تجربتي مع جهاز الليزر المنزلي Philips Lumea

بسم الله الرحمن الرحيم

تجربتي مع جهاز الليزر المنزلي Philips Lumea

وأخيرا أقدم لكم تجربتي مع جهاز الليزر المنزلي philips lumea

أدري طولت عليكم، من زمان وأنا مخططه أكتب عنه ..

لكن هذا النوع من التدوينات يحتاج لوقت من التجربة حتى أقدر أنقل الصورة بشكل كامل ومن جميع النواحي لذلك ماحبيت أستعجل..

اقتنيت جهاز الليزر المنزلي من سنه ونصف تقريباً وكنت محتارة بين فيليبس وبين تريا..

قرأت عنهم كثير

أعجبني في فيليبس أكثر أن عدسته حجمها أكبر بينما تريا تبدو عدسته جدا صغيرة ، وبالنسبة لي ، كل ما كان أسرع كان أفضل ..

فكثير رشحوا تريا للمناطق الصغيرة وفيليبس للمناطق الكبيرة..

وحمسني أكثر الكلام الإيجابي عن الجهاز وأنه ماخذ جوائز ومثبت جدارته في المجال وأنه من أفضل الأجهزة الموجودة ..

لكن ما أستطيع اني أطرح لكم المقارنة بينه وبين تريا بشكل منصف وعادل مهما قرأت عن الجهازين لأني ماجربت إلا جهاز واحد منهم وهو فيليبس .. ولو ماكان ناجح معي كنت بأجرب الجهاز الثاني ، لكنه يفي بالغرض وبالضبط وفر لي الخدمة المطلوبه واللي توقعتها منه ..

أولا أتمنى تضعون في بالكم عند قراءة أي موضوع يخص العناية بالشعر والبشرة أن النتائج قد تتراوح بشكل كبير بحسب طبيعة نوع الشعر والجسم ،

فقد يعطيني منتج نتيجة خرافية بينما لا يفي بالغرض عند شخص آخر بسبب الاختلافات بين الناس ، ولذلك تشوفون ناس يدعمون منتج وناس يدعمون الآخر كلٌ حسب ما ناسبه هو وحسب تجربته الشخصية ..

وأيضا تتراوح قوة النتيجة ومدتها تبعا لهذي الاختلافات ..

ما ودي أطيل عليكم لكن هذا الشي مهم جدا تعرفونه حتى تكونون واقعيين في توقعاتكم عن أي منتج تسمعون تجارب ناجحه عنه ..

🌿🌷

قصتي مع إزالة الشعر

أولا أعطيكم نبذة تاريخية بسيطة حتى تكون الصورة واضحة ودقيقة..

أنا من الناس اللي من بديت بإزالة الشعر كنت استخدم الشمع (الحلاوة) وما عمري شلت بالموس أبدا إلى أن حجزت موعد ليزر وخبروني انه لازم اجلس فتره اشيل بالموس قبل الليزر لأفضل نتيجة ، فبديت أستخدم الموس ..

بأوصف لكم نوعية شعري لأن غالبا اللي نفس المواصفات أقرب أنهم يطلعون بنفس النتيجة،

شعرتي متوسطة لا خفيفة ولا ثقيلة ، اللون بني غامق ماعدا يدي بني فاتح بسبب ان شعر اليد رقيق أكثر من باقي مناطق الجسم ، والكثافة متوسطة ، ما كان يعتبر شعر قليل لكن ماكان غابه .. بشرتي تعتبر فاتحه لكن تشوفون يدي في الصور مو بيضا مره ولا أعتبر سمراء ، كل شي متوسط تقريبا..

الليزر المنزلي أو ليزر العيادة ؟

سؤال يطرح دائماً إذا تكلمت عن الليزر المنزلي ..

جربت ليزر العيادات مرتين فقط ، لكنها كانت كافية اني آخذ تصور واضح عنه ..

سويت الليزر في مستشفى دله ، كانت تجربة جدا ناجحة ، من المرة الأولى اختفى تقريبا نصف الشعر الحمدلله ،

المرة الثانية جربته في عيادة أخرى نسيت والله وش اسمها ووين كانت (جزء مفقود من الذاكرة)

غيرت عن مستشفى دلة لأنهم مايتركونك تستخدمين الجهاز بنفسك لأنك غير متخصصه ويخافون تحرقين نفسك، ومعهم حق ،لكن العيادة الثانية تركوني استخدم الجهاز بنفسي احتراماً للخصوصية،

ونجحت التجربة أيضا تقريبا نصف الشعر زال تماما ..

بعدها انشغلت وماكملت مع المواعيد ورجعت اشيل بالشمع أحيانا وبالموس في أحيان أخرى حسب المزاج ..

جلست بعد الليزر سنتين تقريبا ، خفت نتيجه الليزر مع الوقت لكن ما رجع الشعر مثل ماكان قبل الليزر ..

الليزر المنزلي فيلبس

تجربتي مع جهاز الليزر المنزلي Philips Lumea

بعدها قرأت عن أجهزة الليزر المنزلية وبدون تردد قررت أشتري جهاز لأني بصراحة ما أحب العيادات ، و الشيء الأهم انه غير مريح لبعض المناطق البحث عن عيادات تقبل خصوصيتك وانك تحبين تستخدمين جهازهم بنفسك .. فالجهاز المنزلي كان الحل ..

كنت حاطة في بالي أنه لن يكون بكفاءة أجهزة العيادات مثل ما قرأت عنه من حيث أنه يحتاج جلسات أكثر من العيادة،

لكن ما كانت مشكلة بالنسبه لي لو مثلا النتيجة اللي بأطلع بها من جلسه وحده في العيادة ما راح أحصل عليها إلا بعد أكثر من جلسة من الجهاز المنزلي ، ماكانت تشكل لي أي مشكلة لأن الجهاز ببيتي وعندي بأي وقت ما يهم عدد الجلسات طالما بأحصل على النتيجة في النهاية ..

لكن هذا رأيي الشخصي طبعاً ..

ملاحظة : الجهاز خاص بإزالة الشعر الحقيقي مثل اللي في اليد والساق وغيرها من مناطق الشعر، وليس الشعر الوبري الخفيف.

كم نحتاج من جلسة حتى يختفي الشعر؟

في تعليمات الجهاز كاتبين أن الجهاز سيخفي الشعر تماما بعد ٤ إلى ٥ جلسات وكاتبين انه قد تتراوح المده حسب الشخص لكن هذا الأغلب انه بعد ٤ جلسات بيكون فيه فرق هائل في كمية الشعر إذا ما اختفى تماما،

هذا الكلام إذا كنت منتظمه بالجدول كل أسبوعين جلسه .. وهذا ما أقدر أأكده لأني ما انتظمت بدقه ..

مرات أتأخر عن اسبوعين فما أقدر أقول انه صحيح كلامهم أو غير صحيح ..

لكن اللي أقدر أقوله انه بعد خمس جلسات غير منتظمه اختفى أغلب الشعر في كل جسمي ، وفي بعض المناطق اختفى تماما ..

آلية العمل :

يجي مع الجهاز تعليمات وافيه بالصور طبعا، لكن بأكتبها لكم من باب تغطية الموضوع بشكل كامل ..

ننظف المنطقة اللي نحتاج إزالة الشعر فيها ونحلق بالموس بشكل طبيعي

ثم نجفف المنطقة من الماء بدون ما نحط أي كريمات أو مستحضرات ،

نشغل الجهاز ونختار أحد المستويات من ١ إلى ٥ .. أقوى شي ٥ وأضعف شي ١

تجربتي مع جهاز الليزر المنزلي Philips Lumea

هذا جدول يبين لك أي مستوى تختارين حسب لون شعرك ولون البشرة..

بعض ألوان البشرة الغامقة وألوان الشعر الفاتحة حاطين عليها علامة X يعني الليزر المنزلي مايصلح لها ..

تجربتي مع جهاز الليزر المنزلي Philips Lumea

بعدين نحط عدسة الجهاز على المنطقة ونضغط ..

الضغطه ماراح تطلع الليزر إلا في حالة ان الجهاز متوازي مع الجسم، فأول مانحطه على الجلد اذا كان متوازي بشكل سليم راح تنور اللمبه اللي على الجهاز ..

هذي اللمبه إذا ما نورت مانقدر نضغط الزر اللي يطلع يضرب بالليزر على الجلد.. وهذي حركة للأمان حتى ما ينضرب الليزر بالخطأ..

لكن هالميزة جعلت الأماكن المائله وغير المسطحة يصعب ضرب الليزر فيها ..

بعد ما يطلع الليزر نحرك العدسة للمنطقة اللي بعدها لحد مانغطي كافة المناطق اللي نرغبها..

🌿🌷

نتيجة الجلسات :

بعد أول جلسه :

نما الشعر بنفس الكثافة ثم بدأ يتساقط بعضه .. ثم نما من جديد بدون ما ألاحظ أي فرق في الكثافه والشكل ..

الجلسة الثانية :

بديت ألاحظ الشعر بعد ماتساقط رجع أخف من قبل ، لكن بنسبه بسيطه .. أقدر أقول ربع كمية الشعر اختفت، لكن مو شي يلاحظ بشكل كبير ..

الجلسه الثالثة :

الشعر المتبقي اللي ما اختفى نموه صار جدا جدا بطيء ، يعني بعد ما أشيله بالموس يجلس فتره لحد مايطلع ويطول .. وهذا شي جدا جميل ومريح ..

الجلسة الرابعة :

صار عندي بقع صلعة تقريباً وباقي المناطق فيها نمو شعر خفيف وبطيء .. أكثر مناطق تتأثر بشكل كبير وفعلا ألاحظ المنطقة صار فها بقع فاضية ونظيفة هي المناطق اللي الشعرة فيها ثقيلة وعريضة ..

اما المناطق اللي من الأساس شعرتي فيها رقيقة مثل اليد مثلا ما أختفى فيها الشعر تماما بس صار أقل وأبطأ في النمو .. والشعرة نفسها صارت أخف من قبل

بعد الجلسة الخامسة و السادسة :

وصلت مرحلة الشعور بعدم أهمية الشعر ، يعني من كثر ما الشعر خف فقدت الحماس اني أكمل للنهاية ، بالرغم من انه ماراح تماما يعني مثلا في ساقي فيه شعرات أقدر أعدهم ،

لاحظت اني اجلس كم اسبوع ما اشيل شعري لا شمع ولا موس ولا يضايقني ولا انتبه له ، بالرغم من انه موجود لكن ماينشاف الا بالتدقيق

بس مع مرور الشهور واستخدام الموس باستمرار يرجع بالتدريج يكثر ..

يعني أعتقد أفضل شي عشان نحافظ على انه مافيه ولا شعره بشكل دائم ، اننا نستخدم الجهاز حسب جدولهم كل اسبوعين ، وبعد مايختفي الشعر تماما نصير بين فتره وفتره نعيد عليه بالليزر ، مثلا كل شهر او شهرين حسب الحاجة ..

مستوى الألم :

الجهاز له ٥ درجات ، هم كاتبين انه المفروض ما يألم، إذا ألمك يعني الأفضل تخفضين الدرجة ..

فالألم ما أعتبره موجود ( بالنسبة لي) مع العلم أني درجة تحملي لليزر العيادة كان جيد ما كان شي مرره غير محتمل أحسه كان مثل اللسعات .. بينما فيلبس شعور أقل من اللسعه..

وطبعاً يفرق الألم من منطقة لمنطقة في الجسم المناطق اللي بشرتها حساسة تألم أكثر

وأيضاً يختلف من شخص لآخر..

الليزر للوجه :

فيليبس يجي معاه قطعة عدسه صغيرة للوجه وللمناطق الصغيرة والحساسة،

عن نفسي ماحبيت استخدمه على وجهي لأني بأضطر أحلق عشان أسويه ، ومو مقتنعه بحلاقة الوجه ..

بالرغم من اني قرأت كثير ناس عرب وأجانب يقولون عادي وشعر الوجه مايتأثر بالحلاقة وانها كلها خرابيط ،

بس الصراحة تجربتي الشخصية بعد ماجربت احلق مرتين تقول انه الحلاقة تأثر ، على الأقل تأثر فيني أنا وتزيد من خشونة شعر وجهي يعني الشعرة تصير أثقل، ولأني أساسا ماعندي الا شي خفيف ماحسيت يستاهل احوس بوجهي مع الليزر والموس فأحب استخدم طرق ثانيه لوجهي غير الليزر..

بس اذا تغير رأيي وقررت اجرب جلسات للوجه بأقولكم التجربة بإذن الله ..

🌿🌷

المميزات والعيوب

المميزات:

  • راحة في الجدول ومايتطلب مواعيد ومشاوير
  • سعر أرخص بكثير من الجلسات في العيادات
  • خصوصية
  • نتائج جميلة لأغلب المستخدمين وفي فترة قصيرة
  • بدون سلك

العيوب:

  • البطارية ماتطول، تقريبا بعد ما أشحنه فل، بالكااد يمديني أسوي جسمي كامل من  فوق لتحت بشكل مركز ، لو كان ضربات خفيفه يمشي الحال بالراحة ، لكن إذا الضربات متقاربه مثل ما هم كاتبين فيمكن ماتكفي للجسم كامل وأحياناً أنقهر لأنه باقي جزء بسيط وأخلص.. فكنت غالبا اسوي جسمي كامل على جلستين ..  الشحن ما ياخذ وقت ، لكن ما أقدر أستخدمه وهو مشبوك مايشتغل وهو يشحن..

ملاحظة : يوجد جهاز بسلك مايتطلب شحن .. لكن السلك أيضا مشكلته يحدك تجلسين في مكان فيه منفذ كهرب.. فأفضل أنا اللي بدون سلك..

  • أخف أثر من العيادات ويتطلب جلسات أكثر .
  • بسبب حجم العدسة وكون الجهاز مايضرب الليزر الا إذا توازت العدسة مع الجلد ، بعض الاماكن الصغيرة جدا يكون صعب العمل عليها لأنها ماتتوازى بشكل مسطح ، فتحتاج وقت وحثبره لحد ماتتوازى عشان كذا يرشحون تريا للأماكن الصغيرة..أو فيليبس الاصدار التاسع تجي معه قطعة تصلح للمناطق الصغيرة..

السعر :

سعر الجهاز قرابة ال ٥٠٠ دولار (في ebay لكن في موقع فيليبس كاتبين انه ب ٦٠٠ دولار فأكثر)..

الجهاز اللي بسلك سعره قرابة ٣٥٠ دولار (في ebay أما في موقع فيليبس ب ٤٥٠ دولار فأكثر)

هذي الأسعار بدون قيمة الشحن بعض المحلات تشحن مجاناً وبعضهم مقابل قيمة الشحن..

وأيضا يتراوح السعر حسب الإصدار للجهاز ..

معلومة مهمة :

عدد الضربات محدود مو للأبد .. جهاز فيليبس يوفر ٢٥٠ ألف ضربه .. تريا يوفر ٢٠٠ ألف ضربة .. بعد ماتنتهي الضربات تحتاجون تشترون جهاز جديد ..

مساحة العدسة في الجهاز تغطي 8  سم مربع تقريبا – يعني عن عدة طلقات من تريا لأن حجم العدسة في فيليبس أكبر بكثير ..

وين تحصلون الجهاز ؟

موجود في أمازون البريطاني 

تحديث :

راسلتني صاحبة متجر الجسر الالكتروني في السعودية متخصص بتوفير جهاز فيليبس لوميا لإزالة الشعر بالليزر تقنية IPL .. بسعر منافس من وكيل بريطانيا ( مع ضمان سنتين ) وشحن سريع ومجاني لجميع مناطق المملكة –
المتجر مؤسسة تجارية مسجلة بالغرفة التجارية بالرياض .. وبموقع معروف التابع لوزارة التجارة – وبموقع موثوق ..
لديهم خدمة الدفع عند الاستلام لسكان الرياض فقط ..

وهذا رابط المتجر

تجربتي مع جهاز الليزر المنزلي Philips Lumea
https://www.instagram.com/aljiser_laha/

إصدارات الجهاز :

أحياناً بتلاحظون فروق في السعر مع ان الشكل نفسه

خلوكم منتبهين لرقم إصدار الجهاز ، يكون مكتوب عنده مثلا SC2009 أو SC2007 وهكذا .. الفرق هو قطعة ثالثة إضافية تجي مع بعض الإصدارات يقولون انها دقيقة وممتازة للمناطق الصغيرة .. بس شخصياً ما أشوف القطعة تستاهل فرق السعر خصوصاً انه ممكن تشترونها لوحدها بسعر رخيص..

وبعض الموديلات تكون بسلك وبعضها بدون سلك ..

طبعاً ما أقدر أقارن بين كل الأنواع أو أشرحهم واحد واحد ، لكن في موقع فيليبس عندهم صفحة تساعدكم على المقارنة بين الأجهزة وأسعارها ومميزاتها..

صفحة المقارنة 

أنا جهازي SC2006 بدون سلك وبدون قطعة ثالثة بس قطعتين عدسة كبيرة وعدسة صغيرة ..

تحصلونه هنا سعره مغري بالمقارنه بهم تقريبا ٤٥٠ دولار

عدد الضربات فيه ١٤٠ ألف فقط .. فالأفضل تاخذون الإصدارات من SC2007 وفوقها تكون جديدة ومطورينها وزايدين عدد الضربات..

مع كل اصدار جديد غالبا يكون فيه مميزات اضافية ، مثلا الاصدار التاسع الجديد له رأس خاصة لمنطقة البكيني، أصغر من الرؤوس الثانية ومناسبه للمناطق الصغيره بحيث يسمح الجهاز بالضرب.

سؤال يتكرر ، إذا انتهت الضربات هل ممكن أشتري ضربات زيادة؟

لا ، إذا انتهت خلاص ترمين الجهاز ،
طبعا مستحيل تخلص مره كثيره حتى لو يستخدم الجهاز اكثر من شخص باذن الله الشعر بيختفي والضربات ما انتهت ..

لكن عموما حتى الاجهزه اللي تسمح انك تشترين قطع غيار اضافيه تزيد من عدد الضربات، غالبا يكون سعرها غالي مقارب لتكلفة جهاز جديد..

الآن جاء دوركم .. اللي جربوا جهاز الليزر المنزلي سواء فيليبس او تريا أو أي نوع أو حتى ليزر العيادات، أكتبوا لنا تجربتكم ونوع الجهاز متأكدة كثير بيستفيدون من الآراء الأخرى..

واللي ما جربوه اطرحوا لي رايكم في الموضوع وأي سؤال أنا في الخدمة دائماً 💖

أتمنى لكم أيام ملونة ، وخالية من الشعيرات 💕😃

...

تواصلوا معي عبر :

انستغرام وتويتر : arwa_alomrani@

يوتيوب : arwa karu

سناب : arwakaru



اترك تعليق

714 تعليق على "تجربتي مع جهاز الليزر المنزلي Philips Lumea"

avatar
فرز بواسطة:   الأحدث | الأقدم | الأكثر تصويتاً
خلود
ضيف

أنا جربت فليبس لوميا الاصدار 2008 ,, الحمدلله كانت تجربتي موفقه فيه،، طلبته من امازون البريطاني كلفني مع الشحن تقريباً 480 يورو،،
كنت استخدمه كل اسبوعين الاربع جلسات الاولى،، والجلسات الباقية ما كنت منتظمة فيها مرة

النتائج:
البكيني والاندر ارم: من سابع جلسة اختفى الشعر تماماً

اليدين والساقين : من ثالث جلسة خف الشعر، ولحد الان مستمرة فيه

الشنب : خفيف الشعر فيه سويت جلسة وحدة وتأخر نموه مررررة 💕

نصيحتي: أنصح فيه كل وحدة اقابلها بطريقي😁،، جهاز جباااار وممتاز وخفيف لطيف،، وخصوصية وامان وسعر معقول كمان،، والنتائج الحمدلله عال العال❤️❤️❤️

اامل
ضيف

بسئلك اختي للبكيني استخدمي اي عدسه الصغيره او الكبيره؟!
انا عندي من سنه ونص والحمدلله النتيجه معي تمام التمام،صح بعض الاماكن ف ساقي باقي شي خفيف بس مااينشال همها😂😂
ام البكيني ما انتظمت ع جلساته😁الا تو من شهرين امكن بس نتيجه مرضيه الحمدلله،
وتسلمي اموله تقرير كامل اسمم الله👌🏽

رفيف
ضيف

البكيني عادي اشيل شعر الشفرين الكبيرين يعني اشيل منطقة العانه بالكامل والدبر

ام رفيف
ضيف

ولو هو سؤال محرج بس منطقة بين الفخذين لونها عندج فاتح لو غامق؟انا شةي غامقة يعني مثل لون شعر الراس الاشقر المتوسط او البني الفاتح واخاف اشتريه ومايفيدني فحبيت اعرف هاي النقطة فقط

سارة
ضيف

بسألك ينفع عدسة الجسم للبكيني أو لا ؟

منار
ضيف

لو سمحتي كم يكلف الشحن ؟؟ من غير سعر الجهاز

خلود
ضيف

تقريباً ١٣٠ ريال ،،

Muna
ضيف

اختي الله يسعدك منطقة الشنب تشيلينها قبل بالموس ولا بالليزر ع طول

خلود
ضيف

طبعاً الشعر بعد فترة طويله تقريباً اربع شهور يبدأ يطلع بس يكون نموه ضعيف ،، ويحتاج جلسة عالسريع ،، ولازم تحطوها في بالكم الجهاز لتأخير نمو الشعر فترة طويلة من الزمن وليس نهائياً

Sara
ضيف

هل يمكن يستخدمه ٣ اشخاص اللي فيه ٢٥٠ الف ضربه تتوقعي يكفي ولا لا او ممكن شخصين بس

دموش
ضيف

اي ممكن هو بكفي شخص واحد لمدة عشر سنوات او شخصين لمدة خمس سنوات

هنا
ضيف

لو سمحتي عندي منطقه البكني اغمق من باقي الجسم تتوقعين يضبط معي والا يكون من درجات الجسم اللي محطوط عليها اكس؟

Khlood.k
ضيف

حبيبتي حاولت اطلبه من امازون البريطاني بس رفض ؟؟
ممكن رابط التاجر اللي طلبتي منه
وباي شركه شحن وصل لك اياه

هدى
ضيف

موجود بسوق دوت كوم

ام ليث
ضيف

من وين حصلتي عليه؟؟ ازا من موقع حطيلي الرابط هون لحتى اقدر افوت منه واطلب …. وشكرا كتير الك

ريـف 🌱
ضيف

جهازك بسلك وإلا بدون .. لأني احترت إيش آخذ 🙈.

فوزيه
ضيف

لو قريتي كامل وركزتي بتلقين الجواب ماشاءالله شرحها وافي

ريــف 🌱
ضيف

ما أقصد أروى بالسؤال لأني قريت كلامها كامل وبتركيز وأعرف عن إيش تكلمت 😘
أنا كنت أسأل “خلود” هل جهازها بسلك وإلا بدون ..
والآن ماعاد أحتاج الإجابة لأني اشتريت لي جهاز الحمدلله 💕

Nedaa
ضيف

منطقة الشنب ماصار بها شيء؟ لاني سمعت تنقلب على لون اخضر عندي الجهاز ومره مترددة 🤦🏽‍♀️

رهف
ضيف

هل جربتيه للوجه يعني شلتي بموس وجربتيه لان خايفه اجرب ع منطقه الوجه واشيل بموس انا شعري بالوجه كثير جداً؟

فوزيه
ضيف

بما اني قريته كامل،ما جربت اروى بالوجه لان شعرها خفيف.

شهد
ضيف
الله يرزقك يا أروى الحبيبة ويسعد قلبك ويوفقك في حياتك ويجعلك في الجنة يارب فعلا انتي انسانة نادرة احترام وادب وذوق واخلاق ونظافة وترتيب وصبر وقوة وتفاؤل ماشاء الله تبارك الله الله لا يضرك ياليت كل البنات مثلك حتى في مواقع التواصل الاجتماعي كل شئ تنزلينه مفيد ومسلي صار لي سنة كاملة من يوم ما عرفتك ويعلم الله انه بعد ما عرفتك تغيرت حياتي كثير وصرت انظر لها بالجانب المشرق واتفاءل دائما وصرت ما أضيع وقتي وأستغله في عمل كل ما يفيد وحتى اصغر التفاصيل صرت أهتم فيها مثل الاهتمام بوجبة الفطور والنظافة والترتيب والطبخ وزراعة النباتات في المنزل الله… قراءة المزيد ..
عضو

تقريبا ف الجلسه الوحده كم ظربة يستهلك ؟؟

سارة
ضيف

انا جربته لي معه سنتين وشيء تقريبًا
رائع جدًا جدًا
امي اختفى شعر ساقها ماشاء الله من ثالث او رابع جلسة تقريبًا لان شعرها خفيف، بعكسي انا لا زال في شعر لكن فرق شاسع بالنسبة لقبل خاصة واني كنت اشيل بموس فكثر شعري وصار قوي لكن الان راضية الحمدلله عالنتيجة ايش كنت وايش صرت مع صياح الحلاوة😂💔
وبعد جربت منطقة البكيني رائعة👌🏼
ويبان الفرق فيها اسرع من اي منطقة ثانية ..
دايم انصح صديقاتي ومعارفي فيه اريح من العيادات.

سحر
ضيف

هل القطعة الخاصة بالجسم تنفع للبكيني؟

لجين
ضيف

لو سمحتى منوين شريتيه

فوزيه
ضيف

حاطه الرابط،

ميرا
ضيف

بسألك فتحت منطقة البكيني عندك ؟!🙈

ام رفيف
ضيف

اختي انا عندي المنطقة الحساسة سمرا يعني مثل لون الكراميل تقريبا او اغمق بشووي ينفع الجهاز او لا اخاف اشتريه ومايتفعني ومبلغه مو قليل اتمنى تردين علي

الطاف
ضيف

اي اصدار جربتي عزيزتي؟

ام جود
ضيف

حابه اسالك يألم في منطقة البكيني ؟

دانية التميمي
ضيف
يعطيكي العافية أروى ❤ عندي تعليق على موضوع الموس و الحلاقة و علاقته بكثافة الشعر … بشرح لك و اتمنى يكون شرحي واضح يقولك لما تحلقين الشعرة من مثلاً ” بشرة اليد ” اللي تسويه إنك تقصين الشعرة الظاهرة على سطح الجلد عكس الحلاوة او الشمع تنتفيها من الجذور .. السبب بإن الشعرة بعد الحلق تبان كثيفة هو إنك قصيتيها فقط ما شلتيها من الجذر نفسه ,, يعني لما يبدأ ينمو من جديد ينمو من مكان ما اتوقف ( من مكان ما انحلق من على سطح البشرة الظاهرة ) لأن طبيعة الشعرة تكون سميكة من الجذر ( البداية ) و… قراءة المزيد ..
امووول
ضيف

حبيبتي دانية انا قريت قبل ان الشعرة لما يقص طرفها باداه حادة او تحرق ترسل اشارات دفاعية للجذور فتمد الشعرة بلون اغمق وسماكة اكثر كنوع من الدفاع …
فبالتالي نشوف بعض اخصائين الشعر يحرص على لستخدام مقص حااد جدا اثناء قص الشعر وبعضهم يحرق طرف الشعرة كنوع من انواع علاج ضعف الشعر وتقصفه …
هذا من ناحية علمية .. قراأتها من دكتور بالبشرة والشعر .. والله اعلم 💕😘

لجين
ضيف

كنت متفقة مع زوجي هدية ولادتي فيليبس لكن لما ولدت كانت حالتنا المادية سيئة يا دوب تكاليف الولادة واكل وشرب لباقي الشهر. اليوم كملت الشهر ونشوف اش يصير :$ … ادري مضحك اني اتفق معاه على هدية بس كثير نفكر انه ماله لازمة يجيب هدية مفاجأة ويمكن ما احتاجها وأتركها مُهمَلة.
أفكر اخذ اول جلسة ليزر في عيادة وبعدها لوميا فيليبس اكمل عليه جلسات منزلية بس ما ادري اذا إمكانياتي رح تسمح لي في الأيام القادمة او لا

ليلى
ضيف

حلو انه يعرف ايش تبين بالضبط، ان شاء الله تتيسرلك

مضاوي
ضيف

جميل والله تتفقون على هديه يازينك الله يوفقك

غادة
ضيف
شكراً اروى على هذي التدوينة المهمة 👍🏻👍🏻 جاءت في وقتها انا اشتريت الجهاز نوع SC2007 و عملت الجلسات كل اسبوعين ، الحلو فيه انه في له تطبيق (App) في الابل ستور ، و هذا التطبيق عمل لي جدول بالايام التي يجب ان اعمل فيها الجلسة ، و عدد المراحل و كذا … الان انا خلصت المرحلة الاولى اللي هي عبارة عن ٤ جلسات ، جلسة كل اسبوعين ، و دخلت المرحلة الثانية و هي جلسة كل ٨ اسابيع .. و فعلاً بدات الاحظ ان الشعر خف بنسبة كبيييييرة 😍 و ان شاء باستمر لغاية ما اكمل المراحل كلها 👍🏻👍🏻👍🏻 استمري… قراءة المزيد ..
حنو
ضيف

ولو سمحتي وش اسم التطبيق

وفاء
ضيف

وش اسم التطبيق ماحصلته

سارة
ضيف

غادة ياحبيبة ممكن رابط او اسم التطبيق ؟
وهل موجود على الجالكسي

Layla
ضيف

اش أسم التطبيع الله يسعدك ؟؟

ٍSameera
ضيف

اسمه Philips Lumea IPL متوفر فقط على الأيفون

رهف
ضيف

طيب جربتيه على وجهك؟هل شلتي بالموس ولا لا لان خايفه اشيل بالموس رغم شعر وجهي كثير

ساره
ضيف

اهلا غاده بحت عن التطبيق ما وجدته ممكن تكتبينه هنا

Raneen
ضيف

السلام عليكم أروى لواستعملت الموس وصار جروح عادي استعمل الجهاز فورا؟

Nada Bker
ضيف

شكرا اروى على التدوينة
سألت كثير عن الليزر المنزلي واحترت مرة في اقتناءه و من خلال بحثي عرفت فرق اضافي بين الجهازين ..
تريا ليزر زي حق العيادات
فيلبس يستعمل تقنية الضوء وهي اقل فعاليه من الليزر بس اكثر امان

للان ما اخذت جهاز ولسا قبل يومين سويت اول جلسه ليزر بحياتي بالعيادة
بشرتي سمرا ( كراميل ) والجهاز اللي اختاروه لي قالوا لي اسمه ساينوشور ياق و ممنوع استخدام الليزر ع المناطق الوبرية والوجه يفضل استعمال اللايت . صراحة ما جازفت بوجهي لاني مو ناقصه ينعدم و ما اقدر احكم للان ع النتيجة في المناطق اللي استعملتها بس يارب تكون مجدية .

NISHIKATA Mai
ضيف

انا اسوي لايت لوجهي لان شعر وجهي تقريبا زي الوبري و مرره يريحني يقعد من شهر ونص الى شهرين مفعولة، اسوية في عيادة سوان

shroug
ضيف

تسوين ميدلايت قصدك صح ؟ طيب الله يسعدك اذا رجع يرجع ناعم وخفيف ولا كيف
شعر وجهي خفيف وناعم بس لونه اسود شوي ومضايقني وخايفة اسوي ليزر واندم
اذا بسوي ليزر بسوي ميدلايت عشان كذ الله يسعدك افيديني

Meera
ضيف

انا صارلي استخدمه من سنتين .. وجاب نتيجه روعه
وقفت استخدامه من ٦ شهور ولا رجع الشعر
تميت اضرب كل اسبوعين لمده ٤ شهور وبعدين مره ف الشهر لمده ٣ شهور
احلى شي في الموضوع الخصوصيه ولا احد يكشف عليه في العيادات ويتفلسف على راسي
جميله الاختراعات الي تسهل حياتنا .. اللهم لك الحمد

نوره
ضيف

إِيش جهازك ؟ فليبس؟

jojo
ضيف

ماشاء الله سنتين عندك و ماخلصت الضربات

أسيل عبدالعزيز
ضيف

الله يسعدك الموضوع جا في وقته من زمان وانا مترددة وماقريت شرح واضح مثل موضوعك .. يعطيك العافية مجهود تشكرين عليه 😘

أم ضحى
ضيف

استخدمته يمكن ٣ جلسات
للوجه( ما استخدمت المرس) في جهاز حلاقه صغير يشبة محدد اللحيه عند الرجال.
و لليدين
والرجلين

ولكن كان عندي خطة حمل و توقفت قبلها بشهر و الحين حامل فما قدرت اكمل

الشعر خف و في بقع صلعاء والنمو بطيئ حتى لما اشيل بالموس ياخذ مده بين ما يطلع ..
بعد الولاده راح اكمل الجلسات

Philips lumia 3 heads 250000 pulse

لانا
ضيف

مرحبا اختي توقفتي قبل الحمل بشهر ل اضرار يسببها الجهاز او اسباب خاصه فيك ، لاني بصراحه استخدم الجهاز حالياً وفيه نيه للحمل اذا اراد الله الفتره القادمه

هديل
ضيف
مرحباً أروى هذا اول تعليق لي في مدونتك الجميله …. دائماً تفيدننا بأشياء تنفعنا باغلب النواحي ؛ كما ان طريقتك في الكتابه سلسه و مفهومه 💚… بالنسبه للتجربه: استخدمت جهاز مليسه. طلبته من استقرام مليسه .. سعره تقريبا 2000SR وزياده … فيه 80 ألف ضربه صح قليله ماتكفي لكامل الجسم لكن فيه ميزه تغير العدسه بعد ماتخلص الضربات بقيمه تقريبا SR700 بسلك وتقدر تشحنينه تجربتي فيه : مررره جميله رغم اني تقريبا نفسك ما انتظم بالجدول … الجلسه الاولى اذكر ماكان واضح مثل الجلسه الثانيه بعد الجلسه الثالثه صار في فراغات وزادت بالجلسه الرابعه في الجلسه الخامسه خف بنيه الشعر… قراءة المزيد ..
afnan
ضيف

من وين تشترين العدسه بعد ماتخلص ؟
و٨٠ الف ضربه تكفي لجسم كامل بجلسه وحده ؟

هديل
ضيف

اما شريتها من حساب بالانستقرام هم نفسهم يوفرون العدسه معد ما تطلبينها . بالنسبه هل يةكفي لكامل الجسم ؟ ماجربت استخدمه لةامل جسمي بس من تجارب البات ايه واتوقع راجع لنوع شعرهم ….

Mono
ضيف

افكر اشتري نفس جهاز اخر اصدار هل تنصحيني بالجهاز

نوف
ضيف

بارك.الله فيك أروى على نشر التجارب المفيدة.
هذا التعليق يخص الصور الموجودة في رأس المدونة، فليس من الوفاء أن أستفيد مما تكتبين ولا أفيدك وأنفعك. أفلا تتبعين ما بعث به رسول الله صلى الله عليه وسلم عليا: “ألا تدع صورة إلا طمستها ولا قبرًا مشرفًا إلا سويته”

نوّر الله أيامك وجملها.

لميا
ضيف

يعطيك العافيه حبيبتي 💕، انا افكر اذا خلصت جلسات الليزر بالعيادة اشتري لي منزلي ان شاءالله ويجذبني جهاز مليسه لكن مابعد قررت: )

فاطمه
ضيف

انا بعد قريت عنه كثير يمدحونه والحلو انه فيه دكتوره تتواصلين معها واتساب وغير كذا اذا خلصت الومضات تقدرين تشرين بس خايفه اغامر 😅
جربي و قولي لي شرايك 😟
Fatmhshmry086@gmail.com

عضو

كيف اتواصل مع الدكتوره؟؟

Fatma
ضيف

ماجربت الليزر المنزلي لكن بعد مقالتج بشتريه اكيد. انا كنت اعاني من مملمس بشرتي لان الشعر كان يطلع مع حبوب واحيانا تحت الجلد والليزر وايد خفف لي من هالمشكله

ريما
ضيف

أهلا وسهلا صديقتي أروى 💕
شكرا عالموضوع الرائع
عندي إضافات بسيطه ، بعض الأنواع من اجهزة الليزر
مايحتاج اذا خلصت ضرباته ترمينه وتشترين ثاني لا
بعض الشركات تشترين الجهاز ويصير معه لمبة ، اذا خلصت
الضربات الموجوده في اللمبة تقدرين تشترين لمبة ثانية فيستمر
معك الجهاز الى ما شاء الله 💓😁.
وشكرا 💛.

انفال
ضيف

طيب جهاز اللي في المقال هذا اقدر اشتري عدد الضربات اذا خلصت ؟؟

ام ريان
ضيف

مرحبا ايش اسم الجهاز اذا خلصت ضرباته اشري ثاني

دودو
ضيف

قلبي انتي ربي يسعدك ، طيب اللي بسلك نفس مميزات اللي بدون !؟ لان جد فرق السعر مره بينهم وانا ما عندي مشكله بالمكان دام نفس مميزات اللي بدون ، وبعد سؤال الجهاز عادي يستخدمونه شخصين !؟

nada
ضيف

شكراً على التقرير
استخدم فيليبس لوميا الأصدار التاسع ليا تقريباً 3 – 4 أشهر شعرتي غامقة وكثيفة في أماكن مثل الاندر رام تقرياً من الجلسة الثالثة ماعاد تطلع إلا كم شعره تنعد والشنب اختفى تماماً
أما باقي الجسم لحد الآن باقي أماكن تطلع بس بشكل أخف من قبل وفي أماكن اختفى الشعر نهائياً

ندى
ضيف

وجهك تشيلينه بموس قبل الليزر؟!

nada
ضيف

وجهي كامل ماجربت عليه الجهاز فقط منطقة الشنب اشيلها بالموس واستخدم عليها الجها

عنود
ضيف

ندى من وين اشتريتي فيلبس ومعه راس خاص للبكيني والشنب؟
وهل يعور البكيني زي عوار العيادة ولا؟

روان
ضيف

شلتي بالموس او شي ؟

مريـم
ضيف

استخدمتي مخدر للاندر ارم او الليزر مباشره؟

عضو

متحمسه اجربه لانه راح يوفر علي جهد وعناء كبير ، لكن امي مخوفتني منه -_-” وانه الامراض كثرت بعد هالاشياء و و ..
ومع تجربتك تحمست اكثر 🙂 ..
يعطيك العافيه اروى

شوشو
ضيف

بنات اعجبني جداً كلامكم عنه انا كنت اشيل بعيادة بس توقفت من سنه وسؤالي هل يسبب الم بذات منطقة بكيني

Jojoo
ضيف

السلام عليكم
موضوع جمييل مره استفدت منو
كان عندي فضول عن ازاله الشعر بالليزر والحمدلله حسيت اني استفدت من موضوعك بس عندي سؤال
الحين اشيل بالموس وبعدها على طول اشيل بالليزر ولا استنى الشعر لما يطول بعد ازالتو بالموس وبعدين اشيل بالليزر وكدا كل مره اكررها
يعني كل مانمى شلتو بالموس وبعدين يطول وليزر
طولت بس ابى افهم دا الشي مزبوط
وشكرا حبيبتي

عيوش
ضيف

تسلمين ي اروى 😘
عندي سؤال فرضا انا حلقت وشلته بالجهاز وبعد كم يوم بدا يطلع الشعر هل اشيله بالموس بدون الجهاز ولا استنى اسبوعين بعدين اشيله

غاده
ضيف

زيك سويت جلستين بعياده وكانت مكلفه وقفت كم شهر وبدات استخدم مثل جهازك .. وانتي تشرحين كيف صار كل جلسه كانك تتكلمين عني نفس الشي اناا خفف مره الحمدلله والشعر قليل وباماكن معينه وم يظهر الا بالتدقيق وصرت اتكاسل اشيله 😝

Jollza
ضيف

تقرير وافي و شامل ابدعتي

مره شكراً أروى على مشاركتنا تجربتك

يبدو الجهاز يستحق التجربه ، لي فتره افكر بشراء جهاز ليزر منزلي ❤️

في حفظ الله

جولزا

سمية.
ضيف

قبل ايام شفته موجود في اكسترا 👌

ضحى
ضيف

ياقلبي الله يعطيكي الف الف عافية انا الى الان استخدم الحلاوة لكن في خططي للمستقبلية استخدام الليزر و حمستيني عالجهاز

ساره
ضيف

انا للان محتاره بين فيلبس و جهاز مليسه كلهم يمدحونهم بس مليسه اذا خلصت ضرباته تشترين عدسه بس مو ترمين الجهاز ونقدر نستخدمه وهو ينشحن وكمان اذا تعطل يجونك لباب البيت عشان الصيانه وكذا ولسه بقرر بعد ما اولد 👼
ومشكووووووووره اروى افدتينا كثير❤💛💜

ع
ضيف

مليسا صييييني أصلا راح يخربزعليك قبل تخلص العدسة صارت معي ومنادمة ،،،اشتري شي ضامنتين وصناعته مو صيني ،

فدوى
ضيف

الله يجزاك خير على التدوينه الوافيه المفيده ❤️👌🏼
حبيت الجهاز لأنه اكثر خصوصية من المراكز..

شكرًا أروى 💐

نونا
ضيف

طيب الي متاخر حملها عادي تستخدمه ولا ممكن يضر لان اصلا عندها مشاكل تاخر الحمل ؟؟

أم نواف
ضيف

حمستيني يا أروى أجربه مع إني ضد فكرته من الأساس أنا أروح لعيادة وصراحة على قولتك مشاوير وهم وغثاء وخساير حدًث ولا حرج..

الله يعطيك العافية موضوع متميز كعادتك

غيداء 👒
ضيف

كثييير ودي اجربه بس اخاف احرق نفسي 😰 لاني ماعرف له !
فكيف انتي بديتي به وهل تدرجتي وخليتي العاملات يساعدونك ويعلمونك او لا ؟
شكررررًا اروى على الموضوع الجميييل 💚💚

Dal
ضيف

شرحك سلس وجميل. الله يعطيك العافية
لكن من تجربتي لجهاز فيلبس وبسبب نقطة لابد من إنه يكون عمودي على الحسم ماقدرت أخلص كل المناطق خاصة المزعجة ووجود الميلان !! ويضيع علي وقت وأنا أحاول اوصل الزاوية المناسبة. النقطة الثانية ماتجي الومضات بسرعة ورا بعض نتيجة لما سبق. المحصلة أشعر بأن فيلبس منتاز اذا أحد بيساعدك ويضرب لك حتى في الأماكن البسيطة مثلا الذقن والشنب!! 💔🔥😩. أتمنى تتمرس يدي وتتسهل المهمة.

Leena
ضيف

الله يعطيك العافيه ويجزاك خير كثير ناس بيفيدهم هالموضوع
بالنسبة لي بتكلم عن الأشياء اللي ما ذكرتيها:
للشعر الوبري مثل شعر الكتف ونصف العضد جربته ومانفع نهائيًا بالعكس زاد الشعر ؛ على العكس من باقي اليد نتيجته جدًا ممتازه الحمدلله.
وبالنسبة للوجه جهازي الإصدار الثامن يجي معاه عدسة خاصة للوجه ؛ جربته مره واحدة فقط للشنب شلت بالموس بعدين الجهاز بالرغم من أن الشعره كانت خفيفه لكن النتيجة كانت فعاله جدًا وما أثر الموس على ثقل الشعره نهائيًا الحمدلله.

وبس هذا اللي عندي وأنتي ماقصرتي كفيتي ووفيتي الله يسعدك.

عذاري
ضيف

يعطيج العافيه كفيتي ووفيتي بس كل جلسه لازم نشيل بالموس ولابس اول جلسه نستخدم الموس وسمعت انه بعد سن الاربعين يسبب سرطان الجلد صج ولالا😞الله يحفظنا ويحفظكم جميعا🌹

نوره
ضيف

انا توني شريت جهاز ليزر بس مابعد بديت فيه حابه اسألك بالنسبه للترطيب متى اقدر ارطب جسمي ونفس الشي بالنسبه للتقشير وخلطات الجسم متى اقدر احطها على جسمي

هجير الشمس
ضيف

وعليكم السلام ورحمة الله وبركاته هلا وغلا اروى
ماشاءالله عليك شرح وافى عن هذا الجهاز
ماقسرتى ربى يسعدك فى الدارين والف شكر يالغلا

غيمة
ضيف

شكرًا اروى على التدوينه الأكثر من رائعه كعادتك،،بغيت اسأل عن الكهرباء او الفولت لما اطلب من البريطاني ،هل يضبط في السعوديه🙈❤️❤️❤️❤️احبك

عضو

بالنسبة للجهاز اشتريته من سنتين تقريبا ..
وحبيته مره ..
وكل ماذكرتيه تماااما نفس تجربتي معه ولله الحمد

اللهم نقطة الشحن .. استغربت مره انه يخلص عليك
انا بالنسبه لي ولله الحمد شحنه ممتااااز ولاعانيت من هالنقطة ..
أستخدمه لثلاث جلسات تقريبا ويكفي،

ربما لأن استخدامي محدود ع الشعر السميك والمتوسط سمكاً .. وتاركه الوبري مثل الوجه والفخذ والكتف =/ ؟
لااا وابشرك .. اخلص شيل بغضون نص ساعه بعد ^^؛؛’
صدقيني ياأنك دقيقه مره بالشيل، او اني أنا أشيل أي كلام ههههههه

عضو

لو سمحتي اختي الله يسعدك انا شريت الجهاز من سوق كوم وانصدمت ان الكتيب حق الشرح كله انجليزي مافيه عربي ابد 😑 انتي كذا ؟؟

رائدة
ضيف

الله يجزاك خير مفيدة جدا التدوينة، ايش الطرق الي جربتيها لوجهك ونفعت معاك؟

❤️..
ضيف

مرحبا أروى 💗..
حالياً استخدم الليزر المنزلي لكن ماركه ثانيه وسويت جلستين فقط *ومب منتظمه* لكن لحد الان النتيجه عاجبتني 👌🏻 ، ظهور الشعر ماقل لكن صار بطيء جداً ، انصح للي عندها عزيمه وخلق وماراح تتعيجز تشتري منزلي اوفر وخصوصيه وبدون زحمة مواعيد 😍.
شكراً لك 💗.

لينا
ضيف

ايش نوعه؟

Bayan
ضيف

شكرا جزيلا أروى 💕 إن شاء الله راح أشتري ليزر منزلي لان أنا شعرتي ثقيلة وسودا وكثير قالوا لي ينفع مره مع هالنوع من الشعر والحلو فيه ما يحتاج مشاوير وخصوصية في الاستخدام حتى لو بطول 👌

xano
ضيف

الالوان الي حاطينها ما تغطي كل الوان البشرة اخاف اغلط بين الدرجة المتاحة والممنوعة الي جنبها .
والمناطق السمرا بالجسم بالنسبة لي اهم من الفاتحة في ازالتها ما ادري شنو الحل معاها؟

توته
ضيف

الله يسعد قلبك على التدوينه … سؤال بعد ماتنتهي الجلسات ويختفي الشعر ، له مده أختفائه أو مدى الحياة

بشاير
ضيف

الله يسعدك على الشرح التفصيلي ❤️
سؤالي :عدد الضربات كم جلسه تقريباً؟ ممكن يكفي سنتين مثلاً؟

لطيفة
ضيف

الله يسعدك ويبارك فيي وقتك وجهدك
شريت الجهاز سؤالي لازم استخدم نظارة او مو لازم اذا كان لازم من وين اشتريها ؟؟؟؟

جنان
ضيف

اروى عندي سؤال سريع.. هل يجي معه نظارات ولا ماله ضرر عالعين؟ خصوصا لو ابي استعمله للشعر اللي بين الحواجب

عضو

سؤال مهم
لكن وين اختنا اروى

noosho
ضيف

شكرا

Bayan
ضيف

شلون تحددي الانتقال بين منطقة ومنطقة؟ يعني مثلا الرجل يمكن تضربي ع نفس المنطقة اكثر من مرة
ولازم باتجاه نمو الشعر او عادي باي اتجاه؟
مشكوورة على مشاركة التجربة .. خلتني اتحمس للجهاز وانا افكر اروح العيادة

Bayan
ضيف

اسفة رديت على تعليق الفتاة .. متمللة انزل للنهاية 😂😂

توته
ضيف

يا عسل جربتي

RAHAF
ضيف

ماجربت شخصيا لكن سمعت من وحده انه الاماكن الداكنه ) تجي اغمق من لون البشره نفسه ) مايصلح لها ليزر منزلي والشعر الوبري بعد مايصلح له ليزر نهائيا والله اعلم

ميم
ضيف

اهلاًاروىً و شكراً على التدوينه
انا اشتريته و بعد ٤ جلسات بالعياده نتائجها جباره استخدمته عشان الخصوصيه
اممممم فادني برجولي و الأندر آرم بس اليدين و الوجه أخف أثراً
أعترف ان هرموناتي متلخبطه و اكيد هي سبب ان النتائج بطيئه
بس مريح و مستمره فيه

dno
ضيف

انا زيك عملت ٤ جلسات بالعيادة ومفكره اشتري جهاز منزلي اللي فادني ف العياده مو بس الشعر خف المسام بعد صغرت وسكرت لانها كانت مزعجتني لاحظتي الشي ذا والا مافيك وهل فادك الجهاز المنزلي نفس فعالية العيادة

Haneen Alhammad
ضيف

استخدمه يفك لي ازمه من مشاوير العيادات واخذته احتياطاً
لاني سويت ٤ جلسات بالعياده والشعر شبه معدوم بس من احس فيه كذا شعره طلعت اسوي لي جلسه ومرتاحه معه الحمدلله 💗💗💗

Am
ضيف

انا خلصت جسمي 7 جلسات بعيادة والحين اعيد عليه بين فتره
وفتره بفيليبس منزلي والحمد لله شي جدا مريح
لكن قريت في التعليقات انه ما يستخدم للأماكن الداكنه؟
وانا استعمله للبكيني من فتره مع العلم اني سويت 4 جلسات
بعيادة وحولت منزلي
كيف يعني اوقفه لذي المنطقه وارجع للعيادة؟ 🙁

Halima
ضيف

يعني لو المنطقه مره داكنه والشعر فيها كثيف واسود، ما راح استفيد من الجهاز ؟

‫wpDiscuz

أضف تعليق عبر الفيسبوك:





حمل