نصائح للطالبات الجامعيات

نصائح للطالبات الجامعيات

السلام عليكم..

اهلا مجددا بتدوينة جديده واللي اتوقع انه بتفيد الطالبات المستجدات اكثر💕.

كنت ادور على تدوينات كذا قبل ما ادخل الجامعه فحبيت افيدكم.

 

اتذكر كنت متحمسه مره للجامعه وما كنت اعرف وش اسوي وش اخذ وش اخلي !

بعلمكم بعض اللي اكتشفت..

اهم الاشياء:

نصائح للطالبات الجامعيات

بعد ما تدخلون:
احجزوا لوكر اما يكون قريب من المكان اللي تطلعون معه او يكون لوكر قريب من كلاساتكم.

نصائح للطالبات الجامعيات

اللوكر هذا وش تسوون فيه؟

فيه ناس يحطون فيه كتبهم اللي ما يستخدمونها الا مره بالاسبوع لكن اشوفهم ينسونها وقت الاختبارات ويتوهقون، ممكن تحطونها لكن حاولوا تتذكرونها.
عن نفسي احط فيها الأشياء اللي احس ممكن انساها مثلا:
1- كرتون مناديل جيب.
2- سناكات بسكوت او حلويات في حال نسيت بوكي بالبيت او ما كان معي صرف او ماكان فيه شيء اطلب منه.
3- اكواب ورق وملاعق وصحون بلاستيك صغيره < يا كثر ما احتجتهم.
4- احط فيه عدة المعامل مثل الكممات والقفازات.
5- اللاب كوت في حال كان عندي معمل.
6- جاكيت “القاعات بالصيف تكون بارده” البس الجاكيت داخل القاعه وارجع احطه باللوكر، ارجعه معي اخر يوم من الأسبوع.
7- لزقات جروح وعدة اسعافات اوليه.
8- ورق A4 ممكن كذا ورقه في حال احتجتم.
9- سلك شاحن.
10- قلم ازرق ورصاص في حال نسيت اقلامي.

ممكن ما تحتاجون هذي الأشياء كلها لكن اكيد بتحتاجون بعضها خصوصا السناك..دائما انسى بوكي واتوهق ولكن افتح اللوكر واخذ من السناكات الموجودة..صح ممكن تحطون ريالات في حال احتجتم “وبتحتاجون”.
نصائح للطالبات الجامعيات

أشياء لا تحطونها باللوكر:
اللابتوبات/الاجهزه.
مبالغ ماليه فوق ٢٠.
أشياء تخافون عليها من الضياع.
لوكري لقيته مكسور وكان داخله ايبادي..الحمد لله ما انسرق شيء ولكن انتبوا اللوكر غير آمن..

نصائح للطالبات الجامعيات

طيب كيف طريقة الجامعه وايش هي الأشياء اللي احتاجها؟

اول شيء احضروا اول الكلاسات قد ما تقدرون لان بيقولون لكم عن الأشياء اللي تسوونها وش يحبون ووش يكرهون.
بتعطيكم الدكتوره او الدكتور او الاستاذه او الأستاذ مجموعه أشياء مهمه
وهنا تحتاجون تدونونها ..
1- الاسم
2- الايميل < مره مهم
3- المكتب
4- الساعات المكتبيه

وممكن تكتبون ايش هي الأشياء اللي تزعجهم والاشياء اللي عادي عندهم..
نصائح للطالبات الجامعيات

الايميل مهم في حال احتجتم تستفسرون عن شيء
المكتب لو ما حضرتم كلاس ممكن تطلبون منهم يوضحون لكم نقطه ما فهمتوها ” لكن ما يشرحون كل شيء”.
الساعات المكتبيه هي الساعات اللي يكونون متواجدين فيها بالمكتب عشانكم..يفضل ما تجون باوقات غيرها..الا لو فيه حاجه .

اسهل لكم ارسموا جدول واكتبوا فيها اسم المادة / اسم الدكتور/ الايميل / المكتب / الساعات
وحطوا كل أسماءهم فيها

نصائح للطالبات الجامعيات

انا كنت مسويتها كذا.


نجي لنقطه ثانيه ، كل ماده لها توزيع درجات مختلف عن الثانيه بالكتاب او بالبلاكبورد بتلقون شرح مفصل للدرجات ..اكتبوها عندكم وركزوا عليها ..
..

كيف طريقة حساب الدرجات بالجامعه؟
سمعتم بشيء اسمه ساعات؟
شيء اسمه ٥؟
وش سالفة ال أ+ وال أ؟

بشرح لكم إياها نقطه نقطه..

اول شيء ما نتعامل مع ١٠٠..
توزيع الدرجات للمادة بالحروف كذا
٩٥فما فوق تصير أ+
يعني لو جبت ٩٥ أكون جايبه أ+ ولو جبت ٩٨ أكون جبت أ+ ولو جبت ١٠٠ أكون جايبه أ+.
الصوره من موقع الجامعه:

نصائح للطالبات الجامعيات

طيب كيف احسب معدلي ؟
كل ماده لها ساعات (تختلف الساعات الفعليه عن الساعات الموزونه)
الساعات الموزونه للماده الأولى x نسبة الماده من ٥ “او نسبه الماده من ١٠٠ مقسومه على ٢٠” + نسبة الماده الثانية x نسبة المادة من ٥ + الثالثه والرابعه وهكذا
الناتج اللي طلع لكم اقسموه على عدد الساعات الكلي (ساعات الماده الأولى+الثانيه وهكذا)
وبكذا يطلع لكم معدل الترم من ٥
فيه تطبيقات تحسب لكم معدلكم، لكن عن نفسي ما جربتهم.

نصائح للطالبات الجامعيات

اهم شيء بالجامعه تنظيم الوقت ..لان تداومون بدري وتطلعون بعد العصر اذا ما كان عالمغرب..
فيه وقت في حال رتبتوا جدول لكم ومافيه لو ضيعتوا اوقاتكم..

نصائح للطالبات الجامعيات

نصائح للطالبات الجامعيات

اهم معلومه ، الويك اند احلى شيء للمذاكره لا تتوقعون انكم بتستمتعون فيه..الوقت الوحيد اللي انتم ما تذاكرون وانتم منهكين..
الكتاب ما يمديكم عليه بيوم واحد نفس الثانوي ، لا .. لازم تذاكرونه عالاقل ب٣ أيام..وتسوون خطه..
وزعوا الأولويات ، الماده هذي ساعاته ٦ والماده هذي ساعاته ١ ، اذا بذاكر ام ٦ بشكل اكثر لان معدلي يعتمد عليه بشكل اكبر..
الأولويات ثم الأولويات..
وزعوا وقتكم للمواد اللي تكون متطلبه لمواد ثانيه او المواد اللي تكون ساعاته اكثر..طبعا ما يعني كذا انكم ما تذاكرون الماده اللي لها ساعه وحده ..خطأ كذا!
ذاكروهم كلهم لكن هذي الماده ذاكروها وقت اكثر من هذيك..
والمشاريع لا تخلونها تتراكم..بتكرهون حياتكم لو اجلتوها..
خلصوا كل شيء بوقته..

صح وشيء مره مهم. لا تغيبون الا لشيء حقيقي.. مالي خلق اداوم..احس ما فيه شيء مهم الخ < هذي اللي بتخليكم تداومون اخر الأيام لحالكم والبقيه يذاكرون..لا تتعودون عالغياب ..
بيحاولون يقنعونكم الطلاب لكن لا تسمعونهم خلوكم أقوياء..
اذا غبتو ٢٥٪؜ من عدد الساعات الكلي بينزل لكم حرمان للماده< حرمان يعني ما تختبرون الفاينل او النهائي=الرسوب بالماده..
وطبعا هذا شيء جدا سيء لكم..
لا تتعودون تغيبون الا شيء حقيقي..

بعض الدكاتره يعتذرون عن المحاضره. لو اعتذروا هنا اكيد لا تداومون..هههههههههه
……

قلت لكم شيء عن البلاك بورد او الlms
هي منصه الكترونيه تكون فيها الجامعات ، تدخلون على جامعتكم وتكتبون رقمكم الجامعي والباسوورد ويعطيكم المواد اللي تنزل لكم مع كل تفاصيل المواد، مرات يكون فيها مناقشات او حتى ترفعون فيها مشاريعكم. مرات تكون فيها اختبارات سابقه او تجريبيه تفيدكم..

وفيه لكم ايميل جامعي ..

الايميل الجامعي مره مهم ولازم تفتحونه بشكل يومي، يعتذرون فيه الدكاتره ويرسلون لكم الأشياء المهمه .. تتواصلون معهم بايميلاتكم الجامعيه ..يرسلون فيه الدورات المتاحه والاستبانات وكل شيء

رقمكم الجامعي ما عرفتم تحفظونه ولا ايميلكم ؟
بعلمكم طريقه سهله..
نصائح للطالبات الجامعيات

 

ايميلكم يكون فيه حزمة اوفيس مجانيه وخصومات لبعض البرامج ف استغلوه ..

وبس، أتمنى تكون سنه جامعيه جميله لكم مثل ما كانت جميله لي، اتمنى تتخصصون باللي تحبون.
ويا رب تكون هالتدوينه افادتكم بشكل او بآخر..واذا اعجبتكم لا تنسون تشاركونها صديقاتكم..

تواصلوا معي هنا:

انستغرامي : hus2013



As an Amazon Associate I earn from qualifying purchases

التعليقات ( 2 ) :

  1. يقول Sari:

    السلام عليكم ورحمة الله وبركاتة
    الاخت العزيزية اروى يعطيكي الف عافية حقيقةً انا اتابعك من قبل ولكن بينما زوجتي تتابعك وفي يوم من الايام نظرت الى حسابك الا فية مشروع تخرج لزوجك شي يتعلق بالهندسة الكهربائية .. اذا من غير امر عليكي وتستطيعي تساعديني انا الان بدرس في كلية الهندسة بتخصص كهرباء والترم هذا اخر ترم ليا وببحث عن مشروع تخرج فا كرما احتاج دعمك وشكرا لكي ،،،

  2. يقول منال:

    ممكن اعرف اسم البرنامج اللي دونتي فيه ملاحظاتك؟

اترك تعليقاً


أضف تعليق عبر الفيسبوك: