هذي التدوينه 🌸

المها
ضيف

أستخدم سامسونق
صراحة بططططططلة 💪🏼💪🏼

ودي إذا تزوجت آخذه لبيتي 😭😭😭💞💞💞

عضو

موضوع متكامل

وفاء
ضيف

الله يعطيك العافية ياروي مدونتك جت بوقتها توني مشتريه غسالة وتعبت ودخلت المستشفى وانا ما استخدمتها وبنتي ما تعرف لها ارسلتها موضوعك على الواتس عشان تتعرف عليها
الله يجزاك خير 💞

هجير الشمس
ضيف

السلام عليكم ورحمة الله وبركاته
موضوع رائع جداً جزاك الله خيراًياقمر ربى يسعدك
فعلاً سمعنا كثير اشاعات عنها لكن الحمدلله وضحتى
الموضوع وبإذن الله راح افكر اشتريها

‫wpDiscuz

أضف تعليق عبر الفيسبوك:





حمل